【专题讨论】转载香港頭條網陸羽仁, 王雅媛的文章

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

美國肥熊（２）         

2008/1/9 上午 09:27:34

  　美股走勢比想像還要差，本來估計道指跌到１２８００點時會反彈，但前一日反彈相當乏力；本來估計道指反彈完要反覆下跌再試１２５００點的低位，形成一個一浪比一浪低的走勢，怎知道指一跌就到，昨日大跌２３８點，轉眼跌到１２５８９點，１２５００點都唔係咁硬的防守位。

　　其實昨日下午開始外圍金匯都唔妥，美元走軟，黃金急升，唯一最叫做唔係太壞的消息是日圓未急升，所以對沖基金套息盤亦未大拆倉，估計日本經濟受美國拖累，唔係好掂，有減息壓力，拖住吓日圓的升勢。但黃金就大升，升到８８１美元的歷史高位，主要係美國經濟和美元唔掂，全球資金泊去買黃金避風，連帶石油、糧食、金屬等商品都向上。

　　黃金去年已升３１％，令人想起上一個高位１９７９年，當時伊朗王倒台，世界擔心這個主要產油國失控，能源價格急升，美元下挫，金價升了一倍有多。大家知唔知當時美國通脹幾高，高達１３％！這是１９８０年，當各種金屬價都創新高，美元又跌，油價又高升時，美國就有高通脹，這是輸入產品和能源帶動的通脹。美國如今的通脹未算太高，但１１月已增加了０．８個百分點，是兩年來最高，看來在高油價和低美元的前題下，美國的通脹還要再升。

　　在高通脹的陰影下，美國一道板斧減息救市的空間十分有限。美股身燒火慶，昨日大跌主要是主要按揭商Countrywide Financial Corp.傳出可能破產的消息，雖然公司否認，但市場選擇相信，Countrywide股價單日大跌２８％，跌到５．４７美元，其實該公司股價去年已大跌７９％，樓市急挫令市場擔心Countrywide頂唔住，後來佢得到美國銀行注資拯救，感覺一度好轉，不過美國經濟和樓市繼續下滑，人心脆弱，大家都相信佢唔掂，狂沽股票，即使公司無事都會被人沽到有事，何況公司本來仲幾弱添。自０６年１２月起，美國已有２０間按揭公司唔掂，要申請破產保護令，它們當然無Countrywide咁巨型，但已令人極度不看好按揭行業，已經無銀行願意借錢給它們。

　　樓市和次按問題顯然已影響美國消費，AT&T Inc股價昨日急跌４．６％，是５年來最大跌幅，因為公司的CEO Randall Stephenson告訴投資者美國經濟放緩令公司的家庭電話和上網服務「疲軟」。AT&T Inc這種說法已證實樓市和次按開始影響實體經濟，美國經濟衰退逼到眼前。所以美股的跌勢將從金融股擴散到其他行業，也擴散到其他國家主要出口到美國的公司。

　　美國經濟差和通脹高，雙鬼拍門，巨熊身影愈行愈近，政府減息救市的空間有限，美國財長保爾森昨日話政府有一些挽救經濟措施，但不會傖促推出。若果保爾森講的是減稅措施，我就好懷疑美國國會會否通過，在野黨民主黨控制國會，他們的經濟處方係加稅唔係減稅，你共和黨政府想減稅，談何容易，在選舉年政府想救市，制肘更多，對手想你死，想經濟跌得更多，好讓他們可以當選，並從經濟的低點起步，自然唔俾空間執政政府。

　　遇上美股跌市，港股自然會跌，但這兩日港股兩度頂上２７５００點和２７６００點的「高位」，令人有少少擔心，這也是一個小雙頂，記唔記得上個月恒指兩次衝近３００００點，無功而回，跟住就大幅調整。港股上年尾收在２７８００點的水平，年初開市一兩日跟美股跌，但上週五彈上２７５９６點高位，週一又遇上美股大跌，不過港股無跟住急跌，當日已經好硬咁反彈，結果只跌３００幾點，到昨天又彈上高位２７６３７點，但最後衝高回落。港股這兩次彈上２７５００至２７６００點，主要由地產股急升所帶動，造成一個小雙頂，地產股預支了減息的利好消息，衝高後吸引了不少散戶以至基金追貨，昨天新地（００１６）、恒基（００１２）等強勢地產股見高回落，有點派貨味道，小心小雙頂後，就是一個８至１０天的深度回吐，記住最多信我六成就夠了，如何出入市要自己觀察思考。

　　恒指２７０００點的現價，買貨未算平，地產股升得急，回吐起上來都有不少空間，若果大市無事自然最好，若跌起上來，高位追了貨者，要嚴守一成止蝕，到位打靶，謀定而後動好啲。

陸羽仁

Mr.Business

陸羽仁  2008/1/10 上午 10:39:27

陸羽仁覆網友

股惑仔、鋒仔等：你們講起港股及美股走勢，股惑仔講得幾過癮，恒指和道指有個光明的Gap，我估美股若不急插，這個光明的Gap可以維持，風險在美股突然下插，而這個下插住住在美股減息升上高位後突然湧至，關鍵在「風險」兩字。港股暫時在２６７００點至２７６００點之間玩波子機遊戲，捱過呢幾日，今個月大插的機會較細。

小潘：如大市升到２８０００點樓上企穩，就進入較安全水位。

Chu chu, Wfkk:問起聯想，先講佢基本情況，HP昨日話業績不受經濟影響，聯想應有一彈，但佢今日反彈唔見太有力，短期尋底格局，金曹兄話大股跌開唔似咁快完，我好同意，佢睇５．３元，我一向較保守，怕聯想要試一試５元樓下。買一隻股有基本假設，聯想是假設佢整合美國等地業務後有較大增長，而家美國市場轉壞，會沖銷佢整合業務的表現，對基本因素有影響，要調低其預測。高盛話美國第二三季衰退，若係咁聯想上半年業績都受影響，正路要等９月後才出盡壞消息，所以揸住等基本因素，等到頸都長。唯一額外利好因素係佢排緊隊上A股，近上A時會炒一炒。

Chu chu:你咁黑，隻隻輸過兩成，我係你盡量唔俾買入的股票輸過一成，通常會先止蝕。以聯想計，應一跌落一成先止蝕，睇清楚佢跌乜，估計吓有無改善機會，若隻股基本因素仍不俗，沽出後可以等低位吸番。走失了搵過第二隻。若覺得基本因素徹底變壞，就同佢永久bye bye，聯想應該唔係呢類，但好漢不吃眼前虧，可候反彈減持，唔沽哂都沽一半，博５元樓下買番。

Wfkk:同樣道理，黑仔開有條路，若然黑仔貨多，等反彈減啲貨都好。
不過短炒唔好掂聯想，同意牆頭草的講法，佢短期變弱勢股。

Ray:你問中遠太平洋乜位入，佢跌得幾深，可以分注入，但只屬短炒貨色，油價升航運股插，本是短週期，但業內人士話大量新船在明年開始下水，行業會慢慢轉入向下週期，長揸有風險，買入也要止蝕。

May:在１３９元買了匯豐，可以止蝕沽出，候低買吓中銀香港，一年內回報可能好啲。若長線對匯豐有信心，可以死守，年收４厘息，要預咗守２、３年以上。

Yuki:美股好波動，但這一浪可能已見底，等月底減完息看下一浪如何。內銀股直覺感覺還要插一插，才會見底，跌近我講去年７月的水平應見底，例如建行見一見５．７元。

Ccb:５．３元買了中信銀行，一成打靶應在４．７７元，但佢到４．６元應有支持，或者守一守吧。

Philip:澳博上市，問好唔好炒多金（６２８），老實講賭股多數有幕後人，佢見澳博上借勢炒一炒唔奇，但你真係要識得走至好，也有唔炒的風險。

Jbc:你問平保可唔可以炒上落，佢的確落到７７元左右又有人頂吓，可以炒吓，要守止蝕。

３３３１維達的確炒吓內需，但新股上市未收乾貨，怕佢炒一炒又無影，宜在現價低８％至１０％定止蝕位，然後將止蝕位往上推。

有人問太平洋航運，１５元買，現時１１．７８元，我話現價跌到幾殘，沽又唔係，若好擔心或者等反彈沽佢咗。

Nevermind:樓市是較長線投資物品,雖亦有季節性,但只對經紀有較大影響,對一般買樓者影響有限,因為季節性主要影響成交量,樓價走向睇大市。

[ 本帖最后由 Mr.Business 于 11-1-2008 01:32 PM 编辑 ]

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

洪鋒      
   
2008/1/10 上午 09:34:33

    大家都聽過洪水來時有洪鋒，現時港股就像期待一個又一個洪鋒殺來時的心情，戰戰競競。港股面對兩大洪鋒，一個是美國的可能衰退，另一個是中國的宏調。

　　昨天美股反彈，是兩個星期來最大的升幅，道指升１４６點，升到１２７３５點，暫時脫離１２５００點的低位，主要是股神巴菲特的巴郡話會投資在債券保險公司以及惠普的估計盈利不受美國經濟放緩影響，令美股反彈，預料美國市要捱多幾日波動，過了月中後，又會進入預期減息的反彈市中。

　　高盛的首席美國經濟師Jan Hatzius在給客戶信件中表示，美國經濟已進入衰退，美國要大幅減息挽救經濟，佢估計美國經濟在第二季和第三季每季會負增長１％，令整個２００８年只有０．８％的正增長。這種溫和衰退和２００１年的情況相若。佢估計聯儲局在本月底會減息０．５厘，到年底合共減１．７５厘至２．５厘，阻止經濟下滑。美國大行紛紛發表衰退的言論，出哂口術叫聯儲局先減半厘息。

　　那邊廂大陸通脹的情況嚴峻，總理溫家寶終於出行政手段，指令影響民生的行業物價暫不能上升，包括油價、電價也在指令凍結之列。阿爺出手愈來愈重，應該是在農曆年前把物價控制住，以防人民感覺不良，問題是禁止物價增加後，由於原料價上升，照舊價發售部份行業會蝕本（例如油產品受國際油價影響），他們的對策自然賣少蝕少，出現物資短缺，到時又要看阿爺會否出補貼令他們維持供應。

　　美國和大陸兩度洪鋒齊到，按理港股應受壓向下，但港股已經接連幾次在美股大跌時不跌，昨日原估計佢雙頂向下，怎料還要反彈向上，走勢好飄。昨日整個亞洲都無跌，除了炒美國可能退稅救市及美股短期見底外，相信也有部份資金買吓亞洲貨，避吓鋒頭。

　　港股在洪鋒中波動，近期在２６７００點至２７６００點之間上落，守得幾硬，後市若向上，要看能否突破及企穩在２８０００點樓上，若後企穩會反炒減息。向下就要守住不穿２６７００點，否則就要向下試位。時間愈往前推，減息期近時，本月向下的風險會減少，先炒一炒減息下月再算。

　　如今港股是恒指硬過國企，主要因為恒指有地產股頂住，地產股先後創新高，頂住恒指在高位。但國企指數郤沒有理會內地A股反彈，照樣因宏調下跌。國企指數１6０００點，跌到１５０００點可以開始留意，跌近１４０００點為之Very good，可以搵貨買吓，我認為今年全年國企指數有機會上番２００００點，若在近１４０００點吸貨，捱過宏調有前途。

　　國企暫時處於弱勢，強勢是地產股，但不少證券行估計地產股現價要樓價升４成才合理，所以地產股係愈炒愈貴，高處未算高，若買入咁不幸係高追，要守止蝕。睇吓港股能否順利渡過今年第一季的洪鋒。

陸羽仁

XXXXX
  
陸羽仁  2008/1/11 上午 11:05:50

陸羽仁覆網友

內行蟹人：你有內銀股，聽我話驚佢再跌，所以問好唔好沽，我諗要首先問你係唔係長揸，若是長揸，而家跌咗六六七七，你人價唔算太高，可以守吓。短線內銀股都係炒上落，還有向下的感覺，我擔心佢地反彈完又試低位，所以話長資投資者可以等吓見唔見更低位，短炒例外。

May:你問a50基金，大陸股市正在農曆年前反彈，營造良好感覺，但我怕A股彈完再要調整，等宏調的猛招盡出。所以上證綜指跌穿４８００點可留意，近４５００點可以買入A50基金。

十五十六：安德利果汁係大股東之間交易，觸發全面收購，收購價０．３２５元，按理現價不需要跌到那個價，但隻股盈利麻麻，借勢調整唔係好奇。

Sandy:中國燃氣３．６８元買，現價３．２４元，佢每次跌到３．２元都有支持，之前無沽，而家唯有守吓，最近國家控制燃氣加價對它不利。

太平洋航運真係唔識點建議你，高位買了，現價１０．７６元，你問今年上唔上得番１６元，睇走勢穿位向下，唔係太似上得番１６元，若跌穿１０元這個大阻力位，小心深度尋底。

Flyinthesky，B Cheng:聯想跌後反彈中，小心有力反彈後再尋底。聯想變成民營企業，國資位不會扶持，最大的扶持是讓它回歸A股，其他唔會做。

我仍然覺得聯想是有質素的股份，但受美國影響應有得跌，想長線者最好等佢跌穿５元先至諗。

Idoglife:我都睇過你轉貼的兩篇文，幾過癮，本想都想寫吓，好多人都唔知自己在投資還是在投機。

Maymay:你問電訊業重組幾時發生，我舊年聽到是下半年（去年）發生，結果未發生，可能還要拖吓，咁重好，大陸電訊股久不久可以炒吓。但中移動的國產３ｇ應在三月推出，呢件事要配合奧運，無得拖。

雲淡風清：瑞銀竟然可以把中信銀行十日內發盈喜都預告埋，的確好嘢。今日信行炒高了，如果你信瑞銀，可以趁信行回一回買入短炒，等佢發盈喜時沽出。

Lala:在３５９元時買了宏利，現價３０１元，我估市場擔心宏利有次按，加上金融股唔當炒，所以回吐。只要佢唔公布投資次按爆了大鑊，可以揸吓博佢上番去。

Gogo:６０６中糧油早前講過，穿６元要止蝕，你無止蝕，小心佢炒完咗。中鐵你問可否長揸，問題是你乜價位買，上市價買揸長少少無壞，高追不可以輕言長揸，最後一成止蝕。

Waltzjeff:唔係李生自己沽長實，又唔係長實發新股，所以唔使太驚。

[ 本帖最后由 Mr.Business 于 11-1-2008 01:32 PM 编辑 ]

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

確認減息         

2008/1/11 上午 09:50:40

美國開始進入減息預期的週期中，昨美國聯邦儲備局主席伯南克明示，聯儲局可能進一步減息，並採取更多重大措施（ready to take substantive additional action as needed），去支持經濟增長，防範經濟下滑。

伯南克出席一個論壇時承認，近期的數據顯示，今年的經濟展望轉差；樓市下滑、信貸緊縮和能源價格高企，都會對消費構成壓力，所以可能要進一步減息（may well be necessary）。

伯仔作為聯儲局主席，講話應該比較隱晦，佢講「採取更多重大措施」，本已足夠暗示會減息，但他直接講可能要進一步減息，更屬超常舉動，顯示佢都有啲心急，怕唔先出口術，等到月底會期時才減息，恐怕股市再大幅下滑。

伯仔講完之後，大部份都估聯儲局公開市場委員會月底議息時，可能減息多達半厘。美元在清楚的減息預期中，明顯走軟。

美股聽完伯仔講嘢亦顯著反彈，道指上升１１７點，升到１２８５３點的水平。美股大升的另一個原因是最大按揭商Countrywide 正和美銀商討合併，令其股價勁升５１％，升到７．７５美元，在Countrywide昨日反彈前，佢今個星期已累計跌了３９％，到佢昨日勁彈，亦帶動金融股全線向上。

美股重上１２８００點以上水平，若能守穩一兩日，已確認美股已見這個月的底部，要尋底又等下個月。美股上次減息時衝上１３７００點的水平，去唔番前高位１４０００點，由於１２月減息當日未有減息０．５厘，市場有少少失望，在減息日開始見頂回落。今次減息０．５厘應無走雞，無驚也無喜，也要小心美股到月底減息後，又是反彈小浪的浪頂，到下月又再尋底。

美股走勢幾弱，我有少少懷疑今次反彈上唔上得到１３７００點，可能只去到１３５００點左右，形成一個一浪低於一浪的走勢，跟著減息週期，反覆向下調整。

港股近日走勢較飄，基本上是在２６７００點和２７６００點上落，若美股不再向下，只要大陸唔公布太壞消息，今個月大幅破位下跌的機會正減少中，從「投資的我」角度，今個月至今調整未夠深，未有胃口入市。但從「投機的我」的角度，這一兩個星期內不宜看得太淡。

陸羽仁

[ 本帖最后由 Mr.Business 于 12-1-2008 11:05 PM 编辑 ]

Mr.Business

陸羽仁  2008/1/14 上午 11:22:50

陸羽仁覆網友

巧茹與蕭敬騰：股市飄上飄落，我話「呢個月唔好睇得太淡」，並唔係睇好，我的假設是如果美股呢個月暴跌，港股就要插得好深，結果美股暫未暴跌，無大幅拖低港股，我怕有些網友做了大淡友，會被人挾死，所以提示一下。但即使減息在前，我亦唔係好睇好，我一個月前已講過，港股第一季在有方向前會炒上落市，而且頂部逐部下移，由去年高位第一次頂部係近３２０００點，第二次升近３００００點，到呢個月近月底若有反彈，都唔似會上番到３００００點了，若有反彈，２８０００幾點都好盡。記住上落市係「炒升又死炒跌又死」的另類殺人市。

Ray:陸東在去年１１月大市顛完剛回落時，提出０８年目標３２０００點，最樂觀的藍天預計是４２０００點，佢講的時候指數２８０００點左右，從高位跌４０００點，估計他認為調整已夠，所以再作樂觀預測。

佢而家調低預測，藍天預計亦調低到３７４００點，你問參考價值幾大。我會咁睇，講恒指目標講到天咁高無用，有乜嘢條件才有超常升幅，我就話關鍵係港股直通車（或類似的大放水措施），若無此政策，港股有乜條件去到這些３萬幾、４萬點的水平？但如果港股直通車開車，恒指有機會有超常升幅，升幾多唔知，你買入遇上港股直通車，就用高位跌１０％為止賺，食到盡就得。若無直通車，講藍天又有什麼意思，大家唔好忘記，去年１１月點估，係見到３２０００點估出來，但直通車一剎車，即使曾經出現的３２０００點就失去理據，那個點數已是藍天，早應該調低預測了。

你問花旗和匯豐比較，我覺得匯豐相對會穩過花旗少少，主要是匯豐有大部份非美國業務。但論盈利反彈，花旗一係唔彈（確有此風險），但一彈亦會比匯豐大，轉得快，我做花旗的新CEO，都會把壞帳撇到突，撇得太多公司頂唔順瓜咗（機會比較細），都唔係自己唔得，係上手唔得啫。但撇得勁未來一兩年慢慢回撥番出來，已可保未來兩年盈利有可觀增長，美國CEO平均在任期兩年半，頂到兩年盈利，佢都賺咗啦。所以博反彈，當然係博跌得深啲個隻。

你買話中期買匯豐，如果中期係短至一年，恐怕無乜大收穫，因為匯豐是暗傷不是明傷，調整得不夠深，所以反彈又會慢啲。

Piker:你想買匯豐收息，問跌到１１０元的機會幾大，我就話而家買匯豐要預佢跌到１１０元，起碼要當做三年定期，我估三年後好有機會高過現價（即係定期可以收回本金），但中間再跌一啲都唔奇。

聯想有人睇好，有人睇淡，如果美國經濟無影響到佢的銷售，公司股價大跌，佢應該一早企出來澄清，無澄清令人有啲擔心，怕的確有影響。現時有人睇好，有人睇淡，股票買少一隻唔死得，點解唔睇真的呢？

Andy:玖紙在急救中，有關係好的大行唱好，主席又擺哂姿態增持，希望可以頂住股價，但我絕對唔贊成你溝淡，明知會彈都唔好做，溝淡係壞習慣，一養成壞習慣，呢舖賺番，以後一舖就輸死你。

贏粒糖輸間廠，flyinthesky：有十萬想存外幣，問歐羅好定人仔好，美元再減息的機會好大，人仔今年會升５至７％，加埋利息回報不俗，匯價風險無歐羅咁大，若民主黨上台，小心美元反彈，唔好做長過一年的定期，短啲更好。

May:思捷走勢好差，有穿位向下之感，市場估佢歐洲銷售會受經濟影響，跌市成交大增，有基金洗倉的味道，可借反彈減持，換馬到其他股份好啲。

Piu:你問新地盈利會否被物業估值拖低，土地有價，今年新地投資物業的估值應該拉高而非推低，你擔心新地股價太貴好過。

Alex:想買港交所作長線投資，港交所會隨大市上落，現價不便宜，若想長線，唯有等大跌市出現時才買吧。

Any:地鐵和光大控股好唔同類，現時炒地產股，地鐵強勢啲，光大要等再炒紅色股時才會發力。

黑毛綿羊：淅江玻璃市值細人為味濃，急跌真正原因可能簡單到有人掟貨，今日又推番上。

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

美國肥熊（３）         

2008/1/14 上午 09:32:12

　　美股熊味好重，重到連一向不以經濟為標榜的民主黨候選人奧巴馬都話有７００幾億美元的救市大計，可見經濟衰退已經成為美國人擔心的頭號問題。

　　我呢一排主要留意美股，雖然港股走勢和美股有少少分離，但我怕美股會爆烈性下跌，若係咁樣，港股唔會頂得住，會大幅調整。唔知大家記唔記得，去年２月２７日大陸股市大跌，美股跟住個日就大跌５００幾點，接著就觸發港股一個深度調整，我就怕美股出現這種大跌市。

　　不過近日美股雖然樣衰，上週五道指又大跌２４６點，不過總算暫未出現爆裂性下跌（咁講要掂吓木頭先至好講落去），所以暫時未到恐慌的地步。

　　其實過去一個幾月美股暴跌一啲都唔奇，因為次按風波不止影響金融機構，還波及就業等實體經濟環節，結果令各類消費股大跌，這就如火山爆發一樣，震波一環一環擴散開去；不過火山爆發的核心尚未穩定，餘震不絕，未來金融機構公布業績，又會再顯示次按的影響。到目前為止，美股唔算跌得多，都算跌得少了，而且暫時唔叫做跌得太急，仲跌得比較有秩序，仲可以叫做不幸中之大幸。

　　美國銀行體系仍要施手術搶救，未來幾日銀行公布業績將是壞消息的高峰，金融機構想方設法去控制壞消息的影響，搵人入股，將壞消息變成好消息，將是不二法寶。據英國《金融時報》報道，花旗集團估計要撇帳２００億美元（１５６０億港元！）現時部署一個１４０億美元的集資計劃，主要對象是中國的國家投資公司和科威特投資局，另外少部份會拿出公眾發售。估計花旗的新CEO　Vikram Pandit會減少派息四成，去改善花旗的財務狀況。

　　這已是花旗第二次大幅撇帳和尋求注資，銀行若大幅撇帳，淨資產急劇減少，公司投資評級馬上降，後果十分嚴重。花旗在１１月大撇帳時曾發換股票據向阿布札比投資局集資７５億美元，但今次撇得更多，亦集資更多。

　　而投資銀行美林亦計劃第二次集資４０億美元，科威特投資局相信是接貨的主要對象，估計會在本週中公布。

　　踏入１月下半個月，這幾日將是金融機構公布業績的高峰期，估計只有JPMorgan Chase業績見得人，可以避過次按危機，市場預料它每股有０．９３美元盈利，比去年同期跌１４％。其他銀行和投行的業績都係爆鑊多，若果它們能同時公布巨型集資計劃，找到主權投資公司入股，預料會大減負面氣氛。而近月尾則開始有好消息，除了減息之外，到１月２８日，美國總統布殊將公布國情諮文，隨時包含一個千億美元救市大計，今日聯儲局主席伯南克將和民主黨眾議院領袖佩洛西會面，預計伯南克將會做說客，痛陳美國經濟之險，希望民主黨不要搞局。

　　美國熊市的味道濃郁，尚幸未有暴跌，在未來的歲月，港股雖然要捱，只要不成災就無問題。

陸羽仁

Mr.Business

2008/1/15 上午 11:00:03

陸羽仁覆網友

Patrick:基金有洗倉，有換馬，有些和美國市場有關的股份被洗倉，亦有基金怕風險，沽港交所等轉買房產基金，基金一沽那隻股就有排跌，因為基金貨多，有排未出完，一跌穿某些位就掟貨。例如聯想，今日雖大幅反彈，但買盤全是本地經紀行，沽盤中仍有不少是外資行，可見仍有基金借反彈出貨，餘毒未清。

香港書虫：你問玖紙衰乜，佢既有基金出貨，而炒作盤更在月前出業績後派了貨。這隻股消息滿天飛，有班人專炒業績，高位派了貨就短期失去咗支持。

CCB:你問中鐵同中交建比較，我覺中交建好啲，近２０元個位好硬，等跌深的可以投機買吓，一成止蝕。

中糧我早前講過，跌穿６元要止賺，這些炒浪炒完會唔會回頭，真係無人知，佢回吐穿位你唔沽佢唔再炒，會好痛苦。

小兵卒：上日已答了可換股債的問題，答案如下: 「小兵卒：你問公司發可換股債券，持有人換股後，公司股價下跌，部份差價可計入盈利。事實上的確如此，這涉及發債時先預設的成本，到換股後股價下跌，和先前估算的成本不同，多出的部份變成股本溢價，可計入盈利。但可換股債券換股後，股價上升，公司無需計入虧損。」

June:大市炒到房產基金，但這種股份不是大炒股，炒到咁上下會停，主要追落後，或資金避風，小心炒完就完，高位不妨沽出獲利，或定止賺位，若再升就不斷推高止賺位。

Yuki:你問台灣股市，若最後馬英九當選，台股可以買，但陳水扁極茅，唔知會出什麼術阻止馬英九上台，例如選舉前唔對路，可唔可以搵個藉口搞亂，宣布台灣進入緊急狀態之類，小心。寧願見到馬英九當選後，買貴啲，好過買錯。

你問美股調整完未，我覺得接近，但減完息下個月可能仲有得跌，插深啲才完。

你８．３６元入中石化，４．９２元入工行，入貨價唔算高，工行或許要插穿你個價，但防守性幾強，唔好沽啦。

Christine:你的例子又證明了一成止蝕係保命靈丹，無止蝕跌起上來好慘，先講維達，仍有錢賺，恐怕炒內需只是炒一轉，高位無沽，要定止賺，例如４元，跌穿要離場。

中外運４．１元入，現價又叫你沽，都幾傷，唯有守吓，博佢上番去，但航運業一兩年的前景唔太靚仔，彈到唔使輸可換馬。中石化１３．１元，此股基本因素好，而家俾加油價就傷啲，可以守長啲，有機會見家鄉。

YY太：若再減息半厘，樓市都要再炒吓，旺市買樓好難，業主不斷反價，無計。買北京樓如可租出，不難有５、６厘收益率，長揸２０年，得噃。

小豬貓：月供成本要手續費５０元，想轉兩三月供一次，如果５０元是minium charge,供大三倍都係收５０元，三個月供一次有著數，關是定期供，唔好睇大市升跌。

Why:你等中材發輪，怕佢再跌穿１００億市值，發唔到輪。買入宜守止蝕。

火柴：揸了華能，去年１１月７．９元入，現價７．３元，受累於國務院不准加電價，我估插到咁上下應OK，不過穿７元止蝕也是好策略，不能排除佢不會試低位（６．３元）。

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

搶出線         

2008/1/15 上午 09:52:08

  　 美國這隻大水牛正在抬上手術台急救中，雖然成功搶救被視為好消息，但其本質應該是壞的，例如傳聞中的花旗急救方案除了包括超過１００億美元的集資計劃，還有裁員２萬人的打算，當中有６５００人來自投資銀行部門，這一班資本主義的市場嬌子，正承受著自己有份參與製造的金融和地產風暴的惡果。

另一個會被視為好消息的壞事，就是越來越多人估計月底聯儲局月底議息時會減息０．７５厘，從美國國債期貨走勢顯示，市場相信有高達４８％的機會減息０．７５厘，在１月１１日聯儲局主席伯南克講話前，無有人相信會減息０．７５厘。雖然現時市場主流還是相信減息０．５厘機會較大。

在大幅減息的預期下，美元繼續走軟，今早亞洲市交易早段，歐元兌美元報１．４８７，美元兌日圓報１０８．０９日圓，險守１０８關口，黃金亦升到顛，做９０８美元。

美股開始產生手術將會成功的憧憬，道指昨日升１７１點，升幅１．４％，道指升到１２７７８點，主要因為IBM的業績優於預期，由經常業務產生的季度每股盈利２．８美元，高於市場預期，IBM股價大升５．４％，帶動美股向上，因為市場擔心次按風暴將全面影響各大企業的第四季盈利，但IBM做得好，令人感覺好多非金融、地產類的公司其實唔係做得咁差。

正在急救的花旗都有得升，股價升０．５美元，收報２９．０６美元，升１．７％，市場開始有人炒銀行股見底，甚至美股整體見底。例如Credit Suisse 就把美股的看法轉為「增持」，認為聯儲局表現出推動經濟的承諾，美股應有支持。　

　　最近港股走勢唔太跟美股，好易令人產生港股唔使理美股的錯覺，其實港股大方向暫時走唔開美股，但論基本因素，美國唔掂會大幅減息，對本地的樓市極其利好，所以即使地產股炒過籠還是繼續炒，地產股大升就沖淡咗其他股票的跌幅。論炒作因素，港股走勢咁飄，亦有人為成份，例如昨日美股大跌港股還要高開，就相當玩嘢，不排除有期指好友借此減慢跌勢。所以美股若未脫險，港股亦好難大幅炒上。

　　不過跌到咁上下，就有人開始炒見底，Credit Suisse就係呢類，美國金融股上週五在大跌市中不跌，亦見撈底客的手影。IBM業績好，也令人覺得聯想（０９９２）應該都唔錯（其實IBM出售個人電腦業務予聯想後，它已脫離個人電腦行業，所以兩間公司的業績不可直接比較），令散戶想在此時追入聯想。

在急跌市中跌到咁上下想入貨，就如跑步比賽起跑前評判的號令槍將發未發時，運動員想搶先衝出的心態，既考判斷，也考運氣；運動員太快搶出要重新起跑，三犯就要出局，撈底買股也一樣，搶先入貨者博自己撈到最低，但有時搶得太快，就會中招，買完再跌，一樣要斬。所以我的建議是若是中線投資者，即使想撈底，也不要一注瞓身，否則估唔中會幾傷，況且１月跌完反彈之後，２月隨時再跌，唔駛太急。

陸羽仁

[ 本帖最后由 Mr.Business 于 16-1-2008 12:28 PM 编辑 ]

Mr.Business

2008/1/16 上午 11:24:36

  陸羽仁覆網友

大市見得到２４０００幾點，你就要預佢見２３０００點，要有咁o既準備，去睇吓自己要唔要沽，或者敢唔敢揸，各人要睇吓自己個倉，如果成手貨，唔好想去溝，如果貨少錢多，開始可以分段買貨睇一年。

Ray:你係大戶，錢比較多，你問我國壽和和黃幾時可以第一注，見大市跌１０００點以上，就買第一注賀吓佢，預佢跌多１０００點，和黃現價第一注，７８元第二注，７６元第三注。國壽現價第一注，３２元第二注，２９元第三注。記往買完會再跌架。

Cotty:聯想昨日睇佢升都係無厘頭反彈，無買你執到，跌到４．５元可以買第一注，預佢要再大跌，慢慢買都未遲。

HH:你有錢問買匯豐好或宏利好，渣打好似強勢過呢兩隻，不過渣打也有次按風險，這種風險三隻股都有，但匯豐最大，而家怕佢仲要大撇帳。

Twohitsix:而家無人識計匯豐內在值，因為唔知佢仲要撇幾多，１００元或１１０元唔係無機會見。

Dino:股東增持唔升，係咁，大市跌股東增持都頂唔順，若你見大股東真金白銀買得多，咪跟吓囉。  

小豬貓：你識止蝕恭喜你，你朋友無止蝕，６．１元買咗工行，叫佢守吓啦。

Mathew:有中遠洋，建行，招行，你入價高，特別中遠洋２８元入，濕滯，唔好怪我又問你為何無止蝕，而家止蝕太遲，或可換入中移動或國壽，強勢啲。

S2000:華資大戶都係睇鬼佬插到２４０００點，請信六成。

小潘：仲有１０幾％賺，坐吓貨啦，唔好俾佢震走啦。

水滴石穿：新手對沖，可以買少少PUT輪算啦，不過莊家好古惑，跌市佢跌唔足，所以一定不可以買得大，買少少叫做求過安心。

WFKK:越秀房產做乜咁早高追？其他人等佢跌多少少近３元可以買入收息，你就死揸吓啦。

Muse:長城汽車生意唔錯，你已入第一注，第二注而家可以入，留一注等佢再跌深啲入。

小強：大陸地產商被阿爺要求盡快動工，唔係話開工就開工，佢地無錢週轉不靈怎開工？

晴天：跌市買貨，自然要預佢再跌啦。

小兵卒：可換股債計價一次有盈利後，不會因為股價再跌再計盈利。

Johnny:你問２６２８，４０．４元買，溝就唔好，但跌得幾深，再跌應該有限。

想買８２０翔龍基金，我就鐘意２８２８H股基金多啲，貪佢跌得深的，國企指數跌近１４０００點，進入射程，可分注買，預佢跌到１３０００點。

當然大市跌到２３０００點買貨更安全，但可能跌唔到，可能到時你唔想買。

Marco:想買花旗睇三年，現價可以開始分注入，或會再跌深啲。

Diskie:國壽反彈上４０元後想止蝕，但轉去買工行就無謂啦。不如揸吓，沽貨係睇淡後市，唔再揸貨才好沽。

Berno:有中石化，中移動，國壽，若入貨價不貴，捱吓，不要沽，也不要溝。

火柴：１１５元的中移動和１１元的中石油可以買吓。

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

陽謀         

2008/1/16 上午 09:13:21

　　花旗公布業績，撇掉１８０億美元（１４０４億港元），降低派息４１％，賣出１４５億美元（１１３１億港元）的優先股予新加坡政府等投資者，結果花旗股價大跌７．３％，加上零售銷售數據不理想及油價下跌拉扯油股向下，美股道指大跌２７７點，又跌番到１２５０１點的低位（１２５００點又有少少支持力，唔知呢幾日會唔會插穿）。

　　美國佬玩財技真有一套，正如昨天所講，花旗公布破紀錄的１８０億美元大撇帳，佢不止搵埋幾枝大水喉入股頂住，事前放料消毒的工夫亦相當到家，昨天下午還傳聞花旗要撇２４０億美元，早前一直流傳佢撇帳２００億美元，結果是撇１８０億美元，雖然係天文數字，但比市場流傳的「少」，我估如果花旗有關人等不是事前放料消毒，市場意外地看到它要撇１８０億美元的天文數字，花旗股價隨時一日插２０％，咁美國就股災都唔奇矣。

　　美股的走勢在預期之內，真正困擾人的是外資大戶在香港市場的動向，陸羽仁今天在《頭條日報》的專欄提到，有華資大戶爆料，話佢收到鬼佬的電話，提示佢港股仲有得大跌，叫佢小心咁話。華資大戶滿腹狐疑，點解鬼佬在３００００點樓上唔叫佢沽，到而家又咁好死打電話來「提醒」佢呢？

　　聽完呢個故仔，解答咗我一些疑惑，我近日發覺，一些平日得的分析無乜效，港股走勢非常飄，經常炒相反，走勢又和美股有少少偏離，搞到人暈陀陀，聽完故仔知道又係鬼佬大戶作怪，港股應該跌時，佢一炒高地產股托住，到你覺得大圍跌得差唔多時，佢就嚟料。陸羽仁估計鬼佬有此動機：

第一，鬼佬大戶做了淡倉，而且尚未平倉。

第二，鬼佬大戶搵華資大戶放料，有兩個可能原因。甲，正如華資大戶自己咁估，鬼佬食到咁上想出貨，既然可以同佢講，亦可以同其他華資大戶講，鬼佬到處唱淡，等各華資大戶追入沽貨，鬼佬搵到人接貨，即使大手平倉都唔會推高指數，佢地就可以輕輕鬆鬆咁平淡倉。乙，鬼佬唔係想咁快平倉，係想短期再插得深好多才食糊，而家恒指成份股裏面最硬的是地產股，佢係想叫大地產商批股，市場已經傳咗好耐大地產商會趁高批股，如果成功遊說到一家大地產商批股，咁地產股一定會大力一插，到時就可以隊低大市，鬼佬就順勢食糊。

第三，鬼佬唔想捱到月底等期指自動平倉。我過去已講過，大戶翻雲覆雨，左右大局，但最頭痛的問題是倉位咁大如何平倉，本來炒期指有一個最大好處，就係期指合約月月清，到月底唔轉下月倉就自動平倉。但鬼佬大戶四圍唱，恐怕跌市快近高峰，佢地未必想捱到月底，事關外圍的壞消息出埋呢幾日就出哂，美國總統布殊在１月２８日公布國情諮文隨時有救市大計，近月底又開始炒減息玩反彈，所以要一直頂住在低位到位到月底，可能會偏離外圍股市走勢，唔係唔得，硬要做都得，但會好犯本去沽，所以鬼佬想速戰速決。

　　鬼佬到處唱淡，係陽謀唔係陰謀，聽完故仔影響我對大市的判斷，我估鬼佬要隊低大市才平倉，後市極波動，佢一定會想方設法再插，由於太多人為的因素，單靠分析大市（包括分析美股）的作用不大，憑分析睇大市好易錯，市場走勢隨時可以再走相反，你見美股反彈追入，佢來最後一插隊死你。「投機的我」自己執生，跟沽亦有走唔切的風險，鬼佬平淡倉唔會叫埋你走；「投資的我」有貨可以捱吓，捱得到就不要在這些日子止蝕，就當發場夢睇場戲，去到月底可能會好番啲呢。

陸羽仁

[ 本帖最后由 Mr.Business 于 16-1-2008 12:28 PM 编辑 ]

sakindo

陸SIR较老曹的想法保守些但都有做 CUT LOSS 的后招 呵呵！

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

高手之言續篇         

2008/1/17 上午 09:40:00

　　　美股大跌後企穩，JP摩根公布季度盈利跌２４％，差過市場預期，要為按揭投資作１３億美元撥備，不過金融銀行股反彈，抵銷了油股下跌的影響，道指跌３４點，收１２４６６點，雖穿１２５００點，但這一浪美股抵受花旗公布這種１８０億美元大撇備的衝擊，而家的跌幅都唔算過份了。

　　昨日港股大跌１３００點，絕大部份有貨在手的網友，當然無哂心機，去年全年的利潤可能抹去大半，高位追貨更要入肉，在跌市中，止了蝕的朋友會慶幸，不過若我在在旺市回吐時叫你止蝕，止蝕完再升，可能要捱罵，可知市道絕對影響人的心理與觀感。

　　在大家對股市前景疑惑之際，我又找了高手朋友求教，怎樣看待如今的市況。高手分析大市，他在今年初已認為頭一季必有一跌，係一月定二月大跌唔知，跌市應有去年８．１７那種規模，即是整個地區皆跌，匯市亦大亂，日圓抽升令對沖基金拆倉，總之出現大龍鳯那種跌法，才是像樣的跌市。昨天的大跌，就有咁樣的氣氛啦。

　　在跌市中永遠有人問跌夠未，愈跌得多，愈跌得急，你會愈覺得它未跌夠，所以現在有人問會否再跌到２３５００點。高手問的問題卻是，現在究竟是一個股災的開始，還是一次調整的尾聲。若是股災，港股可能要跌到１５０００點，若是調整結束，即使假設低位是２３５００點，距離現價也只是１０００點，差不太遠。歷史上香港的股災，多是由外圍引發，主要由美股暴跌造成，只有８３年的香港前途談判跌市和８９年六四事件引發的大跌市是例外。高手話外圍暫未成大災，大陸股市反彈，美股跌得尚有秩序，是反覆慢跌而非急跌，唔係太似股災，外圍無災香港好難有災，所以今次大跌較像一個股市調整的尾聲。

　　佢認為呢個月股市走勢咁飄，主要是持有大量淡倉的大戶造成，因為美股的走勢十分正路，但港股卻曾出現眾多古怪走勢，相信是大戶把持大戶造成的感覺。若有大戶炒跌，急插亦十分合理，要留意他們何時食糊，如何在大跌中退場，要在低位買番貨。因為大市插低到咁上下，會逼出大量的斬倉盤、止蝕盤，自然有好人幫佢地接貨了。

　　高手話，沽貨唔好望沽到頂位，買貨唔好望撈到最低位，能夠做到通常都有點運氣，買股票主要唔係靠運氣，假設現在離底不遠，今年的投資便應在這些水平逐步建倉。今次插得幾深，可能短期底部已現或好快出現，反彈後下月即使有調整，也未必會深過這次的跌市，是否如此，月底會較清楚。

　　高手身體力行，昨天跌過１０００點時開始大手入市，買入目標持倉量的三分之二，然後等候這一兩天買埋佢。我問佢驚唔驚自己睇錯，佢話驚，跟住講咗個故事。

　　高手話，年紀稍長的網友，應該睇過周潤發一部名片叫《英雄本色》，劇中主角Mark 哥去酒樓尋仇，預先在走廊多個花盆中放了手槍，他進退都靠這些手槍殺敵保命。佢對大市形成一個看法後，會按看法去投資／投注，但會假設自己可能看錯，會為自己留一條後路，就如Mark哥事先放在花盤中的手槍一樣，關鍵時候攞番出來，救自己一命。

　　由於高手炒作衍生工具，佢會用五對一的比例做好淡倉，假設睇錯，股市再大跌，呢五份一的淡倉可以追番佢大部份的投資，唔會死哂，這就是對沖。你聽完會嘩一聲，散戶買貨點可以咁做，佢話散戶有幾個方法，為自己留後路，第一，分段入市，第二，唔好瞓身博盡，第三，買少少價外的認沽輪對沖，要知道輪商食價好深，非常搵笨，所以只能買「少少」，這些錢如保險金，預咗輸清。

　　陸羽仁補一句，在２４５００點買股票，比在３００００點樓上買安全，散戶現時買貨要捱那種週身中刀的感覺，現唔買大市高升時才買，買貨時感覺良好，其實風險更大。

陸羽仁

[ 本帖最后由 Mr.Business 于 17-1-2008 09:57 AM 编辑 ]

Mr.Business

2008/1/18 上午 11:27:37

陸羽仁覆網友

恐懼和貪焚，是人類炒股永恒的挑戰，在大跌市中，如何正確衡量風險，是最艱難的事情，要用自己的腦袋，不可盡信他人，自然也句括陸羽仁在內。

Ray:你問中油香港、韓國領先基金、天津發展、瑞房、長城汽車，走勢都接近，大多跌近去年８．１７的低位，當中長汽跌幅較少，相信和其生意較好有關，汽車業亦應該唔會被阿爺控制價格，所以可多留意。講風險主要是大市風險，當中津發和韓國領先基金穩少少，瑞房可以泠敲，博低點買入睇長少少。

IPO之友：而家市面好多好股都好便宜，要幾多有幾多，唔駛一定買新股。

Kevin:你想多了解期指、期權及大戶如何平倉，我估新手較難了解，或都先從股票入市易啲，先學睇股票基本因素，再學睇大戶如何炒作。

Myself:買電盈輸咗錢，會令你一生受用，教會你六個字：無股票可以盡信。幾好的股票都可以跌到渣都無。

T:人生的快樂不止希望人地對你幾好，有時快樂在於自己對人幾好，對人好啲，世界美麗啲，好似你揸車，你讓吓人，人哋又會讓吓你。

YY太：我可能比你早起步買股票，我十歲八歲已經跟阿爸阿媽買匯豐，好細過就識乜嘢叫做批股、供股，所以在投資上有少少早熟。

香港書蟲：我之前話減息後二月再插，減完息跌番難免，但如果呢個月港股美股插得夠深，下個月就未必比今個月厲害，月底就有分曉。

Sisi:你一定閒錢好多，一注都買咁多，止蝕逐隻股計，放寬少少就以收市價才計到止蝕位未。

小潘：鄭海泉係講過匯豐「整體業務比去年有增長」，但外圍大銀行撥備得太勁，怕佢被逼要再深度撥備。

Rabbit:惠理唔係基金，係基金公司股，市好佢地賺好多分紅，市唔好就盈利大倒退，和港交所類似，所以若有股災，這類股票和大走向掛鈎，會衰好多年，宜借反彈止蝕，換馬到其他實業股好啲。

HH:每月有２０００元想月供股票，如睇２０年，我話供２８２８H股基金都可以，中交建隻股唔錯，但炒味好強，大上大落，不太適合長線。

Angona:你想沽招行和中交建換人國壽，因為國壽跌得多啲，但招行和中交建是強勢股，所以跌少啲，不宜這樣換馬，若招行、中交建再大插，國壽都唔好得去邊。

Eddie:你問匯源和津發，匯源跌咁多仍有較貴，無人炒就係咁跌，津發盈利較穩，現價市盈率１３倍，進可攻退可守多啲。

S2000:渣打２５０元可吸納，但有少少次按風險。買國壽亦得，但我唔會用「穩陣」兩個字來形容。

Philip:除淨後恒發係好平，但只怕無人炒，重組後要炒都炒煤氣和恒基，而非恒發。

Yuki:我想買股最好買強股，指數成份強股係首選，大陸銀行係跌得殘，但短線會受制於宏調，另一類宏調重傷股是內房股，漸漸到可留意水平。

思捷受歐洲可能衰退影響，唔敢話佢調整完未。

玖龍和理文差不多，但玖龍炒味濃啲，跌得勁啲，炒亦炒得勁啲。

電力股跌到抵買位，可留意，買入守一兩年，應該不能長期死控電價。

大陸A股跌係因為內地市場認為阿爺在農曆年前不會出招搞壞氣氛，但阿爺再出招，有少少出乎意外，但其實阿爺用意如一，過年前搞低物價，等人民感覺好啲，大陸股市反彈不少，回啲唔奇。

牆頭草：如果似Mark哥最後兩飛子彈用完，結果無死，跛咗隻腳，去車房打工再來過。而家買貨唔知會唔會係同一命運，最後唔死跛咗腳都要還神呢又？

陽陽：跌市跌到咁深度，有中海油守得就守吓啦。

Berno:美國確有滯脹之險，所以要盡快出手救市，美國民主黨上台後，停止出兵，控制赤字，美國一兩年後可以復元。香港會跟減息，樓市焗炒。

你的股票長期投資，問有乜好做，我唔贊成「溝」，或者另外找些跌得深的好股「買」吧。

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

政治鬥爭         

2008/1/18 上午 09:40:16

　　美國大水牛急救手術仍在進行中，手術室紅燈仍然亮起，在美國政府公布一個１５００億美元（１１７００億港元）的救市大計的前夕，美股道指大跌３０６點，跌幅２．５％，跌至１２１５９點，距離１２０００點大關只是一步之遙。　　

    　昨日美股沒有特別驚人的利淡消息，但市場相信衰退快將來臨，就把美股推低，主要由艾克森美孚、美國銀行和通用電器領跌。美林公布第四季業績，蝕９８．３億美元（下同），每股蝕１２元，遠比分析員估計的４．８２元為多，結果美林股價急跌，每股股跌５．６４元，跌到４９．４５元，跌幅１０％，第四季業績奇差也令美林去年全年業績見紅。

　　不過陸羽仁又有一個理論，認為美股大跌和布殊政府的救市大計有關。伯南克昨日在美國眾議院預算委員會打開口牌，話一個１５００億美元的救市大計有助舒緩經濟危機，佢甚至透露政府的救市大計的具體方向，話要有總值６００億至７００億美元的臨時措施在２００９年初推出，就會對今年下半年的經濟有重大效果。

　　傳聞中的救市計劃包對每個美股納稅人個人作８００美元的退稅，及對家庭作１６００美元的退稅，又會對企業作出某些減稅措施。

　　伯南克雖然無講救市計劃的內容，但卻在國會內大談不同救市措施的效果，他認為措施要分散才有效，減稅要減低下階層的稅，因為他們比有錢人更快使錢，而２００１年的退稅成功催谷經濟及防止深度衰退。談到企業稅時，他認為針對企業軟件及設備的稅務優惠，比直接減利得稅有效。他又認為把共和黨在２００１年及２００３年的削減利息稅措施，化為永久措施，短線有助提振金融市場的信心。佢又話這些救市計劃「要具體可見，不是做門面工夫」。另外伯南克又重提聯儲局預備好在利率上做出「重大行動」，對抗衰退。

　　伯南克未議息就打開口牌講減息來已經夠奇，佢仲做埋政府嗰份工，為求向國會推銷政府的救市大計，事先披露今年才公布的救市大計方向，就更奇上加奇，內裏自有文章。

　　執政共和黨是赤字減稅派，在野民主黨是平衡預算的加稅派，傳聞民主黨希拉莉上台後還計劃加稅。所以布殊這個行將落任的政府，如果提出大幅減稅的措施，跨越呢屆政府的任期，民主黨控制的國會那能支持呢？

　　這一陣子伯南克經常會見民主黨國會要員，相信是為共和黨政府作說客，遊說民主黨接納減稅救市大計。美國政府事先把方案吹出街，是讓人民看到甜頭，讓民主黨更難反對。在方案推出前夕美股大跌，更增民主黨人的壓力，若堅持反對，搞到美股股災，恐怕今年１１月大選都無望矣，所以他們要決定，究竟係冒住被人民鬧的風險反對方案，還是忍痛接受一個城下之盟。

　　經濟混雜政治，其風險可知，萬一民主黨人拼死反對，美股的確有進一步大插之險，共和黨隨時借此送大熱的民主黨候選人希拉莉上路。若民主黨讓步，忍痛鬆手放布殊政府一馬，股市又可以當無事發生。

　　講番港股，美股大跌，港股自然受壓，散戶仍然要有心理預備，繼續坐過山車了。

陸羽仁

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

唔好溝         

2008/1/21 上午 09:47:00

散戶買股重視回報，看目標價，估大市或個別股票的走向。大戶買股若是長線投資，除了考慮回報之外，還要看如何控制風險。

現時２５０００點的市道，散戶想入市，除了估計大市走向，還要看自己的風險胃納，不同的人，應有不同的風險胃納。可以從兩個網友提問解釋這個問題。網友白穗禮問，「我媽媽有一筆遣散費, 10萬左右, 扣除4萬5千蚊作為未來半年生活所需, 留一半做投資. 我有諗過拎舊錢去買2828 H股ETF或者2823 A50ETF, 不過想媽媽安心D, 所以作罷. 我認為將呢5萬5千蚊拎去做人民幣定期最穩陣.（他接著問人民幣存款的具體問題）」

另一個問題係網友阿tom問，佢在４０元沽了招商銀行（３９６９），問好唔好在３０元左右買番。又問領匯（８２３），早前在低位時陸羽仁提過它的管理層真空問題，問而家仲有無問題。

佢地的問題，包含咗對個別股市和市道的提問，但我主要想抽風險因素出來講。白穗禮的媽媽，得到１０萬元遺散費，意味著可能有一段時間無工開，若年紀大更會退休，無可能把退休儲備拿去作風險投資，以恒生H股ETF(2828)[股價及相關新聞] 為例，主要買H股，而 A５０基金（２８２３），則是A股指數基金，現價投資恒生H股ETF，即使H股已深度回落，但不能說風險很低，而A５０基金的風險更高一些，因為A股最近已從低位反彈了一段，不算太低。借A５０基金的例子，若上證綜指大跌到３０００點，佢會跌４成。老人家唔買慣股，過去沒有從股市賺過錢，就只能投資低風險的工具。買人民幣收息博升值，幾好，因為中國經濟中長線向好，人民幣長線還有不少升值空間，若買完人民幣匯率回吐，長揸亦無壞。

另一個極端是tom，我雖然不知他的年紀，但他卻是最能承受風險的類別。從兩個角度講，假設他是「投資的我」，買招行想長揸，但見股市升得太顛，在４０元沽了招行，當然要恭喜他，因為他沽了招行的全年高位，他想３０元買番，我覺得可以，即使買入招行跌到２５元，甚至２０元又如何？他４０元沽貨，３０元買番，已有１０元利潤在手，即使招行跌到２０元，扣除利潤他也可以當無沽過而矣，尚未入肉。「投資的我」買股份諗住長揸，高位把股份沽出叫做游水，最大的風險是游水後股份回吐得不夠深，稍跌又彈，追唔落手，結果升到無影，就錯過好股，所以「投資的我」高位沽了貨，有一定利潤可以買番，這筆利潤可以加大投資額，降低這隻股份的平均買入成本。換一個角度，若我過去未買過招行，現時入市，看著招行５２週低位只是１４．３元，看著現價３０．６５元，雖然從高位回落了２５％，還會有點心大心細。招行是強勢股，跌得不夠多，自然不會去番全年低位。

若他是「投機的我」，每一個交易都係獨立交易，無得計長線，４０元沽了招行獲了利，而家買唔買，又係第二單交易，就要判斷招行短期後市，唔買招行買第二隻亦無所謂，主要是覺得那隻股票炒作的空間較多，就買邊隻。

順便講吓領匯，領匯５２週低位是１４．２元，一個月的低位是１６．６元，現價１９．６４元，一個月內急升，接近全年高位２０元。主要是最近炒減息，熱炒房地產股，蔓延到房屋信托基金股，再加上資金早前有點避險心態，所以也有一批錢轉到領匯。照常理計，房託股不是增長股，只是追落後，上升有個譜，所以高追有風險，因為大市一轉調，資金可能流走，就有回吐風險。領匯換了鬼佬主席加鬼佬CEO，用鬼佬管理層對鬼佬對沖基金，以鬼制鬼，應該會好啲啩，但對沖基金盤據的局面，令隻股難大升，恐怕一升得多，對沖基金會借勢沽貨離場。所以這隻穩陣股高追亦有風險。

最後講番主題，股市調整後，股份變得「相對」便宜，但追唔追貨，除了睇大市之外，亦好睇個人情況，如果成手蟹貨，就更不要再買，一字戒之在「溝貨」。

陸羽仁

[ 本帖最后由 Mr.Business 于 21-1-2008 05:09 PM 编辑 ]

Mr.Business

2008/1/22 上午 10:57:13

陸羽仁覆網友

在大跌市中各網友問題太多，可能不能一一作答，揀出典型作答。

股災：網友問股災會跌幾多，我話起碼跌到１５０００點，可能更多，唔係嚇你，否則唔叫做災。要有能接受風險之心，才好買股。

政府行為：唔好期望香港政府可以做乜，佢做乜都無大用（頂多買少少港交所，只有像徵意義）。只有美國做嘢有用。

阿Ray問美國民主黨接受救市方案有乜程序，唔駛理程序，只要布殊政府同佢地傾掂數，公布救市計劃詳情，民主黨同時表態支持，就OK了。另外聯儲局亦可以同步公布放水救市措施。

止蝕：部份網友追了貨問好唔好止蝕，我又係一貫答案，若是投機盤，高位跌了１０％後，最好止蝕，唔斬哂都斬一半，控制風險。若是投資盤，特別是高位減了貨者，最近買番，由於已減低成本，可以揸吓。

分段買貨：有些分段買貨未買齊，問好唔好買，我話唔怕買埋佢，然後可以用平均價定止蝕位，若有餘錢者，可以買少少略價外的認沽輪對沖。

投機：（新仔請不要看這段）股市暴升暴挫時，都是投機機會，現家又到認購輪、認沽輪齊齊買的時候，揀些略價外的貨色，兩邊同時買，博佢一係股災，一係反彈。我記得舊年咁講，搞到阿K一身蟻，佢買了即日拆了單邊，搞到一額汗，但到而家我又忍唔住再講，兩邊買，買咗要預咗揸一個月左右，要拆即時同步沽出。（再補一句，無十年以上炒股經驗者唔好學）。

對沖：真正有經驗的投資者亦可以做對沖，買少少認沽輪，揀啲價外少少，成本會平啲，主要用來對沖股災的風險。我的高手朋友，在昨天大跌時已略增沽空一方的注碼，由好淡五比一之比，略增至五比二之比，等如係花盤放多把槍，必要時救自己。當然，對沖有成本，這些對沖成本有機會完全報銷。

Ray：大跌市想買大酒店，就把入市位定低啲，定到一年低位１０．９元開始第一注， 中遠太平洋跟航運股，相當弱勢，現時好多強股都跌到比較便宜，分注買強股安全少少。

牆頭草：大家都要作好洗車的預備。出得來炒股，就要預咗幾年後係一條好漢（如果唔係２０年後的話）。

Twohitsix:我原來話未來幾十日係美國講唔講得掂數的關鍵，環球股市咁跌法，等唔到幾十日，若月底前傾唔掂，美國都可能有災了。

Ling:高價入上電想等反彈換馬中移動，都係唔錯選擇，趁反彈時換入強股好啲，雖然強股跌得少啲，略貴。

S2000:若啲貨唔係太貴入，都可以捱一捱。

Mkm:有閒錢中銀香港１８元開始分注入都OK。

Wall：你組合中的中信銀行不算強股，之前佢算平，而家其他銀行都跌咗，分散少少買建行或交行好啲。

CCB:若判定是熊市，而家當然唔好買貨，若不是熊市，現價開始分注，慢慢吸國航都可以。

Elle:股災最壞情況第一站係１５０００點。

Yuki:我作為長線投資者，部份優質股份開始跌到有價值的地方，可以開始分注吸，同時買少少認沽輪預防股災風險（此部份要全報銷計入買股成本內）。

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

環球大跌市         

2008/1/22 上午 09:24:09

　　昨日港股一插近１３００點，整個亞洲股市都因為道指的場外期貨急跌而下插；亞洲市結朿到歐洲市，全部跟跌，以德國DAX指數跌７．２％最厲害，倫敦股市因為有政府宣布擔保北石條債券數，北石股價急升５成，叫做氣氛好啲，都跌５．５％；始作俑者美國因為馬丁路德金假期而休市，只能睇住個道指場外期貨價，都跌了４００、５００點。

　　全球股市係咁跌，大摩的MSCI全球股票指數亦錄得５年以來最大跌幅，股市大跌引發連鎖效應，日圓再升，做１０５．８日圓，從事套息交易的對沖基金又要拆倉，炒得勁如黃金等商品急回，黃金現價８５６美元，油價亦因為擔心經濟衰退而急回，紐約二月份期油跌到８８美元一桶。所有投資產品皆跌，只有一樣東西上升，就係美債，投資者迴避風險把資金泊入短期債券，二年期美國國庫券升到１０２元，令債息跌至２．１％，投資者情願唔要回報，只求安全。從美國國債券期貨成交的數據顯示，市場估計聯儲局減息０．７５厘的機會，已經高達７５％。

　　歐洲跌得咁甘，今早亞洲開市再跌，日經指數曾跌超過６００點，跌幅約４．６％，之後跌幅略回順。到香港開市，又係爆大鑊的格局，昨日收２３８００點，距離２５０天線２３５００點只是３００點左右，好易一攻而破，直試２３０００點關口。

　　環球股市跌得咁甘，英國政府都投降，同意高盛的建議，由政府擔保北石銀行的債券，這種企業失敗由政府承擔的手法不尋常，但事急馬行田，英國政府也得無奈接受。

　　陸羽仁就好有興趣知道美國財長保爾森和聯儲局主席伯南克而家做緊乜？美國星期一無市，若美國政府什麼都不做，到今晚美國時間星期二早上一開市，道指好易一跌就跌５００點以上，直插向１１５００點，咁都唔緊要，再咁跌吓跌吓就失控，跌得太急就救唔番。伯南克有無放水救市的措施？負責和民主黨就救市方案講數的保爾森，又能否取得民主黨首肯，若這一切只有否定答案，咁危機就會急促擴大。

　　在正常的日子，這種政治性的危機完全可控，因為不同黨派只係做戲攞彩，玩兩玩就埋位做嘢。但今年是選舉年，民主黨會覺得一放生咗共和黨總統布殊，俾佢搞番掂個經濟，就對自己選情好不利，所以會堅持到最後一刻。而聯儲局也會有子彈亦不發，因為聯儲局若先行減息救番起個市，都好難再叫民主黨人就範。不知大家有無注意，民主黨消息人士對記者話，要３０至５０日才會和政府談好救市方案，保爾森和伯南克自然唔想等咁耐啦，最好在１月２８日布殊公布國情諮文前就有分曉，所以壓力就集中在這天，傾唔掂就玩完啦。

　　這是一個占士甸式衝崖遊戲，兩個人各自揸住跑車衝向懸崖，邊個先停就輸，所以兩個車手都會盡量捱到懸崖邊，弄不好兩個人都會跌落山崖，弄到粉身碎骨，政治比經濟更兇險。我們作為觀眾，只能夠等。

　　你問我股市有無災，我話目前仍未算，因為跌得未夠勁，若美國政客玩出火搞唔到救市方案出籠，就好難講嘞。到美股一日跌１０００幾、２０００點時，你想話係唔係股災都唔得。

　　至於網友如何自處，基本是要求心安，關鍵係控制風險，風險控制咗，自然唔會驚到瞓唔著，以瞓得著覺來決定自己買賣的方向。首先唔好借錢買股，因為唔對路時，人家會逼你斬倉，唔到你控制，買高風險的期指或沽期權亦係一樣，結果唔係你能話到事。其次若是成手蟹貨者，亦唔好再溝，有時黑起上來，愈溝愈慘。第三是無貨想買貨者，最好量力而為，股票係相對便宜，最好分注買，亦要你有力守，若萬一發生股災跌到１５０００點坐幾年都唔驚，唔等錢使，先至好買。第四是為自己留後路，有錢唔好買盡，又或者同時買少少認沽輪做對沖（要預咗呢一筆會輸清，這筆保險費就加進買貨成本裏吧）。第五，信自己，有懷疑唔好買。第六，成手蟹貨風險太高者可能要減部份倉控制風險，或買少少認沽輪對沖。冷靜思考自己的持倉和市況，才作買賣的決定。

陸羽仁

Mr.Business

2008/1/23 上午 08:42:04

陸羽仁覆網友

昨天的大跌市，俾到大家一個教訓，股市係有風險o既，買股只能量力而為。即使見到股市反彈，亦都要用同樣的心態對待之。

Twohitsix:執政共和黨和民主黨傾掂救市方案的機會都有七、八成，民主黨背唔起這個黑鑊。若最後有共識，不排除共和黨再俾民主黨先講攞吓彩先，至於共同開記者會就唔似嘞，只要民主黨國會領袖話同意方案就OK啦。

減息０．７５厘係唔夠，但更重要係有一個不斷可以減息的預期，所以月底會議未必會再減，幾時大跌，幾時亦可出招。

Bebe：你講到美國的政治鬥爭害到股市，政客就係咁離譜，為求自己當選，不理世人死活。

Elle:美國衰退一般唔過１０個月，而家美國佬自己都係咁估，不過今次係金融和樓市皆跌，我估會長啲，因為過去樓市無跌，美國佬可以繼續用間樓借錢消費。

你有閒錢，定好止蝕，唔怕買吓。

若美國不爆股災，即使二月香港股市再回，應該都唔會好似今年咁。

過去講投資組合時，我好驚會出現一次大跌，所以講股票好審慎，如今大體無變，但市面上一些強股亦變得便宜了，如中移動，中海油之類，也是另一些選擇。至於當日提到的安全股，領匯和中銀香港已到價，聯想和國航跌到突，但聯想基本因素（美國銷售）變壞，變成弱勢股，早前已講過，目標價大幅下移。

輝NSX:演員當然要搵食，不過真正主宰香港大市的是鬼佬大戶，佢地唔會搵香港演員代言。

Sisi:你去年利潤一筆勾銷，唔好傷心，今年再來，若有閒錢，買下恒生H股基金（２８２８），博大陸經濟未死，插一陣慢慢可以上番，當然中移動，中海油，國航都可考慮。

小潘：你問買股可唔可以長揸，我話要接受有一定風險，大跌有能力守，現價買長揸都ok。

Yy太：你奶奶在去年８１７前夕沽貨，在昨日又叫你清倉，係散戶明燈，要留意吓佢的意見。

Dino:越秀房產係慢股，升市佢唔大升，跌市佢唔大跌。

Coco:你提到網友間直接回覆，意見會向頭條網反映，看他們能否做到。

小豬貓：月供唔使沽，月供的好處就係唔駛估個市，高又供，低又供。

Tom、白穗禮：熊市會一浪低於一浪，反覆大跌，香港出現熊市的機會暫時未係太高。美國可能有一年或稍長的衰退。

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

政治市         

2008/1/23 上午 07:58:23

　　美國佬一如所料地出招救市，聯儲局在美股開市前開緊急會議，決定減息０，７５厘，目標隔夜借貨利率聯邦基金利率由４．２５厘減到３．５厘，銀行同央行借錢的貼現率同時減０，７５厘，這是聯儲局自２００１年９１１事件以來首次臨時開會減基本利率，去年８月１７日聯儲局臨時開會也只是減貼現率０．５厘，無減基本利率。

　　臨時減息在美股開市前約一小時宣佈，美股開市還低開，道指開市跌４６４點，但早上１１點已開始殺上，結果全日在１２０００點上下浮沉，收市跌１２８點，報１１９７１點，雖然是道指近年首次收市跌穿１２０００點，但在事前估計會大跌的恐懼下，跌百幾點真係要開香檳慶祝了。

　　今次港股之跌，甚至整個亞洲、歐洲之跌，都係從星期一美股場外指數期貨急跌開始，時近月底聯儲局議息之日，在星期一美國馬丁路德金假期無市之時，由成交比較薄弱的場外美股指數期貨下跌開始，其跌因的確惹人懷疑。在這些成交薄弱的場外市場，要做低美股指數期貨話都無咁易，跟住就在亞洲大手沽貨，自然可以沽出個大跌浪，因為跌到咁上下，基金都會恐慌拋售，以應付客戶的可能贖回要求，而大量的衍生工具持有人因股價下跌後接貨要斬倉，會觸發連番急跌。　　

　　到亞洲股市和歐洲股市出現連跌兩日的惡浪，美國大跌市的壓力已逼在眉睫，美國若唔在星期二開市前出招救市，就會出災，結果一如所料，聯儲局出招，昨日陸羽仁寫文時已講，聯儲局主席伯南克和財長保爾森要出招放水了，當時還未知港股昨日還要再跌多２０００點兼無反彈，到看到昨日香港的市況，美國出招救市就變成理所當然，所以最後見到鬼佬電視台報導聯儲局臨時開會減息，猛咁話驚奇，我就唔知有乜咁驚奇。

　　鬼佬大戶力插亞洲股，主要目的應該是逼美國政客做嘢救自己，因為間間美資大行都水深火熱，所以唔好意思啦，大力隊低亞洲股市，逼人做嘢，至於在香港等亞洲股市順手撈一筆，這只是甜品，應該不是正餐。網友們可能話佢地衰格，唔沽自己股市沽人地股市，不過話番轉頭，佢地沽美股唔係唔得，但如果要沽到港股咁大龍鳯，製造咁大驚嚇效果，港股兩日跌３５００點，道指起碼要跌番１０００點先有同樣效果，你話美國咁弱o既氣氛，道指跌１０００點，跌開有條路，恐怕佢會一瀉如注，金融大戶都驚自己玩出火，插完想頂都頂唔住，所以唔敢係自己屋企玩，唯有喺人哋屋企放火，然後大大聲聲話風高物燥，要防火也。

　　咁呢次環球股市做出咁大驚嚇，結果又得到啲乜家伙呢？表面上看只是聯儲局減息０．７５厘，好似大家都預咗，其實內裏有一重意義，就係聯儲局隨時在會期以外，以超常手段大幅減息，而家美國利率３．２５厘，誇張起來仲可以減多２厘，所以你去沽美股沽得太厲害，就有俾人突然減息挾倉的風險，所以聯儲局的超常舉措制約了淡友的行動空間，即係聯儲唔係一定要等到會期才可減息。今次減０，７５厘唔夠，若股市再大跌，過兩日佢可以失驚無神再減０．７５厘，用減息大力放水，打到淡友手軟。

　　呢一跌還有一重影響，就係逼美國民主黨就範，盡快接受執政共和黨的救市方案，負責和民主黨談判的財長保爾森話，救市方案「必須盡快推出」，而白宮發言人Dana Perino更表示，不排除救市方案比原定的１５００億美元更大。

　　我可以扮吓保爾森同民主黨講話：「你睇，只係傳吓話美國經濟唔掂，亞洲股市好似香港就跌到阿媽都唔認得，如果你地唔快快趣趣同意救市方案，只係減息唔夠力頂，美股若出現亞洲股市同樣的急跌，一日跌１０％、２０％唔出奇，到時你哋要想想如何向選民交待。」有呢次亞洲跌市做樣辦，的確可以增加保爾森的談判籌碼，保爾森以前係高盛主席，自然深懂股市的玩法。

　　美股「奇跡地」V型反彈，小跌收場，港股跌咗咁多自然會反彈，好多網友關心熊市是否已經來臨，我也維持過去的看法，美國熊市早已來臨，港股的熊市未確認出現，因為熊市的特點是股市見高回落，然後一級一級咁向下；去年港股９、１０月的升市由於有港股直通車消息的人為刺激，一下子搶高到３２０００點的水平，但港股直通車的消息被暫時否定後，港股要回歸自然，我早已說過，港股是大波動上落市，但炒作區間要逐步下移，去番比較正常水平，再定去向，目前的走勢未確認熊市來臨。
　　
　　有網友問是否股災，我話股災唔止跌咁少，跌到１５０００點一啲都唔奇，但我判斷目前出現股災的機會都只係有一、兩成，風險主要係美國市救唔到兼且大急跌，我在早兩日話港股未滑入股災中，主要原因係睇住美國市，因為美國當時利息係４．２５厘，利息未算好低，美國連番減息大放水的招數未用盡，照計無咁快來股災，因為一有災味，美國佬就會連番減息救市，到減到咁上下無得減無可減，或者通脹大颷升形成一個減又死唔減又死的兩難題前，美國佬有招未出盡，所以無咁快有股災。

　　港股呢一轉插得咁勁，好大機會短浪見底，一兩個月的後市要看美國有無災，若美國弄出比較像樣的救市方案，不排除可以軟著陸，若美國因為政治鬥爭搞到救市方案唔湯唔水，再減一兩次息都救唔起個市，就要小心。

　　股票而家幾便宜，只要量力而為，買吓唔怕，守住止蝕，照計都唔死去。

後記：昨日問高手有乜部署，高手話個市跌得幾恐怖，超乎他的想象，但見到個市跌２０００點時，佢就大手入貨，話揸一日睇吓都好，除了因為估美國佬會出招外，他還有一個奇怪理由，話港股咁歷史性跌２０００點以上，一定要買啲貨，贏又好輸又好，將來老咗有故仔可以同兒孫講咁話，去年的８月１７日，他亦大手買貨，感覺和昨天一樣，好驚。

陸羽仁

Mr.Business

注：此篇文章版权归作者陸羽仁和香港頭條網所有。有兴趣的网友请到陸羽仁先生的部落格阅读他的最新发表(http://www.hkheadline.com/blog/list_blog_express.asp?f=5YTPBH5B812303)

同一個老細      

2008/1/24 上午 09:46:15

美國股市昨日先插後急彈，早段因為美國銀行第四季業績跌９５％，遠差過預期，加上蘋果電腦和摩托羅拉預期業績會受經濟回落影響，道指曾經跌過３００幾點，尾段傳出政府同銀行研究出招挽救債券保險公司，道指在金融股帶動下急促反彈，結果收報１２２７０點，大升２９８點，升幅２．５％，上下波幅有６００幾點，坐哂過山車。

美銀因為次按要撥備５３億美元，要發６０億美元的可換股優先股集資，但股價照升８．５％，金融股以JPMorgan升得最厲害，大升１２％。市場開始預期金融股最壞的情況過去，有人認為現價跌到吸引水平。

其實睇番早兩日亞洲股市大跌和美國跟著的連番救市措施，令我愈來愈相信這是有計劃跌市，因為美國已有連串措施跟尾。

第一，救債券保險公司。好多人唔知美國的債券保險公司正在爆大鑊，它們在倒閉的邊沿，由於次按債券爆煲，向債券保險公司索賠的數字急增，債券保險公司的財務狀況急促惡化，美國第二大債券保險公司Ambac Financial　這個月剛被評級公司Fitch Ratings降低其AAA評級，其對手美國最大的債券保險公司 MBIA Inc 也等住降級，債券保險公司爆煲是美國下一浪金融危險風眼，連保險公司都瓜埋，勢必觸發連鎖反應，但昨日傳出消息，美國的保險專員正和紐約的銀行磋商，向MBIA Inc等提供信貸，協助MBIA Inc保持評級，保住它做保險的２萬億美元債券仍然有保險公司支持，否則保險公司冧埋，這些無保險的債券實行等掟出街大賤賣。

政府救債券保險公司的消息一出街，華爾街金融股也勁彈，特別兩隻最受惠的債券保險股更升得誇張，已被降評級的Ambac 狂升 72％， MBIA 也有升 33％。

第二，減息有下文。聯儲局臨時減息０．７５厘，你都咪話無壓力，消息出街之後雖然好多人叫好，也有人彈。有學者風格的摩根士丹利亞太區主席羅奇話美國聯儲局而家咁減息法，係營運這個世界最大經濟體的「危險、魯莽和不負責任的做法」，在泡沫爆破時用減息去支持，會鼓勵投資者將來冒更大風險。而歐洲的央行亦媽媽聲，英倫銀行更出口批評，照示歐洲央行和英倫銀行仍怕通脹，無意跟美國減息，美國減息歐洲唔減，美元弱化，令美國出口到歐洲更有優勢，歐洲股市又無息減又怕衰退，自然大跌，德國股市跌４．８％，法國跌４．３％，英國跌２．３％。

可見若無早前亞洲股市急跌的壓力，聯儲局唔易大幅減息。由於聯儲局已擺明重視增長多於通脹，係一個明顯策略改變，而家好多人估聯儲局在１月３０日議息時會再減息，期貨交易顯示有８０％機會聯儲局到時會再減息０．５厘，令利率跌到３厘（若如此加埋臨時減息共減１．２５厘），在一星期前，係無人估聯儲局會減息減到低於３．５厘（即係唔會減多過０．７５厘）。在減息預期下，自然支持股市反彈。

   　第三，民主黨態度軟化。布殊一直希望在野民主黨支持他的救市大計，到亞洲股市急跌後，佢就約國會兩黨領袖見面，話「我們可以找到共同立場，採取足夠大規模而有效的措施，提振一個規模龐大的經濟。」民主黨國會領袖的態度亦好軟，參議院民主黨領袖哈雷內德話美國經濟正滑向衰退，他希望國會能到2月中旬時已通過一份財政刺激組合方案，「我會希望很快拿出點東西來」，佢講到急過布殊。而民主黨衆議院領袖佩洛西亦話，刺激經濟的法案，「是亟待處理的緊急事務。」看來布殊應可以取得民主黨支持救市方案。

　　香港股市做咗美國政治的配角，幫美國政府和聯儲局掃除救市的障礙。有人話，美國大行炒燶了輸了大錢，就搵政府出手，聯儲局狂印錢救市。政治就係咁，講實力，唔係講口水。

　　昨日經紀張話擔心美股會再跌，我就話炒炒反彈先啦，唔使驚噃，美股同港股，係同一個老細o架！

陸羽仁

[ 本帖最后由 Mr.Business 于 24-1-2008 02:46 PM 编辑 ]