【专题讨论】转载香港頭條網陸羽仁, 王雅媛的文章

Mr.Business

注：此篇文章版权归香港頭條網所有。

炒波幅（８）         

2008/5/29 上午 09:27:24
網誌分類: 經濟

美股繼續彈，摩根士丹利話期油價格會上１５０美元一桶，令油價反彈重上１３０美元，受油股上漲等刺激，道指尾段上升，收報１２５９４點，升４５點，升幅０．４％。

香港爆出輪場大風暴，廉署四出拉人，傳聞拘捕逾２０個經紀，調查窩輪造市。窩輪行業流弊很多，其中之一是谷大成交造市，香港是全球第一大輪市，去年有６３１２隻窩輪發行，現時街外流通的窩輪幾千隻咁多，花多眼亂，散戶唔知點揀，通常就會揀大成交的窩輪去買，你要成交，有無良輪商就造成交俾你睇，搵經紀行夾埋造出大量假成交，引你落叠。

證監會在２００５年做的一項調查就發現，有部份經紀特別活躍於窩輪買賣，而這些經紀戶口內的窩輪客，大多是做即日鮮，甚至短至幾秒間的買賣，一日內不斷重覆，證監會就懷疑他們不是真實買賣，而是可能有其他目的。今次廉署一查，恐怕會揭出不少行內臭史。

散戶入場炒作，不斷受好多消息誤導，考驗你的EQ，你盲摸摸去買股買輪，一開始就跌入陷阱中，今天可以講吓成交假象，其實無論窩輪或莊家股，都造出成交假象，吸引你落場。

先講窩輪，我教大家換腦思維，以輪商的角度出發去思考，發行窩輪的發行商，只要做足對沖，在一般情況下，都是穩賺不賠的生意，和開賭沒有太大分別，主要成本除了請個靚女來做輪后作生招牌之外，就係推廣費用，毛利好高。生意好做就多人做，愈來愈多人做時，難免供過於求，你睇舊年出到６０００幾隻輪，要去貨開始無咁易。

散戶揀輪好多時係睇住成交量來買，見到成交多，覺得隻輪流通量好，易走，就會入場，所以輪商從來都有和經紀行夾，搞高成交量，有合法方法，有非法方法，不過競爭犀利時，就當然是愈搞愈出位啦。以住窩輪要有充足的街外需求才會發行，後來都等唔到了，部份發行商安排經紀行接貨，發咗先至算，經紀行可以在掛牌後沽貨，反正發行商做莊又可以接貨，至多到時接番，發行商和經紀行如何對數，外人就不得而知了。

若然發行商啲貨只係借經紀行個名頂咗，最後要自己接番，始終無真正將窩輪發到俾街外客，賺唔到街外錢。所以在新輪上牌初段，造大個成交額，搞到個場熱熱鬧鬧就好重要，成交活躍引到老散入場，混亂中就把手上的街放番出街；若然成功出貨，派到八八九九時，都無需要再做嘢，交投就會回落番，成交大減之後，隻輪就好似失寵藝人咁，素顏落街買餸，自然嚇到你腳軟，更加無人吼，成交好快就靜過鬼了，溢價自然大跌，你買咗就貴客自理了。你買認購輪，隻正股升咗，你見隻輪升咁少，覺得唔合理，唔想沽住；若隻正股跌咗，你隻認購輪就急急插，你話咁離譜，跌咁多，又覺得唔合理，又唔沽，所以無論睇啱睇錯，總之你就無沽，結果好易揸張廢紙揸到尾。

窩輪咁多，以去年發輪量計，每天有２４隻新輪登場，新輪過幾日就變舊，如果你俾新輪成交活躍的假象吸引，專去追新輪，即係專門買貴輪，窩輪本身已經難賭，貴輪更難賭，係唔係輸多贏少呢？買輪輸錢不關乎你睇市準唔準（散戶當然亦大多睇唔準），主要係整個局對你不利，買成交大的新輪價錢貴，買成交少的老輪沽貨時又任得發行商開低價，散戶被人焗住來砌。

買三、四線股的問題都一樣，你也要換一了莊家的角度去思考問題，莊家低位收哂貨，或者大股東低價批咗大筆便宜股票給他們，他們的目的就是推高價錢散貨，第一步也是做成交，做升幅。香港有千幾隻股票，散戶點去揀，除了睇吓報紙之外，就係睇吓廿大成交榜，廿大上升榜，所以莊家要炒嘢，最好就抽高股價，同場做大成交，每日成交有過千萬元，上哂成交榜、上升榜，散戶睇到覺得係堅嘢，就會落叠。

莊家做成交的方法好簡單，搵幾間相熟經紀行，搵一堆「人頭」，用那些「人頭」的名義做買賣，你見到報價機上隻股買賣雙方都掛滿牌，好墟陷，呢啲叫做「搭棚」，搭好棚慢慢推上，左手交右手，甲經紀行買，乙經紀行賣；可以做到好靚，上３步，又回番１、２步，做出完美的反覆向上圖型，唔係急急推上，證監會要查都好難查。

散戶相信自己眼見的東西，見到成交好，股價升，公司又出消息配合，潮流玩賭業佢做賭業，潮流興礦業佢做礦業，甚至叻到做埋盈利俾你睇（不過現時好多莊家股都好懶，連盈利都費事做），有齊增長股的一切特徵，散戶都難扺抗誘惑。

而家環頭環尾仲有好多寶藥黨騙阿媽，騙子夾埋自己友演一場戲，騙子買寶賣給自己友甲，自己友甲即場買俾自己友乙，賺咗１倍，在旁的阿婆睇到，馬上去銀行提哂畢生積蓄去買寶藥，諗住賺一筆。如果散戶的阿媽買咗寶藥，佢一定會話：「阿媽做乜你咁蠢，咁都信？」但在股市買了作大成交的窩輪，買了成交量和價位都係假的莊家股，本質和買寶藥有乜分別呢？

當局者迷，散戶買了一隻莊家股，睇住佢由５仙升到５毫，你行埋同呢個散戶講，話佢買咗寶藥，話佢俾人騙咗，佢一定問候你全家，質你幾拳都唔奇。股價狂升，係對人類EQ最大的考驗，忍得住手唔買已十中無一，買咗願意沽者亦是十中無一，所以股壇寶藥黨的格經營格言，應該如開賭者講的一句老話：「唔怕你精，唔怕你呆，最怕你唔來！」來了之後，又有幾多個身光頸靚走得番出去呢？

陸羽仁

http://www.hkheadline.com/blog/r ... rd=&searchtype=

ThermoFisher

WARRANT害惨了那么多散户，香港现在才出来抓人。。。。

马来西亚的WARRANT没事，可以继续害人。。。。。可怜的散户。。

Mr.Business

2008/5/30 上午 11:03:14

陸羽仁覆網友

Ray:睇通脹首先睇美國，美國通脹升得太快，會成為滯脹，夾硬加息好大鑊。第二睇中國，若通脹控唔住，加大宏調，港股無運行。第三才看香港或大陸廠家，計吓佢地頂唔頂得順高成本，總體來講，今年想增加盈利好困難。通脹失控，有股災之危，不過暫時未到呢個地步。油價爆煲，商品急回，美元向上，雖然好亂，會利經濟和股市，唯一風險係有無金融機構炒油炒滙會炒到爆煲。

恒指今年仲有５０％以上機會見２８０００點。

窩輪風暴未知完未，若成交不回升，港交所會再試底，見１１６元唔奇，主要睇住成交做人，等跌深少少才好考慮。

Kevin:７２８復牌如升唔多，係危險訊號，即係話好多人趁好消息出貨，最好沽貨或定止賺位沽貨。

Hau:中鐵可以以上市價為止蝕，唔到就揸吓。

Nothing:學睇年報或公司財務報表的簡單方法，可以買本彼得林治的「Learn to Earn」（譯本叫致富之路）睇吓，係入門書，有講股票的基本理念。

Gigi:越房跌跌下進入可留意範圍，近一個月低位２．８９元可以買吓來收息。

亞K:內房股調整未完，但想買中國海外，跌到１２元可以分注買吓，預佢再跌。

長線供內銀股，可供招行，佢係最商業化的銀行。

水滴石穿：你問２００３年的恒指PE為何急跌，年代略久遠，未找到答案。

Aggie, Bdroom，大隻佬:低價入咗中海油，若近止賺價，到位唔沽哂都沽一半，油價好顛，大上大落，有爆煲之險，沽完油價再大升佢再大升都唔奇，要頂得順至好。驚就沽一半先。

哥夫：大市成交急降，可能係風聲緊，窩輪少咗人為交易所致。

Muse:買咗廣深鐵路和長城汽車，想換馬，油價急升加政府因地震減５％開支，對汽車股不利，成個行業下滑，短線要捱吓，頂唔順先換馬都可以。內銀股好過內房股，內房股仍是宏調打擊首要對象，但政府限銀行借錢出街，佢地可以提高利息補數，所以內銀股業績仲可以頂得吓。

Flyinthesky:招行係好股，可趁回落吸納，香港銀行業競爭大，但只要買入價PE低過招行現價PE,買入香港銀行有拉低PE之效，又可以以最快時間在香港建立窗口，除笨有精。

any:等個市回深少少才吸好啲。

Mr.Business

注：此篇文章版权归香港頭條網所有。

金融High Tea——結算日大戶現手影
2008年5月30日

港股結算日，大戶「玩№」跡象都幾明顯，前晚美股偏穩，指數高開292點，見24,542後反覆回落，成日都係牛皮，臨尾市先再回升，收報24,384 點，升135點。內地股市偏軟，國企指數則升137點，報13,512點，大市成交641億元。現貨月期指以24,346結算，成交61,284張。

藍籌股牛牛皮皮，焦點落係本地二、三線銀行股身上，大新金融（440）[股價及相關新聞] 、旗下大新銀行（2356）[股價及相關新聞] 、永亨（302）[股價及相關新聞] 、創興銀行（111）[股價及相關新聞] 升4至10%。另外電訊設備股個別仍好，中興通訊（763）[股價及相關新聞] 升3.9%，中國無線（2369）[股價及相關新聞] 升9%，晨訊（2000）[股價及相關新聞] 升4%。

港股昨日無跟住日股，亦無跟住內地股市，內地股市上午企得比較穩，當時港股不升反跌，到下午兩點後，內地三大保險股開始跳水，滬指終於支撐不住，跌幅不斷擴大，最終以日內次低收市，錄得近日較大幅度的下跌；深成指則在地產股拖累下大幅下挫，結果滬綜指報收3,401點，跌1.7%，深成指報收11,947 點，跌3%，兩市成交額共計1,022億人民幣，但港股尾市反而抽番高。

中環茶友話，今個月市況先升後跌，大戶本來想造勢炒上，但未郁手個市已經湧高，去到高位大戶當然食胡，所以個市升到上兩萬七左右，已經好想調整，差不多時候先爆出內地電訊股重組消息，俾大戶插低重磅股中移動的藉口，等如送多幾百點俾大戶賺，跟住又到油價飆升，美股「蛇蛇聲」滑落，又益大戶食多注，本來大戶想向下炒，個市仲就埋他們，結果起菜食成兩千點，係現今市況都算幾和味。

懶理日股造好

茶友話，昨日結算大戶手影都幾明顯，美股偏穩，跟住日股仲勁升成四百幾點，照正路香港應該彈番四百點樓上，所以一開市，指數好快搶高幾百點，但大戶不是善男信女，好快就壓番落鈬，如果以內地個市只係微微偏軟，無理由港股同日股升幅相差咁遠，唯一解釋就係大戶做№。他估計結算過後，個市好可能會浮沉上落一下。

今個月指數低位結算，主要靠質低權重股中移動（941）[股價及相關新聞] ，內地公佈重組架構，被視為對中移動不利，摩根大通昨日發表報告，雖然維持增持評級，但就認為該公司面對不平衡的政策，在最壞情況下，股價目標降至一百元，慶幸係中長線公司質素仍好，六個月目標保持一百五十元，由於預計短期缺乏利好消息，有興趣撈貨者不必心急，可以等到靚價先採行動。

外資行對中移動有戒心，主要係一旦3G推出，中移動會多鰦對手，現時獨大局面未必可以維持，不過，呢個情況其實在可見將來，都未必會出現，加上過去中移動雖然面對聯通挑戰，卻無損霸主地位，外資的憂慮，可能只係用來質低股價的藉口。

八號仔重組護價

內地電訊業重組之餘，昨日電盈（008）[股價及相關新聞] 主席李澤楷又透露，集團將進行內部架構重組，消息即刻刺激股價在午後急升，最高曾升10%，高見5.14元，收市升8%，報5.05元。

據小小超透露的方案，重組方案是旗下電訊、媒體及資訊科技解決方案的業務，到一家新成立的控股公司，並就出售後者最多45%權益，邀請投資者提交建議書，架構重組將於未來1至2周內公布。市場追捧八號仔，主要係上次電盈出售資產失敗，股價受壓回落，現在忽然又再出招，話會將電訊業務搞成一家新公司，自然令人聯想到會不會再次賣盤。

八號仔早前因為被恒指服務公司踢出成份股，過去有例子除名公司出局後股價不跌反升，但有人認為，今次拋出重組方案，或者係希望可以在恒指換成份股之時，產生護價效應，畢竟今年美國市況轉差，私募基金活動大減，電盈要出售資產，時機肯定無上次咁好，如果價錢唔靚，小小超又未必肯賣，所以講到尾都係鰟句，炒概念要識得落車。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

炒波幅（９）         

2008/5/30 上午 09:41:54
網誌分類: 經濟

美國把首季經濟增長數據向上修訂，加上有聯儲局負責人話將來有可能加息，美元反彈，油價、黃金急插，美股向上股，道指第三日反彈，道指一度升百幾點，後來升幅收窄，收市報12646點，升52點，升幅0.4%。

油價在高位瘋狂上落，美國公布上星期原油庫存是三年多以來最大跌幅，但遇上美國向上修訂首季經濟增長數字，美元急彈，國際油價大幅下挫，再度失守130美元關口，回落至126美元水平。紐約期油由全日高位每桶133.85美元，大幅回落超過7美元，低見126.11美元，收市每桶報126.62美元，跌4.41美元，跌幅超過３％。英國倫敦布蘭特期油每桶收市報126.89美元，跌4.04美元。

美元上升，加上油價回軟，金價亦大幅回落，紐約期金低見每安士876.1美元，收市每安士報881.7美元，跌23.3美元，跌幅2.6%。主要貨幣兌美元亦急跌，在亞洲市歐元造１．５５，日圓造１０５．７，弱日圓有利日本出口股，日股繼昨日大升後，今早開市續升１２０點。

廉署打擊窩輪貪汚案，初步公布案情是有人食價。表面觀之，窩輪發行商和經紀行有太多幕後交易，低價批窩輪出街，造大成交，就讓中間人有上下其手的機會。

昨日講完窩輪後，有網友重貼年多前我的舊文「炒窩輪輸死你」出來，不少網友看後感慨良多，網友淑敏話：「Hi, 陸Sir,　點解這篇『炒窩輪輸死你』現在先至看到呢, 如果早半個月或者我唔會死得咁壯烈. 我在4月尾平均$0.24買了 A50輪, 兩日後升到去 $0.27, 諗住仲有得升多少少無沽到, 結果之後就不用講, 跌了一成無聽 陸Sir話止蝕 (覺得佢會升返) 跟住再跌了 20%, 30%.....60%, 直至5月26日剩番四成, 我真係怕連小小本都無埋, 就 $0.093打靶沽了, 這一次咁死法 (輸了很多 ...很多,不想公開) 我除了認輸外, 還覺得好對唔住 陸Sir用咁多時間去寫Blog教我們, 但始終戰勝不到自己的心魔, 雖然日日看 陸Sir Blog, 最終還是做不到應該要做的決定.」

「但看完今天的Blog內容, 覺得自己原來完全不明白買輪的風險真的這麼高, 並且有被騙的 feeling, 原來咁多數據都可以係假象. 咁我們以後還可以信什麼呢 ?我發誓以後不再買輪。陸Sir, 謝謝你 !!」

網友譚太咁講：「陸sir, 一早睇到你寫呢篇野o既話, 我就唔會買窩輪啦

先前以為好好賺, 點知掉頭我都蝕好多係佢度.... 唉! 初時以為賭大細唧, 冇通殺既....原來唔係o架...依家唔敢再買囉 ~ 改咗做月供股票算囉...」

好多人問我大市走勢，問我價位，好想補捉股票和窩輪的高位低，想低位買高位沽，吃盡波幅，這些問題我都會答，但經常強調買股要方法啱，方法啱時，蠢蠢地都會贏，方法錯時，幾精都會輸。　

我對買輪有一個好唔科學的總結：「唔知點解，買輪買中時賺得唔多，唔識走仲輸番轉頭；買錯時輸好多，一唔走就渣都無。」我早兩日都舉過新地窩輪的例子，假設在５月１３日新地兄弟反目風波鬧大開始，睇兩隻年期和槓桿條件差唔多的新地認購輪和認沽輪，到呢個星期二新地開董事會大局初定為止，那隻新地認購輪跌了５５％，但新地認沽輪只升了１９％，買中者賺得唔多，但買錯就輸好多，都唔知係邊度食咗啲價。

淑敏的個案是買中的典型，佢買完A50輪，升了１２．５％，佢覺得升得唔夠多，唔沽，咁就瀨嘢，散戶見窩輪開始跌時大多心存僥倖，覺得好快會升番，點知過兩日就唔見３０、４０％，即斬都唔見一大截。我有個朋友情況和淑敏類似，買完A50輪後升過３０％，我叫佢走，佢話升得唔夠多，唔走住；後來跌番到打平時，我叫佢走，佢話無理由，大陸指數比佢買時仲高２００點，「無理由」隻輪變番打平，又唔走，之後我無再同佢講，好似而家都未走，輪價無咗６０、７０％。所以唔好以為識得陸羽仁就有著數，因為我同朋友講，佢一樣唔會聽。

有更多是買錯方向的例子，買完輪即跌，一買馬上唔見１０、２０％，散戶心態係唔願打靶，點知隻輪跌得好快，一個星期唔見４０、５０％，散戶唔想面對，連輪價都唔想去睇，眼白白就讓窩輪變廢紙。

在一個不公平的遊戲規則下，買輪要贏錢，要有超常的洞察力，知道發行商點玩，入去偷雞啄兩吓，又要有超常的EQ，控制貪婪和恐懼，炒輪才有可能贏錢，但一般人不能做到。所以我又有一個好唔科學的結論，如果你炒輪輸過大錢，就唔好再賭。

網友均兒講起另一樣嘢，「陸SIR講:『買層樓自往，逼自己儲錢供樓，總好過賭馬、賭波、賭股輸清光』。這是鐵般事實同真理,我舊年大約10月份賣咗層樓,跟住將60%的錢投入股市中,依家先知那時系最高位,都吾算耶,應該系跌到28000點左右才買股吧,依家這60%的錢剩番，都唔知有沒20%,好後悔.　其實同我一齊炒股的班師奶股友早己退出了,剩我一個時不時浸下苦(股)水.股市中應了那句老話:有人辭官歸故里,有人漏夜趕科場.見到一批批新人往裡趕,都幾過癮既~」

好多人問我買唔買樓，都想問我點睇樓價走勢，我覺得現時樓價唔算平（新樓、豪宅仲相當貴），但我好多時會答買層唔好咁貴的市區樓自住都無壞，就係恐怕大家會出現均兒的情況，買樓焗你儲錢，焗你長揸，只要入貨價唔太貴（記住現時好多新樓、豪宅都幾貴），其實好過你炒股，唔係我好睇好樓市，係我唔睇好大部份散戶炒股的技術，若果炒輪，就死得更快啦。當然唔一定要買樓，低價買入好股長揸，都有同樣效果。

陸羽仁

http://www.hkheadline.com/blog/r ... rd=&searchtype=

Mr.Business

原帖由 ThermoFisher 于 29-5-2008 04:46 PM 发表
WARRANT害惨了那么多散户，香港现在才出来抓人。。。。

马来西亚的WARRANT没事，可以继续害人。。。。。可怜的散户。。

看看Cari，这么多人明明知道call warrant是废纸一张，却还是要去玩，博傻meh。。。输钱也不奇怪。

ThermoFisher

＂在一個不公平的遊戲規則下，買輪要贏錢，要有超常的洞察力，知道發行商點玩，入去偷雞啄兩吓，又要有超常的EQ，控制貪婪和恐懼，炒輪才有可能贏錢，但一般人不能做到。所以我又有一個好唔科學的結論，如果你炒輪輸過大錢，就唔好再賭。＂

这段是经典，幸好我买股五年都不曾碰过WARRANT，不然现在已经成仙了。。。

Mr.Business

2008/6/2 上午 11:29:24

陸羽仁覆網友

Ray:市場不喜歡冠君reits斥巨資向阿媽買朗豪坊，所以沽佢，跌近一年低位，要判斷一下沽浪會否持續，若估計沽完會定番，低番分段見破位才吸，穩陣少少。

信德有啲弱，原因未明，有少少怕佢彈完再跌，睇低少少好啲。

陳永仁：想搵DCF Model(現金流折現)計法的參考，好多專門財經書也有，或者上網輸入英文名稱，亦走出大量資料。現金流折現模式對新興行業唔啱用，因為好難估出較準磪的未來現金流。

Peterpan:你問買樓好唔好，請提供呎價資料，直覺覺得借貸９５％比率太高，負債太重。

Bdroom:短炒順勢走一段，唔一定話話佢回升１０至１５％，等後等升２０％，而係無固定比率，一見佢跌定回升就追入，炒一段，可能係１０％，１５％，或者幾多％都得，但目標獲利比率不能低過止蝕比率。

小潘：你問三隻富豪產業、陽光產業和希慎，富豪和陽光的物業質素麻麻，資產值或已近頂峰，勝在高息。希慎藏有重大資產，可惜保守。好息者可揀陽光（但俾我揀若長線我會揀低息一點的越秀房產），希慎悶的，又有１０％左右的機會有驚喜。

魚毛：４．２元買中信資源，見佢急跌到止蝕位，先沽為妙，沽完要預咗佢會彈番，止蝕係防止風險。

Yy太：我罰炒若能幫人，只是拔一毫的行為而矣。

Yuki:競價時段情況好亂，由於輸入系統的限制，想買又買唔到，但一早落咗價外止蝕盤，可能又中埋，真係搵哂笨。

至於點找好股，如何避免搵中８號仔，只能從研究股份生意，行業前景，公司管理和盈利能力，即是從價值入手。

S2000:中移動的基本經營環境有變，但對手是否能威脅中移動，尚待觀察，這是一個風險因素，會扣減中移動的壟斷溢價，但佢跌得深啲時，又出現值博率，你已有咁多國壽，買番少少中移動平衡一下都可以。

Lucy: 你問濱海泰達的超額配股問題，其實隻隻新股都可以咁，包銷商有一個權利，當新股熱賣時，可以叫公司多發一個預先設定的數額股份，俾佢配發俾客戶。

Kaybeo:６月見２２０００點機會唔係咁大啩，恒指現價適中，處於中間位。

Johnny:你問我有無炒波幅的經驗，當然有，不然就唔明白散戶炒幅的心態，有機會可以講講。

Clarie:你問我港交所可能落到１１６元的解釋，港交所主要收益看港股的成交，若港股成下在下半年的旺月如７、８、９、１０月不能回到高位，仲係６００億、７００億成交，港交所就要反覆向下。有興趣可以上網查港交所公布業績時一眾大行的分析假設。

Wa:你的經驗是一年買兩三次股，反而出雙糧，但炒出炒入，只得個桔，這是散戶的通病。

CCB: 中信銀行強番啲，你有貨見家鄉，又可以坐吓，若不放心定一個止蝕位，到位才沽。

Henry:你問６月港股會點，上半月都係牛皮偏淡少少，到月尾近半年結可能好啲。　

Mr.Business

注：此篇文章版权归香港頭條網所有。

金融High Tea——輪劫
2008年6月2日

港交所（388）[股價及相關新聞] 推出收市競價機制未到一個星期，就出現股份大波動的奇景，超過十隻股份在尾段大幅波動，有急升也有急跌，大股如中電（002）[股價及相關新聞] 急升9.8％，百麗國際（1880）[股價及相關新聞] 更升14.9%，亦有股份急跌，湖南有色（2626）[股價及相關新聞] 就大跌10.6%。

港交所對股價在競價時段的解釋是受MSCI香港、中國指數今日調整成份股影響。表面上看，指數基金趕覑在調整之前，按新組合入齊貨，其實港交所推出收市競價機制時段，主要亦是應外資要求，他們話有時要在指定時段內買齊貨，因為受正常交易時段的出價規則限制，不能限時完成交易，所以叫交易所延長收市時間，並設立競價交易時段，讓他們可以自由出價買賣。

競價亂搞 必須徹查

所以上周五事件的大路解釋是指數期金追蹤指數表現，MSCI指數換馬在今天生效，追蹤MSCI指數的基金想在上周五完成組合調動，否則未買齊貨，在星期一基金表現就可能跟唔足改了組合的指數，出現所謂「追蹤誤差」。你可能會問，他們咁樣貴貴都去搶貨，買晒貴貨，有無考慮基金持有人的利益？但其中一個解釋係芬佬可能唔想出現追蹤誤差，貴貨照追，反正高追了的股票在星期一回落，指數也跟住落，指數基金只是和指數同步回落，無乜所謂。

不過陸羽仁認為，基金若只為跟貼指數，不理客戶利益亂買貴貨，認真唔負責任。而且競價時段出現股價咁大波動，人為造市的疑雲重重，大價股咁樣大升大跌，出現好多俾人出蠱惑的機會，可以有好多春江鴨明正言順地搵食，若果有人明知基金要「咁笨」去在最後一刻買貨，就部署沽好多貨給他們都得啦。若果係芬佬買貨搞到咁大波動，有無知情人士會事先知道搵到食呢？若果唔係芬佬買貨造成，又係邊個搞出來呢？有無人從中賺大錢？監管機構應該徹查，並向公眾交代。

散戶炒輪 輸到入肉

股市有咁多金錢流轉，有太多搵食機會了，廉署上周進行代號「探射燈」的行動，拘捕大批涉嫌向窩輪發行商交易員行賄買到平輪的食價人士。中環茶友講笑咁話，輪商發輪時將鱓貨射來射去，平價批輪俾人炒，自己友睇到漏洞，行出街搞番檔生意搵食，今次有人真係做鰦「賊阿爸」啦。

在我的網誌上，有網友見到輪場咁多蠱惑№，貼番我兩年前寫的舊文「炒窩輪輸死你」出來，網友淑敏看後感慨良多，佢話：「Hi，陸Sir，點解這篇『炒窩輪輸死你』現在先至看到呢，如果早半個月或者我唔會死得咁壯烈。我在4月尾平均$0.24買了A50輪，兩日後升到去$0.27，諗住仲有得升多少少無沽到，結果之後就不用講了，跌了一成無聽 陸Sir話止蝕（覺得佢會升番）跟住再跌了 20%，30%……60%，到5月26日剩番四成，我真係怕連少少本都無埋，就$0.093打靶沽了，這一次咁死法（輸了很多 ……很多，不想公開）我除了認輸外，還覺得好對唔住，陸Sir用咁多時間去寫文教我們，但始終戰勝不到自己的心魔，雖然日日看陸Sir個Blog，最終還是做不到應該要做的決定。」陸羽仁聽到散戶炒輪輸得咁甘，都覺得好心酸。

澳門回歸後開放賭權，當時都有人議論過香港應否開賭，我就話唔使啦，香港的股市已經係大賭場，當中尤以窩輪為甚，澳門大小賭場有29家，賭台總數由 2003年的 424張，激增到今年首季度的4311張。不過香港都唔輸蝕，兩年前我勸人炒輪要小心輸死時，香港每年發輪1500隻，我已經大驚小怪，喊到嘈晒，但 2007年香港發輪數量激增到6300多隻，去年窩輪成交金額4.7萬億，佔大市成交金額的22%。每隻輪等如一張賭䒷，香港有6000幾張賭䒷，係唔係多過澳門？

我話窩輪如賭䒷，輪場如賭場，可能好多人唔同意，話窩輪跟正股走，都係投資鎹，點解話係賭呢？

6千賭䒷 天天有局

去年個別股票的窩輪發行最多是國壽輪，佔窩輪總數的十幾%，你買國壽正股（2628）[股價及相關新聞] 可以係投資，投資不一定是零和遊戲（即是唔係你死就是我亡的遊戲），投資可以係正和遊戲（即係話參與者人人都可以贏錢的遊戲），因為國壽上市集資，拿集資的錢去做生意，生意做得好，派息年年加，就等如有新水回流畀股東，假設派息愈來愈高，公司股價跟住上，股東就個個賺錢。即使你唔係買新股，係中途升鰦上去追貨，而家跌鰦落鈬，如果國壽爭氣，維持盈利增長，維持派息，難保過兩三年可以上番高位，所以投資正股，只要挑中有實力的好股，年年賺錢年年派息，就有新水流入股市，可以是公司和股東雙贏的遊戲。

衍生工具就不是那回事，這是一個零和遊戲，呢鱓叫做塘水滾塘魚，水係得咁多，有人贏，就有人輸，好多時都係散戶和窩輪發行商對賭，窩輪發行商賺錢，就係買輪的散戶整體輸錢，若有少數個別的散戶賺錢，只代表其餘大多數炒輪的散戶輸得更多。

窩輪發行人發輪時，買了部份正股做足對沖，股價變化時再增減作為對沖的股份，只要風險控制得宜，窩輪發行時溢價夠高，發輪根本就是穩賺不賠的生意。有某大行的輪后公開講過，發輪從未輸過，咁即係話同發行商對賭的散戶，從整體上來從未贏過，即使少數人贏，只係贏到其他散戶鮋錢，代表其他散戶輸得更慘。

發輪咁好賺，輪商數量亦急增，由幾年前只有十個八個輪商，增加到今日有20幾個，雖然多鰦人爭食，但發輪數量仍然成倍成倍咁增長，新生意同步增長，即係話新人入場一樣搵到食，亦等如散戶整體輸得更多錢啦。

澳門要控制賭䒷數量，但香港卻無人控制發輪數量，因為窩輪發得愈多，港交所收到的發行費就愈多。有人話發輪數量愈多，就代表香港呢個金融中心就愈成功咁話，可惜香港窩輪發行量全球第一（成交量大陸多鱓），呢個第一係用散戶的白骨堆砌出來。

小注怡情 快進快出

一年發6300幾隻輪，即係平均每個交易日有20幾隻窩輪登場，現時有三成係恒指輪，即係有1900隻係恒指輪，1900隻咁誇張？！你買完一隻恒指輪，佢就如蜉蝣一樣，生命周期極短，可能只有頭幾日炒得熱鱓，熱潮一過，成交大縮，佢已經係一隻半死輪，你想出貨，就只能和發行商委託的莊家交易，莊家開出的價然自然極「咸」，比你認為合理的價錢低很多，總之你想沽就要俾人食晒價。你買中覺得升得唔夠，唔想沽，就如上述的網友淑敏一樣，等一等可能等到隻輪跌到入哂肉才能忍痛沽。買錯仲慘，跌得仲快，買完一兩日就跌20、30%，一個星期唔見一半以上，散戶一時面對不到現實，唔想去睇股價，好快就得番個零頭，沽同唔沽都無分別。

你炒輪失敗以為自己眼光唔好，其實同濫發窩輪制度有關，一年發6000幾隻輪，每年以一倍一倍咁增加，窩輪無限量供應，供過於求，輪價無理由會好，你一買走慢半步就鎖死。這還不止，新輪太多，去貨都去唔切，有個別輪商會以折扣價賣俾街外人，在新輪上板時就將這些事先定好的掛番上板，加上接纒貨做大成交，吸引散戶入場，咁就散埋鱓貨尾出街。而家幾千隻輪，散戶點揀，自然係睇住個成交榜來揀，買成交大的窩輪，以為成交大流通量好鱓，要走都走得快鱓，佢懐唔知呢鱓只係人為化妝，高成交維持唔到三日，成交量就直線下插，散戶一上鰦車就好難落車了。

每年發6000幾隻輪，無限制地濫發，簡直係「輪劫」。陸羽仁唔係清教徒，唔反對人投機，甚至唔反對人賭博，只反對人唔知自己賭緊錢而去賭。假設你全副身家得10萬，一般人唔會提晒10萬出來過大海賭一鋪，但絕對夠膽全副身家鲻身買輪。我要提醒大家，鲻身買輪，和去澳門賭錢無太大分別。合理賭窩輪的手法是小注怡情，快進快出，預鰦投入去的錢會輸清，先至好入場呀！

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

論價值         

2008/6/1 下午 11:57:48
網誌分類: 經濟

人在股海中，究意是炒股還是投資股票，好多時都講唔清，講講吓就會問到你買的東西究竟真正價值有多少，如何判斷價值，可以研究一下。

網友均兒有此留言：「在而家這種炒風時代，價值的東西往往被炒得毫沒價值，人人都在尋找價值的東西，大戶也在找價值，價值被炒高來賣，價值又何在？

樓宇的值價在於所在地域、設計、材料上，價值也都可以估算到，但大戶手影費加散戶盲炒費你就計唔到了。澳門好多人都有遇到咁的情形，夜晚吃飯時間有人來按鐘，話系香港xx地產的，你層樓依家值几多几多錢，如果賣的話找佢。在此種炒風下價值的東西一夜之間變得不理性，如果你撞啱要結婚要急用，你覺得價吾價值？」

佢又話：「股市好大，好難看到大戶手影，有價值的股票被不合理抛售時，再有價值也都變得毫無價值，股票被炒高時，毫無價值也都變得很價值。因此我覺得股票沒有價值存在，全是人為因素。依家講的係炒股炒股，沒人話買股票，只要話買股票，給人的印象已係炒股，即係一個投機者。不認同的請問炒字點解？買菜一定不會買燶咗，炒菜才會炒燶咗。同樣買股都唔會買燶咗，炒才會炒燶股。問題係已經沒人認為買股票是買，個個都在是炒，有誰是在買股票？」

均兒講的問題是資產的市價，好的東西無人吼，價錢跌，也變得毫無價值；壞的東西有人炒，價錢升，就變成很有價值。這個講法完全沒錯，科斯托蘭尼講過，股市如一隻頑皮小狗，牠不是走在主人之前，就是走在主人之後，如果小狗和主人同步，就等如股票反映合理價值的話，股票大部份時間不是這樣，並非太貴，就是太便宜。

股票市價經常不反映合理價錢，並不等如合理價錢不存在。我們要判斷一間公司、一間物業的合理價值，要把它看成一盤生意，要看這盤生意賺多少錢，產生多少現金流，就可以看到公司的價值（巴菲特就是將公司無限咁長的現金流貼現，計出「內在價值」），然後比較這個現金收益和市價的比值，就大大約約知道公司現價合唔合理。

公司做生意賺錢年年上升，現金流入不斷增加，公司又願意到的現金和股東分享，有不低的派息，我睇公司仍然睇好基本的數字，睇每股盈利的增長，睇市盈率，睇息率。每股盈利增長超過２０％，主要來自經常項目的盈利增長，市盈率低過１５倍，息率超過３厘，都算做比較吸引的公司，若公司管理層有較可信賴的住績，這些公司就值得注意。

睇樓更簡單，因為樓宇的收益就是租金收益，若租金穩步上升，租金收益率有５厘，證明市價不算貴，若樓價上升而租金不升，租金收益率會不斷跌，跌到　３厘樓下時，樓價都有少少泡沫了。

買入有價值的股票，不等如它明天會郁，好股的股價較平，通常都有原因，好似滙豐受次按威脅，國航、中石化面對油價高企的危險，中移動有市場開放的隱憂，這些公司的盈利備受衝擊，所以股價才插得較深，但若無這樣或那麼的負面因素，它們的股價就不會咁便宜，但有平貨散戶也必肯撈，他們只愛熱股，但若要買價值股，好多時就要冒吓風險，留意吓冷門股，細心分析，燒吓冷灶，說不定有意外收穫呢。　

陸羽仁

http://www.hkheadline.com/blog/r ... rd=&searchtype=

Mr.Business

2008/6/3 上午 10:51:26

陸羽仁覆網友

Indy:想投訴可以找證監會，它是政府機構，是投訴的正確對象，若投訴表格太煩，可以寫信投訴，順便投訴埋投訴表格太煩。政府的負責人是財經事務局局長陳家強，也可向他投訴。

Piglet:領先台灣ETF，也如其他台股基金一樣，科技和工業的比重好大，它們受全球因素影響較多，當然台股PE１０至１２倍，台灣被好時，這些台股可因PE向上而受惠，但我估未來三幾年是台灣的零售、空運、地產、旅遊業最受惠，通常這些股票不是台灣的最大股，不是基金愛股。

廢人：唔好改個咁o既名，做人要樂觀，積極，你話買股輸錢多，只係證明你唔識炒而矣，所以第一要戒炒，第二要戒在熱門時買股。５８元買的恒地可以守吓，若有多餘錢，等佢跌到５１元買第二注，４７元買第三注，買入可以揸長啲。

中移動等電訊重組消息沉澱後，應該會見底，若見１１０元可以開始吸，否則到月中若大市調整得深啲時，也可以開始買少少。

Bdroom:你問我乜見做「跌定先買」，難以三言兩語講清，但不是股份正在急跌時，通常股份急跌後會反彈，跟住又回，呆一段時間，如果好番又開始上番少少，我係指這種時候。

若買入後未到價即回，例如升咗７、８％就回，應以購入價為止蝕價。

Chiwing:你問宏調對煤價及神華的影響，煤價升，但神華股價浮沉，市場似乎怕中央出猛招，講來講去的煤電聯動，不知最後如何出手，煤業有少少政策風險。

Rabit: 招商局基金大體上跟A股走勢，從來較資產值都有折讓，若非大力看淡A股，現價可以揸吓。

志強：你問重慶電機的股票面值１元，上市價１．３元至１．７元，是否定價偏低，其實股票面值和股價無直接關係，唔可以咁樣就話定價低。

Peterpan:想買１９０萬元的深井樓，未知呎價，表面看尚OK，但首期借９５％略高，能壓到８５％至９０％好啲，因為７０％以上的借貸要買按揭保險，利息較貴，多付本金，少付利息好啲。

Bread:你話想買港島樓，請提供具體地區或屋村，唔係好難講。

均兒：２００萬樓租得５０００元，只得３厘租金收息，有啲泡沫，我估你指澳門樓，如今嚴控土地供應，唔知發展商係唔係收樓重建，若不是如此，樓價雖然短期可以炒得更貴，但靠租金難以長期支持。

Mr.Business

注：此篇文章版权归香港頭條網所有。

贏錢總是Insider
2008年6月3日

有一些做會計的朋友他們是從來都不買股票的，第一可能是因為本身職業的限制，第二可能是因為他們於行內做了太久，十分清楚一家公司要做一盤數是多麼容易。所以他們都有一個很先入為主的想法，便是股票是一個騙人的玩意。

「盈利」根本不可靠

盈利根本是不可靠的東西，只要一家公司把入帳或支出的時間稍為動一點手腳，那年的盈利已經不是可以靠平常的分析能夠預測到，所以市場上能夠贏錢的一定是「Insider」。

Victoria同意基本分析不是百分之一百可靠，假如純粹靠看年報可以賺大錢，我想大學裏除了金融外，其他科目報讀的人數將會寥寥可數，但如果以基本分析不可靠為由而不買股票，Victoria則覺得太可惜了。

市場上老千不少

市場上是有很多老千的，有很多人利用上市公司的資源來養活三代，例如平價出租公司物業給自己人，或用公司錢來買私人飛機等等。對於他們來說，市場操作上亦有賺錢的機會，例如把股價炒高，再配合消息高位散貨，於短時間內賺取大量金錢。但Victoria認為這種是一種很短視的做法，他們沒有想到上市公司的市盈率，其實是有令他們財富產生倍數的效果。

上次提出了一個「啖啖肉理論」，便是當一家企業的銷售量超過盈虧平衡點後，企業經營有利潤，此時，由於固定成本不變，產品售價每升一元，那一元對公司來說都是「啖啖肉」。但其實那一元對於投資者或股東來說更是有如「龍肉」。比方說，一家市盈率十倍的公司，只要公司每股盈利多賺一元，那一元便會乘以十，表現於股價上。

炒股P/E大打折扣

作為公司主席或創辦人，通常都拿覑集團某一個百分比，股價上升，集團市值變大亦代表了他身家變多了。故利用公司資源或利用自身股票去賺錢是一個很笨及只看短線眼前利益的做法。當他們每拿走公司一元，其實直接令自己損失了一元的十倍或更多。

除此之外，當一隻股票被市場認定為炒股後，市盈率將被大打折扣。正常的內需股可能可以做三十倍市盈率，但被認定為炒股的內需股可能長期只能做十多倍市盈率。

王雅媛（Victoria）

http://www.hkheadline.com/news/h ... mp;section_name=wnb

Mr.Business

注：此篇文章版权归香港頭條網所有。

金融High Tea——中移動壟斷大勢未變
2008年6月3日

恒指反覆向上，昨日高開9點後，回至24,454點後再上，下午高見24,923點，但未能升穿25,000點大關，之後稍回，收報24,831點，升 298點。現貨收市後期指被質低，收報24,653點，升194點，比現貨低水178點，成交67,700張。國企指數彈256點，收報14,026點，大市成交743億元。

中環茶友話，期指結算後，踏入新月份，大市有少少皮球反彈之勢，即係本來在結算時被人隊低，鬆開手佢又彈纒，未形成一個清晰向好的走勢。

上周五競價時段交易混亂，好多股份急升暴跌，昨日有關股份股價修正原來之走勢，升鰦的跌番，跌鰦的升番，好似香格里拉（069）[股價及相關新聞] ，昨日大跌15.02%，收報22.35元，上周五香格里拉急升19.5%，昨日打回原形，差不多跌番到原來22元的起步點。又例如中電（002）[股價及相關新聞] ，昨日大跌8.2%，去番64.7％，打回上周五急升前的原形。其餘好多上周五的大變股昨日都出現修正，湖南有色（2626）[股價及相關新聞] 升8.4%、百麗國際（1880）[股價及相關新聞] 挫8%、中渝置地（1224）[股價及相關新聞] 挫16.5%、合生創展（754）[股價及相關新聞] 跌5.7%、恒鼎實業（1393）[股價及相關新聞] 跌10.5%、中國鐵建（1186）[股價及相關新聞] 挫7.3%。

第三世界式波動要徹查

港交所（388）[股價及相關新聞] 行政總裁周文耀昨日現身為上周五競價時段風波解畫，話MSCI指數重新調整，令到追蹤相關MSCI指數的被動基金自動出現轉變，受影響共有167隻股份，料因此產生最少300億元港元資金流。他又話上周五競價時段並非只是大戶參與，有15%係散戶參與咁話。周文耀估計，在恒指將於本周五調整指數成份股時，來自強積金及其他追蹤恒生指數的被動基金的資金流總額，僅達20億元，遠低於上周五MSCI重新調整所涉及金額。

中環茶友話，呢單咁鮋離奇股價大波動，交易所的解釋未能令人信服，大部份上周五狂升暴跌的股份，昨日都接近打回原形，若果指數基金唔理客戶賺蝕只為追貼指數，基金公司亦都要向客戶交代。交易所輕描淡寫交代未使人信服，證監會應介入調查，做個報告搵出真相。香港成日話自己係世界金融中心，咁多大價股出現這些第三世界式的波動，股份狂升暴跌，真係令人以為香港股市無王管。

內地電訊業重組具體詳情出台，聯通（762）[股價及相關新聞] 以每1.5股換取網通（906）[股價及相關新聞] 1股，作價有3％溢價，兩公司合併後網通除牌。聯通和中國電信（728）[股價及相關新聞] 訂立關於CDMA業務轉讓的框架協議，聯通將以總代價為1,100億元人民幣，出售CDMA網絡予中電信，作價和外資估計的數字接近，但高於內地市場預期的1,000億元人民幣。

聯通CDMA網業務去年的稅前利潤為12億元人民幣，折合利潤率4%和40多倍市盈率，此作價亦接近去年和電（2332）[股價及相關新聞] 出售67%印度無線電話業務予Vodafone的作價，當日轉讓的67%股權售價是835億港元，折合100%股權總值為1246億港元，和電印度業務有4580萬個客戶，聯通CDMA則有4310萬個客戶，兩者客戶基礎亦接近。

防電訊股好消息出貨

據熟悉內地電訊業的高人話，未來內地電訊業將出現中移動（941）[股價及相關新聞] 、新聯通（762）[股價及相關新聞] 和中電信（728）[股價及相關新聞] 三足鼎立之局，過去中移動獨大，其他電訊業者根本無力與其競爭。中國移動去年純利870億，直接競爭對手聯通的純利只有93億，大約只有中國移動10之1純利，根本無法與其抗衡，市場基本結構完全失衡。

內地電訊業的結構失衡來自分業經營的佈局，網通和中國電信只做固網生意，截至2007年9月，中國固網電話用戶2.29億戶，而中國移動電話的用戶已達到 3.65億戶，固網與移動用戶差距達到了1.37億戶。內地電訊市場未發展好固網，已跳入移動世界，令中移動佔盡優勢。不過今次第三次電訊業重組，雖然放開讓中國電信經營移動電話，亦壯大新聯通，但沒有放開資本投資的渠道，無俾外資入場投資，故預料中國電信和新聯通難以挑戰中移動。

不過從股價走勢而言，幾隻電訊股都會比較波動，中移動升跌皆有可能，不排除借佢舞高弄低大市。但中國電信、聯通和網通復牌後，大路估計電訊業重組對他們利好，但之前已升過一段，若再抽一抽，小心出現好消息出貨，中國電信高價接CDMA，可以成為被人沽的藉口，網通股價會跟聯通，聯通沽CDMA後不會特別分紅，也可以被人借勢抽高出貨。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

論價值（２）
       
2008/6/3 上午 09:47:07
網誌分類: 經濟

美股連彈４日後又再插，道指最多跌過２１０點，但尾市彈番少少，最後跌１３４點，跌幅１．１％，跌到１２５０３點，險守１２５００點大關。

美股大跌皆因評級機構標準普爾調低投資銀行美林、雷曼兄弟和摩根士丹利的評級，第二大投行摩根士丹利的評級降一級，由A+ 調低到AA-，第三大投行美林亦降一級，由A +變成A，第四大投行雷曼亦同樣被降級。至於第一大投行高盛就維持 AA-級別不變，四大投行的前景維持「負面」。標普降低三大投行評級，令人覺得次按風波對金融機構的影響未過，對股市有壓力。美股早前是跌後反彈，如今再跌，尚在尋底之中。港股的跌後反彈亦會完結，又再進入尋底期。

網友Henry昨日突然問，有乜方法可以在３個月內由２萬元變成２０萬元，他出了點意外，有６０％機會要呢筆錢去結緍。他而家工都無，只得２萬，暪住另一半去儲錢和借錢，佢咁講：「最緊要九月時我要有份工先得...覺得她不想這樣委屈咁樣嫁給我，要體面一些才得．．．２０萬其實是最少la．．．最好應該要有６０萬先得....更加無可能...不能太hea ar....顧不到什麼壓力不壓力，儲不到就死梗．．．或許這就是我的命運。是很沉重，但都要擺上肩頭上承擔，多多都要。」

從投資、投機、以至賭博的角度，想在３個月內由２萬變２０萬，都是不現實的想法，由２萬變到２０萬的機會相當細，以賭博論，賭大細，在賭場買中一舖大細的機會約４７％，一舖中就２萬變４萬，二舖中就４萬變８萬，三舖中就８萬變１６萬，雖然唔夠２０萬，都差唔遠囉，但連中三舖機會率係得１０．４％，

１０％機會率係乜嘢意思，即係平均玩十次中一次，你想像吓你玩俄羅斯輪盤，有１０個入子彈位，入咗９粒子彈，你攞住把鎗向自己個頭開一鎗，要咁啱打中唯一一個無子彈的彈孔先至唔使死，你都可以同自己講：「呢次死梗啦！」

唔賭錢去投機，炒股炒輪，我估３個月由２萬變２０萬的機會，仲細過賭大細，點解？因為投機講心理質素，你咁心急，咁亂，亂咁博，平時博得到，呢舖都博唔到，財不入急門，就係咁解。

昨天講到價值，其實唔止買股買樓，婚姻都有價值，係要追求兩人相愛，可以長相廂守（對唔住，觀念略為老土，但至少情侶結緍那一刻仍然係咁諗啩）。我唔知Herny搞出乜嘢不能控制的意外，但佢工都未有，就急急要姞婚，或許有他的苦衷，但等得就不妨等吓先，唔等得只能以２萬元的預算去結婚。

Herny可能話唔等得，而且女友係天人化身，不可以放棄。但我估Herny可能未結過緍，不知兩人相處的難處，一個人住要點就點，兩個人住要互相遷就，連廁所板拉起還是放低，都要互適應，你話：「她不想這樣委屈咁樣嫁給我，要體面一些才得」，這是女仔正常的想法，但如果你無咁大個頭要大戴咁大頂帽，結婚花費咁大，欠落一身債，等如負重磅跑長途，死梗。

貧賤夫妻百事哀，這是恒久不變的道理，假設你借到２０萬結緍，但一開始就欠２０萬債，太太和你結婚風光過後，才發現你是空心老倌，叫你去旅行又無錢，叫你買嘢你又無水，你事先無向佢坦白，你估佢會唔會覺得俾你搵咗笨？跟住就日日家嘈屋閉，永無寧日。

好多人以為一擁有就是永恒，誰不知很多好東西只是曾經擁有，轉眼又會失去。你充大個頭夾硬去花鉅資結婚，婚後一貧如洗，你只知結婚之難，不知維護婚姻更難。婚前大家談戀愛，各自將自己美好一面示人，男方去女方遷就十足，結婚之後就盡顯男兒本色，女方本來已經覺得好難頂（反而亦然），若再加上你係窮鬼（因為婚前過度借貸），就更加惡頂。花了你能力以外的鉅資去娶一個靚女，就等如貴價買好股一樣，買嗰吓好興奮，但長揸吓去，就發覺好難捱。

婚姻的真正價值是兩人的相愛，如果你向對方坦白，告訴她你的財政困難，佢立即頂你唔順，咁樣即使你而家過到骨，女友結婚之後發現真相，佢一樣會頂你唔順。互相坦白，共同解決困難，對長遠相處有莫大幫助。若佢堅持要面子，但你唔使要面子，兩個人性格根本不同，長久相處亦有問題。

唔好怪陸羽仁太老土，唔止Henry，其他網友如果想結緍，但又發覺唔夠錢，只能怪自己過去無儲錢，或者係使大咗，或者係賭多咗，總有一個原因，令你儲唔到錢。儲埋個錢，合理投資，應該早早計劃，無得臨急抱佛腳。

陸羽仁

http://www.hkheadline.com/blog/r ... rd=&searchtype=

Mr.Business

2008/6/4 下午 12:01:06

陸羽仁覆網友

Henry:後生仔好似小潘咁做多兩份兼職，或找幾份補習，一個月搵多３０００、４０００元，月供股票，你就會有好環境，好難靠炒炒出彩虹。

Ray及各位想撈電訊股的網友：中電信、聯通、網通雖然跌得多，按理應有一個像樣反彈，要跌都會彈完再跌，但反彈可能又會幾短，要好好身手才捕捉得到，若是長線，候低撈中移動好過，怕這三隻股已經炒完，要反覆尋底，然後在低位呆一段時間。

ｂCheng:你問中移動和內房股，內房股中線看淡，短線跌得多，月中CPI出來若通脹放緩，或許會彈一彈，但要買買中移動好啲。

Twohitsix:投行被調低評級，一影響借貸成本，要俾多啲息，二影響發行某些有債券性質的產品，如利率調期，但影響不致太大。但投行第一季狂撇帳，最壞情況應已過去。

中移動可以分段入，１１４元入咗，見低入啲，１０５元再入，最後一注安排在９５元，應該較安全。

小潘：越房房託OK，收購唔太負面，現價近低位，可以買吓收息，預咗佢要回多少少，但長線應該唔怕。

S2000:晨鳴紙業係有質素的大公司，可以認購吓，但咁市道唔係實贏。

西班牙銀行增持中信國金及中信銀行，中信國金想私有化，當然利用，但中信銀行好消息可能反映得差唔多。

Bread：想買藍灣半島，呎價５２００元，佢從４０００元升上來，已升３０％，此屋村質素本來唔錯，但交通較隔涉，樓價一直落後，估計長期會如此，自住當儲錢OK，若無論如何要租樓，現價中中地，都可以買，但唔好以為樓價實升，樓市唔就佢回番去４０００幾元都有機會，若只是投資不自住就雞肋啲啦。

Kid:你三年投資的總結，策略比技術分析重要，好有道理。

Suki:在上證綜指３０００點時入A50基金，那時１６個幾，而家上證３４０００點，又係１６個幾，因為那時外資估大陸股市跌得多會反彈，A50 有溢價，而家炒完反彈溢價消失，所以A50又回到１６個幾，預計再跌亦唔跌得太多，可以揸吓。

Aiyu:上海石化維持在較高價位，因為大陸久不久就炒佢私有化，若無此因素，股價有壓力，所以佢會比較大起大落。

KowloonTV: 我無具體研究每一隻台灣基金，唔知有無其他網友可以幫手，要揀啲較多內需、金融、地產、零售、空運股成份的基金會好啲。

Torreskk:國航６元買了第一注，原定５．５元第二注，５元第三注，問好唔好將第三注改成５．２元，我話油價未升定，都係維持第三注５元好啲。

Kwovin:國航受油價和宏調減少客量影響，但捱得過呢浪，又有好環境。

Indy:瑞銀公布減持茂業的消息不會假，你睇５月２８日的成交睇唔到咁多，會唔會那日只是申報日期，不是減持的日期。

Bdroom:乜叫跌定炒番上，也叫跌後反彈會再跌，你要經過長期睇唔同股票的走勢，才可以有感覺，唔可以我講兩句你就知，理論上大跌後會有一段牛皮時段，唔會跌完即升，或者叫你做吓功課，你唔好買，齋睇聯通、網通、中電信的走勢，睇一個月，睇吓有乜心得。

George fisher:我一直講阿爺只想人民幣升值不超過２０％，這是政策頂，衝破６．５後，離頂不遠，適量減持無錯。

詩敏：你用１５萬俾首期，１５萬結婚，結婚只玩一晚，間樓起碼住十年，如果雙方有共識，結婚開支減５萬，買樓首期加５萬，或者間樓買大少少，或者供少一啲，都會著數啲，但至緊要有共識。

Lalama:買股儲錢好主意。

[ 本帖最后由 Mr.Business 于 5-6-2008 04:57 PM 编辑 ]

Mr.Business

注：此篇文章版权归香港頭條網所有。

金融High Tea——好消息出貨坑殺散戶
2008年6月4日

美股杜指上日大跌134點，港股昨日開市未算跌得多，低開275點後，下跌至24,255點，跌577點，尾段跌幅略為收窄，收市報24,376點，跌 456點。期指收報24,239點，跌414點，比現貨低水137點，成交72,084張。國企指數跌404點，報13,622點，大市成交839億元，跌市成交增大，主要受幾間內地電訊股復牌影響，因為三家公司成交加埋都有100億了。

昨日聯通（762）[股價及相關新聞] 、網通（906）[股價及相關新聞] 和中國電信（728）[股價及相關新聞] 復牌，簡直係追獱者的災難，大家應該記得，當日新華社公佈電訊業重組新聞時，呢幾隻股仲交易鰦一兩個鐘，當時停牌前股價急升，然後在上午尾段停牌，當獱貨者諗住昨日食胡之際，幾隻股復牌開市已經唔係升，係跌3%、4%，好消息出貨的勢態好明顯，散戶夠醒仲走得切，但睇多陣都唔掂，跟住沽壓湧至，三隻股愈跌愈有，最後聯通收市大挫14.1%、網通瀉12.8%、中電信跌12.7%；反而中移動（941）[股價及相關新聞] 雖然跌卻企得住纒，只是跟大市跌2.2%。電訊相關設備股同樣被人趁好消息出貨，中通服（552）[股價及相關新聞] 瀉6.7%、中興通訊（763）[股價及相關新聞] 挫6.9%、京信（2342）[股價及相關新聞] 瀉7.9%。

香港沽得勁過內地

股價跌有基本因素，亦有技術原因，講基本因素就如陸羽仁昨日所講，睇晒內地電訊業重組後，唔覺得對中移動有好大挑戰，而新中國電信由於花1,100億鉅資向聯通買CDMA業務，其中中電信以438億向聯通買入客戶，中電信母公司以662億買入聯通母公司的網絡，市場驚業績添壓；新聯通收鰦1,100億又要預備將來打仗，無特別息派，散戶又覺得無覑數。總之外資似乎唔太睇好聯通和中電信可以挑戰到中移動的壟斷地位。

技術原因就係電訊業重組講鰦好耐，如今公佈出來的方案並無新意，但有關股份已炒鰦大半年，例如網通，去年10月還是在18、19元的水平，炒到上公佈前的 27元，而家回到23.6元，其實比起步位還是有相當升幅，聯通也是從去年底13、14元炒上來，昨收15.88元，比起步位仍有一定進帳，外資炒重組，見你一回頭佢就搶住沽，佢地仲有利潤，怕幾隻股打回原形也。

點解我話係外資沽，因為內地母公司聯通集團A股無香港H股插得咁勁，聯通集團A股昨日開市還升過10%漲停板，不過10點半復牌後就開始回，最後收市跌1.5%，報9.59元人民幣收市，雖然都係回，但無香港H股跌14.1%咁勁，可見外資沽得勁好多。

花旗睇好中移動

中環茶友話，呢鱓好消息出貨的古仔不斷重演，好多大公司公佈業績都有咁鮋狀況，但今次三隻電訊股回得恐怖鱓，若散戶在停牌前追入，昨日已被坑殺。通常大跌完會反彈，但三隻大陸電訊股短期概念已炒完，小心彈完之後再跌，散戶唔好輕言追貨，要追可能等中移動跌得深鱓，分段入下中移動好鱓，因為中移動基本因素較強，而且跌得早鱓，股價沉澱得六六七七，而家只係驚大市未跌完，所以中移動還會跟住大市尋底。

有外資行開始唱好中移動，例如花旗就發表研究報告，建議買入，目標價150元（昨收報115元），原因是預計中移於電訊業重組後，可繼續保持龍頭地位。

花旗話，中移動在未來數月較其競爭對手如聯通、網通及中電信有更佳優勢，因為三個對手要專注重組業務。而中移動發展的TD-SCDMA（即中國自行研發的 3G網絡），有政策支持，加上電訊服務有強勁需求等因素下，均有利中移動維持電訊業龍頭地位。因此認為中移動可維持盈利增長，並預期中移動08及09年的純利為1,174億及1,392億元人民幣，未來前景樂觀。

政府公佈公務員加薪，首長級人員及高層薪金級別的公務員，加幅為6.3%；中低層薪金級別的公務員，加幅為5.29%，調整由08年4月1日起生效。特首「煲呔曾」擺明向低級公務員派糖，因為首長級、高級和中級公務員的加幅都係跟薪酬趨勢調查，但低級公務員的加幅按調查無咁高，結果就拉高到和中級公務員有同樣加幅，特首認真識得收買人心，做公僕的讀者應該收貨。

公務員人工加得理想，對本地消費類股份應該溫和利好，對樓市也是稍稍偏好的消息。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

油價炸彈         

2008/6/4 上午 09:45:01
網誌分類: 經濟

美股道指再插１００點，美國開市初段曾上升５０幾點，後來傳出雷曼兄弟或要籌資，令市場憂慮金融股的前景，美股反覆下跌，道指最低跌過１６２點，尾市略反彈，收報１２４０２點，跌１００點，險守１２４００點關口。

道指從今次反彈浪的高位１３１００點回落到１２４００點，跌了７００點，跌幅５％左右，以回吐計深度都差唔多，若再急插，就似大跌多過回吐。不過尤幸今次回落下來跌勢不算太急，尚似一種調整態勢，後市要再觀察。港股亦將跟美股繼續調整尋底。

油價已令全球金融、已至政治動蕩，歐洲各地都有運輸工人罷工，在上班時間阻塞公路，要求政府提高油價補貼。油價高企令耕地轉種生物能源，令糧價搶高，埃及民眾排隊買有補貼的平價麵包時大打出手；聯合國糧食高峰會要求八大國限制生物能源的發展，以免推高糧價；已有愈來愈高呼聲要求八大國聯手逼石油輸出國增產，以壓低油價。油價急升大大推高通脹，影響民生，將會逼到大國政府要出手。
　　
大炒家索羅斯對油價的分析有參考價值，據《金融時報》報導，索羅斯到美國０參議院商務委員會作證，他在證詞中話，國際原油每桶價格最近衝上一百三十五美元的歷史高價，過去一年油價升了一倍，是新一波投機客的「傑作」，部分原因是包括退休基金等機構投資人投入資金到追蹤油價成本的期貨指數，投機性投資推升油價大漲。

索羅斯更警告油價和其它原物料商品已有泡沫特徵，一旦機構投資人突然開始看空油價，將對全球股市造成非常嚴重的後果；他認為，油價市場不會立即「崩盤」，但是投機性高的期貨投資宜減少。佢將目前油價被投機客炒作的情況，與一九八七年股市崩盤作比較，當年大筆資金湧入「投資組合保險」，機構投資人利用這個保險對抗股價下跌。

索羅斯話，「這兩個案例中，機構投資人投入大量資金，金額之大足以讓市場失衡，如果一旦趨勢反轉，機構投資人都決定退場避險，就像一九八七年他們那樣做，那麼全球股市無疑將會崩盤」。

高油價本身就是對經濟和股市的重大威脅，但油價崩盤又會造成金融動蕩，索羅斯係美股大淡友，相信他已造空了美股，所以將油價爆泡睇成為美股崩盤的危機，我就話如果油價係咁升唔會跌，全球經濟深受影響，股市更易崩盤。

美國財長保爾森死頂話高油價由供求所致，和美元疲弱無關，佢在國會的壓力下，亦叫商品及期貨交易委員會去調查油價的炒賣活動，但美國政府公布的數據顯示，對沖基金和投機者在上月持有期油的淨好倉合約，比高峰減少８０％，顯示他們也怕油價會爆煲，已減少持好倉。５月２７日的期油好倉淨持倉量減至２５８６７份合約，比高峰的１２７４９１份合約大幅下降。

商品及期貨交易委員會受到美國國會壓力才去調查，但查到對沖基炒油的情況不嚴重，估計真正的原因是退休基金及指數基金大手買入期油，長期持有，以對沖持有股票的風險，但他們的長期持倉數字不在披露之列，所以睇唔到全幅圖畫。我估真相係油價升得太高，連對沖基金都唔敢去炒油價再升，但高油價已逼到大量長線投資基金買入期油，以對沖其他投資的風險，令期油的需求急增，更推高油價。

油價的大泡沫已經成，既然是泡沫，只會愈吹愈大，直至吹爆為止，好少吹到上高位就停住唔郁，再加上高油價影響民生，影響政治，會逼住大國政府干預，油價係一個大炸彈，谷谷吓谷爆的機會好大，小心。

陸羽仁

http://www.hkheadline.com/blog/r ... rd=&searchtype=

Mr.Business

2008/6/5 上午 11:26:45

陸羽仁覆網友

Ray, Clmama, 紫紅豆，yogie等問油價爆煲會點，美元下跌，係全球商品上升的主因，中國和印度的需求是附加因素，若美元不回升，油價本來難跌，但油價升得太急，有炒到爆的可能。油價呢一浪回落後，若再上重穿１３５美元，就好快殺到１５０美元。

若果索羅斯對美股有偏見，我就對糧價有偏見，認為咁o既糧價、油價唔可以長期維持，否則死好多人，全球政治經濟都會爆煲，美國係始作俑者，明知病因是美元弱勢，但佢唔理你死，任由美元轉弱救自己的經濟，呢個策略好成功，你睇美股最低跌咗幾多？

我認為油價唔爆真正死的人會更多，經濟衰股市亦會爆。但油價爆的確又對金融市場有衝擊，有幾多炒油的基金會爆呢？會唔會拖累金融機構，唔知？但總體而言，從人道角度看，油價係爆好過唔爆。從股市角度看，油價再升的危險更大，初步估油價爆對金融市場的衝擊較短，對經濟利好的因素較長。

Ray,　暫時無改對股市的看法，６月呆啲，跌完彈吓，７、８月股市應會旺番啲，一年都要炒一轉啩。

投資的我不要因為怕油價爆煲離開股市。

Sandy:你對幾隻「石油股」有少少分唔清，中海油係油股，油價升對佢有利。中石油聲稱自己上下游業務平衡，煉油及成品油分銷由於受制於阿爺不准加價，受損於油價升，走勢有少少油價升股價跌。中石化主要係下游業務，深受油價上升影響，股價和油價成相反走勢。你啲中石油、中石化入貨價唔算太貴，又唔使在而家低位減持啦，揸吓先啦。

Racheal:中海油和其他能源股一樣，上到高位無力上，似有疲態，可以等油價再穿１３５元上高位時，先減持一半好啲。其餘定止賺位，到位就出貨。

JJ:你話美國金融股似見底，想買相關的ETF, 好似無ETF專買美國金融股，唔知其他網友有無提供。

達爾：買樓有５厘回報，若自住尚算OK。你有５０萬首期，以３成首期計，只能買１７０買的樓，可能要搵到新界區，或市區較細單位。記住買樓要量力而為。

長友：若無本金分注入，長揸最好等大市急跌跌得深啲才入市。

小潘：你問我係唔係仲覺得奧巴瑪勝算較低，我轉咗軚啦，希拉莉選到中段老態畢露，敗象已呈。而家係奧巴瑪勝算較高，共和黨的候選人太老，若是白人後生仔有得砌吓。不過我對美國傳統勢力強勁，不喜黑人當總統的看法無變，若奧巴瑪當選，我驚有一天又有一個唔知真定假的神經佬，又走去一鎗做低個總統，所以奧巴瑪的副總有機會做總統。

總體講民主黨上台對經濟有利，因為佢地會裁軍削赤，搞到美元強啲。但奧巴瑪太後生，可測性低啲。

你問瑞房乜位入安全，內房股整體還在反覆向下，可以炒作，博低位反彈，但長揸就有啲風險，壞消息好似未盡出。

Flyinthesky:同樣道理，世茂亦有可炒難揸之感。你想加注若是短炒，尚可，長揸就要等等先啦。

招行可以博大行再唱衰吓佢，博股價落番２４、２５元，可分段吸。

Bdroom:我講的美股並非神奇數字，但美國市場大，睇圖都有啲譜，道指一個小浪在２００點左右波動，有一些係大位，例如１３０００點，又例如早前牛皮好耐的１２６００點，升或跌破大位時，通常都會走一段，起碼走２００點，所以跌破１２６００點時，１２４００點又在望，美股跌緊，港股好難升。

牆頭草：唔好期望阿爺救航空股，佢只係到處貼膠布，好難難好受災公司，航油壓住唔俾加價，住後更有加價壓力，但國航的好處是唔似美國航空公司，唔會執，所以沽貨者唔太狼，沽到咁上下又炒吓反彈，但整體仍勢弱。

S2000:港華燃氣走勢好強，可以揸吓，望見家鄉。

Muse：內銀股建行、招行較佳，我鐘意招行多啲，但佢太貴，若今次回到２４元可開始分段吸。

Awong:電力股因為山東限煤價炒一炒，你９．３元買的大唐，離價太遠，無嘢好做，沽又唔係，坐吓先啦。

Yenpoon:７．７元入的碧桂園，可以坐吓，若老闆楊國強買得成邵氏，碧桂園或會炒一炒。

Yuki:盈富唔知做乜咁大成交，要查吓。

現在的市場是反彈完之後的調整市，高手估呢個月結算價上落不致太大，又做緊同時揸沽期權的動作。

金曹兄：李小鵬離華能應屬個人行為，但有少少可能反映電力股短期無乜景。五大電力集團有四間第一季要蝕錢，都係電力股的寒冬，照計通脹定下來後，電價都無可能長期唔郁了。

小吱：次按帶出來的問題有否解決，要看金融機構是否已將壞帳撇清，要看他們第二季業績如何，從借貸市場息口略放鬆來說，而家應該已經改善咗啲啦。

[ 本帖最后由 Mr.Business 于 5-6-2008 06:02 PM 编辑 ]

Mr.Business

注：此篇文章版权归香港頭條網所有。

金融High Tea——有形之手送錢你使
2008年6月5日

中環茶友話，雖然早一晚美股杜指大跌，但外圍日股升1.6%，內地股市跌1.9%，全日港股都係上上落落，但尾段回得較多，特別係期指更加急插，搞到低水 220點，穿埋24,000點，超前反映調整市，結果恒指以全日低位24,123點收市，跌253點。國企指數跌236點，報13,386點，大市成交 789億元。期指下挫至23,895點，收報23,903點，市場話現貨同期指臨尾急插，係因為有對沖基金可能出事，被逼沽貨。

中環茶友話，美股未尋到底，杜指12,400點唔知守唔守到，港股睇住大佬，恐怕調整未完，上半個月仍然係反覆尋底格局，股民想買平貨，就不必太過心急。

昨日港股大部份時間都係上上落落，但煤炭股表現已經好唔靚仔，皆因山東省政府日前發出通知，要求省內煤礦增加供應，同時要求下調煤價，按照今年5月全省煤電運調度會議確定的省內電煤追加量要求，嚴格履行已簽訂的合同，穩定煤炭價格，保質保量完成電煤供應任務。

煤股超前反映干預

山東限制電價，相信係因為從5月中旬開始，山東省電網在高峰負荷時段，已經實行限額用電，當時離夏季用電高峰期的6月下旬，還有一個多月時間。踏入5月，山東省電網用電最高負荷曾已接近去年全年的最高峰，據預計電網最高負荷將增長近一成半。為應付電煤供應緊張情況，政府要求省內煤礦須在確保安全的前提下，每月增產256萬噸電煤計劃，所供電煤在下月價格基礎上，每噸下調10元人民幣。

消息一出下，市場估計另一產煤大省山西，好快都會出招，特別係最近李小鵬宣佈離開華能（902）[股價及相關新聞] ，改為派去山西做官，一個做開電廠的高幹調去產煤大省，自然令人聯想到中央是否要加強壓抑煤價，所以昨日幾隻煤股都跌，神華（1088）[股價及相關新聞] 跌5%、中煤（1898）[股價及相關新聞] 跌6%，兗煤（1171）[股價及相關新聞] 最慘，跌了9%。相反，電力股就得米，華能（902）[股價及相關新聞] 升2.8%、大唐發電（991）[股價及相關新聞] 升4.5%、華電國際（1071）[股價及相關新聞] 升5%，股民有人歡喜有人愁。

煤股急挫，散戶當然會問，是否應該用反腦思維，人棄我取趁壞消息入貨呢？中環茶友對呢個問題咁拆局，內地「管理層」壓抑煤價的思維，相信不是今朝起身鲻醒諗起，係經過一段醞釀過程，從股市表現，可以睇到，煤炭股過去兩個星期，表現開始走樣，神華、中煤股價在煤價上升、純利增長等好消息下，股價依然陰陰跌，顯示有大戶擔心煤價急升，根本無法維持，最終不是用家無法忍受，就是阿爺的有型之手干預，結果現在答案走鰦出鈬，就係阿爺出手，過去煤股在盈利高增長下，市盈率炒到二十幾倍，現在阿爺出手，等如為盈利增長封頂，往後莫說要保持高增長，就係要維持現時盈利，恐怕也不容易，係呢個環境下，是否要咁急去「低撈」，股民自己可以自己計數。

物極必反係真理

茶友話，內地煤價急升，煤股落後，由此睇到有形之手威力，同樣地，煤價急升，理論上電力股應該大跌，但當電力股上個月開始發盈警開始，電力股股價竟然掉頭上升，因為聰明錢睇到，電力係國家不可或缺的必需品，雖然中央不會容許電力公司把能源成本全部透過加價轉嫁給用戶，令通脹急升，但亦不會任由電力企業漫無止境蝕下去，所以當電力股跌到殘之時，他們就開始入貨。

一理通，百理明，茶友話，好似最近油價急升，有外資大行看淡國航，除了因為油價上升，內地進行宏調，已開始令旅客減少，不過，國企股價跌纒跌纒，最近開始見到有承接，跌勢已經減慢，咁樣講不是叫你今日就飛身去買國航，而係叫你分析問題，要睇深一個層次，明白物極必反的道理，正如煤價升得太緊要，升到去企業同社會都頂唔順，最後就只有回落一個方向，睇得通呢個道理，你及早坐係適當位置（雖然要做到咁係說易行難），就可以輕輕鬆鬆，等政府有形之手或市場無形之手，把錢送入你個袋！

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

森林規律（１）
       
2008/6/5 上午 09:53:43
網誌分類: 經濟

美股微跌，道指跌１２點，跌穿１２４００點關口，收１２３９０點，仍在上下尋底。聯儲局主席伯南克話美國有通脹危險，令人相信聯儲局呢個月尾議息時唔會再減息，年底更有可能加息，美元強番，刺激油價回落，昨日又大跌２美元，跌到每桶１２２美元的水平。

TVB劇集「師奶股神」用上「鱷口偷金」這句話，講師奶蔣如珠點樣變股神鬥大鱷的故事。我怕大家誤以為師奶好易鬥贏大鱷，唔怕長氣，又再講吓森林規律。

我以前講過，股市如森林，是一個弱肉強食之地，森林中有鱷魚，即係股市中的炒作大戶，包括本地鱷及來路大鱷，佢地係最兇猛的肉食者，殘殺森林中所有弱小生物。森林中有大象，即係股市中的互惠基金和退休基金，佢基本上係素食者，一般唔會食森林中其他小動物，只是食大量植物生存，即係較少炒作，多作中長線投資。森林中另一物種係老鼠，即係股市中的散戶，佢本身草又食肉又食，但佢地本身又係大鱷的主要食物，老鼠自以為好叻，其實無嘢叻，勝在繁殖得快，鼠媽媽一胎生十幾隻，幾個星期又生一胎，所以大鱷食老鼠食極都唔完，食完一批，轉眼又有另一批入場，成為大鱷的美餐。

睇吓投機家Victor Sperandeo的名著《Trader Vic—Method of a Wall Street Master》(譯作叫《專業投機原理》)就有好好的例子，講明在鱷口中不易生還，都唔好講話要偷金了。Victor Sperandeo講到一個「短吻鱷原則」，呢個原則係基於短吻鱷的捕食方法研究出來，佢話當短吻鱷咬住獵物時，獵物掙扎得愈多，短吻鱷吃得愈多。想像一吓有隻短吻鱷咬住你隻腳，你用一隻手去打佢個頭，佢鬆一鬆口再咬，就連你啲手同腳都一齊咬住，你掙扎得多，佢咬得多。所以俾短吻鱷住隻腳時，唯一的逃生方法係犧牲隻腳，切斷隻腳走人，翻譯成股市的語言係：「當你知道自己買錯嘢時，就馬上清倉啦」。Victor Sperandeo話自己買嘢蝕本時，唔好嘗試合理化佢，唔好希望會好番，唔好去祈禱，走啦！唔好將個組合改高改低，對沖吓，或者做啲乜嘢，簡簡單單止蝕走人算啦！（p.15）呢個係散戶係鱷口偷唔到金，仲俾鱷魚咬住隻腳時，最佳的保命方法。

Victor Sperandeo話自己花好多錢才學到這個「短吻鱷原則」。佢話１９７０年代後生時，有一次本來投了小注在INA保險的期權，買了２０張１２月到期、行使價是２５美元的INA認購期權，期權金係１．２５美元（等如１２５美元一張合約），他當時自定買期權的止蝕守則係輸０．２５美元就打靶。佢一買入INA期權後，正股就開始跌，期權金開始先跌０．１２５元，後來跌０．２５元，到咗佢的止蝕價，但佢無執行止蝕，就在反方向「對沖」，見隻股跌，就沽出６０份１２月到期、行使價係３０美元的認購期權，收回每份０．７５美元的期權金，換言之佢買認購期權唔順手，就沽出更大量上方的認購期權，希望執番上方３０美元行使價期權的期權金，來補下方佢買２５美元行使價認購期權之蝕。

做人衰開有條路，到佢沽突INA３０美元的認購期權之後，INA突然傳出併購消息，股價開始調頭急升，佢以每份０．７５美元沽出的認期權，急升到１．６２５美元，你估Victor Sperandeo點做，佢又沽出行使價２５美元的認沽期權，收回每份１．２５美元，博隻股再升。點知INA又走出來否認併購傳聞，隻股又回，認沽期權又抽上。Victor Sperandeo每做一步就錯一次，原本如按止蝕規則行事，只會輸５００美元，結果佢輸足６０００美元，佢輸大１２倍！即使買第一批期輸哂亦只係輸２５００美元，愈做愈錯，愈掙扎愈輸得多。

記唔記得我講的黑社會大佬教個靚去同人開片的故事，佢教個靚仔「一唔對路就閃」，同Victor Sperandeo教的原則係唔係有啲類似呢？呢個就係森林法則，好難作理性分析。你千祈唔好以為Victor Sperandeo無諗基本因素，唔係，INA保險平時係一隻成交唔多，郁動好少的股票，所以沽佢啲期權按道理無錯，只要股票波幅唔大就可以吃盡期權金，點知偏偏分析完都出錯，而Victor Sperandeo最大的錯誤是一次又一次唔守止蝕原則去炒作。

我叫大家投機炒股時要止蝕，唔好溝淡，贏就谷，輸要縮，道理亦係一樣。

陸羽仁

http://www.hkheadline.com/blog/r ... rd=&searchtype=