【专题讨论】转载香港曹仁超---投资者日记-熊二反彈進入浪B調整

四伯爽

政府多數低估bailout代價
自從英國政府推出bailout方案，令倫敦股市一度上升後，bailout已成為大部分投資者最歡迎嘅方案。翻查歷史，bailout並非乜嘢新方案，早喺美國政府成立初期，首任財長Alexander Hamilton曾經向一間銀行提出發債畀政府作為抵押品，吸收資金去增加貸款。當年該銀行負責人William Duer接受上述條件，但美國立國後首次金融危機無法停止──此乃著名嘅「Panic of 1792」，美國政府債券價格大跌，政府又向銀行借錢去支持政府債券價格，結果引發銀行出現倒閉潮，最後William Duer（當年國會議員）宣布破產及被關入獄（被債權人控告）。四十五年後嘅1837年，美國總統Martin Van Buren面對Second Bank of the United States出現財政危機，總統拒絕bailout，銀行破產，存款人只能收回部分款項，銀行股東一無所有；銀行破產後亦引發美國經濟衰退，以當年規模媲美大蕭條。1897年美國財政部面臨破產（無法應付別人用美鈔換黃金），由JP摩根個人聯同其他銀行成立私人syndicate，借出6500萬美元價值嘅黃金畀美國財政部贖回美鈔，令美國政府逃過破產命運，但唔少參加該計劃嘅銀行因自己手上嘅黃金唔足夠而破產。1907年，同樣危機出現，唔少銀行已唔願意參加，JP摩根把邀請番嚟嘅銀行家關响自己嘅私人圖書館裏（East 36th街），直到凌晨五點各銀行家同意簽名為止，JP摩根才放佢地返屋企。到1914年，聯儲局成立，調控金融嘅責任由聯儲局負責。上述例子證明，無論 bailout或唔bailout，其實都有後遺症。

最近由Luc Laven及Fabian Valencia共同研究，1971年美元浮動滙率制度下响三十七個國家共四十二宗bailout事件，發現事發前政府皆低估為bailout所付出嘅數目（睇嚟呢次財長保爾森亦犯咗同樣錯誤，例如AIG已一再要求增加撥款）。據兩位學者研究所得，平均bailout代價係該國GDP 13％。如上述結果有參考價值，美國政府呢次bailout代價應係2萬億美元，而非7000億美元。由於三十七個國家中發展中國家佔大多數，如只參考日本呢類已發展國家，bailout代價係GDP 24％，令日本經濟進入十年失落期。

Dunne及Henwood研究日本、南韓、挪威、瑞士已發達國家嘅bailout，發現呢D國家皆出現低通脹率、低債券息率、失業率較穩定，而危機後第三年股價才上升（日本更陷入通縮）。如參考前科，未來美國通脹率將回落，利率維持低水平，失業率唔會急升，而美股到2010年先至會回升！

四伯爽

（此篇文章版权归作者曹仁超）

英鎊危機再現
11月7日，周五。恒生指數响13273.09獲支持反彈，至14243.43收市，較上日升453.39；成交487.96億元。11月期指升 470點，收14200點仍較現貨指數低43點。技術上睇，恒指仍處a、b、c反彈浪內行走【圖】。太陽陳話呢次應該係一個似模似樣反彈，上望 16830點。過去策略係Sell on Rumour，今天恒指不跌反升，證明策略已轉為壞消息入貨。


本港銀行界減優惠貸款利率0.25 厘，11月10日生效，係今年3月以來首次。思捷環球（330）升9.5％，見43.8元，因歐洲央行減息半厘。聯想（992）跌12％，係2000年4 月以來最大跌幅一天，因邊際利潤由15％降至12.6％。馬鋼（323）升12％，見1.68元，鐵礦石明年可能降價15％。

滬深三百指數升1.7％，收1677.83。

過去三個月，美資銀行無論對消費者或商業機構都收緊信貸，消費信貸係1980年以來最緊。住宅貸款由7月份樓價75％降至10月份樓價70％。

英國10月份樓價較9月份跌2.2％（較一年前跌15.5％，跌幅已超過九十年代初期嗰段日子）；跌幅亦為1983年以來最大。依家英國樓價係中等收入家庭年收入五倍（為過去四年半最低，但平均水平應係三點六倍，即仍有下跌空間）。英倫銀行減息1.5厘後，Land Securities Group及British Land Co.股價仍分別跌4.1％及6.3％，睇嚟英國樓價仍未見底。

兩岸關係開始大大改善，睇睇以下措施：每星期有一百零八班包機來往海峽之間，唔少係每天飛一次，再唔係一星期只飛四天。台灣十一個港口與中國大陸六十三個港口貨物可互通而唔使抽稅，每月兩岸可直航貨運六十次。

日後台北飛上海只需三小時（經香港需七小時）。貨物互通可令台灣港口使用率大增，但香港成為受害者。國泰航空（293）失去部分台灣客，本港貨櫃碼頭亦將失去唔少貨運量；前者對國泰不利，後者影響最大係和黃（013）、九倉（004）等等。

投資股票11年仲係負回報
花旗估計，國泰今年每股虧損1.26元，目標價6.8元。太古（019）今年估計每股獲利2.38元，較去年減少58.7％，目標價50元。另推介遠洋地產（3377），估計今年每股獲利36.2仙，減少33.7％，P/E五點一倍，目標價5.1元。

太陽陳名句係十年黃金變爛銅。回顧1997年8月7日恒生指數16820點至今十一年有多，成績又點？1997年7月回歸後，投資股票亦係有波幅冇升幅；整整十一年啦，投資股票仍係「負回報」！

民主國家經濟政策隨住民意方向左搖右擺，八十年代傾向減少監管，2008年又再次傾向加強監管，情況有如六十年代中期至七十年代。不幸事係，六十年代中期至七十年代係美國經濟停滯不前期，要到八十年代全球化及九十年代IT高速發展，帶動資訊科技革命推動經濟繁榮。可惜踏入2000年科網股泡沫爆破，為對抗科網泡沫爆破後遺症，美國2001年1月起減息，到2006年美國企業純利40％嚟自金融業，財富愈來愈集中响溫巴仙人口，已為社會埋下不穩定因素。可惜政府漠視上述情況，最後由市場調整引發危機，最初只係樓價回落，到去年變成次按危機，今年已演變成金融海嘯。呢次美國大選結果證明鐘擺又向「左」方向擺動。未來美股會否重演1966至82年情況？

今天道指分析員仍假設明年企業純利平均上升13.8％，我老曹擔心明年道指企業純利係跌1％，淡友估計係跌21％。

普特朗認為，如銀行繼續收緊信貸，遲早引發類似1929年式大蕭條而非衰退。佢接受霍士新聞訪問時表示，擔心奧巴馬對上述問題處理能力較殊仔更差。

Oppenheimer 基金銀行股分析員Meredith Whitney認為，市場過去五年太習慣寬鬆信貸，主要係銀行將貸款證券化後响市場拋售結果，未來已冇呢隻歌仔唱。你仲以為銀行一如2007年之前，純利按年上升，令資本大增，然後進一步增加借貸能力嗎？今年銀行資本有賴政府大量注資，才令資產負債表好睇D。

未來一年信貸市場更緊張
柏克萊銀行分析員Jason Goldberg指出，上兩次信貸周期中，銀行股較信貸寬鬆期早一年見底。從呢點睇，未來一年信貸市場仍然愈來愈緊，因為銀行股仍在下跌中。

Vanguard集團創辦人Jack Bogle估計，呢個衰退仍算溫和，最短可維持一年半，但股價早已走在衰退之前。美股由一年前市值18萬億美元回落到上月底9.5億元，最近反彈至10萬億美元。由10月27日起反彈18％睇，佢相信熊市已結束。

Leuthold集團CEO Steve Luthold係有名大淡友，佢認為美股已見底，並進入牛市，理由係存款只能收1.5厘，投資股票隨時收6厘息。

股市仍熱鬧唔似熊市已死
凱恩斯曾話過──盲目樂觀者係嗰D只見眼前利益而唔理三七二十一者；保守者係嗰D只睇過去而不前瞻者。投資既要回顧過去，又要前瞻未來。雖然現實令人唔愉快，但投資者必須面對而非逃避。到底10月27日開始係熊市另一反彈抑或係轉好開始？只有Keep an eye on the market。

過去一年，分析事物最準確係Nouriel Roubini：一、佢响10月24日估計未來美國經濟衰退係L型。二、佢認為道指將由近日高位9600點再跌20-30％。三、佢認為2009年秋季美國經濟才見底。四、唔好投資商品、股票、物業，最吸引係日本政府債券，並建議响適當時刻放棄美元，改為持有歐羅。五、佢認為全球股市進入功能失調（dysfunctional）期。六、佢擔心情況較佢估計更壞（去年佢形容係金融列車出軌，即逐個車卡出事）。七、退休金損失30-50％，令退休人士大受困擾。八、經此一役，好多人從此唔再涉足投資，令大氣候改變。上述猜測會否應驗？唯有騎驢看書（走着瞧）。我老曹唔知股市何時見底。恒指由去年10 月至今年10月已回落三分二，P/E一度見七倍，會進一步創新低抑或响10月27日10676點見底回升？我老曹木宰羊，等佢行完a、b、c反彈浪後，再睇下一個浪點走。唔好扮先知，因世上無先知。1973年1月至74年12月6日道指跌45％，見577.6，當天成交只有一千五百五十萬股；1974年 11月底更有一天成交只有七百四十萬股。當年著名分析員Lucien Hooper接受《華爾街日報》訪問時話──投資者已唔再等候入市，大部分已離開了（哀莫大於心死）。1975年1月6日股市已上升10％亦冇人理會。牛市往往喺熱鬧中死亡，熊市卻靜悄悄地死去。今天股市仍然如此熱鬧，唔似熊市已死。

根據Morningstar數字，9月份美國互惠基金被贖回560億美元，10月707億美元，形成呢兩個月基金被迫賤價拋售股票。

[ 本帖最后由 四伯爽 于 8-11-2008 12:45 PM 编辑 ]

四伯爽

英國明年減息抗衰退
前天英倫銀行宣布減息1.5厘，隔夜錢回落到3厘（呢次減息幅度係五十年內所未見），初期英鎊滙價唔知點反映，一度升上 1.6011美元，最後才回落到1.5868美元。英國面對經濟衰退壓力，估計英鎊利率明年將降至2厘息去對抗衰退，會否令英鎊滙價重返1976年水平？當年响社會主義影響下，英國瀕臨破產，最後由IMF借出23億英鎊才度過危機。英鎊由去年11月2.1美元下滑，至今已跌咗24％，貨幣策略師Lee Hardman同意英鎊前景令人擔心，BNP百利達分析員則擔心英鎊重返1992年9月索羅斯攻擊英倫銀行後水平。一旦鎊滙下跌，英國通脹率便上升，但因為樓價下跌壓力大，政府仍將利率降至2厘。小心英鎊出現另一次危機。

隨着美元進入低利率期，歐羅、英鎊、澳元、紐元、加元亦相繼跟隨，即全球將進入低利率期，1995年起日本透過零利率鼓勵利差交易，令圓滙由1995年4月79日圓一度回落至124日圓，不但為日本投資者賺取息差，同時贏咗滙率差，協助日本出口企業獲利。去年8月次按危機壓力下，美元帶頭減息，令日圓利差交易進入拆倉潮。依家日本人利差交易响滙率上損失好大，引發資金回流日本推高日圓滙價，令日經平均指數今年10月創1990年熊市以來新低，並令日本經濟再次進入衰退。全球進入低息期，日圓會否重見80日圓？如重見 80日圓，對日本經濟而言將係另一場災難。今年超過三千間日本建築公司、四百二十五間地產公司申請破產，留下負債250億美元要處理。去年下半年開始銀行界已對日本地產項目收緊信貸，總貸款已由500億美元減少至80億美元。樓價下跌後，東京寫字樓租金回報率由過去2.5％上升到4％（次級者甚至有 5.5％）。唔少外資2003年進軍東京物業，但至今已無利可圖。

奧巴馬提出「改變」，並計劃未來四年增加開支1萬億美元喺教育、退休及福利事業上，但錢從何來？美國同日本唔同，日本政府消費可增加至佔GDP 6％赤字仍然冇問題，因日本人儲蓄率至今仍佔GDP 19％（政府開支上升，來自日本人儲蓄，即荷包跌落肚兜），過去十八年日本投資者虧損15萬億美元，經濟仍可撑得住。美國人儲蓄率接近零，美國政府增加開支需要外資流入去支持。因此，日本政府可長期保持財赤佔GDP 6％，日圓滙價仍冇問題；美國政府財赤如一再擴大，最終必引發美元危機。

美國會否一如九十年代日本，進入「Balance Sheet Recession」？當Marcus Aurelius成為羅馬帝國統治者之後，亦進行一連串改變，可惜野蠻人已壯大，並一再挑戰羅馬帝國統治權。羅馬軍隊疲於奔命，加上國庫日漸空虛，最後羅馬帝國解體。1978年中國改革開放政策來得及時，雖然當年中國經濟上一窮二白，但政治上仍係強勢領導。今天美國人同美國政府已負債纍纍，狂野派對開得太耐（如Change响2001年出現，美國仍有得救），呢次改變會否來得太遲？喺資產負債表衰退壓力下，美國能否頂得住？當資產價格回落，負債必須減少或撥備。以1997年第四季香港太古城住宅為例，一千呎市值1100萬元，業主借銀行770萬元都冇問題。但當樓價跌30％變成770萬元時，負債仍係 770萬元，問題開始浮現，供樓者必須努力減少其他開支去減債，不然將面對銀行清盤壓力。未來樓價每下跌多一D，壓力便增加一DD，最終引發負資產效應，直到2003年9月本港樓價止跌回升為止。日本政府到1995年已將利率降至接近零去幫助供樓業主，另增加政府公共開支到財赤佔GDP 6％危險水平，結果又點？美國家吓情況肯定較1990年日本或1997年後香港差，未來點樣應付呢個資產負債表衰退所帶嚟壓力？

近日美國物業亦吸引外資。吸收咗東京物業經驗，相信未來美國房地產投資價值亦有限。

IMF 主要經濟家Olivier Blanchard將2009年GDP增長率由上月估計3％修正為2.2％（即IMF首次公開認為明年將踏入全球性衰退，因IMF認為GDP升幅不足 3％係衰退）。美國GDP由增長0.1％改為負0.7％、歐羅區由增長0.2％改為負0.5％、日本由增長0.5％改為負0.2％；新興國家由增長 6.1％改為5.1％，中國由9.3％改為8.5％。展望明年，我地將面對美國、歐洲、日本三大經濟體系同時出現衰退，你說怎麼辦?!

唔係人人可做畢非德
當然，如果你擁有畢非德咁財富，你可以將手上現金分為三份，第一份今時今日投入，第二份明年今日投入，第三份2010年下半年才投入，响股價一再下跌後仲係買、買、買。上次畢非德由1975年一直買至1985年（買足十年），問題係你有冇上述財力及耐性?!所以話，唔係人人可以做畢非德。

格拉咸响1932年年中才開始喺《福布斯》寫文章，其後被封為價值投資法鼻祖。格拉咸1976年逝世，佢最出名弟子畢非德喺1960年開始投資，今天成為世界首富，令價值投資法世界知名。值得注意事係──格拉咸喺1932年年中開始推介股份時，正值美股大熊市結束日子；畢非德全力出擊日子係1974 年（另一美股熊市結束期），佢喺1974至84年大量收集廉價美國股票，到2007年10月美股大牛市結束之前，自然表現出色。

格拉咸主張大部分人應投資，投資第一項係保本、第二項才係爭取合理回報。佢老人家並唔反對別人投機，但必須遵守三大條件：甲、明明投機，卻自以為係投資。乙、冇足夠知識及技巧卻學人投機。丙、用你輸唔起錢去投機。各位有冇犯上述三點？

發達十法：

一、創立一間成功企業；

二、成為大企業CEO；

三、成為超級巨星如劉德華、張學友；

四、取得奧運金牌，如體操明星李寧、短跑冠軍劉翔；

五、嫁個有錢人；

六、成為知名藝術家如張大千……；

七、用別人錢從事投機行為（OPM）；

八、寫世界出名小說如《哈利波特》；

九、做房地產生意而懂得把握機會；

十、學會管錢，例如森池兄。今天唔少人先至發覺原來唔少投資銀行係唔識管錢，只知道分花紅；可惜大部分人响金融海嘯發生後才知道。

[ 本帖最后由 四伯爽 于 8-11-2008 12:45 PM 编辑 ]

四伯爽

（此篇文章版权归作者曹仁超）

零利率解決唔到問題
11月9日，周日。上周泰國股市上升12.4％，台灣股市跌2.6％，理由不詳。

10月份美國零售數字可能係2001年經濟衰退以嚟最差一個月，甚至有可能係四分一世紀以嚟最差一個月（11月14日公布）。跌幅最大係汽車。通用汽車（美國最大汽車生產商）10月份銷量減少45％及福特減少30％。11月6日起美國唔少商場已開始聖誕大傾銷；估計今年係2002年以嚟銷售情況最差o既一個聖誕節。密芝根大學消費信心指數11月跌至 56.3，係1980年以嚟最低。入口產品因美元強勢而便宜咗4.4％。

海灣股市受油價下跌影響，跌幅正在擴大。Emaar地產（全中東最大地產公司）已跌至四年內新低；杜拜財務市場指數上周五收2666.64，係2005年2月以嚟最低。

英國財長正在研究減稅刺激經濟！

道指短期走勢未明
道指9月底至今形成敏感三角形【圖】，短期動向未明，RSI下降軌一度失守，但又迅速重返下降軌之下。道指由去年10月15日14118點跌到今年10月10日7882點後，可唔可以進入上落市？

道指出現接近1000點回落後，周五出現「奧巴馬反彈」。迪士尼宣布，第三季純利下降13％；Morton牛扒屋話唔夠客；《華爾街日報》指出，美國人正從高風險投資、奢華嗜好、高級餐廳及名貴產品市場撤退，走向節儉！美國人終於明白節儉係美德，甚至的士乘客亦正在減少。

最新一次o既Keeneland名種馬拍賣，營業額較去年同期減少52％，馬價平均下跌37％。

o係一片利淡消息中，美股上周五上升係因為指數已拋離200天線太多，出現技術性反彈。估計整個11月都係咁，即股市短期對壞消息反應麻木。

o 係熊市中，連大學o既Endowment基金回報率亦下跌。麻省Liberal Arts大學及緬恩州Colby大學宣布，由6月30日至今冇咗25％市價；衛斯理公會o係Middletown 大學宣布延期興建科學大樓，以節省1000萬到1500萬美元開支；康奈爾大學宣布凍結招聘新人及所有新項目；甚至哈佛、耶魯及普林斯頓大學亦感受到壓力。耶魯及普林斯頓大學把70％資金投資o係對沖基金、私人基金、房地產項目上、石油及天然氣項目；哈佛保守D，但亦有57％投資上述項目。過去十年，哈佛Endowment基金每年投資回報13.8％、耶魯16.3％、普林斯頓14.9％及史丹福14.2％；同期機構投資者年回報率6％；而標普五百指數只上升3％。不幸o既事係自6月30日起，上述三大名校Endowment基金平均蝕咗25％。地產信託基金回報係負35％、對沖基金回落20％及新興市場基金回落45％。今年下半年連大學方面o既捐獻基金亦投資失利。

穩定帶來唔穩定，奢華之後係節儉。今天已唔係去Morton牛扒屋o既時候，而係叫Pizza外賣；我老曹係Economic Cycle Research Institute讀者，堅信盛衰循環理論。上周五Weekly Leading Index係負24.6％，代表乜o野？即各位準備迎接一次極速o既經濟放緩（或衰退）。10月份美國失業率6.5％，美國銀行估計，明年第三季失業率可達7.7％，即未來一年美國失業率仍在上升。通用汽車公布，第三季蝕42億美元，截至9月30日止，現金得162億美元，只夠捱埋今年第四季。10月全國汽車銷量下降32％，係二十五年內最差，希望政府挽救。自2004年至今，通用汽車共蝕咗730億美元，如佢破產，約有二百五十萬人失業，通用汽車股價今年下跌82.5％，家吓每股只值4.36美元，係1950年至今最低位，前景極之令人擔心。上周六Franklin銀行成為美國今年內第十八間破產o既銀行，呢間銀行有51億美元資產，其中37億美元係存款。FDIC已宣布接管，25萬美元以下o既存款者獲保障。家吓美國有問題o既銀行多達一百一十七間，估計o係2013年前仲有唔少銀行倒閉。估計FDIC虧損可達400億美元。連股聖畢非德旗下巴都郡亦出現連續第四季純利下降。呢次純利下跌77％，至 10.6億美元（每股682美元，去年同期每股獲利2942美元。嚟自衍生產品蝕咗10.1億美元，估計第四季情況將進一步轉壞，因10月股市及債市皆大跌）；今年內巴郡股價回落20％。

阿特蘭大聯儲銀行主席Dennis Lockhart估計，明年上半年前美國經濟仍在放緩及美元利率將降至半厘。英倫銀行行長金格警告，全球零利率時代將降臨。零利率政策最先由日本銀行採用但無法阻止日本經濟下滑。依家美國同英國已係負利率（利率低於CPI增長率），但無法阻止兩國經濟下滑。相信好快美國進入半厘利率時代，英國進入2厘利率時代。零利率係咪可以解決資產負債表衰退困難？從日本過去o既經驗答案係No。反而迫銀行進入低利率及高借貸風險率時代，令銀行索性減少借貸（即收縮銀根）。高盛證券倫敦分析員Jim O'Neill認為，各國央行迫商業銀行減息，結果反而加速經濟走向通縮，情況好似九十年代日本銀行。o係低利率及高借貸風險壓力下，銀行只會加速去槓桿化o既速度，反而不利經濟復甦。

無法刺激消費
一個正常經濟衰退期需時二點五年至三年，何況呢次係金融風暴？去年10月至今股市只下跌十三個月，短期反彈隨時出現，至於見底？似乎仲太早。以供應管理協會（ISM）指數睇，如高於60點即代表經濟復甦，低於50點代表經濟放緩，低於40 點代表嚴重衰退快嚟到。上周五指數係38.9，o係1982年9月以嚟最低，睇嚟並唔係幾時復甦，而係美國經濟正在迅速惡化。去年美國汽車銷售共一千七百萬輛，根據《金融時報》估計，每個美國成年人擁有一部車計，年需求亦只有一百五十萬部。點解去年賣咗一千七百萬輛？理由係廉價財務或消費者浪費造成。美國人平均五年換一部車，去年唔少人未夠四年便換車；今年已搵唔到任何理由換車，引發汽車業大衰退。由於長期生產過剩，點去處理過剩o既生產力？不但汽車業及房屋係咁，大部分日用品亦係咁，因此甚至降至零利率亦無法刺激美國消費者再增加消費。o係咁o既情況下，美國呢次衰退可維持幾耐？相信較1981／82年及1973／74年更長（甚至把利率降至零）。

二十國財長及央行年會11月8日o係巴西聖保羅開幕，中國人行行長周小川預測，明年中國GDP升幅8％至9％之間。

瑞銀估計，中國明年GDP增長率只有7.5％（或更少）。政府已計劃增加鐵路項目投資及大量興建低成本住宅，去減慢明年GDP下降速度。中金公司首席經濟學家哈繼銘估計，明年中國GDP只有7.3％增長率。駐香港o既麥格理分析員Paul Cavey對明年中國GDP增長率表示極之憂慮，因依家中國GDP增長下滑速度愈嚟愈快，未來六個月似乎無法阻止下滑。渣打銀行中國研究部Stephen Green認為，中國黃金歲月突然停止，估計明年中國GDP增長率只有7.9％。上周中國政府已要求出席秘魯o既財長急急回國商討對策，估計短期內中國將公布刺激經濟方案。德國銀行o既馬俊表示，如果冇刺激方案，明年中國GDP增長率將下滑到只有6％，係極之危險水平。

[ 本帖最后由 四伯爽 于 10-11-2008 08:57 AM 编辑 ]

四伯爽

全球患上「美國病」
上周五內地銀行向媒體表示，明年貸款投向以鐵路、基建及大宗商品為重點，房地產業仍將面臨較為嚴峻o既融資難題。進入今年8月，房價調整已在全國蔓延，多個城市房價已跌回一年前水平。去年大幅上漲o既深圳房價亦開始下跌，奧運之後加上全球經濟衰退逐漸表面化，大家均承認房地產市場寒冬將至，開發商盼望政府救市。由9月15日開始六年嚟首次降低存款準備金率；加上三次減息，但至今成效有限，仍無法阻止房價及銷量下降。

金融海嘯下，香港及澳門樓市都頂唔住。中原城市領先指數上周末為63.45，較上月降6％，即房價已回落30％；依家中原城市領先指數已重返去年11月25日63.33o既水平。其中以西九龍「四小龍」擁有o既四個中檔樓盤跌幅最大，其次係貝沙灣。

澳門樓價今年4月至今跌幅大約30％。例如濠庭都會，最近成價每方米2萬元（去年12月係3萬元）；壹號湖畔依家成價每方米5萬元，去年12月6.2萬元。

美國次按危機已演變成國際金融海嘯，並席捲全球，中國亦無法避免。中國o既海外投資、進出口貿易、金融保險證券、房地產、旅遊及GDP增長率無一不受波及。中國面對海外投資價值暴跌必須撥備；進出口貿易o既資金回收上有困難及訂單減少情況下，明年貿易順差將大大收窄，影響中國勞工就業情況。最近中國政府已降低出口關稅去應付，但收效未見；至於對金融、保險及證券業衝擊只要睇睇滬深三百指數跌幅已可知一二。房地產面對海外投資機構拋售、抽離資金及美國地產危機對中國人購買意欲影響正在浮現。雷曼兄弟已把亞雷投資51％股份出售畀光大控股（165），仍在為24.5％股份搵新買家；與資本策略（497）共同持有 o既SH Fortress Ltd，以4.16億元人民幣價格拍賣。另外，亦為手上o既資本策略股份找尋買家。其他外資公司亦紛紛減持中國房地產項目，令內地房地產面對重大壓力。

全世界都得咗「美國病」，不但國家欠債，連政府、企業及個人都欠債。例如冰島人平均欠債額已超過美國；南韓家庭負債率亦超過美國（韓國央行11月2日宣布，截至今年6月止，韓國家庭應償還年貸款利息達49.9萬億韓圜，佔可支配收入9.8％。韓聯社表示，韓國每戶家庭平均負債3960萬韓圜係歷史上最高）。戰後至今六十多年，全人類都學曉借錢買樓可致富，但日本人自1990年至今借錢買樓卻損失慘重；香港人1997年下半年借錢買樓者，到2003年年中亦好慘，最近五年先叫做透透氣，但今年下半年起本港樓價又再次出現較大幅度回落（今年上半年本港樓價除豪宅外，大部分樓價仍未見1997年上半年水平）。當人人相信一套理論之時，呢套理論往往出錯（群眾常常作出錯誤決定）。2006年後美國人亦開始後悔買樓；2007年後英國人亦開始後悔買樓；2008年起中國人亦加入後悔買樓行列。隨住戰後嬰兒步入退休潮，各國樓價一個接一個進入回落潮。

金價低於700美元可收集
黃金後市又點睇？今年 3月由每盎斯1036美元回落，到底係牛市結束，定係牛市中另一次調整市？1973／74年美股大跌後，聯儲局大量提供資金，刺激道指o係1975年回升。八年後美國通脹率達18％、失業率11％及利率21.5厘。擔心2007／08年甚至明年上半年美股o係度重演1973／74年（共二十三個月）o既歷史。由去年11月起計，美股下跌已超過十二個月，估計熊市明年年中完成，然後進入復甦。未來將出現惡性通脹、高利率及高失業率期。黃金價格如低過700 美元應開始收集。

隨住陳江會談後，兩岸將由小三通轉為大三通。三通概念已炒咗好耐，最終落實，而最受惠係廈門貨輪港口及機場。估計廈門港口將取代日本石恒港及香港中轉站地位，而帶動福建省GDP增長。無論海運、物流、旅遊、房地產、高科技及金融服務業都受惠。航空方面，相信上海航空、南方航空（1055）及中國國航（753）受惠，因每周兩岸直航班次增加三倍，但對本港航空業影響唔大（因本港國際機場已無法應付不斷上升o既新需求）。

不過，澳門方面影響就好大，過去有44％台灣客取道澳門作為中途站，而澳門至今航空運量仍唔夠。兩岸直航班次大增後，估計明年兩岸直航客約二百四十萬人次，最大受惠者係上海機場，因35％台灣客居住o係長三角地區。海運方面，估計香港失去6％直運貨量及7％轉運貨量，令港珠澳大橋興建價值大減。大三通對香港經濟影響好細，反而澳門經濟卻係雪上加霜。



[ 本帖最后由 四伯爽 于 10-11-2008 08:58 AM 编辑 ]

四伯爽

（此篇文章版权归作者曹仁超）

波浪理論等同事後孔明
11月10日，周一。恒生指數升501.2，收14744.63，成交607.1億元。即月期指升537點，收14737點。滙控（005）為美國次按再撥備43億美元，但有足夠資本應付而唔使英國政府幫手。2003年滙控收購Household後，一度成為次按最大貸款戶，但因及早止蝕，所受影響喺可控制水平；今年股價只回落11％，係六十九間歐洲大銀行中表現第二出色銀行；理由係佢吸收存款能力強勁，而唔使好似皇家蘇格蘭銀行、HBO及萊斯銀行等，要出售370億英鎊股份畀英國政府去增加股本。今年第三季滙控業績已較去年同期更出色，第一級資本比率（Tier one）高達8.9％，超過國際標準8％水平。

內地又見政策市
中國鋁業（2600）宣布，把氧化鋁售價由每噸2900元人民幣下調至2600元人民幣，今天股價升19％；中鐵建（1186）升20.2％、建設銀行（939）升7.6％、安徽海螺（914）升31.4％及中石油（857）升8.2％。不過，聯想（992）跌13.5％，因摩根士丹利睇淡。

由去年10月30日恒指31958點回落到今年3月18日 20572點，總共下跌11386點，反彈至今年5月5日26387點，上升5815點，升幅係前跌幅51％。呢次由今年5月5日回落到10月27日 10676點，下跌15711點，如反彈前跌幅31.8％約5000點，上望15676點（最少升幅）。如反彈前跌幅50％，可見18531點。10月 27日至今恒指已上升35％。
特區政府提供100億元（特別信貸保證計劃）為中小企信貸作出擔保，中小企可獲50萬元循環貸款，其中70％由政府擔保，信貸計劃12月推出，為期兩年；另一貸款計劃貸款額達1200萬元，由政府擔保50％。上述計劃周三交立法會審批，如通過，12月可實行以協助本港中小企解決資金周轉困難。


用波浪理論分析大市，今年3月18日20572點係浪1；5月5日26387點係浪2；10月27日 10676點係浪3，依家行緊浪4，估計喺15767至18681點之間任何一點完成，然後再行浪5（即終極一跌。細波浪分析由今年7月24日23369 點起計，到10月27日已完成1、2、3、4及5下跌浪，家吓喺a、b及c反彈浪）。我老曹1978年起學習波浪理論，到1997年前放棄，因發現波浪理論事後解釋幾好，但用佢推算未來，就錯漏百出。初期以為自己學藝未精，後來發現國際級波浪大師Prechter亦錯得離譜；咁樣我老曹只用作印證已發生嘅事，唔再用嚟預測未來。

七十及八十年代係我老曹最醉心走勢時刻。例如GANN（江恩理論）、ARIMA、TORGUE（扭力走勢）及 Cycle Timing（循環理論）等都曾經研究過，甚至較偏門嘅走勢分析如Square Root of Sharpe及Stone's and Okham's Ratio亦有研究，但1997年後反璞歸真，重新相信基礎分析，另配合各種各類技術分析；最常用係Cycle Timing。基礎分析有如力與健，任何功夫如無氣力及健康身體，一切皆枉然。技術分析已集各派武功取其優，一如李小龍嘅截拳道，做到後發先致。旺市莫估頂、淡市莫估底，搵到頂或底後先攻擊。例如去年10月見頂後，11月先睇淡，因為太早睇淡及太早睇好都係死罪。請唔好再扮先知。

滬深三百指數今天升7.38％，收報1801.67，創下七周來最大升幅。三百間成分股中有四分一漲停，主力有鋼鐵廠、水泥廠及機械股，只有兩間下跌，屬典型政策市。政策市通常只會支持三幾天，小心大升後又再回落。

奧巴馬上台後，對美國經濟是禍是福？透過增加稅收去擴大政府開支，如果上述方法成功嘅話，又點解釋1990年到依家日本經濟嘅停滯期？分配財富同創造財富，自古兩難存：鼓勵創造財富必帶嚟社會兩極化；着重分配財富，經濟又往往停滯不前。奧巴馬亦跳唔出呢個框框。

英倫銀行上周四減息一厘半後，未來世界各大銀行嘅減息消息再不能引起太大刺激嘞。

日本政府上周五宣布，放寬本地銀行資本負債比率。根據國際會計標準，日本銀行必須把未兌現虧損60％由Tier one核心資本中扣除。如果係咁，可引發日本另一次信貸收縮。上周日本政府批准銀行喺2012年3月前可以唔遵守國際會計標準入賬，以及毋須把虧損按市值入賬，令周一日經平均指數上升。

能源股未來最傷
本周有二十一隻標普五百成分股公布今年第三季業績，其中兩隻係道指成分股，擔心業績公布令投資者失望。根據Thomson路透統計，今年第三季標普五百企業純利上周五估計數字係負增長13.9％（對上一周係負11.7％）；金融業負 107％（上周係負94％）。至11月7日止已有四百二十二間企業公布業績，59％較預期高、10％同預期近接及30％較預期低。對第四季純利展望估計可上升24.7％（7月1日時估計可上升59.1％）。較對上周前估計升28.8％又降低。第四季P/E為十一倍（前四季平均P/E十三點三倍）。標普五百指數中，有四百二十二間公司已公布第三季業績，純利平均減少14％，係連續第五季減少；呢個情況只喺2001至02年曾出現。業績仲未包括雷曼兄弟破產所帶嚟嘅衝擊，因為公布時已接近9月底，衝擊大部分喺10月份才出現。分析員估計，今年第四季純利只上升25％（之前估計上升47％）及明年第一季只上升 6％（一個月前估計上升25％）。明年純利上升13％嘅機會相信好微（如衰退出現）。根據MKM Partners分析員Michael Darda統計，喺衰退期分析員純利前景估計通常高估30%至35％。參照過去情況，Darda估計，明年標普五百純利應該回落13％，而唔係上升 13％。Ablin Harris Private Bank分析員相信，大部分分析員仍假設明年經濟會出現V形反彈，但佢相信隨住油價回落，明年企業純利進一步下跌嘅機會好大。今年最傷嘅行業係金融服務業，未來應係能源股。大部分投資者希望透過政府強力干預去阻止經濟進一步下滑，能否成功呢？以三十、七十及八十年代熊市P/E見底時都係單位數去睇，依家明年P/E估計仍高達十三倍；加上企業邊際利潤2006年第三季見頂，但家吓正在收窄。P/E十三倍唔算貴，亦唔見得便宜。

惠譽估計，明年第一世界GDP收縮0.8％，係第二次世界大戰後最嚴峻一次收縮期，引發金屬及石油需求增長率及價格下降；而且流向新興市場嘅資金亦大減。近日聯儲局、英倫銀行、歐洲央行及IMF倡導減息，希望減少短期流動性收緊壓力。雖然係咁，但面對嘅衰退，相信係1980年至今最嚴峻一次。嗰D愈依賴外資流入嘅新興市場所受影響較大，對外資依賴度唔高者所受嘅影響較少；其次係對商品依賴度細嘅新興市場所受影響應唔及對商品出口依賴度高嘅國家。甚至中國亦無可避免受影響。惠譽估計，明年中國GDP增長率只有7.2％，係近十年內最低，但已係全球最高GDP增長率國家。中國政府宣布，推出4萬億元人民幣刺激經濟方案，相等於去年中國GDP 16％或2006年中央及本地政府全部開支。項目包括房產、農業、基建、醫療、社會福利及向資本開支上升嘅公司退稅，以維持明年GDP增長率有8％，以壯本周六中國參加G20會議時嘅聲威；呢個方案較美國政府年初推出1680億美元刺激經濟方案大三倍，何況1680億美元只佔美國GDP 1％，而中國呢個方案卻相等於中國GDP 16％。甚至較日本550億美元方案大十一倍。中國政府呢次真係財大氣粗。摩根士丹利認為，如冇刺激經濟方案，明年中國GDP增長率可能回落到只有5％至 6％，將引發好多問題，有咗刺激方案可令明年GDP增長率保持喺8％至9％之間，同時可確立中國喺美國及歐盟之外嘅另一股勢力。1998年面對亞洲金融風暴，中國政府亦大力增加投資對抗境外需求減少，家吓面對相同問題，中國照辦煮碗。有人建議中國政府取消（或降低）增值稅，可令企業開支每年減少1200億元人民幣一年，大大刺激內需。

中國經濟學家常修澤表示，擴大內需有兩個方向：一個係消費性內需；一個係投資內需。前者較後者難度要大，因為城鄉老百姓收入唔大幅提高，點樣增加消費？去年佔六億人口嘅農民年收入只有4000多元人民幣，點樣增加內需？至於投資內需主要嚟自政府及企業，4萬億元人民幣刺激經濟方案主要係基建設施、環保及創新型投資，對消費性內需唔一定有利。

四伯爽

中國擴大內需有難度
中國內需市場好細，消費只佔GDP 36％（美國超過70％），投資反佔42％；投資主要係服務出口需求。點樣擴大只佔GDP 36％消費性內需去抵銷出口方面嘅增長率萎縮？去年大量資金湧入中國，炒人民幣升值，刺激A股及樓價暴升，今年無論A股及樓價皆暴跌。去年雙盈餘（貿易及資金淨流入盈餘），造成流動性泛濫，央行曾大量發債及提升存款保證金率兼加息，仍無法全部吸收過剩資金，而引發資產價格膨脹。今年外貿盈餘減少，流入資金亦大減；加上美元至今年6月前貶值，令中國外滙儲備相對冇咁值錢。全球流動性進入退潮期，未因各國刺激方案推出而改變方向。

日本政府好擔心通縮重臨；如唔包括新鮮食品，估計未來一年核心通脹率已降至零，而唔係先前估計1.6％。美林證券日本分析員Takuji Okubo估計係負0.4％。通縮令日本自1999至2005年經濟不前，由於日本利率已接近零，無法再利用減息對付通縮，而近日日本滙價一升再升，擔心 2003至08年上半年嘅經濟增長期又告一段落。大和證券分析員Teizo Taya擔心類似情況將喺美國出現；日本經濟陷入通縮背後理由係日本工資甚至喺企業獲利上升期無增長，以便同中國及其他鄰近國家競爭；呢個情況令日本人消費欲下降，企業為咗刺激營業額上升，只有推出低價產品去競爭市場，引發通縮。

全球GDP齊萎縮
全球經濟正步入衰退期，最大理由係銀行Tier one資本在萎縮中。喺金融危機發生前，全球金融機構Tier one資本約5萬億美元，其中美國同歐洲佔3.3萬億美元，去支持一個43萬億美元嘅借貸市場。今年如全部投資按市價入賬（mark to market），全球金融市場Tier one資本將減少85％，引發去槓桿化。雖然大金融機構不斷向外集資甚至政府向銀行注資，仍無法填補過去一年金融機構Tier one資本虧損。金融危機前，美國同歐洲金融機構借貸比率係Tier one十三倍，家吓已超過二十六倍，即金融危機前槓桿比率早已偏高；加上世界經濟進入每增加4至5元信貸，才可刺激GDP增長1元；換言之，世界必須每年增加10%至15％信貸，才可令GDP增長2％到3％。唔好話信貸收縮，甚至信貸無增長，世界GDP已面對萎縮期。响金融危機中，已知虧損1.7萬億美元，已入賬7000億美元，即未來仍有9000億到1萬億美元虧損要入賬（今年唔少政府批准銀行可不按市值入賬）。各金融機構透過集資及政府注資，依家 Tier one資本大約23萬億美元，即年底槓桿比率仍超過十八倍，大大超過國際結算銀行公會要求（十二倍）或以下，即借貸市場仍要萎縮37％先合格（已假設金融機構喺未來唔再虧損）。第一世界國家至今仍無法擺脫信貸收縮，咁嗰D新興國家能否背道而馳（Decouple）呢？去年10月Decouple論好流行，我老曹去年已指出，一旦衰退，新興市場所受影響較第一世界有過之而無不及（因為當有錢人唔食鮑翅時，窮人往往冇飯食）。今天第一世界响去槓桿化之時，自然減少資金流向新興國家，甚至將資金由新興國家抽回；加上第一世界國家家庭及企業負財富效應亦大大影響新興工業國產品出口，家吓已波及原材料及能源生產國。

[ 本帖最后由 Mr.Business 于 11-11-2008 09:38 AM 编辑 ]

四伯爽

（此篇文章版权归作者曹仁超）

刺激經濟方案杯水車薪
11月11日，周二。恒指14000點一度失守，收報14040.9，下跌703.73，成交543.8億元。即月期指冇咁好彩，下跌767點，收報13970點，期指倒掛現象又再出現。太陽陳來電話：「恐怕反彈已完成，投資者對後市宜多D戒心。」真係語重深長，但幾令人洩氣。
花旗推介中國海外（688），估計今年每股獲利7角，升23.7％，P/E十四點三倍，目標價16.08元；冠君產業（2778）估計今年每股獲利11仙，減少 90.2％，P/E十五點三倍，目標價2.54元；駿威汽車（203）估計今年每股獲利28.4仙，減少1.5％，P/E五點四倍，目標價2.1元；遠洋地產（3377）估計今年每股獲利36.2仙，減少33.7％，P/E六點一倍，目標價5.39元。
今次好難復甦

4萬億元人民幣刺激方案令滬深三百指數只上升一天，今天又回落1.13％，收1781.36。中國10月份出口只上升19.2％（9月上升21.5％），入口上升15.6％，外貿盈餘上升，至352億美元，因原材料跌價及入口需求下降。

拉斯維加斯金沙集團計劃集資21.4億美元，宣布暫停澳門威尼斯人賭場擴建，另計劃向一中資銀行借入7億美元作為興建上述項目。截至6月止，該公司負債資產比率達80％危險水平，停牌前股價再跌6.3％，收報7.5美元，較去年最高價回落92％。呢場豪賭原來最大輸家係賭場。
1997年7月2日亞洲金融風暴，當時MSCI指數304.8至1998年9月1日低潮MSCI指數124.8，跌幅59.1％，共三百零四個交易天；當年P/E下跌至九點四倍。今天面對全球金融海嘯，亞洲區情況應該唔會較1997／98年嗰次差。一嚟風暴唔喺亞洲而喺北美洲；加上中國及印度經濟已冒起，令亞太區對北美洲同歐洲依賴唔及當年咁大，因此宜趁低吸納。呢個係摩根士丹利公司嘅分析，各位點睇？

全球衍生產品泡沫爆破，去年10月前喺本港大量出售嘅 Accumulators，包括股票、外滙同商品，殺傷力逐漸浮現。Synthetic CDO被包裝成高息債券，透過銀行及保險公司出售畀投資者（部分銀行及保險公司自己都有購買）．所引發嘅殺傷力亦好大（呢D債券唔係只有雷曼迷你債券）。對港人財富所帶嚟嘅破壞唔會較1997／98年亞洲金融風暴細。
仲有日圓利差交易，當全球其他貨幣皆走向零利率時代，資金回流日本及美國所產生嘅威力亦好大。

AIG、房利美、房貸美、通用汽車及美國政府能否無止境地提供信貸而唔使付出代價？今年第四季財政部計劃借出5500億美元，明年第一季3600億美元（仍在上升中）。
一個月票據與三十年債券利息差在拉闊，兩年同十年債券息差高達2.47厘，過去只响1992及2002年出現過，兩次都响經濟衰退快結束期因短期利率急跌結果；呢次唔同，卻係十年期利率上升結果，因擔心政府發債去支付bail out。


2003 年8月兩年期債券與十年期債券利率高出2.74厘，理由係聯儲局剛完成十三次減息，投資者估計復甦而大量借入兩年期債券作投資之用。不過，呢次今年第三季 GDP收縮0.3%（彭博估計，第四季GDP將收縮0.8%）；高盛證券估計，明年美國GDP將收縮2%，假設未來十八個月喺經濟復甦環境下，令兩年期債券利率降至1.33厘，十年期債券卻升上3.83厘。即係代表信貸收緊，財赤上升，分析界首次猜測零利率喺美國出現，經濟進一步向下。

呢個形勢對奧巴馬上任不利，估計佢上任後，明年美國經濟將進一步惡化，資產負債表衰退繼續，美國呢次面對嘅唔係一次普通性周期衰退，而係一次資產負債表衰退，情況同九十年代嘅日本接近，因為金融機構失去太多資本而收縮信貸，呢個衰退很難復甦。

金價650美元有支持
好多人都唔信會出現通縮，美國只喺1929至33年曾出現過，因消費減少令價格下跌。今年10月通用汽車銷售減少45％，豐田汽車喺美國銷售亦減少 26％，10月份美國因就業人口減少二十四萬（連續十個月回落）人會唔會引發美國通縮？第二次世界大戰後，美國每次衰退，政府便大印鈔票，戰後一代從來唔知咩係通縮？只有日本人同港人喺1990及97年後先真正經歷過CPI負增長，美國人就從來未經歷過真正嘅通縮。

油價今年由150美元急跌至60美元、銅價由6月時每噸8900美元跌至3800美元及鋁價由每噸3000美元跌至1900美元；再加上減債及失業率高企，甚至喺政府大印鈔票下，明年美國CPI出現負增長機會好大。

美國明年將獲一位新總統去處理老問題，不幸嘅現實係大氣候與小氣候，不會因人嘅主觀願望而改變。去年10月至今唔知幾多次投資者希望尋底，但一次又一次底部失守；家吓道指最低係今年10月10日7882點，並在此形成上升三角形。最終能否建立底部而上升定係經一個多月上落市後，失守7882點？要事後才知道。

金價已回落前升幅50％，喺640至650美元之間有強大支持，除非回落前升幅61.8％才可見550美元。我老曹傾向相信喺640至 650美元守住，因為美國政府正進入1萬億美元財政赤字期（甚至上升到1.4萬億美元財赤）。過去投資銀行槓桿比率達到1比40，即每100元投資中只要出現2.5元損失，投資銀行便失去全部股東資金。2007至08年投資銀行點止每100元投資損失2.5元？紐約市長彭博估計，未來有十四萬金融從業員失業。工業亦唔見得好，10月份通用汽車銷售額下降45％、福特下降30％、日本本田汽車下降25％及豐田下降23％。美國三大車廠要求政府注資250億美元，唔係就宣布破產。FedEx及DHL已齊齊宣布減少喺美國嘅業務而裁員九千五百人，理由係呢D業務一直處於虧損狀態。德銀指出，通用汽車及福特汽車股價真正價值接近零，如政府肯注資則每股約值1美元。10月份美國失業率6.5％係1994年以嚟最差，估計明年可上升到9％（1981／82年美國失業率達11％）。

早幾個月前，美國政府決定注資挽救AIG，本周二公布所需資金1525億美元（分析家指出仲未夠）。新挽救方案包括財政部認購 400億美元AIG優先股及提供600億美元貸款。房利美剛公布第三季蝕咗290億美元，要求財政部年底前再注資。截至9月30日止，資產淨值只有94億美元（7月1日414億美元），如政府唔注資，年底將陷入負資產。周一收報72美仙（去年11月14日47.82美元）；房貸美周一收報88美仙（去年 11月14日44.19美元），短期內公布第三季業績，估計亦要財政部再注資。房利美手上未售出接管返嚟嘅物業共六萬七千五百一十九間（三個月前五萬四千一百七十三間），你說怎麽辦？

中國政府上周末宣布4萬億元人民幣刺激經濟方案（相等於2006年16％ GDP）；再加上寬鬆貨幣政策支持2009及2010年中國GDP保持8％增長。中國希望以內需代替出口，成功與否，木宰羊。長久以嚟中國一直推行國富民窮政策，點樣擴大內需？4萬億元人民幣聽落好似好多，喺美國只係挽救一間AIG已動用1850億美元（1.3萬億元人民幣）；再加上房利美同房貸美已相等於4萬億元人民幣。換言之，中國刺激經濟方案真係杯水車薪而已；請唔好再相信Decouples論，因為全球經濟早已一體化。波羅的海乾貨輪指數更嚇人，一下子便跌至829點，即三個月內下跌93％。

四伯爽

三方法避免自我毁滅
摩根士丹利CEO麥克接受CNBC訪問時承認過去嘅槓桿比率係31比1，家吓已降至20比1，但唔少歐洲大金融機構仍然處於40比1；換言之，去槓桿化早已成為不可阻止嘅大趨勢。
格蛇上周五喺多倫多午餐例會上表示，世界經濟已進入嚴重衰退，美國GDP喺今年第四季將明顯下跌！美國樓價喺見底前再跌5%至10％，估計最快明年上半年才見底。過去習慣經濟見底後便復甦，但佢唔肯定呢次經濟見底後立即復甦；可能牛皮一段日子後又再回落，但佢唔打算再預測，因為喺呢方面一無所知。

作為投資者應避免走上自我毀滅之路，其中包括：一、明白呢次危機係無可避免，係必然會發生，問題只係遲與早；二、唔好估底。估底係失敗投資者遊戲，成功投資者唔會參加。短期超賣必然出現反彈，博到又點；三、要有耐性。通常熊市較估計中長，千祈唔好感情用事。喺金融海嘯中，人們會拋售一切可變錢嘅項目。

投資者一動不如一靜
金融海嘯嘅威力由9月15日開始橫掃全球，各國政府互相合作欲挽狂瀾。政府嘅能力相較金融海嘯威力，就好似怒海中一葉輕舟，完全唔受控制。股市、滙價及商品價格波幅之大，我老曹一生未經歷過。一位揸帆船老手（唔係練乙錚先生）同我老曹講，駛帆船出海，如遇上順風順水真係一種享受；一旦驚濤駭浪，根本上無法控制嗰艘帆船，執番條命都算你好彩。家吓D投資者如喺怒海中行走嘅帆船，一樣係咁無助。請唔好喺咁極端嘅情況下作任何決定，因為你唔係股聖畢非德。股聖嗰艘係巨型航空母艦，你只喺揸隻小帆船。小心大部分金錢喺博反彈中冇咗。過去嘅數字證明，一般人預測股市成績往往較風水佬睇流年更差，如你仍相信預測，不如搵蘇民峰好過。

有台灣經營之神之稱嘅王永慶死後留畀子女一封信，佢認為，財富雖然係每個人都喜歡嘅東西，但它並非與生俱來，亦唔係任何人可帶走嘅東西。它係人經過努力後可能累積或多或少嘅財富。生命終結時只有歸還社會，無人可以例外。我地應視財富為上天嘅託付，必需妥善管理及支配，因為冇人可真正擁有它。
王永慶出身貧困家庭，經努力後有所成。佢對社會作出實質嘅貢獻，而認為不枉此生；佢希望子女亦能充分了解財富真正意義，為企業而努力經營及造福社會，不忘奉獻而唔係只以私利為追求目標，才能有宏偉嘅見識及胸襟，發揮智慧力量而不負生命嘅意義。

呢幾個月嚟，我老曹最大嘅感動係喺金融海嘯中，相信讀者們亦面對唔多唔少嘅損失，但大家仍關心農家女技術訓練學校。有D更透過我老曹嘅秘書美寶小姐取得農家女內地銀行戶口直接滙款往北京；有D信賴我老曹，把善款存入個人支票戶口，因我老曹另一筆嚟自天地圖書公司版稅（即前五本著作，仍有銷路），12月收到後，連同各位呢幾個月內嘅捐款，一齊滙上以節省滙費。捐款有大至10萬元（早已代滙上），亦有小至200元；一切隨心。能夠捐助10萬元嘅讀者們，恭喜你，呢D代表你有能力，願上天祝福你同你嘅家人；至於捐助200元者，更加祝福你，可能你自己生活仍未到豐足階段，但已開始關心較自己不幸嘅人。呢顆善心日後必獲得報酬。我老曹出版嘅新書《論性》，便是深入探討性格對投資成敗嘅影響。上周五嚟自農家女學校校長嘅好消息，今年創校十周年籌款活動中，獲善款共 50萬元人民幣，其中唔少嚟自港澳同胞嘅滙款。認真多謝各位支持。每個國家及民族，都有自己獨特嘅哀傷，亦有自己美麗嘅一面。過去百年歷史，中華民族哀傷事多，美麗事少；作為港澳人士，我地冇能力減少中華民族過去嘅哀傷，卻有能力為佢加添一分美麗。幾十年嚟，港澳人士為祖國所提供嘅各式各樣捐款，正好為中華民族哀傷嘅面孔添上一分美麗嘅笑容，令國內貧窮人士破涕為笑。呢D亦係王永慶先生嘅遺願。

四伯爽

（此篇文章版权归作者曹仁超）

中國應擴大消費而非基建
11月12日，周三。恒生指數跌101.81，收13939.09，成交472.4億元。即月期指跌208點，收13762點，低水，後市繼續睇淡。

Tontine Associate LLC宣布，由於旗下兩大對沖基金Tontine Capital Partners下跌77％，以及Tontine Partners下跌77％，所以把兩者清盤；主因係商品價格大跌。公司仍繼續營運二十五個基金，涉及資金70億美元。基金公會估計，今年約有七百個基金需清盤，較去年上升27％。

G20會議隨時變口水會
英鎊兌美元至今跌22％及兌歐羅跌11％；周二見1.5388美元（去年11月見2.116美元）。上一次相同跌幅，令英國响1992年擺脫衰退，但呢次卻不行，主因係貿易夥伴如歐盟及美國一樣陷入經濟衰退。睇嚟要到2010年英國經濟才能由呢次英鎊貶值中受惠。10月份英國製造業經理指數出現近七年嚟最大收縮（出口佔英國GDP 40％，製造業佔GDP 15％）；理由係英國必須同低生產成本嘅國家競爭市場，令電器產品出口大減，雖然藥品出口大增，但唔少英國產品早已喺英國以外地區生產，所以未因呢次英鎊滙價回落受惠；反之，CPI卻因英鎊貶值，令入口成本大升推高未來嘅通脹率。

殊仔邀請二十個國家阿頭出席11月15日峰會，代表全球GDP 90％及包括十個新興經濟國，但奧巴馬唔想喺殊仔任內出席呢個G20會議，令G20峰會大為失色；加上每個國家代表只有十五分鐘發言時間，恐怕變咗口水會。响1992年，代表民主黨嘅克仔擊敗對手老殊後，迅速通過《訊息高速公路法案》，引發互聯網經濟井噴。互聯網及IT產品業發展亦改變咗金融同投資業運作方式，例如網上銀行及網上投資等，大量新嘅金融工具被開發出嚟。到2000年，代表共和黨嘅殊仔上台後，對貨幣及財政政策採取寬鬆態度；2003年輪到金融及投資業出現井噴。衍生金融產品透過互聯網推廣成為高增長行業，但不幸地導致今年嘅金融海嘯。奧巴馬提出嘅改變，又將帶來乜嘢？高盛前投資銀行家塔伯特出咗本書《奧巴馬經濟學》；指出奧巴馬強調係公平，佢認為共和黨喺稅收政策上過分討好富人，咁樣雖然帶嚟2003至07年嘅金融空前繁榮，但同時引發出今年金融海嘯。因此佢主張管制金融利益集團而唔係扶持；至於點樣幫助因呢場金融海嘯而失去屋企嘅窮人？奧巴馬主張增加教育、公共衞生等開支及窮人福利，令佢地有能力去自力更新。其他如環境保護及能源方面嘅策略，似乎只停留喺批評，而未能提出可行嘅解決方案。

奧巴馬能否成功解決金融海嘯所帶嚟嘅影響？根據紐約大學教授魯賓尼喺11月11日嘅最新發言，佢持否定態度。佢擔心美國將經歷一次較1974／75年或1981／82年更嚴重嘅衰退，估計一直到明年年底，失業率升至9％及GDP下降4％。相信V形反彈唔會出現，U形（十八至二十四個月）已成最樂觀估計。出現日式L形衰退機會亦唔大，但 2010年復甦，而GDP只上升1%至1.5％，最多係2.5%至2.75％。因奧巴馬所繼承嘅係五十年嚟最嚴重嘅一次衰退，財赤高達1萬億美元及去槓桿化高速進行，引發信貸壓碎。數以百萬計美國家庭將陷入負資產，甚至引發通縮。利率降至接近零，仍無法阻止金融資產下跌。歐洲、英國、加拿大、日本及澳紐受美國影響較大，中國GDP增長率明年將降至6％，已係全球中最好一個。估計所有第一世界國家明年CPI升幅少於1％。

恐難再成救經濟妙藥
中國10月份出口只上升19.2％（9月份21.5％；去年全年25.7％），入口上升15.6％（9月份21.3％；去年全年21.3％）。入口往往走在出口之前，即代表明年中國出口增長率進一步減弱，相信係最近政府提出4萬億元人民幣刺激方案背後嘅理由，希望增加內需（加快基建項目投資）去保持2009 及2010年GDP 8％增長。剛結束嘅廣州秋交會，十七萬四千五百個買家只落315.5億美元訂單，較去年減少15％。利好消息係10月份CPI升幅只有4％（9月份 4.6％，2月份8.7％），代表中國仍有減息空間。

10月份全國發電量按年下跌0.46％，係1999年以嚟首次衰退。今年1至9月全國發電量升9.9％及用電量升9.67％，一D高耗電量省份如廣東、山東及江蘇最先出現負增長，亦係近十年少見；9月發電量只升3.4％，10月更出現負增長；例如中法合資東風雪鐵龍公司宣布裁員一千名員工；奇瑞汽車、長安福特及江淮汽車等傳出裁員消息。沿海地區工廠倒閉，導致民工失業返鄉潮已唔係咩嘢新聞，而係每天發生嘅事。政府估計，加大鐵路投資可創造八十萬個職位，但相對製造業裁員潮只係杯水車薪。

過去三十年，基建項目投資年增長率平均20％，較GDP升幅大一倍，過去三十年新建超級公路三萬里，估計到2020年達五萬三千里（美國亦只有四萬七千里。美國接近所有成年人有車牌，中國只有十分一人有車牌，中國公路係咪已進入overbuild？有D窮省份超級公路因冇車行，農民用嚟曬榖物）。去年中國出口1萬億美元產品，佔全球總出口量 9％，喺呢個水平下，未來中國出口增長率有幾多？呢次中國動用4萬億元人民幣投資微利房、水利、能源及機場，其中7000億元人民幣興建新鐵路。中國家吓已係世界第四大經濟實體，大量投資基建可令中國响硬件上漸漸追上美國、日本同歐洲。

明年1月1日生效嘅增值稅轉型改革：
一、企業新購進設備時唔再採用退稅方法，而一如原材料咁採用直接抵扣，並喺全國推行，取消地區及行業限制，以鼓勵新投資；
二、房屋建築物汽車遊艇等不動產不能抵扣。生財工具如新機器、機械及生產設備才可扣稅。上述不限進口或國產，一律採直接抵扣；
三、過去小規模納稅人按工業及商業分別適用6％及4％徵稅率，明年起一律改為3％，將大大減少中小企業稅務負擔；
四、增值稅由1994年訂為13％，明年提升到17％，令礦產品成為唯一面對加稅行業；金屬及非金屬礦產價值稅一律由13％恢復到17％，以保護資源。

自鄧小平1978年提出開放改革政策後，每次中國面對經濟增長放緩，政府就大力投資基建，其後經濟便復甦。投資基建似乎成為對抗經濟衰退嘅靈丹妙藥，往往藥到病除。呢次中國振興經濟方案，係咪另一次靈丹妙藥？如睇睇日本1990年至家吓亦大力投資基建項目，包括興建海底隧道至北海道或跨海大橋到海中心孤島，卻不能振興日本經濟。過去三十年中國一直處於基建不足嘅情況下，當道路建成及交通發達，自然帶動經濟向上。因此過去每遇經濟衰退，由國家帶動嘅投資基建項目，全國經濟好快又好起嚟；反之，日本基建已相當發達，1990年再投資基建變成浪費資源，例如係咪值得花幾千億美元興建通往北海道嘅海底隧道？或花幾十億美元興建跨海大橋通往海中心孤島？依家中國應擴大嘅唔係基建項目，而係消費。中國人消費只佔GDP 40％（美國80％、日本68％、台灣73.3％及香港90％），中國問題係儲蓄率太高，消費不足。由1990年起，中國人消費佔GDP比重不但冇上升，反而一直下降，呢個情況不但產生大量外貿盈餘，令人民幣升值打擊出口，同時造成流動性過剩，引致去年嘅股市大牛市最後變成大熊市。

四伯爽

真正問題係消費
消費、投資及儲蓄三方面都要均衡。開放改革三十年後嘅中國係咪應鼓勵投資而壓抑消費？咁樣做好易走上日本之路。中國人過分強調節儉係美德，响農業社會係正確，但响工業社會係唔正確。如人人節儉，產品便滯銷、工廠裁員及社會出現不景氣；反之，產品暢銷、工廠大量擴充及社會出現繁榮。

大摩嘅亞洲區總裁羅奇認為，美國人需要增加儲蓄，而中國人同日本人需要增加消費，才可挽救呢場金融海嘯。

內地專家建議提高個稅起徵點，可拉動消費性內需。「十一．五」規劃將個稅起點由800元調高到家吓嘅2000元。今天月入2000元點可以算係富人？應該大幅提高到5000元先合理。
中央財經大學稅務系黃樺教授表示，依家消費者購買一套房產證未滿五年出售要徵收5％營業稅，以及個人賣房所得淨收入要繳納20％個人所得稅，呢個係令內地二手房無法活躍嘅理由，未來應下調以刺激二手房交投，從而活化房地產買賣。

一個經濟繁榮期一般可維持三點四至三點七年，一個衰退期可維持十三點一個月至十八點五個月（只有喺大蕭條期才維持四十三個月），由去年10月起計至今，已有十三個月衰退期，有三分一機會恒生指數喺10月27日見底；最大機會恒生指數喺明年3月或4月見底，即共衰退十八點五個月。

令經濟再度繁榮嘅方法係投資回報超過利息回報，令工商界重新借錢投資，直到通脹率上升，令利率升至某一水平，工商界決定唔再借錢投資為止。點解去年9月至今減息，但股市去年10月反而回落？就係因為企業獲利率急跌，包括開支上升及消費者減少消費。所以話第一次減息係出貨訊號，最後一次減息先係入貨訊號（但邊次係最後一次？木宰羊）。

彭博訪問五十九位經濟學家後得出嘅結論係，佢地估計今年第四季GDP下降3％，明年第一季GDP下降1.5％，擔心呢次衰退係近七十年內最後一次，較1990年嗰次長，甚至較1981／82年嗰次長。

估計明年標普五百獲利不但唔會上升15％而係回落15％，令標普五百指數喺未來再下跌20％或更多（極限35％）。金融市場虧損將達1萬億至2萬億美元。不但次按受影響，連Prime Mortgages亦受影響，例如商業樓宇、信用卡、汽車貸款及學生貸款。換言之，今年11月起未來六個月，股市仍係下跌機會大過上升。商品價格再回落 20％，金價可見650美元，美元响明年年初開始回落（由強轉弱），但未來半年Cash is King。

1929年9月道指381.17，要到1954年11月先升穿，共二十五年；1966年1月18日道指升穿1000點，要到1982年11月先再升穿，前後共十六年；去年10月開始回落嘅道指，到幾時先打和？

美國要重建信用
作為分析員最好對幾何（geometry）有D認識，以便了解嗰D圖案所象徵嘅意義，亦應該有D玄學根基，以便了解人類內在嘅小宇宙。唔少佛教寺內供奉嘅曼陀羅便是用得道高僧嘅舍利子造成。今天美國經濟核心就係信用（credit）；透過信貸可產生林林總總嘅金融產品，推動美國經濟向上；換言之，信用對美國經濟好似曼陀羅對佛教。今天全人類都質疑美國嘅credit，因而產生信貸危機，主因係過去CDO唔列入資產負債表內而唔受監管。理論上，要重建金融信心，首要項目就係令全人類對美國credit重新信任，而唔係由政府Bailout或向大銀行注資。因為credit先係整個西方金融制度嘅曼陀羅。

人無信不立，國無信不張。一個人冇咗信用必一事無成，一個國家冇咗信用，社會必亂七八糟。列根成功嘅地方便是响八十年代重建全球對美元信心。明年嘅奧巴馬能否重建全球對美國嘅credit？Mark to market會計制度係咪痛苦？答案係，但有助重建世人對美國企業嘅信心。從兩年債券與十年債券息差睇嚟，美國經濟前景繼續令人擔心。美國房地產市場第一隻鞋已掉落嚟，幾時第二隻鞋再跌埋落嚟。

bryon

关于真正問題係消費&中國應擴大消費而非基建
可以参考

http://online.wsj.com/article/SB122635482375915243.html
http://online.wsj.com/article/SB122643558466218199.html

四伯爽

（此篇文章版权归作者曹仁超）

富人變窮人
11月13日，週四。恆生指數跌717.74，收13221.35（最低曾見12943點），成交517.9億元。即月期指跌664點，收13098點。

　　花旗推介和黃（013），估計今年每股獲利3.67元，減少48.9％，O十一點二倍，目標價57.6元；騰訊控股（700）估計今年每股獲利 1.348元人民幣，升48.5％，O三十三點三倍，目標價75元；港交所（388）估計今年每股獲利4.07元，減少19.2％，O十五點六倍，目標價 125元；威高（8199）估計今年每股獲利0.464元人民幣，升47.9％，O十六點六倍，目標價12元。

　　滬深三百指數升4.01％，收1874.08。

美國第二隻鞋開始跌

　　9月份美國7000億美元挽救計劃聽落係幾驚人嘅數字，至今已動用3500億美元，財長保爾森要求國會再增加撥款，並答應唔再收購有毒債券，而改為支持消費金融；呢個消息令道指週三回落4.7％，收8282.66。依家財政部得番600億美元（欲動用其餘款項必須國會批准）。百思買（Best Buy）發出盈利警告，美國經濟中第二隻鞋開始下跌。通用汽車已跌至第二次世界大戰（1943年）時價位，每股2.76美元。如政府唔挽救，今年內將破產！房利美及房貸美亦向政府伸手；情況好似D初生嬰兒想飲奶，但母親卻冇奶水畀BB 飲。估計今年第四季美國GDP收縮係最嚴重一季。第三季美國售樓者中，有三分一係蝕本離場。樓價已連續第七季下跌（第二季蝕本離場佔23.7％）。估計第四季將進一步惡化，情況一直伸延到明年第二季。

　　環球對沖基金響10月份蝕咗1000億美元。日本第二大銀行瑞穗計劃發行3000億日圓（32億美元）優先股去增加資本；呢個消息令股價跌5.2％。日本銀行宣佈，經濟進一步惡化並計劃將利率由0.3釐減至0.25釐。澳洲聯邦銀行宣佈，呆壞賬可能上升一倍，令股價跌4.1％。

　　六個月前全球擔心通脹上升，當金價由1036美元回落時，我老曹擔心通縮冇人信；家嚇人們擔心衰退，甚至擔心通縮，金價一度跌穿700美元（我老曹估計，支持位喺630至650美元，並重建基礎），油價由147美元跌到56美元。

　　倫敦一流餐館白菌售價已下跌84％、靚紅酒售價下跌65％及龍蝦售價下跌52％；同期英鎊滙價下跌25％。去年英國家庭債係個人收入165％，較上一次衰退（九十年代初期）高出50％，倫敦高級餐館嘅餐牌已出現通縮！星巴克股價已回落75%，Coach股價下跌三分二及Tiffany股價亦下跌一半，呢次唔係貧者愈貧，而係富人變窮人。

　　英國第三季失業率5.8%，較第二季升0.4個百分點，估計到2010年英國將有二百七十萬人失業，失業率達8%。英倫銀行計劃再減息半釐。

　　加拿大打算響12月9日減息半釐到1.75釐，各國央行正步日本銀行後塵，走零利率路線，投資市場已變成流動性陷阱（Liquidity Trap），放多多錢入去都被吸乾。

　　信心危機？No。類似九十年代日式資產負債表衰退（balance sheet recession）。隨住資產價格下降，金融機構必須集資或出售資產，唔係就減少貸款。一切皆響理性情況下進行，並冇出現非理性行為，股市出現過度拋售又出現正常反彈。

　　依家不但投資股市要take shelter，投資日圓及美元以外嘅外幣亦需take shelter，甚至投資黃金亦一樣要take shelter。換言之，全球已進入由資產價格下跌而引發衰退嘅時代。

未來嘅三大問題

　　展望未來三大問題：How low、 How bad及How long？通常一個經濟衰退期維持三年。一個大跌市（指股市）則長達十三點一個月至十八點五個月（即股市見底後，經濟仍衰退），如果呢次係十三點一個月，即今年10月27日見底。如果係十八點五個月，即仲有六個月，熊市響明年3月或4月見底；反之，經濟衰退（或一般人感到復甦）需時三年，即2010年年底大部分人先感受到經濟正在復甦，例如失業率下降或樓價又再止跌回升。響明年3月至2010年10月，恆指響25%至35％波幅內上落，直到經濟真正復甦時才大幅上升。如出現資產負債表衰退，明年3月股市有一次似樣反彈後又再下跌。

　　熊市中最大嘅苦楚係眼見自己嘅投資化水，唔少人連計算自己手上投資值幾多錢嘅勇氣都冇。新投資者可能只經歷過1997年亞洲金融風暴，未經歷過1981至82年主權回歸時嘅大跌市，更加唔好講1973至74年超級大熊市，恆生指數可以大跌91.5％（1981年7月，恆指由1810點跌到82年12月676點，跌幅高達62.65％；1997年8月至98年8 月，恆指由16820點跌到6544點，跌幅61.09％；最近一次熊市，恆指由2000年3月18397點跌到03年4月8331點，跌幅 54.71％；今次熊市由2007年10月31958點跌到08年10月27日10676點，跌幅66.9％，已超過過去多次熊市跌幅，只係唔及1973 至74年嗰個熊市）。1973至74年係香港全民皆股民嘅日子，情況同去年10月前情況接近。

　　Capital Economics分析員Paul Ashworth估計，未來兩年美國銀行仍將虧損4500億美元，相等於家嚇股東資金45%。各銀行必須進一步注資，唔係就引發資產負債表衰退，被迫出售資產及減少銀行貸款；佢估計，未來兩年美國銀行將減少10%總貸款及集資3500億美元。1933年美國通過銀行法成立聯邦存款保險公司，保證商業銀行內存款，同時禁止商業銀行包銷證券及做股票經紀，呢D業務只由投資銀行（俗稱iBank）負責。呢道防火牆由1980年起逐步拆除，九十年代更將貸款包裝成衍生產品，響市場上出售，例如CDO。2000年再通過Commodity Futures Modernization Act，把CDO期貨化。2004年美國證監取消證券公司資本與負債比率中12比1嘅限制（即1元資金只可以有12元貸款），令證券公司負債上升至資本三十至四十倍，結果喺去年爆煲。

四伯爽

兩種資本主義

　　自由資本主義係佛利民主張，鐵娘子及列根總統上台後成為英格魯及亞美利加體系，即主張小政府大市場、開放市場容許自由競爭、政府最好少干預及減稅等。萊茵式資本主義（第二次世界大戰後響德國萊茵河一帶髮展出來）強調企業必須對社會負責，係英美式自由資本主義外另一種資本主義。兩者最大分別係英美式自由資本主義由阿當史密斯開始，認為人係理性，只要訂下公平、公正及公開嘅市場規則（例如法律、制度及規範），人為咗追求個人利益最大化而推動經濟增長，政府只需執行法紀（law and order）便足夠。戰後德國認為，如缺乏警員維持秩序，往往容易形成擠塞及失控，甚至進入無政府狀態，因群體係非理性。響十字路口，每個駕車者都希望爭取空間通過。如冇交通管制，遲早出現交通意外而唔相信無形之手（市場）可自動調節。政府就好似交通燈，必須執行任務，令企業完成對社會嘅責任。即市場必須透過政府有形之手去維持效率而非依賴無形之手，以免令市場失控。

　　呢次到底係政府監管出問題，定係自由資本主義出問題？響信貸膨脹嘅刺激下，1970年賣2.3萬美元嘅物業、1980年賣6.22萬美元、1990年賣9.73萬美元及2000年賣14.73萬美元，到2006年賣 22.19萬美元，較1970年上升九倍。地產泡沫響2006年中爆破。

　　進入九十年代，美國人已忘記儲蓄嘅重要性；去年儲蓄率跌至負數。如要重返八十年代10%儲蓄率，即美國人每年消費要減少1.3萬億美元。展望未來，全球政府對金融監管愈嚟愈嚴；各位正面對1973至74年以來最大一場資產拋售潮。

　　日本前經濟計劃廳部長大田弘子批評政府日前推出2萬億日圓（200億美元）挽救經濟計劃，唔足夠令日本經濟復甦。

　　家嚇日本企業稅率40.7％，已接近全球最高。日本製造業效率很好，但服務業生產力卻較美國低30％；大部分仍停留響小本經營或家庭式操作，形成日本國內消費既昂貴又非物有所值。各位如到日本旅行會發現，無論旅館、餐室及商店大部分仲停留響小本經營（或家庭式操作）。我老曹1980年首次踏足日本嘅情況就係咁；1995年情況亦一樣，估唔到今年9月日本仲係咁。唔少食肆由兩夫婦加幾個人手經營，並冇集團化及連鎖化；類似美國麥當勞或星巴克嘅集團少之又少；類似美國連鎖式經營嘅酒店亦唔多見。可以話日本響製造業方面極之先進，但服務業方面仍停留響七十年代，連大型連鎖式超級市場亦唔多見。好多旅遊區好似香港上海街咁，只得細商店，冇大型連鎖店。

　　日本經濟另一缺點係企業之間嘅股權互控。起源響1952年有人欲收購三菱不動產；為咗保護三菱不動產公司嘅控制權，三菱集團旗下十一間公司紛紛購入小量三菱不動產股份，但加埋後令收購者無法獲得足夠控制權，收購因而告吹。六十年代日本股市開始對外資開放，為防止日本企業控制權落入外資手裡，日本企業流行互控。到1989年日經平均指數見頂時，差唔多所有上市企業股份超過一半由其他日本企業持有，即外資根本無法收購日本任何一間企業。

中國企業要出去闖

　　結果產生兩大問題：一、企業優先照顧圍內公司。例如豐田、本田及日產汽車都持有自己供應商或商業上合作夥伴部分股份，好容易形成小圈子，削弱企業與企業之間互相競爭條件；二、一旦股市回落，手上所持有股份便要減值。例如去年日經平均指數跌10％，令企業因互控而賬面蝕咗4440億日圓；今年3月到9月再蝕3300億日圓。到2004年日本企業超過20％股份仍由其他日本公司持有，一旦股市回落，好容易引發全面性衰退。甚至自己公司業務唔跌，但因為持有第二間公司股份要減值，純利一樣大跌。

　　透過互控的確可阻止外資敵意收購。呢D對整體日本經濟係好定壞？過去十八年日本經濟停滯不前係咪同外資無法進入日本市場有關？響經濟發展初期例如五十及六十年代嘅日本，適度嘅保護係需要；到咗八十年代，日本企業已長大，但仍然大量保持互控，只令日本企業無法適應環球性競爭，種下九十年代日本經濟走向衰退嘅種子。九十年代我老曹話「日本經濟要衰退十八年」，結果響今年10月已應驗。展望將來仲搵唔到日本經濟可以再強大起來嘅依據。

　　中國應吸收日本教訓：一、對中小企業不應提供過分保護。好似小孩子，響長大過程中畀佢吃D苦頭及捱D風浪（千金難買少年窮），千祈唔好提供溫室。溫室內嘅孩子係長唔大；二、阻止企業之間互控，以免形成保護層及小圈子而無法達致全面性競爭。改革開放三十年來，提供適當保護係應該；今天中國經濟孩子已三十歲，應有足夠能力應付外面風浪，就畀佢地到全世界去闖（包括闖禍）。只有咁樣，中國先有真正跨國大企業。

　　1907年經濟危機後，英國從全盛期走向衰落。去年金融海嘯後，美國係咪同樣由全盛期走向衰落？美國戰後嬰兒潮一代人已到退休年齡，佢地對醫療及社會福利嘅依賴，可令聯邦政府面臨破產威脅。美國正走上 1907年英國嘅舊路，佢地嘅信用體系已面臨被摧毀。雖然仲有一段日子，美國仲係全球最大經濟體（好似英國急速衰落期響第二次世界大戰後先出現），但 2008╱09年度美國財赤將超過 1萬億美元，響伊拉克同阿富汗軍費開支高達2000億美元；加上國債已有10.5萬億美元；反之，中國有如1907年嘅美國，雖然響全球危機中一樣受打擊，中國宣佈2010年投資4萬億元人民幣改善基建，情況亦同二十世紀初期嘅美國好相似。

　　中美勢力響此消彼長下，好似二十世紀初期嘅英美勢力。嚟自WTO嘅紅利，中國已用得七七八八，出口市場已難繼續擴大；加上歐美日經濟走下坡，中國必須拓展內需市場才能繼續長大。好似三十年代嘅美國大蕭條，不但冇摧毀美國經濟，反令美國響第二次世界大戰後雄霸全球。

　　1780年工業革命響英國開始，到1900年英國國力已雄霸全球，進入大量消費期；1907年美國接力進入電氣化時代。汽車及飛機各種電器及電子產品出現，令美國漸漸雄霸全球。三十年前中國走改革開放路線後世界又再改變，美國人盡情消費，中國人努力生產。

Mr.Business

四伯爽兄好象不在，我暂时帮忙转载。。。

（此篇文章版权归作者曹仁超）

投資者日記 [曹仁超] 2008 11 15

反彈可維持到12月初

11月14日，週五。恆生指數升321.31，收13542.66；成交447.35億元。即月期指升484點，收13582點，代表短期後市睇好。道指形成雙底【圖】。恆指由5月5日26387點跌到10月27日10676點，下跌15711點，如反彈前跌幅三分一即5237點，恆指重見 15913點機會存在；由5月5日至10月24日曆時五個月，回升一個多月亦唔奇；理論上，呢次反彈可維持到12月初。短期股市繼續完成a、b及c反彈浪。

　　滬深三百指數升3.71％，收1943.65。法新社今天用「到東方去」標題，估計紐約市未來兩年有十萬五千人失業，其中四萬人係金融業人員，佢地都計劃到中國或印度發展。其中一萬人更係響紐約從事金融工作嘅華人，均計劃回中國找差事。中國金融機構亦計劃前往倫敦及華爾街招攬金融人才，包括中國主權投資基金、招行及工行等。西方媒體估計，到2010年上海將成為國際金融中心其中一員。

　　德國宣佈，第三季GDP下跌 0.5%（第二季下跌0.4%），確認係衰退；上月商業信心跌至五年底位。歐盟今天公佈，第三季經濟下跌0.2%（第二季下跌0.2%），確認歐盟區進入衰退。擔心呢次係1973至74年以嚟，另一次美國、日本同歐洲三大經濟實體同時陷入衰退。

　　中國10月份工業生產上升8.2%（今年3 月上升17.8%）。其中石油及鋼鐵產量更下跌17%；電力出現近十年內首次回落。花旗銀行分析員認為，呢次中國工業增長率放緩速度，較十年前亞洲金融風暴嗰次仲快，如冇刺激方案，明年GDP增長率恐怕會下降到5%。依家多咗四萬億元人民幣刺激方案，希望中國政府保八成功。

牛市出現前嘅特徵

　　過去五個月乾貨輪租金指數下跌88%，令到全球最大船隊Mitsui O.S.K Lines LTD計劃把一百艘運鐵礦砂船中嘅七艘拆掉。船租已跌至每天3966美元（6月份每天23.39萬美元），估計明年中國入口鐵礦石將減少，係1999年起首次減少，擔心明年全球有20%乾貨輪投閒。

　　估計週末G20會議冇料到，令美元同日圓又再上升。見97日圓兌1美元，相信好快見95日圓。

　　世上永遠存在相反意見，家嚇最多人問嘅係10月27日恆指係咪熊市底？一個熊市通常可維持十三到十八個月。去年10月至今已十二個月有多。根據Ned Davis Research資料，牛市開始時必出現以下三點其中一點：一、喺五十個交易天內，道指反彈最少30%；二、喺一百五十五個交易天內，道指最少上升 13%；三、Value Line Geometric指數最少上升30%。

　　由10月10日道指7882.51起計，如喺12月份道指升穿10276點，唔排除道指牛市出現。如12月份道指無力重返10276點以上，美股將繼續尋底。

　　美國上市嘅金沙集團去年10月股價係144美元，今天只值5美元。艾德森財富一度僅次於股聖畢非德同蓋茨，過去一年冇咗300億美元，家嚇身家估計只有20億美元。全球超級富豪響過去十二個月身家皆大縮水。

　　澳門特區政府經濟財政司司長譚伯源估計，澳門博彩運營今年第四季及明年初出現負增長嘅機會好大，但有信心保持每月收益70億澳門元水平。六家營運商可維持基本生存空間，至於艾德森10月底從家族資產中拿出4.75億美元協助拉斯維加斯金沙集團，令人懷疑該公司能否持維經營落去。金沙去年底負債高過90億美元，家嚇情況相信更差。

澳門博彩業好麻煩

　　澳洲皇冠集團去年12月15日14.27美元上市，至今跌到6.38美元，跌幅高達57.4％。

　　美國嘅永利由去年10月29日168美元，跌到近日44.76美元，下跌73％。

　　美高梅由去年10月10日100.5美元，跌到近日10.77美元，跌幅接近90％。

　　本港上市嘅新濠（200），由2006年12月18日嘅24.5元，最低係今年10月20日0.96元，跌幅達96％。

　　銀河娛樂（027）由去年10月2日9.56元，跌至今年11月7日0.5元，下跌94%。

　　2001年澳門原先只有十一間賭場。2004年金沙娛樂場開業，淨係該娛樂場嘅賭枱數目已係以前十一間加起嚟嘅總和。其後大量大型賭場落成，家嚇多達三十一間，除美高梅金殿外，每間都進行大型擴張計劃。

　　2003至07年赴澳嘅內地客亦以每年90％速度上升。今年6月起，廣東居民赴澳簽證被收緊為一月一簽；7月改為兩月一簽；8月改為停留時間由十四天改為七天；9月持赴港簽證內地客唔可以赴澳；10月再改為三月一簽。形成內地客今年6月到澳門旅遊開始下降，6月較5月減少12.3％；不但係咁，連香港及台灣客亦下降（今年8月數字較去年同期減少6.1％及13.2％）。中台加強直通後，擔心台灣客再急跌。

　　銀娛與新濠天地合作嘅Mega Resort原先計劃明年上半年落成，家嚇已計劃延遲六個月甚至一年。銀娛上半年收益53.92億元，較去年同期減少9.4億元；澳博（880）嚟自博彩收益亦由去年上半年162億元，下降至今年上半年155億元。

　　1962年澳娛首次獲博綵牌照後，將博彩客由港澳伸展到印尼、日本、新加坡、台灣及泰國。除大大拓展海外賭客比例外，亦喺十多個國家建立旅遊辦事處推廣澳門。

　　2001年政府發三個賭牌，吸引大量外資投資酒店業及娛樂場所，但博彩客對象主要係內地客，除內地客外，未見開拓其他客源。相信係中央政府今年6月起將逐步收窄赴澳簽證嘅理由。

　　今年對投資者嚟講，肯定係Tough Market；股價已at a deep discount。喺熊市中忍耐係金，唔尋底係聰明做法。全球經濟進入衰退期，唔少國家政府採取刺激方案，包括日本七年內第一次減息，其他如澳洲、印度、中國及南韓皆減息。由減息到經濟復甦通常需時六個至十八個月（甚至更長），中國GDP增長率亦由去年11.7%下降到今年9%，明年估計只有7%（政府正努力保8而推出4萬億元人民幣刺激方案，相等於去年GDP 16%）。美國同日本刺激方案已太多，無法一一數清楚；英國亦大幅減息。

美停止印債

　　五十四位分析員估計，美國第四季GDP下降3％，復甦最快喺明年下半年才出現。加州大學嘅Sung Won Sohn認為，刺激方案有幫助，但不能解決困難。MFR企業嘅Joshua Shapiro認為，我地開始unwind信貸泡沫及資產泡沫，呢個泡沫已存在多年，又以最近五年（2003至07年）為最。1990至2006年金融業佔美國GDP比重上升超過一倍；去年二十一萬二千美國人收入高達800億美元，其中四萬五千個紐約打工仔支付全國30%入息稅（紐約50%入息稅嚟自1％打工仔，其中絕大部分從事金融業）！一旦出現調整，需時幾耐及幅度係點？

　　偉大嘅美國製債機器開始進入停止期。最先壓碎嘅可能係美國汽車工業，其次係石油工業。油價已由今年7月11日147.27美元一度跌至56美元，今年7月人人預測油價可見200美元之時，佢卻開始大幅回落並出現十七年內最大跌幅。OPEC宣佈減產後略為回升，因為至今仍冇人相信低油價時期來臨，全人類仍未接受信貸泡沫及資產升值泡沫已爆破！德國已連續兩季GDP負增長，確認衰退；結束由 1996年起嘅擴張期。今年第四季相信美國、英國同日本可確認衰退。美林分析員John Thain認為，呢次唔係1987、1998或2001年，最低限度係1974年甚至更差。美國同英國消費者嘅財富突然蒸發掉，百思買（Best Buy） COO Brian Dunn表示，從事零售業四十二年，從未見過美國零售業咁差。10月份同店銷售減少7%，估計今年聖誕較去年同期減少15%。摩通CEO戴蒙喺一個銀行會議中表示，佢相信呢個衰退好深，至於有幾深便不知道。佢估計，第四季信用卡壞賬率達5%，明年初達6%、然後上升到7%。不但次按繼續喺明年有虧損，連主按亦開始虧損。有人估計，美國銀行業明年喺次按市場虧損達4250億美元及主按達3000億美元；銀行業喺明年仍唔會放寬信貸。

今年遊戲規則係搶錢

　　美國現任期交所主席Brooksley Born喺1998年領導CFTC時，認為缺乏監管嘅期交所合約遲早危及美國經濟。 1998年律師出身嘅Born與另一位Dan Roth發生監管者之爭，因當年格蛇及財長魯賓支持放寬政策最後Born辭職，國會批准期貨合約唔受監管。成交額喺2000年初合約值由100萬億美元上升到6月份684萬億美元。現年68歲嘅Born已離開華盛頓及出任期交所主席；加上上月出任CFTC主席嘅Walt Lukken亦主張加強監管；證監主席考克斯喺9月份亦主張加強監管。聯儲局計劃最先監管依家只餘下33萬億元市值嘅CDS市場；再加上House Financial Service Committee主席Barney Frank亦傾向加強監管，相信美國未來大方向已係加強監管。六十年代出身史丹福大學法律系嘅Born當年已係極之出色嘅女性，喺1998年長期資本管理公司出事時，佢認為係「wake-up call」，應該加強監管嘞。1998年9月呢個見解係少數，主流意見仍係減少監管，直到今年雷曼兄弟出事，加強監管才漸成為主流。美國亡羊補牢係咪遲咗點D呢？

　　雖然貝南奇以研究三十年代華爾街大危機出身，但一樣無法阻止負債之鍾（debt clock）unwind。雖然各國政府聯手注資，但債券市場仍然萎縮。保爾森瘋狂注資亦多多都唔夠，信貸危機仍然持續發展。家嚇環境仍係 Disinflation，估計可維持到明年上半年；如明年下半年經濟仍無法復甦，恐怕我地將進入通縮期。喺通縮期股票平均O只有七倍，因為冇通脹幫助下，企業純利只會減少而唔再增長。今年遊戲規則好似TVB過去曾玩嘅搶錢遊戲，即Money, Money, Money！

　　人性弱點係產生危機最大嘅理由。我老曹同意德國經濟學者嘅理論（個人私利如唔受政府監管，最終會闖禍）。呢個次按危機起源於1990年逐步取消監管嘅結果。過去因利率上升才結束樓價上升週期，但呢次利率下跌卻無法結束樓價下跌週期。受過分貪念影響，喺2006年美國樓價已被推向極端，情況好似1990年嘅日本。美國財赤已存在四十六年，美國負債超過60萬億美元係去年美國GDP四倍（家庭負債15萬億美元、金融業負債17萬億美元、地方政府負債3.5億美元、非金融企業負債22萬億美元及政府負債11萬億美元）。美國點還債？過去四十五年全人類儲蓄作為美國人消費之用。呢個遊戲仲可玩幾耐？甚至美元進入零利率又可支持幾耐？1982年美國失業率一度達10.7％，進入蕭條前期。幸好1982年第四季起美股止跌回升。高盛估計美國失業率由家嚇6.5％回升到去年年底 8.5％，會唔會喺2010年出現類似1982年嘅情況？

　　英國New Court嘅Simon Ward估計，英國利率明年見2釐，GDP負增長1.3％，2010年恢復上升1.7％。

右手賺錢左手make money　　我老曹認為二十五歲前應努力學習，包括讀書及投資技巧。二十五歲到五十五歲係黃金三十年，右手應努力賺錢，左手應努力make money。唔少人只懂運用右手賺錢，例如由月入1萬餘元到10萬元。由於唔識同時用左手make money，喺面對退休之年，手上所剩下嘅財富唔夠自己過舒適退休生活。過去四十多年，香港經濟高速成長，每年令資本增值15％並不苛求；即1967年1 萬元到去年變成267萬元；成績好一D年增長率達20％，即1萬元投資到去年可變成1224萬元。成績更好嘅亦大有人在。

　　如你同時係運用左手嘅高手，年紀漸大後、一般亦開始進入charity生涯。charity唔係一次性捐款行為，而係協助某機構達致某D目標，例如協助非牟利機構，為社會提供服務及減少貧窮因素。當然救急扶危亦重要，例如四川地震之後救援工作或中國雪災之後嘅支援；不過，真正改變貧窮嘅唔係呢D工作，而係向人投資，包括提供技術、制度、醫療及教育援助，從基本層面上改變導致貧窮因素，呢D先係charity。至於救急扶危只係一項施捨，冇長久意義；例如捐助100元畀慈善機構去買D月餅送畀老人亦係好事，但基本上你冇改變乜嘢。今年8月微軟主席蓋茨捐助500萬美元畀Techno Serve為發展中國家企業提供設備去創造就業機會，就更加有意義。另一機構叫做Bridgespan，嚟自Bain & Co顧問公司嘅分支，佢唔係協助慈善機構而係追查慈善機構金錢用途，包括overhead方面開支。例如有D慈善機構話營運開支只佔總捐款13％至 22％，調查後卻發現佔總捐款17％至35％。透過佢地嘅追查，捐款者知道邊D慈善機構喺運用善款方面最有效率，邊D營運開支佔捐款比重太大。調查亦發現，連續性每年唔受限制用途捐款，較一次性大筆捐款能產生更大效益。慈善機構依賴較多人捐較低數字嘅銀碼，較依賴一、兩個知名人士大筆捐嘅善款來源更可靠。今年已有唔少大人物削減捐款數字；反之，普通人每月捐款卻冇減少。

　　作為普通人，成立自己慈善機構並唔容易（因財力及物力太小），最好係加入已成立並有良好業績嘅機構。唔使一次過大筆捐款，而係持續性（例如每月數百元）捐款，咁樣做對呢個機構幫助最大。

　　五十五歲或以上嘅人，右手工作遲早要停低，左手則應繼續make money。亦係應該開始charity日子，利用charity取代打工賺錢，可以令人好忙而不知老之將致。自私D講，從事charity乃令自己心境保持青春及愉快不二良方，正係多有多做、少有少做。找一間慈善機構理念同你相近者，作為恆久嘅捐助者。可以係每月一百幾十，保證令你身心愉快。例如資助貧窮小孩上學去，每當收到佢地嘅成績表之時，已可令你快樂一整天。

　　請好好運用你嘅右手，從過去搵錢打工轉為慈善事業，以免右手因少勞動而變得不靈巧。

Mr.Business

四伯爽兄好象不在，我暂时帮忙转载。。。

（此篇文章版权归作者曹仁超）

投資者日記 [曹仁超] 2008 11 17

口水大會洋洋大觀

11月16日，周日。二十國領導人响華盛頓召開金融海嘯同世界經濟峰會，一如估計只係口水大會，講就洋洋大觀，做就冇一個國家肯承擔。


有人認為金融海嘯係由投資者貪心引發。貪心值得原諒，世人誰不貪？只要貪得其所便可。但愚蠢卻不值得原諒，各位不妨睇睇嗰D衍生產品合約嘅條件（例如贏就贏粒糖，輸就輸間廠），我老曹實在唔明白點解仲有咁多人肯簽個名落去？除咗士刁拔之外，真係無法解釋者也。



呢個情況，有如1997年嗰年特區政府八萬五房屋政策，當年大家已見到日本政府1990年房屋政策變成又藍又黑，但我地可愛嘅白眉董伯伯，仍然舂個頭落去。

保爾森日式方法救市

今年另一個可愛嘅傻瓜叫保爾森，佢已睇過日本股市過去十八年雞毛鴨血，仍然採用「日式方法」救市，期望阻止全球信貸收縮。睇嚟今後金融市場再冇派對（開心日子）矣。

今年3月金價回落後，我老曹曾提出通縮論，但信嘅人唔多。七個月後今天，各國政府官員及學者都擔心明年美國進入通縮。1982至2007年整整二十五年信貸膨脹面臨結束，甚至有人開始質疑1971年尼克遜總統嘅浮動滙率制度能否繼續落去。過去一年美國股票市場蒸發25萬億美元市值，美國物業市場蒸發4萬億美元市值，保爾森計劃動用7000億美元去阻止信貸收縮，你話效果如何？雖然政府不斷向銀行注資，但信貸危機仍未消除。道指上周五重返8497點，雖然我老曹相信10月10日起嘅反覆向上嘅力量仍未完成，後市道指仍有機會升上9000點或以上，呢個a、b、c反彈浪才告完成，因估計12月6日美元再減息半厘。但10月10日道指7882點，到底係2001年9月、2002年7月抑或係02年10月（見底）？我老曹相信見底嘅日子，可能係2009年3、4 月。過去一年全球股市均面對Margin Call！

美國10月份零售額下降2.8％，係連續五個月下跌，Circuit City已申請破產。美國10月份入口更下跌4.7％，因美國消費者財富被蒸發20萬億美元，美國消費信心進入1980年以來最低點。流動電話銷售下跌 5.5％（9月份跌4.8％）；汽車跌幅最大，連入油站亦宣布銷售下跌13％（部分因油價下跌，以銷量計下降1.5％）。美國貿赤進一步減少，9月份原油入口成本平均每桶104美元，11月平均65美元，下跌咗三分一，令11月貿赤有可能降至400億美元，即2003年以來最細，刺激美元進一步升值。何況全球資金正回流日本及美國，例如南韓圜兌美元已貶值33％，仲有印度盧比、菲律賓披索、印尼盾等，甚至新台幣、泰銖及新加坡元都在貶值，估計上述趨勢維持到2009年年中，到時美元再面對貶值潮，因美國2008／09年度財赤超過1萬億美元，支出大增而稅收大減。

FDIC主席Shiela Bair計劃利用7月份接管銀行Indy Mac，向二百二十萬個樓按者提供低息貸款（以佔佢地收入31％為上限），以便業主仍可响負資產嘅住宅內繼續住落去，而免被收樓令政府每年支出244億美元，相信可令一百五十萬個家庭繼續捱下去。依家已有七百五十萬個家庭陷入負資產，樓價每下降5％便額外增加二百萬個。上述情況一如1997年之後，本港銀行向負資產業主提供援助（減每月供款，大家齊齊捱）。到2008年，本港80％負資產家庭因此而脫離負資產行列，拖長嚟供，希望有一天可脫離負資產行列。睇嚟美國負資產業主仍有排捱，五年又似，十年都似。

費城聯邦銀行主席Charles Plosser响匹茲堡經濟會議上話，道指如再跌快夫巴仙，8000點失守，將進一步引發衰退恐慌。佢估計明年第四季GDP將較今年第四季再跌2％。响能源及商品價格下跌壓力下，明年通脹率唔再令人擔心，反而一連串因規管收緊所產生嘅信貸收縮現象更令人憂慮。

英國拋股買樓者增

英鎊本周跌6％，見1.4734美元，係今年內新低；兌歐羅跌5.6％，成85.95便士兌1歐羅；兌日圓跌7.6％，成142.28日圓。近期嗰D購入 50萬英鎊或以上市值物業嘅業主，資金來自大量拋售股票者較一年前增加26％；購入市值75萬英鎊或以上市值物業嘅家庭，資金來自拋售股票者較一年更增加 35％。雖然依家供樓貸款利率只有6.81厘（一年前7.14厘），但賣股買樓現象漸漸出現。政府宣布一年豁免印花稅，令首次買樓者受惠，但嗰D市價 125000英鎊至175000英鎊物業交投响8月份只有三千八百宗（7月份四千二百宗），未見回升。

日本經過十九年衰退，街上再出現老人扒手及小偷，因為政府大幅削減福利及醫療補貼，令唔少六十五歲或以上嘅老人到店舖內偷嘢，去年佔上述犯罪率18.9％（1978年只佔3.1％）。今天有五分一日本人已係六十五歲或以上，為美國兩倍、中國三倍，估計到2050年佔日本總人口40％以上。2006年起日本政府打算每年減少2200億日圓社會福利，至2011年止，以減少政府每年財赤。2001年依賴社會福利嘅日本家庭三十萬，去年已升到一百一十萬，未來仍在上升。日本再次進入扒手及小偷大量湧現嘅時代，真係人又老、錢又冇，唔少日本老人晚景好可憐。

過去十九年，日經平均指數由1989年12月38957點下跌到1992年8 月14194點時，唔少知名分析員以「淡市不出三年」為理由，認為日股熊市完成而推介。其後日經平均指數升至1994年6月21573點又回落，1995 年7月重返14295點，因為冇跌穿1992年8月14194點，引來另一批睇好者，理由係「雙底」，而將日股推高至1996年6月22750點；但到 1998年10月又回落到12787點，熊市已死論又出現，而將日股推高至2000年4月20833點，可惜又一次令人失望。2003年5月日經平均指數跌至7603點才回升，並喺2007年2月見18300點；2008年10月28日日經平均指數再創新低，見6994點。十九年熊市，美國投資者一而再、再而三認為日股熊市已死，結果再次令人失望。上述情況未來會否喺美國股市重演？

1990至2007年日本GDP平均每年仍增長2％（同期美國1.8％、德國1.6％）。日經平均指數表現咁差，理由係八十年代日本股市同地產炒爆咗。同樣理由，今年本港住宅最高峰期，普通住宅樓價（唔計豪宅）一樣未能超過1997年第三季，理由係1997年第三季本港普通住宅樓價早已炒爆咗。

日本第二次世界大戰後，透過通商產業省（Ministry of International Trade and Industry，簡稱MITI）協助生產商、零件供應商、銀行及貿易商組成相互關係（透過互相控股），响政府官員努力下，建成今天仍然存在嘅強大出口產業。韓戰爆發及越戰期間，由美國政府領導下嘅盟軍最高司令（Supreme Commander of the Allied Powers）認為，協助日本經濟發展可阻止共產主義思想擴散。1950年韓戰期間，來自美國政府嘅訂單佔當年日本總出口27％，並批准日本加入關貿組織（GATT）成為臨時會員（當年英國曾反對），以及將管治日本權力交回日本國會。當越戰响1975年結束時，日本已成為全球第二大經濟實體，僅次美國。 1980年日本GDP達13650億美元。日本由1950年韓戰爆發到1980年，經歷三十年經濟高速成長期；喺MITI領導下，政府故意壓低日圓滙價、利率，並向消費者抽重稅，以便資金流向策略性工業，例如造船業、鋼鐵業、電力、汽車、電子產品等，再透過保護主義阻止外國貨入侵日本消費市場。大量公路、機場、港口、高速火車等亦响呢個時候建成。

1978年中國實施改革開放政策，並喺1979年獲美國MFN（最惠國地位）。越戰結束後，美國與中國關係愈來愈好，美國唔再協助日本，例如1973年起要求日圓升值，並要求開放日本消費市場。日本政府雖同意，但奈何國內反對力量十分大，至今日本消費市場仍未全面向外開放。面對日圓升值壓力，八十年代開始日本資金唔再集中响策略性工業上，但消費市場又無法發展起來，形成八十年代至1990年資金集中喺股票市場及房地產市場，最後以炒爆收場。1995年日本政府又設法誘導資金流向海外，形成大量日圓利差交易存在，透過資本出口賺取利息，同時壓抑日圓滙價去維持日本GDP增長。今天日本面對全球大減息及資金回流，大大打擊日本出口事業。

從日本發展史回望近代中國。1978至2007年嘅中國，係咪1950至80年嘅日本？日本因為不讓日圓大幅升值及開放本土消費市場，造成八十年代日本股市及樓價狂升，帶來近十九年經濟呆滯期，中國又如何？

美國消費亞洲生產模式難再

2008 年將盡，2009年點睇？我老曹上周五為新城財經台協辦嘅香港經濟峰會2009開記者招待會。去年港股直通車無法落實，我老曹對2008年嘅睇法已傾向偏淡；今天則擔心過去由美國消費、亞洲生產帶動全球經濟上升嘅模式已無法持續。加州大學工商管理與經濟學教授勞拉．泰森認為，呢次經濟衰退期較過去我地所面臨過嘅更長、更嚴重。去年11月佢曾預計美國房地產危機會演變成金融危機，再由金融危機向實體經濟蔓延，從而導致經濟衰退，家吓一一應驗。呎次佢獲邀出任奧巴馬嘅顧問團成員，可以向新任總統提供乜嘢意見？佢同意大摩亞洲主席羅奇嘅睇法──美國人應加強儲蓄，亞洲人則應增加消費。但點樣將上述諗法落實？一旦美國消費需求下降，對依賴出口嘅新興市場如馬來西亞、台灣及中國大陸等地區首先帶來各種動盪，例如股市崩潰、樓價下跌，又點樣增加消費？正是未見其利先見其害。

摩根大通中國研究部主管龔方雄認為，去年9月至今全球財富已蒸發50萬億到60萬億美元，相等於全球一年GDP。依家外國向金融市場注資約3萬億美元，只及蒸發掉財富嘅二十分一，未能將資產縮水嘅底部填平，又點樣刺激消費？

根據國際結算銀行公會公布，今年6月止全球衍生產品市值684萬億美元，係全球GDP嘅十二倍，超過66％係利率合約、9％係外滙合約，依家市場仍在萎縮，所產生嘅信貸收縮壓力十分大。換言之，今天大部分人已睇到問題所在，但搵唔到妥善解決之法，老鼠拉龜。

Mr.Business

四伯爽兄好象不在，我暂时帮忙转载。。。

（此篇文章版权归作者曹仁超）

投資者日記 [曹仁超] 2008 11 18

銀行搶大額存款

11月17日，周一。恒生指數跌13.13，收13529.53；成交398.38億元。11月期指成13461點，跌121點；12月期指跌 162點，收13428點，後市繼續令人擔心。港交所（388）被大摩建議減持，股價跌8.3％，見60.55元，未來目標價38元，都幾令人心驚驚，因估計明年港股成交額將減少至每天470億元（今年平均每天成交756億元）。永亨銀行（302）跌4.5％，見37.1元，因涉及冰島銀行債券投資。綠城中國（3900）跌13.53％，見2.3元，因10月份內地房價首次較一年前回落。上升股份有東方航空（670）升7.6％，見0.99元；南方航空（1055）升12％，見1.22元，傳政府提供補貼。

滬深三百指數升2.24％，見1987.22。

花旗推介長實（001），因家吓市價只及NAV 65％；估計今年每股獲利7.81元，較2007年減少19.6％，P/E八點四倍，目標價82.79元。

平均投資法牛三勿試
如何喺凋零股市中搵到寶石？經過一年拋售，今年10月27日恒指見10676點已相當低，平均P/E只有七倍，已好接近2003年4月水平，或較2007 年10月高P/E（二十三倍）低65％，係本世紀以來最低P/E。喺熊市中，股票無論好壞均難逃一跌；一旦牛市重臨，優質股最先反彈。所謂平均投資法（例如每月投入一定金額），响牛市三期勿試，但今時今日卻值得開始。即使上市公司今年純利進一步回落，令熊市三期喺明年第二季才出現，今時今日分十二個月，每月投入一定金額資金進行平均投資法，長遠而言應該唔蝕底得幾多。喺超級大熊市中亦不乏大型反彈，如冇心水股可吸納指數基金。

據Thomson 路透社11月16日調查結果，分析界對標普五百今年第三季純利估計為負18.4％（10月1日估計負4.3％），上周估計負13.9％，即進一步睇淡，主要受通用汽車新聞刺激。至今四百六十三間公司已公布業績，其中能源股純利升59％，金融則負124％，消費有關行業負45％。估計標普五百第四季純利上升 20.6％（10月1日估計純利上升46.7％，上周估計純利僅升24.7％）。

美國商業經濟協會估計，美國衰退將一直伸延到2009年，估計今年第四季GDP將出現負2.6％增長而確認衰退（上述已非乜嘢真知灼見）。我老曹相信，美國經濟未來兩年將進入低通脹、低增長期，但唔會出現大蕭條，兩年後有望出現U形走勢。家吓市場壓力來自去槓桿化，上述趨勢大大削弱貨幣政策效果。中國社科院世界經濟與政治研究所國際金融研究會副主任張斌相信，美國經濟有望响2009年見底，2010年穩定下來、2011年出現U形反彈，理由係美國國際競爭力猶在，只因過去過度消費而引發次按危機，未來一段日子將因減少消費而令GDP出現負增長，但唔會進入長期衰退，因美國經濟係開放型，唔同日本係半封閉型；全球最優秀人才都可去美國發展，呢類型社會係唔會出現長期衰退。金融危機並冇將美國生產力沖垮，美國响好多方面仍具有優勢，唔似日本至今仍依賴出口帶動經濟增長，別無他法。日本經濟2003年開始復甦，今年第三季確認衰退，又係另一次極之溫和復甦期。隨住外國經濟衰退，日本經濟又再次陷入衰退。

歐洲經濟脊骨受傷
日本第三季 GDP收縮0.4％，確認經濟衰退。喺東京JP摩根大通分析員Masamichi Adachi擔心日本陷入本世紀最嚴重衰退，因來自海外需求大減，加上日圓升值，令企業純利下降，例如豐田汽車便有四分三營業額來自海外，估計今年純利下降70％。瑞信東京分析員Hiromichi Shirakawa認為，喺世界經濟未復甦前，日本經濟係無法擺脫衰退，因為日圓利率只有0.3％，已減無可減，日本不但必須面對世界經濟衰退，同時面對日圓再升值10％壓力。日本人由1990年至今已花咗十八年去應付樓價及股市下跌所帶嚟影響，依家已無能為力，第四季消費肯定負增長。

日本最大鐵礦砂運載船務Mitsui O. S. K. Lines今天喺東京再次跌5.6％，成455日圓；日本丸跌7.6％；日本第三大航運公司Kawasaki Kisen Kaisha Ltd.股價跌6.7％。日本三大航運公司股價皆大跌，代表未來全球貿易增長率全面放緩，全球經濟正陷入衰退期（只有少數亮點）。

英國11月份房價跌2.9％，即下跌6712英鎊至22979英鎊一間。倫敦今年樓價已下跌5.4％（11月份較上月跌1.3％）。減息兼英鎊滙價大跌，似乎未能阻止英國樓價下滑。

11 月15日歐盟正式宣布陷入經濟衰退，此乃1990年歐盟成立以來首次，分析界擔心最糟糕日子仍在後頭。今年7月15日1歐羅兌1.599美元，相信係造成第三季GDP下挫0.2％部分理由。其次係油價响7月11日創下147美元一桶，令7月份歐盟CPI上升4％，為1997年開始相關統計以來最高。雖然歐羅滙價同油價7月份開始回落，但9月份雷曼兄弟事件對歐洲金融業打擊甚於美國，第四季係金融危機開始對實體經濟產生殺傷力時候，分析界指歐羅區經濟增長响明年年底前好難轉為正數，因為金融業係經濟脊骨，一旦傷及金融業，較傷及其他行業更難痊癒（唔信各位睇睇日本）。歐洲央行11月6日減息0.5 厘，至3.25厘，响唔到三十天內兩次減息，更係1998年歐洲央行成立以來第一次。分析界估計下月歐盟將減息0.75厘，摩根大通估計明年歐羅將減至 1厘息。

銅價由去年11月14日起至今已回落37％，見3695美元一噸，估計明年見2400美元一噸。標普GSCI商品指數由今年7月至今下跌超過50％（其中油價跌57％），代表原材料價格進入回落期。

形勢比人強美國人必減消費
G20 會議中胡錦濤提出國際金融體系改革四項原則——均衡性、漸進性、實效性、全面性，相信將漸成主流意見，並喺明年3月31日再加強討論。1990年美國政府開始放鬆金融業監管，歐洲方面一向唔同意，奈何當年歐洲央行仍未成立；加上1989年六四事件後中國被孤立，國際事務以美國馬首是瞻，最後唔止放寬監管，直情係缺乏監管（例如CDO市場發展就完全冇人監管），最終引發次按危機。G20會議挑戰G7（或G8）權威性，代表G7（或G8）左右世界經濟大局 時代結束，未來將由G20取代，由G20重新制訂未來世界金融秩序。新興市場國家透過經濟冒起，响世界事務上有更大話事權，結束過去由第一世界支配全球經濟時代。G20係富有國家（G7）同新興市場國家首次坐埋一齊共商對策，雖然新興市場國家所受打擊較G7大（富人唔食鮑翅、中產減少出街食飯、窮人可能冇飯開！），為防止三十年代式世界經濟情況再出現，加上中國同日本同屬外滙儲備充足國家，响開放市場方面可擔當更重要角色，而非過去一味強調加強出口。只要中、日兩國人民加強消費、減少儲蓄，將可防止全球經濟增長率喺明年大幅下滑，但成功機會有幾高則木宰羊。反而美國人民加強儲蓄呢方面則唔需要擔心，响形勢比人強下，美國人不得不減少消費、加強儲蓄（皆因過去一年美國消費者身家已大縮水）。

貸款主力變成依賴銀行
近日各國政府逼銀行向工商界貸款。以美國為例，11月初銀行向工商界增加貸款16000億美元，較一年前升15％，即最近三個月貸款升25％；其中樓按佔57800億美元，升21％，最近三個月升48％。點解喺銀行增加貸款環境下，信貸市場仍然萎縮？主要係其他貸款渠道也在萎縮。Asset-Backed Securities發行（過去係信用卡及汽車分期付款最大資金來源）10月份下降79％，只有1420億美元，垃圾債券市場亦收縮66％，CDO市場更大幅縮減。貸款主力變成依賴銀行，情況可維持幾耐？各國政府紛紛向銀行注資（或購入有毒債券），例如美國已動用2500億美元，但花旗銀行及美國銀行股價仍跌至十三年新低（連畢非德亦沽售美國銀行），一旦政府停止向各銀行注資或購買有毒債券，銀行呢條最後貸款渠道又可頂幾耐？經過金融海嘯後，各銀行都努力爭取客戶存款，例如花旗提供六個月商業存款票據利率高達4厘（遠高於聯儲局利率1厘），Virginia Commerce Bancorp（美國小型銀行）願提供4.5厘去吸收六個月存款。換言之，大額存款今時今日極受銀行歡迎。

中國政府出台十項措施，投入資金約4萬億元人民幣去擴大內需，但大部分仍係基建項目為主，而非刺激消費，成功機會有幾大？近代史中最成功經濟轉型係香港，1980年巧遇中國獲得美國 MFN（最惠國）地位，本港將製造業內移，變成前舖（貿易）後廠（珠三角一帶成為香港出口產品生產基地）。當年唔少社會人士曾批評我老曹鼓勵港商回國內開廠，目的係將香港經濟空洞化咁話；佢地唔明白八十年代香港土壤已唔適合工廠發展。香港轉型成功，不但帶來1984至97年空前繁榮，亦帶動珠三角一帶製造業發展。反觀呢次中國擴大內需期，卻面對美、歐、日經濟齊齊陷入衰退，內地A股跌到七個一皮。

中國經濟轉型過程痛苦
內地房價係咪已見底？10月份全國七十個大中城市房價較去年同期升1.6％，較9月份降1.9％。其中北京、上海、天津、南京、蘇州、杭州、深圳、武漢、廣州、重慶及成都交投量較去年同期下跌34％至41％。上海11月1日起執行普遍住房標準，以稅務優惠鼓勵市民購買小型住房。喺廣州，個人可由公積金中貸款50萬元人民幣（夫妻兩人上限80萬元人民幣）用作買樓；10月17日好多地方政府降低交易稅。

此外，農業銀行、光大銀行、建設銀行、招商銀行、交通銀行、杭州銀行出台房貸細則，協助市民供樓，但11月份內地房市滯銷情況未見改善。《中國青年報》向一萬四千四百九十三名公眾調查結果顯示，81％認為明年房價仲會再降，只有7.7％認為會上漲。騰訊網對七千八百九十八名公眾人士調查顯示，對於各大城市中心區房價，74.9％認為明年仍會下降。中國社科院金融所研究員易憲容認為，房地產市場調整只係開始，過程十分漫長。响央視《今日觀察》節目中，評論員張鴻強調，中央政策係「救市」唔係「托市」；唔係救房價，而係大量供應經濟適用房、廉租房畀市民購買，並非「托住」房價。上海一手房價已跌破去年同期售價，為2005年以來首次。新建住房價格較去年10月下降0.3％；九十方米住房價下跌0.1％；二手住房價仍升0.8％。

中國銀行副行長朱民認為，明年中國GDP增速喺7％左右，面臨二十年來低谷。花旗銀行亞太區首席經濟學家黃益平認為，2009及2010年中國GDP增長率喺8％。摩根大通中國區研究部主管兼股票策略師龔方雄則認為，今年第三季中國GDP增長率6.4％、第四季4.1％，但明年仍有8.1％增長。換言之，呢次中國經濟由出口帶動轉為內需推動，令中國經濟陷入低增長期。唔似1984至97年香港經濟轉型，當時係配合天時、地利兼人和。可以講，中國經濟呢次轉型應會幾痛苦。

[ 本帖最后由 Mr.Business 于 19-11-2008 06:44 PM 编辑 ]

Mr.Business

四伯爽兄好象不在，我暂时帮忙转载。。。

（此篇文章版权归作者曹仁超）

投資者日記 [曹仁超] 2008 11 19

破產容易搵食艱難

11月18日，周二。恒生指數跌613.64，收12915.89；成交448.4億元。11月期指跌688點，收12773點；12月期指跌701點，收12768點。期指倒掛，即短期大市仍睇淡。

恒指10676點終將失守

自10 月27日恒指由10676點反彈至11月5日15317點，如回落前升幅61.8％，恒指將喺12450點守住；如12450點失守，代表新一輪跌市由 11月5日展開，繼續去年11月開始嘅大跌市。長遠而言，10月27日10676點應會失守，但短期反彈只有七個交易天，氣勢未免弱咗D。

今天滙控（005）跌3.6％，成79元；長實（001）跌3.7％，成65.1元；新地（016）跌5.8％，成55元，摩根大通降低上述兩大地產股評級。中石油（857）跌3.6％，見5.6元；中海油（883）跌5.2％，成5.7元，因原油價格跌3.7％，成54.95美元一桶。東方電氣（1072）下跌8.1％，見14.14元，公司計劃供股。

花旗推介方興地產（817），估計今年每股獲利0.2元，較去年升18.2％， P/E六點五倍，目標價3.29元。大連港（2880）估計今年每股獲利20.6仙，減少1.8％，P/E七點七倍，目標價2.35元。天津港（3382）估計今年每股獲利16仙，升21.2％，P/E九點六倍，目標價2.5元。

滬深三百指數跌7.42％，見1839.82。

英鎊响10月24日一天之內跌咗5.5％，見1.526美元，係1992年9月退出ERM以來最大單日跌幅。至今為止，過去一年英鎊兌日圓跌33％、兌美元跌29％、兌歐羅跌16％，更一度低見1.4792美元。

英鎊前景繼續令人擔心，萊斯TSB銀行認為，隨住英鎊滙價下跌，英國通脹率將上升，令資金唔願流入英國；加上英國物業市場較美國更唔掂，英國須進一步減息，估計年底見2厘。

對沖基金經理John Paulson（唔係保爾森也）去年因擔心次按危機，曾大量沽售股票，昨天佢响美國國會上作證時話上周開始吸納美股；佢管理360億美元嘅基金，去年獲利 37億美元，今年第三季止旗下基金仍上升15-25％。淡友轉為睇好，係咪跌市近尾聲？我老曹木宰羊。畢非德今年亦犯咗太早睇好嘅毛病。大部分牛市都較分析員估計中長；同樣理由，大部分熊市亦較分析員估計更長，因此唔估頂、唔撈底，直到趨勢形成後才加入。

中國人民銀行認為，隨住商品價格回落，人行開始防止通縮出現，包括增加流動性資金及足夠信貸。今年第三季GDP增長率只有9％，令明年經濟下跌風險加大。人行相信，4萬億元人民幣刺激方案應足夠保持明年保八。人民幣近日回落至6.8258兌1美元。今年6月起人行已停止人民幣兌美元升值，只保持穩定，以減少出口商嘅壓力。

美國巨企紛紛Bailout

1879 年，一位十六歲、名叫亨利．福特嘅小孩去咗底特律一間機械廠做學徒。十二年後，佢成為Edison Illuminating Co.嘅工程師，醉心於汽油引擎。其後，佢自己成立福特汽車公司。1920年代，美國通街都係Model T汽車，亨利．福特因此賺咗10億美元（响九十年前，10億美元係天文數字）。到今天，底特律卻希望政府動用250億美元挽救美國三大汽車製造廠（單係通用汽車已需要資金220億美元）。一百年前嘅朝陽工業，今天已成為夕陽工業，世事變化之大可以想像。如通用電氣不獲政府Bailout，將令美國明年失業率急升至9.5％。通用汽車、福特及佳士拿响五、六十年代威風八面，但七十年代日本車及歐洲車冒起，佢地風光日子不再，依家只有等候政府Bailout！

下周美國國會投票將決定係咪Bailout美國三大汽車工廠。2008年平均每個美國家庭有七點二八架車，我老曹再睇唔到美國汽車業有乜前景可言。美國到底仲有幾多大企業需要政府Bailout？

房貸美上周五公布第三季蝕253億美元，估計明年全年可能虧損400億美元，財政部須再注資500億美元及準備1000億美元備用貸款。

由於擔心三十年代式大蕭條出現，聯儲局主席貝南奇與財長保爾森大量注資金融實體，同時大量Bailouts，到底係好事定係壞事？如時光可以倒流，2001 年1月至03年6月聯儲局冇將利率由6.25厘降至1厘，今天美國就唔會有樓市泡沫，更加冇次按危機。衰退係咪咁可怕？1948至49年美國曾出現連續五季GDP負增長，其中兩季跌幅更達4％，影響如何？1953年亦有一季GDP出現負6％增長，1958年第一季GDP甚至下降10％。六、七十年代亦出現過唔少衰退期，最後一次衰退係1981年，出現連續兩季GDP負增長，幅度分別為4.9％及6.4％，影響又點？

真正財富在於平靜心境

衰退並唔可怕。1987年格蛇上台後一再阻止經濟衰退出現，令美國經濟出現自1982至2007年歷史上最長一次繁榮期，美國人對衰退已失去免疫力，先至搞到呢次咁大件事。美國透過大量注資兼大量Bailouts，結果會係點？請睇睇日本1990年至今，過去十八年日本人嘅日子並唔好過。長痛不如短痛，大量注資及Bailouts嘅做法，只會延長衰退期，但冇解決問題。

1976年，一間叫微軟嘅公司由MITS電腦公司分拆出來。1979年，公司內有一位二十一歲嘅CEO叫蓋茨，佢將呢間公司由北墨西哥州Albuquerque移去華盛頓州Bellevue。1999年，蓋茨手上微軟股票市值達 1000億美元（依家約值600億美元）。相信1999年亦係微軟嘅高峰期，到2000年開始走下坡，因為科網股泡沫已爆破。

2007年 12月巴郡股票成151650美元一股，最近已失去三分之一市值，只值95615美元一股。公司宣布响9月30日前已揸咗八千三百萬股Conoco Phillips（3月31日只持有一千七百五十萬股），並減持美國銀行及NRG能源。9月30日Conoco Phillips每股市價67.31美元，上周五市價47.39美元，巴郡喺上述投資上賬面損失唔少。今年第三季巴郡只售出3億美元市值嘅股票，但購入 39.4億美元市值股票；佢減持嘅美國銀行响過去十二個月內股價下跌64％。9月30日止，巴郡仍有334億美元現金可作投資之用。畢非德買入後持有嘅投資策略，已隨住美國戰後最大一次牛市（由1975至2007年）結束而失去光芒。

Thomson路透社對2009年標普五百最新估計純利只上升12％，2008年至今美國投資者嘅財富有7萬億美元被蒸發掉。野村證券分析員Richard Koo認為，美國正進入「資產負債表衰退」，情況有如九十年代日本，因消費者及企業財富大量被蒸發，令佢地減少開支及減債，經濟因此無法好起來。香港亦曾經歷過一次「資產負債表衰退」，就係1997至2003年。1967至97年香港係發達容易、搵食艱難時期；1997年後香港進入破產容易、搵食艱難時期，因投資市場由低風險高回報變成高風險低回報。

2007年10月起美國亦進入破產容易、搵食艱難時期。去年至今全球股市失去25萬億美元市值，歐洲、日本已確認進入衰退期，今年第四季美國亦加入。潮起潮落，不知淘盡多少英雄。

類似情況不斷喺美國、香港、中國內地發生，問題在於你有冇踏足其中一架「幸運號」快車？例如1967至97年本港樓價由50元一呎升到12000元一呎，恒生指數由1967年64點升到2007年10月32000點。財富唔係賺（earn）番嚟，而係製造（make）出來。資本主義社會中嘅財富不斷被毀滅，同時不斷在產生。閣下有冇智慧捕捉到下一個大趨勢？請不要work for money,let money works for you！金錢如潮水，來之時擋唔住，去之時亦留唔住。真正嘅財富係平靜的心境。

世上冇天生成功者或天生失敗者。有些人喺體育上或藝術方面有天分，但如果冇適當後天栽培及個人努力，亦無法成功。例如蓋茨、喬布斯、Scott McNealy都喺1950年代出生，正好趕上1975年IBM大電腦被個人電腦（PC）取代嘅時期。雖然上述幾位電腦奇才响大學皆攻讀呢方面知識，但同時期出生、同時期入大學攻讀電腦系者，又何止呢幾位？箇中分別係蓋茨用咗七年時間去研究電腦程式，廢寢忘餐到無法完成大學畢業，只有離開哈佛大學，加入微軟做CEO。不過，如非佢嘅家庭係中產階級，亦唔會有足夠財力支持佢咁樣做。

上述亦同家族文化有關，如果蓋茨出身於中國有錢家庭，佢嘅父母一定阻止佢離開哈佛去微軟（當年微軟只係微型公司）做CEO。中國人係食米民族，種米必須努力辛勤才能有收穫（誰知盤中飧，粒粒皆辛苦）；反之，西方人係食小麥民族，小麥收成極受天氣影響，形成西方民族極富冒險精神。可以講，必須天時、地利、人和三方面配合，才可製造出類似蓋茨呢種天才，缺一不可。

今天本港嘅超級富豪，都係喺六十年代才大量投資本港房地產者。太早投資唔得（例如五十年代霍英東家族甚至戰前何東家族，今天雖然亦極之富有，但財富仍唔及六十年代後起者），太遲投資亦不行，唔少七十年代或八十年代才加入者均無法成大器。此乃「勢」也！過去地產市場中嘅爭奪者又何止上述幾位，當時有好多競爭者參與，至於點樣响呢場戰爭中勝出（由七國咁亂到列強鼎立），便必須策略運用得宜。最後誰能像蓋茨雄霸天下？此乃性格使然。如果蓋茨唔係有醉心於電腦軟件嘅性格及好勝心理（蓋茨做乜嘢都一定要贏，包括做善事），便不能成為皇者。

此乃我老曹寫《論勢》、《論戰》、《論性》三本書嘅理由，並成為一個系列。12月份三本書將製成精裝版讓各位珍藏；上述乃我老曹四十年投資市場嘅經驗沉澱，應有一定參考價值，到時請多多捧場。

通縮伏線已經埋下

我老曹係趨勢嘅信徒，購入一隻股票嘅理由係因為前景秀麗及有上升動力。我老曹1975年起已放棄價值投資法，唔會趁低買入然後呆呆地等市場逐漸認識該股價值並將它推高，理由係你唔知道到底要等幾耐？有智慧不如趁勢。

過去一年，美國人嘅退休金失去6億萬美元市值，即平均每位擁有175000美元退休金者損失52500美元！2008年開始美國人進入退休嘅高峰期，你說怎麼辦？

去年8月至今，各位見證到信貸收縮及各國政府大量向金融實體注資，造成通縮與通脹之爭。單睇油價、金價及CRB商品價格表現，似乎通脹嗰方佔上風。不過，如今負債者正努力減債，由樓宇按揭到信用卡貸款以至汽車分期付款，雖然聯儲局將利率降至一厘，但10月份美國生產商價格指數估計進一步下跌，因為油價已回落 24％，已埋下通縮嘅伏線。

8years

“12月份三本書將製成精裝版讓各位珍藏；”

希望等到出时大家可以有link可以download。

tanhy

我老曹係趨勢嘅信徒，購入一隻股票嘅理由係因為前景秀麗及有上升動力。我老曹1975年起已放棄價值投資法，唔會趁低買入然後呆呆地等市場逐漸認識該股價值並將它推高，理由係你唔知道到底要等幾耐？有智慧不如趁勢。 

我还是第一次听到有人从基本分析改去技术分析
证明香港人十个有九个爱赚快钱