【专题讨论】转载香港頭條網陸羽仁, 王雅媛的文章

Mr.Business

原帖由 股友 于 6-10-2008 11:11 AM 发表
看到很乱，速龍华文叫什么？

速龍（屬名：Velocisaurus）意為「快速的蜥蜴」，是種角鼻龍下目恐龍，生存於白堊紀的阿根廷。速龍身長可能約4尺（feet）。目前僅發現後腿骨頭，從後腿與腳掌顯示牠們適合奔跑，因此取名為速龍。奧尼拉斯·諾瓦斯（Fernando Novas）與塞巴斯蒂安·阿派斯特圭（Sebastian Apesteguia）在2003年的研究顯示速龍是惡龍的近親，而惡龍是種奇特的角鼻龍類恐龍。這兩個屬可能形成一個速龍亞科（Velocisaurinae），屬於西北阿根廷龍科。

http://zh.wikipedia.org/wiki/%E9%80%9F%E9%BE%8D

Mr.Business

注：此篇文章版权归香港頭條網所有。

金融High Tea——馬車衝崖 少少失控
2008年10月8日

昨日香港重陽節放假都算放得好啦，因為避開在美股大跌後開市，股民可驚少半日。

香港放假前已經歷了一個全球股市的黑色星期一，當日包括港股以內的亞洲股市已經跟外圍插，恒指周一收16,803點，跌878點，大跌5%。港股跌完到歐洲大跌，歐洲跌完到美股大跌，杜指周一曾經跌700幾點，尾市反彈，仍跌369點，收9955點，自2004年10月以來，首次跌穿10000點大關。全球資產總值一天內即時縮水2.2萬億美元！

在金融巨浪中資金亂竄，走向美國國債和黃金避難，所以國債價格和金價周一在美國市急抽，但原油和一眾和工業需求有關的礦物就大插水，其中以銅的跌幅最為顯著，反映全球的需求正急促下滑。

澳洲狂減息救市

在周一全球暴跌中，各國各出奇謀應變，俄羅斯股市周一跌19%，最後直頭停埋市，唔俾人再沽，這是俄國近期第二次停市。而澳洲昨日宣佈大幅減息1厘，將隔夜拆息目標利率降到6厘，澳洲央行突然減咁多息，大出市場意料之外，澳洲股市亦轉跌為升，昨日收市升1.7%。澳洲的行動令人懷疑全球主要工業國的央行已有協議，會相繼大幅減息，所以澳洲減息的消息令亞洲股市回升，大摩的MSCI亞太指數在澳洲減息前跌3.2%，後來澳洲減息後跌幅收窄至跌1.2%。日股昨日早段跌穿過10,000點大關，後來跌幅收窄，最後跌317點，收10,155點，跌3%。而中國上證綜指跌幅亦逐步收窄，最後少跌0.7％收場，收報2157點。

周一半夜睇住美國個市，杜指連9600點都一度跌穿埋，真係好有股災的味道，後來市場估計聯儲局會大幅減息救市才反彈番幾百點。聯儲局昨日就緊急再向市場大力放水，以紓緩信貸市場極度緊張的銀根。

睇住美股插水，令我想起一件事，上月初美股在11,000點右左時，前大摩策略師碧斯估美股短期見底，話杜指要抽番1000點，當時睇美股走勢唔係太似會升，所以我估碧斯咁睇好，其實係預測緊美國政府會救市，結果幾日後美國政府推出打救按揭證券公司房利美和房貸美的計劃，其後又出手打救AIG。

碧斯估錯有因由

美國政府雖然一如預期出手，但美股並無反彈，而且隨覑雷曼爆鑊，美國更推出7000億美元救市大計，但美股都係頂唔住。碧斯預測後美股最多跌了1400 點，都可以話連大師都跌眼鏡了，但碧斯在3月美國政府出手救貝爾斯登前，曾成功預測美股會大反彈，所以佢今次係估錯了政府救市的功效。

最近全球股市走勢顯示，局面開始有少少失控，各地政府救市後，都挽救唔到市場的信心，人人唔敢借錢出街，各地的銀行同業拆息都急促抽高，這種乾晒塘的局面持續下去，唔單係有病的公司會死，無病的公司一樣死，只要公司現金唔夠，一時周轉不靈就可以死人，所以目前各國政府先要做的工夫是如何可以大量而急促地放水，以阻截信貸緊縮不斷把公司殺死！

美國政府好像騎在一架失控的馬車上，衝向懸崖，唯有搏命去拉，過去一拉馬就停，所以觀眾對個車伕都幾有信心，但依家拉極都唔停，令人有少少擔心架車最後都係會墮崖。見到呢架馬車停低時，亦唔好太高興，佢隨時又會再發癲。

油價在周一跌低過90美元，油價跌穿上浪的低位，走勢上已確認一個反覆向下的格局，原油和工業用商品繼股市之後，相繼走入熊市。若未來是一個全球性的經濟衰退，商品也不能倖免。過去買了商品或商品基金的朋友，如果買得早，現時仍在水面，仍有錢賺時，就最好以買入價作為止蝕位，一到位就打靶，唔好輸俾佢。

小心我們會從一個通脹的世界，好快又滑向一個通縮的世界，油價和能源價格回落得急時，通脹會好快退潮，如果不計能源和食品以外的所謂核心通脹，更有可能變通縮。香港對通縮有經驗，通縮代表資產價跌、租金跌、人工跌，乜都跌，以買樓收租者為例，不可以以為明年一定可以收番今年的租金，特別係豪宅和甲級商廈的租金，更有可能大幅下跌，所以大家要快速適應新環境了。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

失控         

2008/10/8 上午 09:21:32
網誌分類: 經濟

　　澳洲減息１厘的好消息刺激咗全球股市半日，到美國市又唔掂，美股昨日早段反彈１００幾點，市場憧憬聯儲局會減息，氣氛一度轉好，但聯儲局主席伯南克講完嘢無料到，大市調頭回落，杜指大插５０８點收市，急跌５．１％，收９４４７點，杜指兩日累跌８７７點，即係香港放一個重陽假，登高避完災番來，大災難仍未過去，美股兩日夾埋跌咗８．５％，港股都要交俾啲功課，跌番啲補數啦。

　　睇番美股走勢真係幾劣，壞消息不斷湧現，市場憂慮銀行及房地產公司會因信貸危機加劇導致營運資金短缺，新一輪的拋售潮再度出現，結果美國三大指數齊齊插水，連續第五天下瀉。杜指３０隻成份股更無一倖免的全面下跌。標普500跌近五年來的最低位，收９９６點，自2003年以來首次跌穿1000點關口。

跌市中的火車頭為位於芝加哥的房地產投資信托公司General Growth Properties，跌幅達42%之巨，其股價在一年内已下跌92%，又係跌到執笠價；而美國銀行將股息削减一半至每股32美仙，並聲稱計劃出售100億美元的普通股以集資渡困境，股票被市場大量拋售，股價大幅下跌26%。

聯儲局主席伯南克的講話無料到，成為跌市元兇。佢表示，一旦信貸情況持續緊縮，令經濟惡化，而通脹顧慮較少的情況下，當局已準備好，以減息方法，應付難關。伯南克暗示會減息，但市場卻期望聯儲快速行動，甚至等唔到月底開會，在會期之間就大幅減息，伯南克那種唔咸唔淡的說法聽到股民火滾，就插低股市回應之。

而家利率市場期貨交易價顯示，估計聯儲局等唔到月底開會提前臨時減息的機會有５０％，而４０％機會減０．７５厘，而至估佢減０．５厘的更高達１００％。伯南克為何不馬上決定大幅減息，相信係遇上一個困境，當市場期望聯儲局減息０．５厘的機會高達１００％，即使馬上減０．５厘，刺激作用亦有限，能否拉任這一輪衝向懸崖的馬車，也是一個好大問號。由於市場預期美國減息，美元下插，等別是兌日圓跌得最多。而家局勢甚明顯，美元和歐元都要再大幅減息，變成難兄難弟，而日圓因為利息太低減無可減，所以一枝獨秀。

　　美國無料到，全球政府都要出全力自保，歐洲未能同意統一救市，德國大力反對，認為等得歐盟作統一決定會拖得太慢，所以堅持獨立行動。英國政府計劃動用350億至500億英磅公帑，購買銀行資產，重組幾家重磅銀行債務，提高銀行的第一級資本，增強其抗虧損能力，以挽救瀕臨崩潰的金融體系。

　　聯儲局開始救私人企業的商業票據，由於無人敢買，商業票據市場幾近停頓，聯儲局宣布成立商業票據資助設施（Commercial Paper Funding Facility），撥款予紐約聯邦儲備銀行（Reserve Bank of New York），以基金的形式購買美國商業票據，希望阻止不斷緊縮的商業票據市場，提高交投量，搞活番個市，以降低商業票據息率。

　　香港金管局亦宣布減低讓銀行向金管局借錢貼現的貼現窗利率１厘，由過去高於美國同類利率１．５厘，變成只高０．５厘。金管局任總裁睇到銀行水緊，早前出五招歡迎銀行向金管局借錢週轉，但銀行借短錢仍要付３．５厘的高息，愈借愈蝕入肉，自然牙痛咁聲，今次金管局大手筆減１厘息，擺明唔係想賺銀行錢，而係放水俾銀行週轉，相信有助舒緩銀根。

　　日股今日早段跌３８８點，跌近４％，但仍然無美股跌５％咁多，亞洲股市亦跌到麻木，都跟唔足美股跌了。而家買賣股票都有高風險，美股一副破哂位向下插的格局，再急跌一啲都唔奇，但跌咁多反彈吓亦唔奇，呢種高風險股市，點玩都得，記住小注怡情，唔好博命，唔係好易無命。

陸羽仁

http://www.hkheadline.com/blog/r ... rd=&searchtype=

Mr.Business

注：此篇文章版权归香港頭條網所有。

金融High Tea——假V死得人多
2008年10月9日

港股重陽假後開市，上兩日美股累計跌了877點，港股自然無運行，大裂口低開695點，好快就跌穿16,000點重要關口，下午再插，最後以全日最低點收市，收報15431點，大跌1372點，跌幅8.2%，成交額777億元；期指報15,288點，跌1432點，跌8.6%，低水144 點。國企指數報7452點，跌964點。

昨日最誇張係下午早段市況，下午一開市就大插，插到15600點上下就牛皮上落，點知一到3點就神奇大升，最高升到16422點，由下午早段低位彈番近 1000點，當時市場中人覺得大奇跡日又到，隨時升番到上日收市的16803點樓上，以為最後倒升都唔奇。當時市場見到大市係咁升，最多人四圍問究竟升乜？流傳得最多的版本是「全球央行一齊減息救市躀」。

全球央行齊放水

不過呢個升浪來得快也去得快，3點15分過後掂到高位就急回，3點半後就開始大插，好快就插穿下午早段的低位，最後差不多以全日最低位收市，散戶「大奇跡日」夢碎，佢懐早前試過上兩次跌到16000幾點就單日轉向，今次同樣搶入博反彈就中招，好多短炒客要即時打靶，大叫「假V反彈害死人」。港股大升時外圍杜指期貨亦一度大升，由跌300點變成跌80點，但後來唔知點解又再插番低。若果有人為炒高靠害，呢班友都係環球操作，做足全套。

但係環球減息最後證實不是流料，到黃昏時就出消息，多個西方國家的中央銀行齊齊減息救市，美國、歐洲、英國、加拿大、瑞典和瑞士齊齊減息0.5厘，美國聯儲局把目標利率由2厘減至1.5厘，這個緊急的聯合行動，企圖借此紓緩全球金融危機。昨日黃昏全球央行齊齊宣佈減息放水後，美股杜指期貨轉跌為升，由跌 300點變成倒升。

中國亦出三招救市，首先是配合西方一起減息，人民銀行決定從今天起下調一年期人民幣存款和貸款基準利率各0.27厘，其他期限存貸款基準利率亦作相應調整；人行又決定由本月15日起下調銀行的人民幣存款準備金率0.5個百分點，放鬆銀根；另外又決定今日起對儲蓄存款利息暫免徵收5%利息稅。阿爺又減息又減存款準備金，放水救市。

香港金管局昨日開市前，亦宣佈減低讓銀行向金管局借錢貼現的貼現窗利率1厘，由過去高於美國同類的聯邦基金利率1.5厘，變成只高0.5厘，即由3.5厘減到2.5厘，銀行水緊，過去要向金管局貼現窗借錢要捱3.5厘的貴息，如今減息1厘，希望可以拉番低銀行同業拆息。

紅色巨股慘被狂質

大跌市中礇控（005）[股價及相關新聞] 算跌得少，跌3.8%，收115.8元，叫做有抗跌力，英國自行推出救助銀行方案，英國政府將向銀行業至少注資500億英鎊，包括英國礇豐在內的英國最大 8家銀行將會受惠，若佢地資本唔夠，可以叫英國政府注資，而政府將獲得這些機構的股權。礇豐雖然是其中一家參與銀行，但就話自己唔需要問英國政府借錢咁話。

昨日是紅色股的災難，跌超過10%的股份比比皆是，內銀股勁跌，建行（939）[股價及相關新聞] 跌得最甘，跌12.4%；招行（3968）[股價及相關新聞] 跌11.9%；工行（1398）[股價及相關新聞] 跌7.8%；中行（3988）[股價及相關新聞] 跌6.5%；平保（2318）[股價及相關新聞] 插12.9%；國壽（2628）[股價及相關新聞] 挫8.4%。

全球流動資金緊絀，市場憂慮經濟持續放緩，生產原料以及能源的需求下降，將直接打擊礦產資源類股份。能源業、原材料業及工業製品業綜合指數均下插逾1000點，如中石油（857）[股價及相關新聞] 跌14%，中石化（386）[股價及相關新聞] 跌12.5%、中海油（883）[股價及相關新聞] 跌14.3%。中國鋁業（2600）[股價及相關新聞] 更慘，發盈警料第3季純利跌逾50%，被高盛唱淡，股價急插至4年新低，收報3.41元，下插20%，成為插水大王。跌得過10%的大股，顯然有基金倉皇出貨啦。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

未定驚         

2008/10/9 上午 08:17:26
網誌分類: 經濟

全球主要國家中央銀行聯手減息，令金融市場的緊張氣氛略為舒緩，但美股仍未扭轉跌勢，在開市初段曾經上升，但上午後段轉升為跌，到下午又曾彈上９６００點以上的高位，但最後半個鐘卻插落低位收市，收市跌１８９點，收９２５８點。

昨日杜指的跌幅有２％，但標普５００指數只跌１．１％，跌勢未止，但向下的力度略為減緩，主要是市場未有足夠買家。環球減息只有短暫歡愉，現時市場主要有兩種期望，第一，是美國政府有進一步行動舒緩信貸市場的恐慌，第二，再來一次大跌，令股價更吸引，就可以引到真正買家落場，可見短期後市仍會非常波動。

理論上美國政府還有很多招數可出，市場見全球減咗０．５厘利息，又期望月底聯儲局再減多０．５厘息。而美國財長保爾森亦暗示會再出招，佢話金融市場動蕩無咁快停止，重大的挑戰還在後頭。英國提出５００億英鎊向８大銀行注資的計劃，保爾森就暗示按美國國會通過的救市計劃，美國有需要時亦可直接向銀行注資。

金融危機已導致全球經濟增長放緩，今年可能已是自2002年以來最低的增長率，未來很可能會全面步向衰退。雖然經濟學家認出現另外一次類似１９２９年的大衰退（The Great Depression）的機會可以說「接近零」，但己經無人敢睇好了。

綜觀這兩天的惡劣情況，全球股市被催殘得體無完膚，各國各自應戰無功而還，全球7大央行終於戲劇性地，作出史無前例的聯手減息０．５厘行動，緩解金融危機對經濟的負面衝擊，遏止全球股市繼續大瀉。但除加拿大S&P/TSX綜合指數升2.3%以外，美洲及歐洲股市繼續下挫，這一劑止瀉藥未完全收效。

除了股市未定之外，匯市亦都大亂，環球一齊減息，理論上大家齊齊行動，對匯價影響會拉平，但實際並非完全這樣，因為各國的利息底數唔同，所以影響不一，以美元兌兩大主要貨幣日圓和歐元為例，影響就各異，歐元跌，日圓升，歐元今早維持在１．３６２７的低位，而日圓卻升穿１００圓，造９９．５８圓。

美國把目標利率聯邦基金利率由２厘調降至１．５厘；歐洲央行把基準利率由４．２５厘降至３．７５厘。英國央行把基準利率由５厘降至４．５厘，加拿大央行把基準利率由３厘降至２．５厘，瑞典央行利率也由４．７５厘降為４．２５厘。

　　部份央行減幅較輕，瑞士央行把三個月瑞士法朗倫敦銀行同業拆息目標區間調低０．２５厘，降為２至３厘。而減息最多的澳洲央行早前把目標利率由７厘減至６厘。另一個極端是日本央行，佢雖然表示強烈支持環球央行的減息行動，但因為日本的利率已低至０．５厘，所以佢未有加入全球聯手減息行列。

　　而家你問匯市點睇，由於金融市場太亂和環球經濟步向衰退，匯價走勢大幅波動，極難預測，但短期的方向似乎是睇住減息的空間做人，雖然美國經濟好衰，但其他國家都唔見得好，講經濟大家都碌落地下，講唔出邊個特別好（或者大陸好啲，但佢匯價唔開放），所以市場就睇利息，利息愈高的國家，減息空間愈大，匯價愈弱，好似澳洲６厘咁高息，減息空間大，所以走勢好弱，而歐元亦有３．７５厘咁高息，真係減多２厘仲得，所以亦要捱沽；日圓叻在減無可減，得０．５厘息，咁日圓就被逼走強，匯市資金短期泊入日圓，搵佢做避難所，捱過全球減息潮再算。

　　若這個推論正確，未來一兩個月，美元除了兌日圓外，兌其他貨幣唔會太弱，到明年初各國減定息時，美元才會轉差。

陸羽仁

http://www.hkheadline.com/blog/r ... rd=&searchtype=

Mr.Business

2008/10/9 上午 11:37:55  

陸羽仁覆網友

泡沫咖啡：你問手上有現金買乜外幣好，正如我今日網誌所言，歐元和高息貨幣短期有大幅減息之憂，特別弱，如果是投資者唔好郁住，等二三個月佢地減定息再算，但投機者卻可趁日圓回吐時，買吓沽歐元揸日圓的交叉盤，睇嚟仲有一段走吓，不過唔炒慣外匯者唔好去試啦。

有錢唔一定要買嘢，無買無跌可能就係羸啦，在確認熊市之初我一直叫大家唔好買嘢，就係咁解。

Any:９０２和一眾紅色股一樣，未跌定，但電股有一定基本因素支持，煤價回吐亦有利，不過遇上熊市買乜股都會死，小心，要買睇好長線，買完大升又唔妨先游一游水，高手朋友就係咁不斷游水，逢高必沽，降低持貨成本，佢話熊市未完，沽貨千祈唔好驚買唔番，但唔貼市的朋友好難咁做。

Roots:能源價回吐，加國經濟會更差，有減息空間，要買等減定息好啲。

Spade Ace:我估日圓有可能反覆上試９５圓的高位，有日本紙唔怕揸吓先。

爛賭小妹：要月底去日本，可以等美元兌日圓略彈時，起碼換一半先，怕月底聯儲局又再減息，美元兌日圓再跌。

籠中鳥：澳元息口６厘，經濟唔掂大幅減息，短線兩三個月內走勢都弱，想大反彈都難，但中長線明年美元會弱番，所以合埋眼收息等３年都得。

Ccb:你問中海集運，航運是長週期股，而家入衰退週期，唔會咁快好番，加上大量新船下水，經濟開始好時航運業都未好，長線收集都唔使而家開始，聽到船公司執笠時開始買都未遲。現時息率基於去年的盈利和派息，完全不可以作準，盈利一跌，派息即跌。

潘記：全球衰退，中國一定受影響，所以我擔心中國股市會彈一段，然後過兩三個月又開始尋底，無咁快好。但中國經濟相比西方經濟，因為未完全開放，人口又多，可以政府增加開支，用內需撐住，有機會維持８％的增長，對企業來講已經係天堂啦。若美元災難性下跌，港紙都會跟住大貶值，都有一兩成機會出現這種災難。

魚生粥：你問「而家全球蒸發左咁多錢.....夠竟d錢去左邊呢??..邊個先係大贏家呢??...d股價係咁跌,係咪每間公司都係蝕錢呢??.」

以前啲錢由金融機構不斷衍生，１元變咗１００元，而家１００元變番１元，帳面財富全面消失，以股票計，若帳面財富大量蒸發，可以令大多數人帳面輸錢，因為財產貶值，亦令大多數公司帳面輸錢。若以實質計，有成交才有真正贏輸，就只有在高位沽咗股票，無再買嘢，坐住現金的人才是贏家。而公司則要在淡市仍然做到生意賺到錢的才可保盈利。

Govia:你想買建行，短炒趁低買吓唔係唔得，要守一成止蝕。長揸仲可以等吓喎，要買只宜好小注。

Tsanglung，水滴石穿:匯豐是英國主要銀行，所以暫時無需要問英國政府借錢，也參加其中，問心嗰句，佢又係唔係寸到認為自己永遠無需要問政府借錢呢？

匯豐、渣打現有股東，一定不是增持的時候，遲吓若彈得高，不妨又減少少磅，將來有機會低啲買番。佢地已經係較低風險銀行股，但將來如何，誰可預估。

長友：要在１２月前買加幣，最好等佢再減息時買。

Zizou Z:股票未算最平，未來還可再跌的分析，合符實際，因為睇經濟大方向，的確如此。

Mr.Business

注：此篇文章版权归香港頭條網所有。

金融High Tea——反彈養傷 靜待黎明
2008年10月10日

多國中央銀行破天荒聯手減息救市，加上人民銀行「三招」放鬆內地銀根，支持港股昨早高開166點後逐步向上，最多升559點至15,990點，下午指數從高位回落，但再次在A股收盤後拉高，最後收市報15,943點，漲511點或3.3%。期指收報15,925點，升637點，高水18點，大市成交608 億港元。國企指數報7,743點，漲290點或3.9%。

昨日的走勢和前一日相反，前一日是一個倒V形下跌，但昨日下午雖然一度下插，但最後卻是一個小V形向上，在高位收市，令一眾好友抹晒汗。中環茶友話，大市日中的走勢唔係咁易估，有大戶專殺炒期指即日鮮的散戶，你以為佢見低位會單日轉向下午會升，佢就不斷插低俾你睇，到你以為佢下晝又要插，佢又彈番上高位，出其不意就殺鰦班即日鮮。

拆息市場未復正常

美國通過鰦7000、8000億美金救市大計後，又到多國央行聯手減息，招數出盡，環球股市都有點唔係好企得穩的感覺，其中一個關鍵因素係環球的銀行同業市場都緊張到不得了，借貸極度困難，利息抽高。

好似香港的隔夜拆息正常2厘多一鱓，依家升到上4厘。銀行之間唔敢借錢俾大家，搞到水乾晒，要借只能付貴息去借，金管局任總大手筆即減香港貼現窗利率1 厘，減到2厘，但拆息並未馬上回落，銀行家話而家好多銀行手頭都有錢，但怕風險唔想借出街，要佢借就要收高鱓風險溢價。

世界各地都有類似情況，日本央行連續十幾日向市場注資，單係昨日已注入4兆日圓（即395億美元），各國央行都大力放水，即係銀行唔敢借錢俾人，就由政府借錢俾缺水的銀行。而家美國考慮緊其中一個救助資本市場的方案，就係由政府擔保銀行之間的借貸。我估要等銀行同業市場較正常運作，拆息開始回落，股市才到回到較穩定的狀態，而家只能靜待黎明。

記得早排經營U-RIGHT服裝連鎖店的佑威國際（627）[股價及相關新聞] 公佈全年業績時，我話佢全年盈利倒退一半，得番6140萬元，而且不派息，狀況唔係幾好，在租金等成本高企但生意又無增加時，零售業開始步入寒冬，但勢估唔到佑威咁快玩完，在8月底已停牌的佑威被債權銀行申請委任臨時清盤人接管。

生意難做 執笠潮起

佑威長短債加埋欠12億，流動資產有16億，牌面夠數，但公司執得自然係周轉不靈，不知有無不為人知的漏水之處。佢在2000年上市以來，年年有錢賺，買鰦佢鱓股票的股東最後一鋪清袋，真係慘過買雷曼迷你債券。生意難做，香港經營環境在第3季開始急促轉壞，相信好多公司今年埋數都唔係咁靚仔，明年更小心有公司執笠潮，打工仔要醒定鱓啦。

昨日大市反彈，早前跌得多就彈得多，兩巨股之中，礇控（005）[股價及相關新聞] 早前跌得少，昨日升2.2元升或1.9%，收118元；中移動 （941）[股價及相關新聞] 收報69.4元，升2.9元升或4.4%；其他電訊股表現亦不俗，聯通（00762）[股價及相關新聞] 大升9%；電訊設備股亦有強勁反彈，昨天重挫的中通服（552）[股價及相關新聞] 反彈15%、中興（763）[股價及相關新聞] 彈7.%

「三保六行」銀行股彈得勁鱓，保險股力水唔係好夠，國壽（2628）[股價及相關新聞] 及平保（2318）[股價及相關新聞] 升2.2%，財險（2328）[股價及相關新聞] 無起跌；建行（939）[股價及相關新聞] 、工行（1398）[股價及相關新聞] 及中行（3988）[股價及相關新聞] 分別升4.1%、6.6%及5.4%；交行（3328）[股價及相關新聞] 、招行（3968）[股價及相關新聞] 及中信銀行（998）[股價及相關新聞] 升4.8%、4.1%及2.4%。

北京調高成品油價及高盛納為油股首選，中石化（386）[股價及相關新聞] 股價急彈7.3%，收5.26元；中石油（857）[股價及相關新聞] 亦反彈3.1%，報6.37元。惟中海油（883）[股價及相關新聞] 受累油價回落偏軟，報6.5元，股價原地踏步，油價已入熊市，小心中海油會長期弱勢。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

極度驚慌         

2008/10/10 上午 09:20:26
網誌分類: 經濟

美股未能企穩，又再狂瀉，市場人士認為近期各國政府暖化已接近冰封的信貸市場的火力不夠，未能穩住金融市場信心，倫敦美元同業拆息飆升，三個月拆息觸及今年高位，令美股連續第七個交易日暴跌，杜指收報8,579點，全日急跌678點或7.3%，是自2003年5月來首次收在8,600點下方，標普500指數和納斯特克指數也跌至逾五年低點。

其實美股昨日初段仍然OK，有投資者趁低吸納科技及商品類股份，杜指在頭一小時反彈，早上9:45曾報9424點，上升166點，漲幅1.8%；但好境不常，走勢調頭，到上午11時，杜指已倒跌115點，之後波幅收窄，在9100與9250點之間遊走。但下午在通用汽車和AIG等插水式暴跌帶動下，杜指在3時開始急跌，跌勢如水直下，收市報報8,579點，大跌678點收場。

金融業仍是重災區，杜瓊壽險類股指數.DJUSIL猛跌18.5%。市場擔心日本三菱UFJ金融集團的90億美元投資摩根士丹利計劃會有不測，加上拋空金融股禁令到期，大摩股價暴跌26%，報12.45美元。XL Capital狂插53.8%報$4.01。AIG 因要政府增加注資378億美元，股票被大量拋售，收報$2.39，急挫25.1%。金融海嘯的恐慌蔓延各消費行業，通用汽車收報$4.76，暴跌31%，股價跌至58年來的新低。

按走勢分析，美股極度超賣，按理反彈應該好快到來，但實際上反彈不止未來，美股還在步步深插，關鍵是市場處於一種極度恐慌的心理狀態中，持股人怕手持的股票，間公司明天就執笠，要錢唔要貨，所以那一隻美股一被拋售，好快就跌至一些近乎執笠價，你可以話過份沽售，也可以話正在反映真正的危險，而危機的風眼在信貸市場。

在倫敦銀行同業拆借市場，三個月美元拆息高至４．７５厘，是去年１２月２８日以來最高，隔夜美元拆息略回至５．０９厘，但仍遠高於聯儲局定出的１．５厘目標利率。六間中央銀行聯手降低利息，暫時只對隔夜拆息有少少舒緩作用，但未能拉低３個月的利息。另一方面，企業的商業票據市場早前接近完全停頓，但六國減息加上聯儲局宣布會直接買入商業票據後，商業票據的隔夜息平均回落１．１５厘，跌至２．３５厘。

銀行和企業信貸市場接近冰封的狀態，不止令企業的信貸成本急升，要俾多好多利息才借到錢，亦令市場大為憂慮有公司頂唔順要執笠，所以股價平都無人敢買，持股人覺得企業的盈利會大倒退已是不爭的事實，怕只怕買到另一間雷曼的股票。

若果恐慌的根源在於信貸市場，特別是倫敦同業拆息的市場，銀行拆借的情況一日未改善，拆息未顯著回落，股市也難望好轉。過去市場對七大工業國開會無甚期望，如今就希望佢地傾出一些救市措施，例如各國央行共同擔保銀行之間借貸，讓銀行可以放心在拆借市場放錢出街。

正如我早前所言，而家的市場極度波動，巨浪百幾呎，反彈和爆煲的機會一樣咁大，手痕者亦只宜小注。

陸羽仁

http://www.hkheadline.com/blog/r ... rd=&searchtype=

Mr.Business

2008/10/10 上午 10:35:16  

陸羽仁覆網友

咁o既市大家要控制風險，無論做好做淡，放落去啲錢要預咗輸哂，唔好俾人一Q清袋。

K仔：我睇股市未到熊市第三期，只在熊二的暴跌之中，金融海嘯對實體經濟衝擊都未完全反映，邊有咁快熊三呢？要買股一啲都唔使急，大陸股市亦未到熊三，上證綜指未來反彈後，隨時明年又試低位，你要買內銀股亦唔使太急。不過大家請記住，暴跌之後必有短期反彈，我只係叫長線投資者唔好心急買股，短炒者自己衡量。長線投資者無買，未來見到反彈，亦唔好怪我，你地係睇長線，呢個百年不遇的衝擊會拖較長時間，股票彈完三幾個月後又會再回。

逍遙遊等：我唔知美股個底係邊，所以亦答唔到港股個底係邊，我早前一路估，美國咁大鑊，杜指無理由咁高，唔見吓７０００點、８０００點唔會到底，但佢咁快碌落８０００幾點，又真係估唔到，呢啲崩潰性下跌，長線投資者唔好博啦，未來反彈都當睇唔到，明年隨時再試底。

Tsangling:銀行同業市場停頓，金管局已經以２厘的低息直接借錢俾有需要的銀行。銀行盈利當然不可樂觀，理財業務死哂，按揭又死埋，有排衰啦。

Lovelygirl:你問我好唔好而家將有錢賺的股票沽出，在股市幾日跌咗幾千點時，我真係唔識答你，怕叫你一沽，過幾日反彈時你又會泵哂心，當然唔沽亦有可能再急跌。只能咁講，在咁恐慌的市場，都係唔太適宜沽貨，唯有等吓佢有像樣反彈時，才減啲磅啦。

你問係唔係買樓好過買股，股市通常跌得快過樓市，千祈唔好而家沽股買樓，否則你就會中第二棍架啦。

MWT:沽點數無謂，但而家即使插得深，要入貨亦是只宜短炒者，因為未來只是有反彈，無真升；長揸者若買咗見反彈都唔會沽，就唔好咁急買啦，要買都只宜小注。美國佬衰幾年一啲都唔奇，唔會咁快無事又嘭嘭聲咁上。

中國經濟來年應可頂得住８％以上增長，講經濟已經好好，但股市唔單止唔會大好，來年有機會再試低啲，６０００點唔係呢兩三年可以再見到啦。

淑敏：迷你債券若可收回６至７成，還可以不放棄追討權利，如果係我就會接受，可惜這只是政府的建議，我怕銀行唔制。

你問「之前你是不是說過美國可以無限量印銀紙, 又不需耍有任何的儲備嗎 ?

點解美國政府可以咁做, 其他國又可不可以呢 ?」

個個國家都可以咁做，但弱國咁做，匯價會暴跌，通脹會升上過１００％，但美國係強國（過去肯定係），所以可以不用儲備印銀紙，財赤貿赤又大，但美元都無大跌，因為美元係國際貨幣，人人信美元，但恐怕經過呢一場風暴後，呢個故字要改寫，所以美元長線還有大跌之險。

三心兩意：美股雖然漸跌到吸引水平，但市場信心太弱，開大開細無人知也，美國衰退一兩年一啲都唔奇。高手朋友都估唔到今次跌咁多，佢在１６０００點入市，輸８００點離場，仲話而家千祈唔好博死命去撈底，好易連老命都無埋，佢話怕一起身見到美股唔見２０００點喎，所以而家買少少，都只係「紀念性參與」，佢話成天飛刀跌落你，你接唔接得住呀？

Catjim:本來跌得咁急會加速見底，但香港實體經濟的大衝擊明年至到，誰敢說明年今年而家的港股已是底呢？

香港金融體系並非百毒不侵，尤幸今次係外資大戶後欄失火，佢地未得閒來搞香港而矣。

YY太：你問「買了工行, 恆生. 建行分注長期. 所以不止蝕. 是否對呢?」

你要扮吓巴菲特，睇吓呢啲公司的基本因素（或經濟因素）有無根本變化，我覺得工行、建行會穩定少少，因為在阿爺較受控制的經濟環境中，但恒生的波動較大，特別是香港銀行業的理財生意完全破產，而按揭又唔得時，我對香港銀行業一兩年走勢相當睇淡，止唔止蝕要自己衡量，要止蝕最好等反彈時才止蝕。

你有６５％現金，就揸住佢唔好郁，等三個月半年先。

另外香港經濟嚴冬將至，做生意要超謹慎，借少啲錢，存貨多要沽啲，成本可省則省，未來唔係賺蝕問題，先要過「生存」這一關。若有好多豪宅要減磅。

一草一木：你問好唔好放棄份工去英國留學，咁o既時勢，未來亦不會好快轉好，若本身工作收入不俗，放棄份工，去留學成本極重的英國升學，５０萬一年使哂，機會成本好大，要小心衡量。如果做嘢超博命，即使學歷唔太高，都有晉升機會，但要做到「超博命」，唔容易。

有否考慮在香港一路做嘢一路進修，例如讀MBA，香港也有很多選擇，咁讀法會辛苦好多，但成本平好多，三思。

至於幾時買英鎊反而係枝節問題。

Bluepanda:你話最近的政策傾斜對中移動不利，這是事實，或許阿爺見佢，或者佢阿媽（母公司）賺錢太多，又不受淡市影響，所以要做吓嘢。所以我同意佢有風險，不過風險相對少過其他公司啲啲而矣。

筋肉人:你話匯控和國壽走勢好過大市，這是事實，但在熊市之中，強勢股是避難所，唔包保佢唔會有一日開始暴跌，也不一定是升市火車頭，因為到市場風險胃納增加時，又會轉去其他股，佢地跌得較少，反彈幅度亦較少。

Mr.Business

注：此篇文章版权归香港頭條網所有。

金融High Tea——企定定等人排隊尾
2008年10月13日

若你在上周五半夜睇美股，真係可以用動魄驚心來形容，美股全日好似坐過山車那樣，急跌急抽，高低位相差超過1000點，最後杜指收市報8,451點，略跌 128點或1.5%收場。我懐過去見到美股跌過100點會話「大跌」，而家見佢最後只跌百幾點會話「略跌」，當大家見慣大場面之後，見到跌100、200 點都覺得是小兒科矣！

證券股執笠價

上周五美股承接亞洲、歐洲暴挫的氣氛開市，杜指一路下滑，跌幅不斷擴大，9點半開市不久就插穿8000點，見全日低位7882點，10點過後隨即V形反彈 500點，升回8600點樓上，之後就拾級而下，一擺一擺下墮，到下午2點幾再度跌穿8000點大關，但到3點後就急抽，由科技股帶動，在3點多反彈回升至全日最高位近8901點，從低位計急升超過1019點，尾段回落，收市報8,451點，下跌128點。標普500指數報899點，下跌11點或 1.2%。納斯特克指數收市1,649點，微升4點或0.3%，納指錄得本月首次收高。

投資銀行股票是重災區，評級機構穆迪投資表示，可能下調美國第二大證券行摩根士丹利評級，令市場再度擔心它改以銀行模式經營的生存能力，摩根士丹利和高盛重挫，摩根士丹利暴跌22.3%，高盛重挫12.4%。反映企業的信貸風險的「信貸違約調期」（CDS）約金大幅上升，大摩的「信貸違約調期」約金急升到21 厘，即係話持有大摩債券的人願意付21厘咁高年息去買保險，雷曼破產前的信貸違約調期約金也只是7厘多，最後一日才急升到14.4厘，但大摩的信貸違約調期約金竟然高達21厘，可見市場對其信心接近崩潰。

相對地上周五美國銀行股卻反彈，市場相信美國政府最後都會採用英國方式，直接入股銀行，變相把銀行半國有化，大大減低銀行倒閉的風險，所以銀行股彈升，花旗銀行逆市回升 9.1%，報14.11美元。美國銀行反彈6.3%至 20.87美元；摩根大通則勁升 14%至41.64美元。

美股從低位反彈的同時，油價和商品大跌，美元彈升，11月期油價格下跌了7.02美元，達到每桶79.57美元，跌幅高達8.1%，跌穿80美元大關。金屬等商品亦大跌，黃金跌3.4％，跌到856美元，全日亦是以100美元的上落幅度波動；三個月期銅每公噸跌至4800美元，跌幅高達9.7%。

上周五是全球金融市場驚心動魄的一天，港股收市報14,797點，跌1,146點或7.2%，但尾市已從低位反彈近400點，現貨收市後期指再抽高，期指跌992點，收14,933點，高水136點。當日歐洲及亞洲股市遭遇歷史性重創，俄羅斯、印尼和烏克蘭三地股市要避難而停市。

七國集團財長上周五美國收市後結束會議，會後聲明無提及具體的措施，只表示目前金融市場的情況需要緊急和非常的行動，它們會全力採取各種必要措施，令凍結的信貸市場復甦。

碧斯話「不可投資」

港股連15,000點都穿埋，跌番到05年年底的水平，即係等如指數過去3年無升過，不過亦有好多恒指新貴或新上市的紅色巨股，當年並未計入恒指或並未上市，所以佢地未跌到05年底的價錢，例如中國人壽（2628）[股價及相關新聞] 上周五跌到22.4元，這是06年底佢開始急升時的價位，國壽在05年長期做緊6、7元。不過股市跌鰦咁多，吸引鰦好多朋友想入市，或者我懐又睇纒好有市場經驗的前摩根士丹利策略師、對沖基金Traxis Partners負責人碧斯點睇，佢上周五接受彭博電視訪問，評論到美股現時的市況。

碧斯認為現時股市是瘋狂了，杜指可以半小時升500點，再過半小時又跌500點，股市這樣劇烈地波動，近年罕見，只有73年股市暴跌後的市況可以比擬。記者追問他有無入市，以捕捉股市可能出現的反彈，碧斯話目前的股票「不可投資」（univestable），所以他沒有入市，只是持有大量現金，等待政府採取行動，以消除信貸市場的緊張狀況。碧斯在股市打滾幾十年，見過好多大風浪，連佢都話「不可投資」，大家可知風險有幾大。

記得上月港股第一次跌到16,200點，但單日轉向下午彈番上17,000點時，陸羽仁已經話好似成天刀仔跌落來咁，叫大家唔好咁勇博到盡去接刀，其後股市亦有反彈，但彈番到18,000點樓上又再狂插。

牛市心態唔改會死

在過去兩年大牛市時，每逢股市大跌，我都會叫大家雨天購物，人棄我取，認為在大跌市買股必有斬獲；但自從股市在今年確認進入熊市後，見到大跌市，我不再會叫人放心去買，頂多叫大家想買就買少少，唔好咁博，見升番有利潤亦要走，背後的理據是牛市和熊市有本質的不同，要採取不同態度面對股市。在牛市中，勇者取勝，因為股市反覆向上，你在大調整時入市，即使買早鰦，股市再跌，你坐纒貨好快又上番去。但在熊市中，在未跌得夠深時，懼者取勝，因為股市反覆向下，你在大跌時入市，如果入早鰦，固然要捱幾千點的跌幅，即使入得飱，個市入完馬上反彈，但彈完又再跌，你死獱唔走一樣中招。

好多在牛市測市好叻的股神，其實都係得一招，永遠睇好，升又叫人買，跌更加叫人買，這種建議在大牛市好易中。但市勢逆轉，變成熊市後，這些股神多數保持牛市的心態，以為仲係牛市，仍然係見親跌市都叫人買，咁就唔係好掂。大市變鰦熊市後，應該不斷叫人趁高沽至係，叫人趁低買顯然就捉錯用神啦。

在這種融化性的跌市，叫得做百年不遇的金融危機，即係話而家在世的人都無乜經驗，所以陸羽仁唔敢認叻，唔敢話估到股市的底部在哪裏，故此只能作幾個建議：

第一，股市狂跌急彈，後向難測，關鍵係控制風險。你買任何一個方向，都要假設自己可能錯，要諗諗如果錯了，有甚麼後果，自己頂唔頂得順那個後果，頂得順才好下注。美國專家估在這場海嘯中，最後有六成對沖基金會死亡，所以生存至關重要，碧斯作為一個對沖基金的頭頭，唔願冒咁大風險入市，獱住現金，唔死就已經跑贏大多數人。

我有一個排隊理論，在大牛市中要搶住排隊頭，因為排隊頭就會中頭獎；但在大熊市，你本來排在條隊中間，企定唔郁都得啦，你獱住現金唔郁，過鰦三兩個月後，會發覺大量排隊頭太勇者，都跌晒落隊尾，你唔郁就可以排上前列，或者唔係最叻鰟個，但倖存者都算贏啦，若果真係有六成對沖基金玩完，碧斯唔買唔沽，應該可以做到倖存鰟四成，咁咪係贏家囉，這種環境太博會死人。未來好快就由通脹變通縮，通縮時獱住現金不輸錢，購買力就日日上升啦，記住「賤物鬥窮人」呢句話，而家鱓股票雖然平，但未到爛賤價。

第二，如果你是只獱不沽的「投資的我」，現時不宜入市，夾硬要買都係買少少留為紀念就算。陸羽仁認為如今大市仍急促波動，只是熊市第二期，未到熊市第三期。熊市在急跌後，稍為喘定就會急彈，但急彈之後，慢慢進入熊市第三期，那時市況會極之沉寂，股民連睇都無眼睇，股市成交縮到你唔信，港交所（388）[股價及相關新聞] 的股價跌到阿媽都唔認得，在大牛市出世的財經雜誌頂唔順要執埋，那才是入市的時機，你有錢若想長獱，唔使而家咁心急大手買貨喎。

金融海嘯對本地實體經濟的衝擊，要明年才是高潮，到時又會進一步打擊股市，即使指數再尋底未必低過而家好多，但唔知點解，在熊市第三期股市無人理時，好多股票（例如非恒指成份股，或者是成份股中的細股）陰陰跌都可能會跌多好多，你而家摸入去，明年可能仲要唔見一截。我希望大家問清楚自己係投資定投機，如果你話係投資，會長獱不放，我叫你唔買，但係過一個月升番2000點，亦希望你唔好怪我。你買鰦股唔會賣，彈番上去若企唔住，曾經見過價位都係假鮋鎹，你買完會沽就另計啦。

狂賭要預鰦輸清

第三，「投機的我」就自己執生啦，現在的美股可以半個鐘跌500點，半個鐘彈500點，你無論沽或者獱，都有一半機會中，你亦都可以講，跌鰦咁多彈起上來會好勁，但亦可以講隨時插深鱓，一人有一個理論，或者大家都可以估中半日。又係去番鰟句，在咁大波動的股市，話入市係投機都係講得平淡鰦，話係賭博可能貼切鱓。既然係賭，就要預鰦放入去的注碼要輸清。亦有些人半投資半投機，我就奉勸這類人買鰦股如果升番，就最好沽貨食胡啦，在大熊市炒作，死獱無運行。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

歐洲救市         

2008/10/13 上午 09:26:08
網誌分類: 經濟

上星期嘅全球股市，可以講係「黑色一周」，全球股市跌到阿媽都唔認得，統計２３個已發展市場的大摩MSCI環球指數一短短一周累跌２０％，是自１９７０年以來最大一周跌幅，杜指一周跌１８%, 破曬紀錄，統計歐洲股市的FTSE泛歐績優股指數(FTSEurofirst 300 index) 一周累計跌幅２２%。各方期望７大工業國開會有結果，但最後只有原則性決議，反而是歐盟１５.國開會有料到。

歐元區１５國領袖首腦緊急會議通過，由各國政府擔保銀行之間的借貸，並向有問題的銀行注資，共同應對金融危機。根據會議發表的聲明，歐元區成員國將在２００９年底前為銀行５年期以下的新債務提供擔保，政府又會以取得優先股的方式向銀行直接注資，以紓緩銀行因為信貸緊縮而面臨的融資困難。

歐盟輪任主席、法國總統薩爾科齊在會後舉行的記者會上說，歐元區國家領導人一致承諾，不會讓任何一家大型金融機構在金融危機中倒閉。

而英國正部署緊急拯救銀行，英國傳媒指英政府今天會宣布歷來最大規模的拯救銀行方案，直接注資蘇格蘭皇家銀行（RBS）、巴克萊銀行（Barclays）、萊斯及英國最大按揭銀行哈利法克斯銀行（HBOS）四大銀行，並可能成為其中至少兩家銀行的大股東，報道指，四家銀行正在籌集合共３５０億英鎊（約４６３６億港元）資金。

　　倫敦《星期日泰晤士報》報道，四家銀行將請求央行擔保及注資，英政府向RBS、HBOS、萊斯和巴克萊四行的注資額按次序為１５０億英鎊、１００億英鎊、７０億英鎊和３０億英鎊。英國政府可能分別購入RBS和HBOS的５０％和７０％股權，而且會列席董事局會左右其未來派息，今次英國政府為挽救金融危機，在未知這些銀行的不良資產黑洞有多大時，指住鼻哥上陣包底去救佢地。而匯豐銀行和渣打銀行則未需要向英國政府要求注資。

　　今次金融海嘯由美國吹向歐洲後，就有停不了的趨勢，特別是美國讓雷曼倒閉後，銀行同業拆借市場幾乎停頓，因為銀行彼此之間不再信任，不敢再借錢出街。但歐洲的行動比美國果斷，今次歐盟的通過為在２００９年底前為銀行的５年期以下債務提供擔保，雖然細節未出，但市場估計是由各地政府做中間人，銀行先貸款給政府機構，再由政府放番出來俾要借錢的銀行，銀行不信其他銀行，都應該信政府，照計唔會有好多政府好似冰島那樣會破產，所以這個措施相信會暫時止得咳，令銀行同業市場的拆借活動重新啟動。

　　至於歐盟同意用英國模式救銀行，亦比美國原來用的方式徹底，因為美國７０００億救市方案的原始版係美國政府向銀行購入不良資產，然後等銀行自己用新帳簿去集資，但咁o既市氣氛銀行集唔集到資亦都係一大問題，英國索性直接由政府入股銀行，唔使等銀行自己慢慢再集資，入股比例高時，政府控埋股，變相把問題銀行國有化，你唔信銀行，都會信國有銀行。由於此招比較快見效，美國倒番轉頭話會研究採用。

　　英國方案的另一要點是唔理好醜全部銀行都救，美國救一間唔救一間，唔救雷曼，令全世界對金融機構失哂信心，但英國一開始就將８大銀行納入拯救計劃，連你話唔需要錢的銀行都在計劃之內，將來有需要亦會救，唔使等人估估吓。此舉令存戶不用急於擠提存款轉去安全的銀行，間間銀行都有政府照，理論上間間一樣咁安全。

政府救銀行最後一招就係提高存戶的存款保障，德國已表示會向個人存戶提供無限額保障，澳洲剛剛又宣布會提供無限額保障。

　　歐盟一出招，特別係擔保銀行去借貸，市場馬上有反應，歐元在日本市彈升１．５％，由上周五紐約市的每歐元兌１．３４０８美元，升上１．３６０７。而美股期貨今早亦反彈，今早９時，上升２４０點，相信港股開市都有機反彈。

陸羽仁

http://www.hkheadline.com/blog/r ... rd=&searchtype=

Mr.Business

2008/10/13 上午 11:59:34  

陸羽仁覆網友

Ray:你問我所謂「反彈和爆煲機會一樣咁大，「爆煲」係指乜，我係指杜指在那時水平再插多２０００點，見番６０００幾點。如果美股到這些水平，恒指都要見１２０００點，所以我的意思是恒指彈２０００、３０００點和跌２０００、３０００點的機會同樣咁高，炒作如同賭博。今天歐洲１５國同意擔保所有銀行之間的借貸，若果美國跟埋，應該有機會暫時將會股市定一定。

在此時刻，「投資的我」真係無興趣買，因為佢係個買咗唔賣的信徒，面對這種市況死揸真係唔掂。「賭博的我」買少少嘢，就好似買馬咁，一來叫做參與吓，二來要預咗輸清，這才是控制風險之道。當然你有十注去投資，買一注亦唔係咁緊要，但係買太多真係唔建議。

Qingqing:你問買指數股如盈富係唔係好過買單一股票，咁o既環境當然係，但係２８００未到你目標價１２元喎。

Bluepanda:你問４０５還可以派１０厘息嗎？４０５以現價１．９２元計，息率１２．４厘，假設佢租金收入跌３０％，再把十足可分派收入派息，改為派九成（一早講咗會咁），即係以現價計息率７．８厘，都幾吸引，所以佢股價再跌一啲都唔奇，但派息唔至於太低。

人債價格跌了，但除非睇人仔匯價會大跌，否則無需要現時沽，可以揸到到期。

Nevermind:據知A50基金的確唔係直接買A股，有「對手風險」，以指數基金計，買H股基金或港股基金安全啲，盈富基金係港府支持下成立，應該較穩陣。

潘記：我好怕散戶在跌市中博反彈，因為好多人唔係買大藍籌，而係買雞股或衍生工具，所以愈撈愈輸得多，我一直叫人唔好溝淡，就係咁解。

中投買黑石，有政治因素，當時係吳儀去美國訪問前夕，中國唔大量採購美國貨（包括黑石），美國會逼人民幣再升值，中國也要付出代價，所以中投並唔係炒股咁簡單。

逍遙遊：我叫人小心風險，如果個市最後反彈番２０００、３０００點，又有好多朋友心中會鬧我無叫佢入市。但要在這種金融海嘯中，生存係比發達重要。

Catjim:而家的股市的確係有啲超跌，但美股和港股合理沉降在什麼水平，最後要看經濟，我怕經濟、特別是銀行金融業的生意未來會大不如前。如果講恒指真如你所講的跌到１１０００點至１２０００點見底，好多非成份股或中型股仲有排跌。

美國的信用咭債務未爆，遲的亦會爆，但最壞也只是逼死銀行而矣，若美國如英國那樣入股銀行，就會包底。問題係全部國有化的西方銀行業會點，西方國家齊齊狂印銀行的後果如何？是否齊齊印美元就唔會大跌？這些問題是下一步的重大問題，無人知結果？

籠中鳥、Rachel:你地問澳元，早前叫大家唔好掂，怕佢減息會再跌。佢近期低見見６３美仙，而家造６６美仙，睇圖走勢幾差，籠中鳥問會唔會見４０美仙？無咁誇啩！不過唔排除澳洲減息會再跌。我長線唔睇好美元，今年第四季美元無事（除咗兌日圓會弱），明年美元恐會再回弱勢，但短線美元企硬，澳元未改弱勢，想買唔好貪平，要等佢破位向上，例如上穿７０美仙企定吓，略回落時可吸納，但要定位止蝕。

Muse:澳元建議如上。若想買招行作長線，忍吓，有可能在１０元以下買到。好想買現價買少少，唔好買太多。

老老實實：中國能否借危機追近美國我唔知，但用一個２０、３０年的角度看，美國國勢走向衰落，呢次金融海嘯係一個分水嶺。

Daidai：你問「係咪最危險嘅地方就係最安全嘅地方呢？美國政府力托AIG，係咪代表香港嘅AIA好安全呢？現在您建唔建議大家投保於AIA同埋投資佢哋嘅基金呢？」

先答你哲學問題，現實世界唔係古龍小說，最危險的地方都係最危險o既，不過經歷衝擊唔死得的金融機構，特別有美國政府入了股，都唔會危險得過未爆煲的金融機構。

但講到保險公司介紹的投資產品，唔係針對AIG，間間都係咁，好多時透明度低，其實係投資緊保險公司自己的投資組合，你話風險高唔高？我奉勸大家在而家的時勢，要買最透明的東西，我買中移動，揸現貨，即使萬一佢跌到２０元，間公司仲存在，有得守。

天人合一：交行唔係最大嗰間，暫時唔好買呢種。

Wawa:你問的問題好多，但簡單點講，唔好在這種驚人跌市中，把所有股票沽清，把所有錢轉去保本，要做等反彈時才做，也不用全部清倉，要沽沽一部份都夠，而家沽沽得太遲。

[ 本帖最后由 Mr.Business 于 13-10-2008 05:06 PM 编辑 ]

Mr.Business

注：此篇文章版权归香港頭條網所有。

從「最幸福國家」到「瀕臨破產國家」
2008年10月14日

曾經有一個傳統的智慧，每當金融危機來臨，只要情況壞到有一間銀行要宣佈倒閉時，金融危機通常便已經接近尾聲了。但這一次連一個國家都要宣佈面臨破產，危機好像還只是剛開始而已。根據在美國華爾街工作的朋友說，原來在兩星期前，美國投資界還是對大市挺有信心的。直至剛過去的兩個星期，他們才真正步入了非常驚慌期。都不知道應該說他們是見慣大場面所以非常鎮定，還是後知後覺好了。

身邊一些經驗老到的投資者繼續趁低吸納，Victoria問，你們不害怕美國、甚至全球的金融體系有機會崩潰嗎？他們打趣說，如果全球的金融體系真的是崩潰，作為體系中一環的貨幣不也是同樣被糟蹋，變得沒有價值嗎？如果世界末日真的要來臨時，股票跟貨幣都有機會變得沒有價值。那不如趁機買入一些現在非常不合理的股票，博世界末日不會出現吧！聽完這番話後，一時間，Victoria亦答不上口，因為畢竟我相信全球金融體系解體是遙不可及的事情。

近日全球的急跌，我想是跟冰島宣佈面臨破產一事也有關。當大家都因次按危機把神經拉得很緊、死忍不想沽貨的時候，竟然傳來了一個國家都可能面臨破產的消息。這個突如其來、想也沒有想過的消息把大家的恐慌推到了頂點。在思想癱瘓之下，形成了上星期的恐慌性拋售。這次次按危機毫無疑問是非常嚴重，但是否嚴重到可以令到一個國家破產呢？抑或事實是冰島本身經濟結構已經有問題，正如四川的那些豆腐渣工程一樣，一遇到危機時，會馬上瓦解？

小政府、大銀行

冰島去年才被聯合國選為全球最適宜居住的國家，雖然人口三十二萬也不到，但是二○○七年，冰島人均國內生產總值突破六萬美元，位居世界第五。冰島一向給大家的印象都是以捕魚為生，何來那麼高的人均國內生產總值？原來巧妙便是她的金融產業，再配合超細小的人口。冰島的福利是非常完善，市民連大學也都是免交學費的。福利好，教育水準高，人口素質自然高。冰島人明白靠捕魚維生是沒有可能令國家富有的，所以很多年前，他們便大力發展金融業。

他們的策略便是以高利率與低管制的開放金融環境，吸引海外資金。而冰島的銀行也效法其他國際投資銀行，在國際資金市場大量借入低息短債，投資高獲利長期資產，次級按揭資產便是其中一種。之前幾年的全球經濟好景，導致冰島的銀行忽略風險，過份借貸。冰島銀行總外債規模竟達到了國內生產總值的十二倍。

以美國政府為例，大家都說她是過度借貸的，但數據表明，美國○七年GDP為十三萬億美元，而國債只是剛剛超過了十萬億美元。可想而知，冰島銀行的借貸規模是有多誇張。在這樣一個「小政府，大銀行」的情況下，銀行一旦出現問題，政府根本救也沒法救，只好馬上宣佈面臨破產了。

王雅媛為持牌人士

http://www.hkheadline.com/news/h ... mp;section_name=wnb

Mr.Business

注：此篇文章版权归香港頭條網所有。

金融High Tea——國有化救起天下銀行
2008年10月14日

歐美國家不斷出招下，港股昨日終於出現像樣反彈，在港股開市前，歐羅區15國峰會議定共同救市方式，包括擔保所有銀行之間的借貸到09年底，各國政府亦同意直接注資入有需要的銀行，消息令外圍股市造好，恒指高開359點，其後一度倒跌，下午在美國聯儲局和歐洲的中央銀行宣佈無限量向銀行體系注入資金，恒指一路向上，尾市急升至16,376點，以近高位16,312點收市，大升1,515點，升幅10.2%，成交725億港元。期指尾市略回，收報 16,180點，升1,247點，比現貨低水132點，成交109,893張。

國企指數走勢與恒指類似，惟升幅較恒指大，收盤報8083點，急彈947點，升13.4%，估計夾高後令大量沽空盤被逼斬倉。

依家金融海嘯最大鑊係搞到銀行之間唔敢借錢，令各地銀行同業拆借市場死晒，拆息急升，咁搞落去會拖死好多企業。所以歐洲15國決定全面擔保銀行之間的借貸到09年底，屬大手筆之舉，因為銀行借錢俾同業有政府擔保，按理唔怕收唔番，而家主要睇美國跟唔跟，如果美國跟埋去擔保銀行之間的借貸，應該可以穩定歐美銀行之間極其虛怯的信心。

大放水令股市抽升

昨日午後美國聯儲局公佈的無限量放水聲明，亦係一劑重藥，聯儲局公布歐洲央行、英倫銀行和瑞士銀行會提供無限量美元資金，不限額拍賣7日、28日和84日的資金，聯儲局在背後支持多國央行此一行動，更表示會無限量提供資金以滿足市場需要，日本央行亦表示會考慮引入類似措施。

一個前英國財政部官員話，過去美國和歐洲的放水措施全部是有限額的，今次推出無限額的放水機制，史無前例，其重要性比多國央行聯合減息還要大。

這個大放水計劃一公佈後，美元兌歐羅即時回落了0.9%，銀行同業拆借市場也有反應，三個月歐羅拆息由5.38厘跌落5.32厘。

西方國家出盡一切方法，既為銀行包底，同時又全面放水，總之就由各國政府印銀紙全面照起，將半個金融體系國有化，希望市場不信金融機構都信政府，可以令金融市場回復信心。

你睇英國政府第一個直接大手筆入股銀行，昨日宣佈直接向蘇格蘭皇家銀行（RBS）注資200億英鎊，佔60%股權，同時向正在傾合併的萊斯銀行及哈利法克斯銀行（HBOS）注資170億英鎊，持股超過40%，英國三大銀行唔覺意又變鰦國家銀行。

美國跟上 可繼續彈

中環茶友講笑，話可惜馬克思已經睇唔到，西方的資本主義國家竟然要將大量銀行國有化，共產過第一個搞社會主義的國家俄羅斯。呢種做法雖然好唔自由經濟，但係就比較有短期效果。大炒家索羅斯也讚許歐洲的做法，話會有利市場回升；佢又大彈美國財長保爾森的手法雖然較重視自由市場原則，但係就唔係幾掂。

茶友估計，如果美國跟歐洲直接擔保銀行間的借貸，亦快速直接入股有問題的銀行，應可以暫時穩住局面，股市亦可以炒纒反彈，因為早前跌得咁急，反彈時亦會彈得好急，至於各國濫發貨幣救市的惡果，就將來再理啦。

昨日港股大升1500點，42隻藍籌股全線上升， 其中超過半數的漲幅在10%以上。重磅股礇控（005）[股價及相關新聞] 報114.5元，升4.3%；中移動（941）[股價及相關新聞] 仲勁，收74.8元，大升12.7%。

其他股份以本地地產股和內銀股升得最勁，恒隆（101）[股價及相關新聞] 漲19%，漲幅位列藍籌股首位，信置（083）[股價及相關新聞] 升16%，恒地（012）[股價及相關新聞] 、長實（001）[股價及相關新聞] 升15%，新地（016）[股價及相關新聞] 升13.5%。

內地股市昨日由跌轉升，上證綜指收2073點，升3.7%，紅色金融股乘機發力狂彈，其中招行（3968）[股價及相關新聞] 報16.28元，狂升18%；工行（1398）[股價及相關新聞] 報4.28元，升14%；交行（3328）[股價及相關新聞] 報6.14元，漲14%。大和總研和高盛同時調高中石化的投資評級， 調高至「跑贏大市」及「買入」，令中石化（386）[股價及相關新聞] 成搶購對象，急升17.5%至5.65元，沽空鰦中石化者，斬都斬唔切。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

大反彈         

2008/10/14 上午 09:05:22
網誌分類: 經濟

這是最壞的時候，也是最好的時候！在歐美政府連番入市救市之後，股市絕地反彈，杜指昨日杜指全日收市報9388點，勁升936點或11%，單日上漲點數與漲幅均創下歷史新高！

在美股收市後，今早又傳出消息，話布殊政府將會公布入股美國金融機構的方案，將第一階段救市資金２５００億美元中的一半，即１２５０億美元，拿去入股九間金融機構，入股的目標包括花旗銀行，摩根大通銀行、美國銀行、富國銀行、高盛證券、摩根士丹利證券、State Street Corp.及 Bank of New York Mellon Corp，亦有消息說美林證券亦在投資目標名單內。

市場一直批評美國財長保爾森買呆壞資產救銀行的方法不直接，應模仿英國直接入股銀行，保爾森同意考慮，看來好快可以成事。受此消息刺激，美股期指今早再升３００點以上，報９７００點樓上，直撲１００００點大關。消息亦令日圓下滑，因為匯市投資者猜測美國入股金融機構後可以穩住局面，借日圓買高息資產的交易重燃，日圓匯價今跌至１０２．３６圓，比１０月１０日的高位９７．９２圓顯著回落。

　　講番昨日環球股市的情況，美國聯儲局在昨日下聯同歐洲央行、英倫銀行與瑞士國家銀行公布向銀行提供無限額的貸款的放水計劃，對市場有好大刺激，而歐洲各國亦推出救銀行的具體行動，英國將向四家銀行注資630億美元、德國為4000億歐元銀行間貸款提供擔保、法國將推出一項3600億歐元的融資計劃、澳大利亞也為銀行大規模融資提供擔保，各種消息皆令資金如潮水般湧入全球各大市場，亞洲升完到歐洲升，英國富時100指數升8.26%,報4,256點；德國DAX指數大漲11.4%,報5,062點；法國CAC-40指數勁揚11.2%,報3,531.點。泛歐600指數上漲了近10%，收報226點。

美股全球股市回揚的氣氛下開市，便在摩根士丹利 、Waste Management Inc. 等股票的帶領下，大幅飆升，至上午9：39，杜指報8867，上漲415點或4.9%，到11時許升近９０００點然平穩發展，到3點後再抽高，結果杜指全日收市報9388點，勁升936點或11%；標准普爾500指數上漲104點，至1003點，漲幅為11.6%，升幅創創69年來新高。納指則上升195點，報1844點，升幅11.8%。結束了連續八個交易日下跌的勢頭。

杜指30隻成份股中僅有兩只股票下跌，，漲標准普爾10大行業板塊全線上揚，金融類股份仍是市場焦點，三菱東京UFJ銀行向摩根士丹利投資90億美元的計劃一度有阻滯，但最後大摩同意改變條件，給多三菱部份年息１０厘的優先股，雙方終於達成協議，摩根士丹利股價飈升87%，高盛亦狂升 25%，其他金融股如花旗、美林的升幅亦超過10%。市場憧憬通用汽車與佳士拿合拼成功，令通用汽車成為杜指升市大王，勁升33%，並帶動和福特汽車也跳升逾20%。

原油交易者憧憬危機可保持原油需求，逼使淡倉平倉，原油期貨上漲了3.4%，紐約商業交易所十一月份交割的原油期貨上漲了2.68美元，至每桶80.38美元。歐元攀升，歐元對美元匯率上漲了1.4%，至1.3577美元。紐約商業交易所黃金期貨連續第三個交易日下滑，十二月份期金合約下跌了23.7美元，至每安士835.3美元。

不單美股大升，美股期貨今早再升，勢將刺激港股再彈，呢種跌市跌得急亦彈得急，反彈高位一般在大跌日後３至９日出現，今次可能係來得急那一種。

陸羽仁

http://www.hkheadline.com/blog/r ... rd=&searchtype=

Mr.Business

2008/10/14 上午 09:38:45

陸羽仁覆網友

Ray:持有人民幣想轉澳元，咁做又唔拘喎，一則可以分散風險，二則若美元回軟，澳幣升幅較大，但澳元還有再試底險，要忍得至好。

籠中鳥：澳元是資源貨幣，但若美元轉弱，不排除回到７０美仙樓上，我是建議你等佢轉番強勢才買，因為若不斷減息，可能要再試低少少，今次不同過去，不能純以過去利率作準，若風暴止不住，澳洲不會怕通脹，理論上還可以大幅減息，先觀察其利率走勢再行定奪。人民幣較穩陣，但美元回軟時也不會有太大升幅，因為出口轉弱，中國不想見人民幣太強。

piano：如持有中信國金，可接受其換股建議套現及換入中信銀行。

Wawa:大市唔會此後一片陽光，大反彈之後，回番啲，正常就會在那些水平牛皮上落一段時間，如果真係想止蝕，可以趁反彈到較高位（如近１８０００點）減一部份本來都要止蝕o既貨。

Any:你想買華能，今日先買會略遲，因為到你買到貨，可能已完成今次反彈浪的三分二升幅，若入貨尾段可能仲有得升吓，唔知你走唔得切。

你問４１０等一堆股份，質素本來屬中上，但關鍵看大市，若估計反彈完還是回軟，可以先減持一些，沽貨時分段沽好啲，若一次沽清，沽完再彈，會十分肉痛。

三心兩意：索羅斯話可能風暴最壞時間已過，都可能啱，但風眼過去廢墟重建都要長時間，而且香港實體經濟的衝擊未到，大家要預備去捱。

英國和歐洲入市手法更徹底，不問好壞，把出事的金融機構全部國有化，好處是市場較有信心，唔使怕遇到下一間雷曼。長遠是政府赤字會增加，要大量發債發鈔，風暴一過通脹又來。

Catjim:你問「在熊市中，照計反彈應一波比一波弱，做成一浪低於一浪之勢，熊市已行了近1年，但現在每次反彈仍既急且勁，何解？」你問了一條好問題，因為呢次係百年一遇的金融風暴，所以頭段都拖得好長（和政府不斷去救亦有關）呢次急跌可能只是等如過往熊市一、二期的急插，仲要捱佢一波比一波弱的熊三時份。

各國大放水，短期不會形成泡沫，因為資本去槓桿化的速度可能和放水入去一樣咁快，但過一兩年通脹效應可能又出現。

我唔識講乜價位買國壽平保，由於佢價位仍然相對高，在熊市中看到高價貨我會避開，可能錯過好股，但亦可能避開貴股。

逍遙遊：呢啲咁o既恐怖跌市，唔死一定喪彈，要做股市倖存者，不能太勇，當然也無發達，有時發達和發毛也是一線之隔，作為投資者，太冒險的事情就不能做了，留番俾「賭博的我」做吧。

Acx:招行唔係無反彈，佢昨日都勁彈，它跌最多的原因是因為它也是升最多，受地深吸力影響，所以也回得多。你買入９手大部份都在２０元樓上，買入價貴，建議如反彈近２０元時，先止蝕一部份吧。

YY太：無豪宅好啲，嗰啲３萬元一呎的豪宅，我怕佢唔跌到１萬５，都會跌番到２萬啦。

譚太:Reits安全過地產公司好多, Reits其實等如一舊出租物業, 你買佢等如買樓收租,但買地產股等如起樓去買,好市時後者賺得多,大跌市時後者財政壓力好大。

Mr.Business

注：此篇文章版权归香港頭條網所有。

金融High Tea——政府全包 銀行定驚
2008年10月15日

受美股上日狂升11%的消息刺激，恒指昨大幅高開，一開市就衝上17,141點的全日高位，隨後獲利盤湧現，低見16,615點，其後走勢反覆，在500 多點之間大波動，尾市回穩，恒指收市報16,833點，升521點，升幅3.2%，成交817億港元。現貨收市後期指扯高，收市報17,079點，高水 246點。國企指數升352點，收報8,435點。

港股昨日反彈到第二日，一開市散戶就走都走唔切，經紀張話佢十個客九位都係沽。我話個市早上被人沽到16,600點就有錢買番上來，買貨者似乎唔係散戶，可能係基金盤早前被人逼倉沽得太狼，而家陸續要補番少少貨，估計後市仲有得彈纒。

港股收市後，財爺曾俊華開記者會公佈，港府為增強投資者信心和存戶保障，將推行兩項措施，第一項是擴大香港的存款保障範圍，由現時的保障上限10萬元，改為運用外匯基金為所有銀行客戶的存款提供全面擔保。第二項措施是成立備用銀行資本安排，為所有在香港註冊的銀行提供額外資本，兩項措施即時生效，直至 2010年底止。

唔出招怕走資

政府呢兩招事出突然，令人懷疑係唔係有銀行出鰦鱓問題，外界睇唔到呢？不過陸羽仁搵高人打聽纒，發覺唔係呢一回事，原來近日世界各地都提供無限額的存款保障，新加坡都部署緊做類似的事情，港府擔心如果人做我懐唔做，大額的存戶為求安心，會大量把錢調走，那時就無風暴搞到有風暴。有時唔係香港懶係做自由市場就得，資金情願走去有政府包底而唔係咁自由的地方，你睇美國財長保爾森就係人辦，佢唔到金融機構死都唔救，救鰟時亦仲唔肯包晒底，結果被人罵到七彩，反而有理無理包晒底的英國首相白高敦，就成為救世英雄。

現時香港外匯儲備有1,600億美元（約12,500億港元），令人擔心香港擔保晒所有存款頂唔頂得順，其實政府認為，有了全面擔保之後，市民無動機去擠提，出事的機會更少；而且在5萬6800億港元總存款中，只有900億存在中小型銀行的資金風險略高，外匯基金應該頂得順。

有中環茶友分析，政府實行100%的存款擔保之後，小存戶會把錢轉番入高息的中小型銀行，現時礇豐等大銀行錢多到水浸，根本唔想收存款，走番少少出街都無乜影響也。預計政府呢個大動作有助增強市場對香港銀行體系的信心，有相當「定驚」作用，大家唔使擔心銀行再擠提，對股市屬利好消息。而美國又話動用 2500億美元直接入股九大金融機構和8500間地區銀行，若然實行，美國股市亦應該可以繼續反彈纒。

昨日港股只升3.2%，和內地股市轉升為跌2.7%及巨型股無乜表示有關，第一大股礇控（005）股價及相關新聞收報114.9元，只是微升0.4%，和大市升勢唔匹配，拖住恒指的升幅，佢同行渣打（2888）股價及相關新聞重申無意動用英國政府款項，昨日裂口反彈18.3%，收報174元，就威過礇控好多。另一巨股中移動（941）股價及相關新聞叫做好鱓，收76.95元，升2.9%，亦追唔到指數平均升幅。

三幾日見浪頂

恒指成份股中部份地產股升得好勁，郭氏家族再斥資3,594萬增持55萬股新地（016）股價及相關新聞，新地急升11.5%報74元；恒地（012）股價及相關新聞 報30元，升8.1%；太古A（019）股價及相關新聞回購股份，報60.8元，勁升7.6%；長實（001）股價及相關新聞則報81.5元，升5.3%。

其他藍籌方面，中遠太平洋（1199）股價及相關新聞升13.4%、招商局 （144）股價及相關新聞升9.5%、中信泰富（267）股價及相關新聞升8.5%、富士康（2038）股價及相關新聞彈8.8%、和黃（013）股價及相關新聞升8.6%、中鋁（2600）股價及相關新聞升8.2%。

「三保六行」方面，以招行（3968）股價及相關新聞 股價表現最勁，收17.92元，大升10%。早前成為資金避難所的公用股則逆市下跌，煤氣（003）股價及相關新聞跌2.2%、港燈（006）股價及相關新聞挫6.8%、中電（002）股價及相關新聞跌6.3%。

中環茶友話，依家全球都在一個大型反彈浪中，早前跌得咁急，反彈亦會好急，睇圖會出現一個V形峽谷咁形態，咁急抽上來，皆因有大量淡倉要斬倉，跟住有好多基金沽鰦貨會補倉，但反彈得愈急就愈唔會維持得耐，可以三幾日就彈上此一反彈浪的高位，所以追貨的風險會愈來愈高，炒友係搵高位套利而唔係再追。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

反彈與衰退         

2008/10/15 上午 09:17:20
網誌分類: 經濟

　　美股昨日大幅波動，收市小幅下滑。美國政府披露向大型金融機構注資2500億美元計劃的細節，美股開盤後一度大幅飆升406點至全日最高位9,794點。但投資者仍憂慮宏觀經濟，加上微軟、百事業績不如理想，電腦及消費品股份受壓，拖累大市，獲利盤湧現，指數曾跌至9,085點，但尾段收復大部份失地，杜指收市只是微跌77點，報9311點，跌幅0.8%；標准普爾500指數下跌5點，報998點，跌幅為0.5%；反映科技股的納斯達克指數就跌得甘啲，下跌65點，報1779點，跌3.5%。

美股在大跌急彈後，出現一個執位現象，早前跌過籠的金融股因獲政府直接入股拯救而繼續急彈，但消費股、地產股和科技股卻開始憂慮衰退而下跌，受瑞銀集團降低微軟未來盈利預測拖累，資訊科技股份下跌3.9%。微軟下挫5.5%；英特爾亦因桌面電腦需求下降，股價下滑6.2%’但在收市後英特爾公布的業績卻優於預期，第三季度營收創102億美元的歷史記錄，純利同比增長12%，遠高於預期，英特爾股價在休市後場外交易由15.93美元回升4.5%，至16.65美元。

標普500指數內的地產公司整體急挫l 8 %, 是24行業最高，顯示經濟放緩將打擊商業樓宇需求。全國性的就業率下降，令很多公司將辦公室轉租。美國市中心辦公室的空置率，第三季已升至10.6%。Simon Property Group Inc. 股價下挫8.5%、Vornado Realty Trust 下滑10%，有「工業物流地產老大」之稱的美國普洛斯公司 ProLogis 更勁跌13 %。.

金融類股份受惠於財政部買股行動而急彈，銀行、保險及資產管理公司的整體繼上日升幅10%後，昨日平均再上升6.4%，但與去年比較，這組別股價仍然下跌41%，大摩繼前日日飛升87%後，昨日繼續急彈21%、花旗彈18%、美林跳升 21%、高盛漲11%、National City Corp. 上揚35%，而 Regional banks KeyCorp及 Huntington Bancshares Inc更齊齊狂飆50%！

美國政府昨日公布入股金融機構計劃的細節。財政部會先向九間銀行購買股票，共1250億美元將於日內支付予花旗、富國、摩根大通、美國銀行、美林、摩根史丹利、高盛、紐約梅隆銀行(BANK OF NEW YORK MELLON CORP.) 及道富集團(State Street Corp.) 等。並預期在年底前用完2500億美元資金。財長保爾森促請銀行儘快運用這2500億美元資金，投放到借貸市場上，鬆動銀根，遏止企業破產和失業率情況因資金緊拙而持續惡化。另外美國存款保險機構亦公布，會為所有無息的存款提供全額擔保。

　　美股還在反覆反彈的氣氛中，中環茶友估計，今次反彈有機會上一上10000點樓上，但要小心港股會比美股更快到達反彈浪頂，反彈的樂觀空氣一過，對經濟的憂慮即至。紐約大學經濟系教授在接受彭博訪問時預測，美國經濟衰退及金融虧損會很嚴重，失業率會達到9% (這和微軟主席蓋茨前天的預測一致) ，房屋價格下跌15%，衰退期持續18至24個月。若果美國係咁，香港亦都唔會好，未來要先捱一段緊日子。

陸羽仁

http://www.hkheadline.com/blog/r ... rd=&searchtype=

Mr.Business

2008/10/15 上午 10:28:11  

陸羽仁覆網友

Ray:資本主義自由經濟本有缺陷，華爾街的貪婪就是災禍的核心，貪婪不受控制時，惹出災難，最後只能以政府干預來補救，這是資本主義的自我復修過程，不是資本主義的終結。現代社會沒有政府大量把金融業國有化的經驗，估計政府入股後，會控制金融機構的冒險行為，這些銀行無咁冒險，亦會賺少啲錢，咁樣亦間接抑制咗信貸的擴張。銀行和投行無以住賺咁多錢，已是不爭的事實。

你問恒指可以反彈幾多日，同Eric問我的問題類似，佢問「反彈高位一般在大跌日後３至９日出現，今次可能係來得急那一種」係指乜，我係指３幾日就可能已見高位。若大市好弱，呢個高位就係高位，跟住有排上唔番去，若之前沽得太多、市場潛藏購買力好多，第一次見高位回落後，第二次還會再挑戰高位。

你問乜位可以減持部份股份，１８０００點或１９０００點，去唔去到咁高呢？一個小浪頂可能今天出現，等埋施政報告可能有的刺激（例如控制土地供應之類）有獲利貨可以減一部份。留一部份等第二浪睇吓可唔可以上高少少，不要期望得太高。

未來一兩個月恒指應在１６０００點至１９０００點中游走，有激動人心大事發生又另計（例如又有爆煲事件）。

我早前講過通縮，但又講過「風暴一過通脹又來」，其實時序無講清楚，未來，，本地非核心通脹指數應會急回，嚴重者會通縮，明年上半年會好快反映，跟住就睇美國衰得耐唔耐。但我講「風暴一過通脹又來」，係指兩三年後的事，各國央行現時大量發鈔，係以發鈔對抗金融業非槓桿化的影響，初期係貨幣收縮力量大過政府發炒的補充，作為投資者，近程半年內要憂慮通縮（或者只係低通脹），在這種收縮年代，不利投資，因為一選錯投資產品就會跟住縮，例如在買咗大反彈上高位的港交所。

我估等佢個市跌得殘啲，靜啲，熊三有可能在明年初會到。

三心兩意，Billy等：三心兩意問國家為銀行擔保，誰來為國家擔保？無人為國家擔保，一個國家發鈔接管銀行，下一步就睇人地信唔信你的經濟實力，唔信你貨幣就會大跌，如冰島克朗匯價唔見咗一半。冰島搞到佢銀行業大過GDP８、９倍，賺錢時好好，輸起上來根本頂唔順。

實體經濟大衝擊明年才到，股市亦會走在經濟之前，但美國若衰多１８個月，即係經濟要２０１０年初才見底，股市咪要２００９年中才見底囉。無人可以準確預測股市的底部，關鍵是無人知美國衰幾耐，但長線投資者在熊三靜到死時慢慢買，安全過在急跌時去撈。Billy,股市是流動的，好難早半年話俾你聽邊個位安全，半年之後，可能比較清１９０００點入貨是安全啲，或者比而家高，但「安全」無價噃。見識過早前的融化性跌市，首先令自己唔好死，然後才諗賺錢。

Gigi: 你問世銀高級副行長林毅夫為何咁樂觀，佢話「有三大因素為中國應對國際金融危機築起了一道“防火墻”：中國具有龐大的外匯儲備；中國存在資本管制；中國財政政策穩健，中國政府過去４年都實現了財政盈餘。」佢的說法有道理，所以中國無直接受金融海嘯衝擊，銀行無擠提，但這不等如中國經濟不會受影響，美國衰退，中國也會受影響。

美國大蕭條情況睇書睇過，美國有三份一銀行倒閉，但而家美國８５００間銀行中，只有１０幾間倒閉，所以完全唔係嗰回事。

Lovelygirl:現時的大反彈是急跌後的反彈，如無意外反彈後是牛皮上落，但未改向下趨勢。持有的股票如想沽，趁反彈升得急時就要沽，未來中國有機會推下救樓市措施，趁那些時候股市抽升時，可以減持一啲A50基金。

想買國壽睇埋明年業績都未遲。

下世紀再嬉戲：從本地經濟而言，最壞的時刻未到，我自己的長線投資中持有股票唔多，只持有早年好低位買入長揸唔郁的股票（我有５元、１０元買入的匯豐股票，好細個時買架啦），現金比例七、八成左右。

Andy188:你講A50基金有信貸風險，絕對係啱，雷曼事件後「對手風險」大大提高，長揸者買２８００盈富最安全，若賺紅色味唔夠重，可能恒生隻２８２８都安全啲。

達摩：我好鐘意研究「賭博的我」輸錢的原因，不過怕講得多等如間接教咗大家去賭，所以唔敢講咁多。

Yuki:你問我的高手朋友在１６０００點博反彈止蝕後為何無買，係作為投資者定投機者唔買。其實答完之後，高手朋友在星期一見歐洲聯合出手後，入市買咗少少，佢話呢啲叫做賭大細，結果賭中咗，但佢買好少，亦無後悔，佢話自己係在股海長期搵食之人，最怕係「沒頂」。答番你開頭那個問題，上星期尾佢話投資長揸絕對買唔過，投機係一個５０對５０之局，值博率不夠，佢永遠都係計機率去投機。

Bdroom:油價很可能一浪一浪向下，但經濟差對航空股不利，仲可能會跌深少少，等證券行個個出報告話航空股唔掂時，才買都未遲。石化股好少少，但經濟放慢亦影響油產品銷量，相信還有機會向下多少少。

小潘：想做高息定機趁快啦，最好今日去，因為全球拆息回落，香港又有存款保障，利息會回啦。

Mr.Business

2008/10/16 上午 09:48:40  

陸羽仁覆網友

闇之作手：你問「我剛剛發覺我用果間証卷行擅自用我個現金戶口買貨, 宜家蟹晒, 陸sir, 我應該立即報警嗎? 還是明天向証監投訢?」

我建議你首先將你自己真正買入而存在該股票行的股票先調走，例如調去穩陣的大銀行（唔係封咗舖未必可以攞番），然後問間股票行，睇吓佢有無合理解釋（唔好問你的經紀），若無合理解釋就馬上去證監會投訴或報警。

Ray：我都估反彈好快完結，但估唔到美股回落得咁急咁深，港股後向睇美國，如果美股收市守唔住８０００點再創新低，小心港股亦要再試底。

你問港股會否在未來半年再試１４３９８點的低位，我估先要問短期會唔會再試低位。若唔理短期，在股市穩定後，半年內等負面因素全面反映後，港股頗大機會要再試底。

好多國際大鱷自己都唔掂，暫時唔得閒搞香港，但等佢地定咗神之後，又會番來，如果我係佢地，都係趁未來一兩個月反彈高啲時累積淡倉，然後一棍將你打番落來，因為咁o既市做淡易過做好也。

MC:經濟踏入衰退，投資者買股一啲都唔使急。而家政府包底存款，細節未出，但長線應會有些徵費以支持運作，例如現在的存款保險公司那樣。

三心兩意：你問若某個歐盟國家好似冰島那樣破產，對歐元有無影響，如果係德國、法國等大國，當然有影響，但暫時看不到大國會出事，細國出事問題不大。

S2000:你話想為了派息買４０５，若然只為貪一期派息，當然不智，要研究股票的基本因素，咁o既市任何股都會跌，只是要揀基本因素比較硬淨的股份。有朋友將４０５和其他內房股比，話會唔會跌到幾毫子，４０５是Reits，是房產基金，買佢同買樓好相似，由於由唔係內房股咁樣高槓桿經營，所以升市難大升，而跌市亦無跌得咁厲害，如果４０５跌到幾毫子，即係話廣州商廈價錢跌到高位的六份之一，七分之一，咁又唔怕不斷買噃。

CCB:你問保華集團點解跌得咁厲害，我唔知點解，睇埋佢出業績或者知，呢啲細股而家千祈咪掂，有蟹貨亦千萬不要加注，基建上馬唔等如佢會好，跌起來唔使講理由，信市場啦，可能簡單到無人炒咪跌囉。

中年股壇初哥：你回流香港想買物業，你講那個荃灣盤加埋優惠唔使６０００元一呎，本來唔算貴，但係都去唔到貨，市場氣氛好差，等半年睇定啲先啦。

Soho:你講到嗰間金舖，去年報紙都有講，專滾大陸客的金行同那個老闆有關，經營手法如此，佢o既股票又點買得過？而家話公司唔見咗２億元黃金，仲可能同公司高層有關。