【专题讨论】转载香港頭條網陸羽仁, 王雅媛的文章

Mr.Business

注：此篇文章版权归香港頭條網所有。

麗展折讓大 隨時爆上
2008年4月22日

當大市氣氛差了那麼久，突然一點好消息已經可以給市場一個藉口大升。似乎近日的美國市便是如此。而香港市場投資大股可以賺大錢的機會已經過去，要跑贏大市便要開始懂得選擇冷門。一般來說，股仔市值少，很小的資金已經可以給股價帶來強勁的升幅。為了爭取較好的回報，所以Victoria最近覑力選擇一些有價值的股仔，近日留意到麗新發展（488）[股價及相關新聞] 。

市盈率低意義不大

麗新發展一年前的股價約三角，今年一月約二角，今年三月更加急跌到最低一角，足足跌了七成。集團又不是要倒閉，再加上這一年來香港地產項目都升值了不少，麗展實在跌得過份了。麗展市值十七億，現市盈率為一倍左右，衡量地產股時，市盈率本身意義不大。故低市盈率並不是投機這隻股票的原因，資產折讓極大才是。

每股NAV有0.6元

麗展最值錢的非麗嘉酒店莫屬，麗嘉酒店重建後的市值為35億元，麗展佔一半，達十七億五千萬元，單是麗嘉酒店已超越麗展本身現總市值。除麗嘉酒店外，麗展還控有其他物業，如銅鑼灣廣場二期，長沙灣廣場等等。另發展中物業包括大埔道、旺角及灣仔活道等商、住項目。粗略計算每股NAV約六角。

麗新系列一向不討好投資者，因為此系列關係糾纏不清。豐德麗（571）[股價及相關新聞] 是麗新系列其中一家上市公司，它跟麗新發展是互控的。早前前者宣佈供股集資，作為股東之一的麗展當然無可幸免。自豐德麗公佈供股集資後，麗展股價便開始大跌，原因除了是當時市場氣氛不好之外，Victoria認為市場擔心集團沒有足夠資金供股是另一個更大的原因。但去年麗展成功拉攏建行合作，向建行出售麗嘉酒店部份權益。出售事項完成後，此刻麗展手上現金充裕，集團負債比率可以說是近年來最低，故早前導致大跌的原因已不存在。

現金充裕負債低

一般優質地產股股價跟其NAV有大概三成折讓，麗展並不算優質地產股，Victoria並不期望它股價可以有這樣的升幅。但畢竟早前導致大跌的原因已經消除，而其資產總有一定價值。麗展現股價跟其NAV折讓達八成，香港地產市道又不是世界末日，試想想如果整個銅鑼灣廣場二期以市價兩折出售，於外面那會找不到買家呢？故折讓八成的股價是極不合理的，所以Victoria決定買入一些麗展。

王雅媛（Victoria）

http://www.hkheadline.com/news/h ... mp;section_name=wnb

Mr.Business

注：此篇文章版权归香港頭條網所有。

金融High Tea——A股騰雞 高追中伏
2008年4月22日

美股上周高收，港股的ADR已經造好，加上前晚內地證監會又出招，限制內地賣股，兩個利好消息帶動恒指大幅高開623點，升上24,887點後，之後指數高位徘徊，收市升幅略為收窄，報24,722點，升524點；國企指數升340點，報13,015點，大市成交814億元。期指收報24,618，升 386點，低水104點。

中證監發佈《上市公司解除限售存量股份轉讓指導意見》，紓緩大小非減持對二級市場的衝擊，但內地股市先升後回順，滬綜指報僅漲0.7%，深成指報收 11,094點，跌幅為1.8%，兩市成交額共計1,207.32億元人民幣，受到內地股市反彈窒步影響，港股變成一開市即見高位，相比之下，國企H股走勢較強，三保六行全線向上，國壽（2628）[股價及相關新聞] 升3.6%，平保（2318）[股價及相關新聞] 更升5%。

香港太少台資股

其他股份方面，台資概念的富邦香港（636）[股價及相關新聞] 發力大升15%，反映市場看好台灣大選後的前景，可惜係台資概念股在香港掛牌的選擇太少，港交所應該盡快做№，避免台股大升之後，香港變成蘇州過後無艇搭。

一如預期，內地「管理層」在股市連番下跌後，終於出手作出回應，針對「大小非」沽股的陰影做№，呢招可以話係對症下藥，但股市反應只屬一般，中環茶友話，呢個係典型市底弱的表現，投資者輸到驚，就算有好消息，都止唔到咳，升兩升又跌番落去，港股散戶高追，立即變成中伏摸頂。

中環茶友話，今個月大市主調都係游自由式，大戶跟住個市去炒，並無主動去炒，所以外圍好鱓時，個市自由式變蝶式撲上去，但往往撲完就唔係幾夠力，以昨日為例，就算大戶想夾高指數收市，但如果月尾係睇25,000點，個市已經彈到好近目標，但距離結算仲有成個星期，你係大戶又會唔會力托呢？所以就算睇好後市，都係等個市低撈覑數鱓。

最近美股表現硬淨，內地股市又見管理層出手做№，有人問個市是否已經見底，中環茶友話，個市係咪見底無人講到終極答案，因為連聯儲局主席伯南克呢類話事人，都唔敢講美國經濟是否已度過危險期，更何況係其他人，所以股民問個市見底未，不如問點樣可以減低入市的風險。正常的情況，係個市就算真係見鰦底，都要經歷一段上上落落的渾沌期，即係話個市仲係欠缺明顯方向同訊號，投資者置身其中，會見到利好同利淡的不同跡象。

利好利淡跡象同現

最近見到渾沌期的一個跡象，就係大戶分別做出賣股同買股兩個相反方向的動作，好似過去一個星期，不少有份量的本地華資，都開始入市吸納自己公司的股票，他們包括李嘉誠、李兆基等。華資買番自己股票，梗係覺得抵買先出手，所以可以視為利好跡象之一。

華資入貨捧自己場，但同一時間，亦有好多公司係市場抽水，昨日IBM就批售手頭的聯想股票，在此之前，百麗等公司都有主要股東趁反彈套現的消息，有人會認為這些主要股東都對後市有保留，於是趁市況稍穩立即急急腳抽水。

對於大戶有買有賣，茶友認為，除了涉及後市點睇外，亦都要睇個人財政狀況，好似李超人等大戶買股，可能係見到息口低，自己又唔等錢使，與其放錢係銀行收低息，不如買番自己公司股票好過，至於套現者，好多都係覺得擰番鱓錢有更好用途，所以就算平少少賣股都制，如果根據大戶買股的心態，老散策略亦都一樣，應該抱住股可以買、但唔一定買的心態，即係話如果市跌就可以撈纒，升就無謂高追，皆因投資市場仲未形成個市會升定會跌的共識，大市上纒落纒，大家無謂太過搏命。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

止蝕（３）  
       
2008/4/22 上午 09:45:06
網誌分類: 經濟

美股偏軟，主要係美銀公布業績唔靚仔，因為要撥備６０．１億美元，首季業績跌７７％，差過預期。不過其他公司業績理想，花旗調高蘋果電腦估計盈利，對科技股有支持，道指微跌２４點，跌幅０．２％，收１２８２５點，美股在金融股差勁時展現少少抗跌力。港股ADR價有調整，日股早段又跌百幾點，港股又進入調整格局。

昨日講緊止蝕，網友平凡人提到中化化肥（００２９７）事件，也是一個好例子，中化化肥上周四開始急跌，由當時７．０５元，累積跌到昨日收５．２９元，三個交易日夾埋跌了２５％，在中化化肥急跌之時，市場唔知乜事，平凡人睇到上周四晚中央電視台二台經濟半小時節目，講到今年以來化肥價格大漲，過去一年漲了１００％，化肥是種地的主要成本，農民很苦，因爲他們所種的糧食成本主要是化肥。國家為控制化肥價格，準備徵收化肥出口特別關稅100%，節目又點名批評中化化肥。

據平凡人引述，中央台二台訪問了化肥專家、全國政協常委武四海，他說中國只有10家公司擁有進口化肥的權利，但今年的進口化肥只有中化和中農兩個公司得到進口的合約，其他8個公司談判失敗。中化化肥與外方簽約2008年的買價是人民幣（下同）1900元一噸，而在國内賣給農民是4000元一噸。中央台二台指稱中化化肥囤積進口鉀肥500萬噸，說的是100億元的利潤。

中化化肥昨天發了一個通告，表示不明股價跌因，公司亦沒有回應中央台二台的批評，所以我哋唔知有關批評是否準確，但中央媒體咁樣批判一家企業囤積居奇，亦足夠令投資者走避了。

即使中化下跌後，市價仍達３６９億元，今年３月底公布業績，去年盈利６．６億（現價市盈率４７倍），但公司公布業績時指業績倒退主要是衍生金融工具價值的變化所致，剔除這個因素，純利有１２．９億，同比增長４３％。中化是中國化肥業內大戶，盈利增長又快，所以能支持高市盈率。今年年初，大行對中化未來前景都比較看好，例如花旗集團曾經預期鉀肥價格上調１７％，將中化化肥０８及０９年度盈利預測，分別調升１０％及１２％，估計兩年度之純利料達２０﹒３８億元及２５﹒９３億元，花旗當時將中化化肥目標價，由６﹒７元調高至７﹒６元，並給予其「持有」投資評級。所以中化在３月底公布業績後，核心業務增長符合預期，股價又上番７元樓上的高位。

阿爺要嚴控通脹，糧食價格是主要控制的對象，農民投訴化肥價太貴，找化肥專家問一問，專家話中化囤積進口化肥謀巨利，結果可想而知。投資者一聞到味，自然走避。

今日的題材仍是講止蝕，上星期四中化跌６％，當晚中央台節目出街，星期五中化再跌１０％，假設不少中化的股東不知道中央台的節目批評中化，財經評論員還說中化急跌是中國徵１００％化肥出口稅所致，若你是中化股東，應否止蝕？

如果我係中化股東，如果買中化主要為炒業績的投機心態，遇上這些無名腫毒，唔知點解無情情急跌，一定會止蝕，因為呢個世界咁多知情人士，佢地大手沽得，一定有理由，隻股短期都無運行，急跌完或會反彈，不過亦好難大升，亦有大戶出唔齊貨會等反彈再沽，所以小心反彈完再牛皮向下。

如果我係抱投資心態買中化的股東，見佢去年純利６．６億，剔除金融投資純利１２．９億，增長４３％，大行原來估佢０８年純利２０．３８億元，但在中央可能會出手嚴控化肥價格的前題下，仲有無可能有咁大純利增長呢？唔確定。中央唔干預，４０億純利都唔奇，中央干預，２０億未必做得到。中化當然可以靠母公司注入資產來增加純利，但股價下跌集資力弱，母公司是否願意調低價格注資也成疑問。中化純利增長有很大不確定性，長線投資者唔沽哂都應該沽一半，換番第二隻前景較穩定的股票可能好啲。若早前低位買入，另可以從一個角度考慮，若跌到成本價全數止蝕，不到成本價守吓。

我用這個例子想去說明，在股價不明原因急跌下，股東大多數要嚴厲執行止蝕，止蝕完隻股升番唔奇，因為跌得過份隨時有反彈，揸重貨者亦可能會出來頂吓，你要預咗有這件事發生，但止蝕係防止坐艇坐到大西洋的最好方法，留得資金在，那怕無股炒。

陸羽仁

http://www.hkheadline.com/blog/r ... rd=&searchtype=

Mr.Business

2008/4/23 上午 11:01:57

陸羽仁覆網友

S2000:若想長揸１０年，想中信銀行不如買招商銀行，招行雖貴，但在外資眼中是一流銀行，長揸有利，即使股市大跌，１０年都可以上番有突。若短炒信行追落後，升幅較大唔奇，但長揸講實力，信行不如招行。

Yy太：你換馬信行唔係問題，問題係換咗去新地，新地等地產股早前升得過份，信行當時已跌夠，你在新地回吐未夠深時換過去，就要捱佢再大跌。如想換馬，當時換紅色大股好啲，換工行、建行、國壽、中移動，就無咁o既問題，跌市換馬要換入強股，因為反彈時強股先升。

Airwall:你問炒阿爺托A股，可否炒中石油，理論上係得，但咁樣不如直接炒A50。馬鋼和洛鉬唔同類，雖比高下，但宏調對馬鋼影響大啲，跌得幾深，要保留可能保留馬綱好少少。

Tom大少：今年底前見２７８００點的機會有七、八成。再見２１０００點的機會都有四、五成。今年年底前股災的機會只有一兩成。我而家和三月的看法無大變，都係覺得跌到咁上下要反彈，仲係在一個大型上落市走動，要變番升市，要看大陸宏調會否緩和，以及美國是否已見底。

Muse:大陸汽車業前景有陰影，油價咁升法，阿爺隨時要減少新車量增長，以免消耗太多能源。汽車業要汱弱留強，華晨就俾人降評級，長城生意不錯，入貨價貴，可以等大市反彈上高位時，為佢定一個止蝕位，回吐時沽出，候低再買過，或換馬到其他類別股份。

中海油或可定１３元為止賺位，若一直升，就將止賺位慢慢上移。

白穗禮：你問A股一跌就彈，會否係對散戶的陷阱，暫時看不太似，似係好淡角力多啲。

中港老鼠倉都一樣，大陸會嚴重好多。

JL:A５０歷史較久，外資愛炒此股，招商中國基金有折讓，若你是長揸者，可能買招商中國基金好啲，博佢長線在旺市時折讓收窄，但若短炒，都係A５０會貼價啲。

Indy:通常大戶都係用反彈止蝕，唔係在壞消息出第一鐘人頭湧湧時止蝕，但等反彈唔可以等太耐，因為好多人都等反彈出貨，最好在大跌當日的反彈先沽一半，在大跌兩三日內要沽就要沽清，否則等得太耐，又見佢跌得多，好多人等等吓變咗唔沽，結果可能渣到無。

Bdroom:有些股份配股時專門炒一炒，做好氣氛去配股，但未必維持得耐，一般而言，在淡市配股，都係壞消息，大股東借機減持一部份貨，更難看成好消息。但在旺市時，配股又可以成為炒作借口。

Flyinthesky:你話長供大陸地產股，我話供中國海外穩陣點，因為佢地執笠風險無咁大，但佢地經營手法比私人公司保守一點，反之，私人公司如世茂一定進取一點，但有風險，自己衡量。內銀股亦一樣，四大銀行之首的工行，當然不如商業銀行招商銀行進取（但招行亦是國企）。

小潘：希慎主要揸商場，好過太古揸重寫字樓，但香港通脹厲害，生產成本急升，商戶承受租金上升的能力減弱中，商場都唔係咁易再大加租了，但此影響會較慢反映出來。

Mr.Business

注：此篇文章版权归香港頭條網所有。

金融High Tea——逼上梁山焗住炒
2008年4月23日

港股市底幾強，恒指昨日低開261點後，主要受內地股市拖住落，上證綜指穿3,000點大關時，港股最低跌至24,413點，下午內地股市來一個小V反彈，恒指亦反覆上升至24,966點，衝向25,000點關口，收報24,939點，升217點。期指收報24,962點，升349點，比現貨高水37 點，成交65,638張。國企指數倒升405點，收報13,420點，大市成交877億元。

內地股市3,000點有支持，滬綜指一度跌穿3,000點，但股市無乜特別消息都觸底反彈，收市升番上3147點，升幅1%。

美股、港股市底都唔弱，早一晚美銀公佈業績唔靚仔，首季業績跌77%差過預期，但杜指微跌24點，顯示一點預到壞消息的抗跌力，美股和港股的反彈之勢未完，可能反覆仲有得上。

中金、社保買A股

幾個中環茶友打牙骹，茶友甲講起，散戶睇淡多，估大市過唔到25,000點，好多仲睇淡死去沽期指過夜，小心大戶先開夠下月期指好倉，儲夠下月轉倉貨，然後近月尾推高本月期指結算。雖然港股在低位上升不少，但係不要做淡，好易被人夾死，而25,000點也是高處未算高，即使回一回，到月尾又似會上，這是焗住炒格局。

茶友乙話自己縮骨一點，見港股升鰦一段，未敢追太多，反而覺得A股雖然未跌完，但可以逢低就吸，短炒一轉。港股從20,500點反彈了20%，但內地A股還在創新低，雖然論基本因素還是H股較平，但外資仍然走去買A股，因為相信A股係西部市場，一係唔彈，一彈又可以彈到好顛，所以這是一個高風險高回報的遊戲，鬼佬正在玩緊，散戶量力而為。

內地資金在A股市場的走向也值得關注，茶友乙話，剛公佈的第一季數字，顯示內地開放式基金大幅減持A股，激起散戶跟風，這是跌市的元兇，但社保基金、中金和QFII資金（合資格境外投資者機制，即外資）卻大舉建倉買A股。唔講鬼佬，社保基金和中金為何建倉？他們用的都是阿公錢，第一個可能是它們奉阿爺之命入市吸貨頂住大市，第二個可能是他們知道阿爺最終都會救市，所以先撈貨，我估是兩個可能性的混合體，所以中金和社保基金還是不斷入市。你夠唔夠膽買A股，就要睇你信唔信阿爺救得起個市啦。

政府公佈3月通脹數市，本港上月通脹率為4.2%，升幅雖較2月份的6.3%回落，但核心通脹仍達5.3％，特別是食品價格升幅顯著，上月按年急升 17%。其中豬肉價格按年升59%，牛肉升50%，罐裝肉類分別升44%，而海鮮、凍肉及雞蛋就升19%至20%，外出用膳價格則升5.9%。

茶友話，樣樣都升，好難叫人腳踏實地，打工老闆加4、5%人工已經牙痛咁聲，話樣樣成本加，隨時要蝕本；但柴又加，鹽又加，打工仔幾個巴仙人工，真係好過無而已，加鰦人工剛好夠買Å，咁鮋環境真係焗人鋌而走險，?錢去炒。

租金回吐收租股受壓

樣樣加，不過有樣№可能開始回落，就係寫字樓租金，高盛發表研究報告，預計租金和航空業務會回落，建議減持太古A（019）[股價及相關新聞] ，維持目標價86元。高盛估本港寫字樓租金將於下半年回落，影響太古租金收益，而太古持有40%國泰（293）[股價及相關新聞] 股份，預計乘客收益率會下跌，亦令太古的收入減少。太古A收市報87.85元，跌0.73%，成交金額4.3億元。

其實中環已有一股寒風吹到，因為大投資銀行間間業績都唔掂，人人都話全球裁員幾千人，少少地都要裁一成幾員工，香港分公司亦難倖免，對中環甲級寫字樓的需求相應減少，恐怕甲級商廈租金黃金期已過。所以大家如果獱住隻股有好多中環寫字樓，都要小心為尚。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

抗跌力         

2008/4/23 上午 09:50:07
網誌分類: 經濟

美股顯著回吐，因為油價創新高和科技、醫療及消費類股份業績未如理想，令人憂慮次按危機的影響會由金融類股份擴散到各行各業，道指跌１０４點，跌０．８％，跌到１２７２０點，是最近一週以來最大跌幅。要睇吓港股在美股回吐時，有多大抗跌力。

呢一轉美國公司公布的業績未如理想，晶片製造商德州儀器因為電話公司訂單減少，股價大跌。醫療保險公司UnitedHealth Group 因為僱主購醫保減少，股價跌近１０％。Coach Inc.因為銷售手袋要增加折扣，影響盈利。總之間間公司都有點負面東西，美股難免受壓。

美元還在反覆偏軟中，油價升到近１２０美元一桶，早前有證券行預計會升到１５０美元，雖然人人都話升到這個水平無一個國家頂得順，但從炒作角度，都唔係無可能挾到這個水平。

美元兌歐元又創新低，曾經跌穿１．６美元，在亞洲市早段造１．５９７３美元，主要係歐洲央行維持利率不變，而美國在月底又好可能再減息，支持歐元匯價。按美國利率期貨的交易價顯示，８２％交易員估計美國聯儲局月底會減息０．２５厘，其餘估計會維持利率不變。

歐元在４月已升了１．２％，而今年至今更升了９．５％。歐洲央行正在進退維谷，本想降低４％的主要借貨利率，但３月歐洲通脹升至１６年高位３．６％，減息又怕刺激通脹，唔減息造成高匯價，又怕會步美國後塵陷入衰退，歐洲挾在兩難之中，歐元係咁升，而家匯商沽美國減息後，歐元短線會炒上１．６５美元的高位。

美元兌日圓匯價暫時還企到吓，在亞洲市早段兌１０３．０９日圓。高盛本來估日本央行今季會減息，但最近已放棄此看法；市場開始估計日本央行下週發表經濟展望報告時，甚至會暗示中長線日圓會加息。現時的情況和六個月前的估計比較，日本的經濟增長低過預期，通脹增長快過預期，但日本央行多數會採取一種觀望態度，利率暫時不升不降，而非調頭減息，而日圓利息長期過低導致的不正常現象，長線還需糾正。

另外，加拿大央行宣布減息半厘，受美國次按危機影響，加拿大經濟有放緩跡象，加拿大央行減息回應。

美元大跌，油價大升的循環還在繼續，搞到全世界匯市、商品市場立立亂，網友阿Ray問我，美國經濟的危機是否還在深化中？他亦問到我早前話識一個金融猛人睇美國樓市可能衰到０９年，但金融市場今年４、５月等埋銀行第一季業績，就會可能會見底，唔知佢而家點睇？

美國次按危機對金融市場的影響，短線有少少舒緩跡象，至少不是在擴大中。對美國後市有兩種看法，睇經濟的人傾向睇得淡啲，認為美國仲有一排衰，但睇金融的人傾向睇好少少，頗有偷步入市的味道，例如我所講的金融猛人，還是維持當時的看法，美國銀行業績未有太大驚嚇，而家等埋第一季經濟數據出籠，若數據一如所料地壞，不是出人意表地壞，他預計金融市場會延展一段較長的反彈浪，之後再牛皮觀望信貸市場的走向。我就加一句，香港要睇埋大陸，如果大陸市不斷大跌，會拖住港股，反而若大陸市觸底反彈，港股就有第二個引擎，未來有機反覆向上。

陸羽仁

Mr.Business

2008/4/24 上午 11:39:50

陸羽仁覆網友

Elsa, Leo，Philip等買咗熊仔的朋友:大市走勢轉強，雖然可能升完又回吓，但走勢向上，有熊仔夠狠者一刀止蝕，唔夠狠者都走一半先，穩陣啲。

Ray:冠君持有的是甲級商廈，會受影響，以Reits計佢最受影響。本地Reits計，領匯的低檔商場及車位受影響較少。專租俾鬼佬豪宅盤已有壓力，租金有少少回。

美股本質不弱，港股背馳有大陸股的因素，但也有期指結算因素。

YY太：本地樓市受股市影響，要見股市得唔死得，樓市靜半年又會好番，但股市一直沉就另作別論了。

三心兩意：你問高手做乜，佢咪係華能出盈警後去買貨嗰班人囉，亦都係佢話個市要大升要「等二十之後啦」，因為到下旬美國業績出到咁上下，港股回吐唔深，就係反彈向上時，二十後佢見到港股穿２４０００點跌唔後太多，已慢慢加貨，主要買吓紅色股，到昨日見到港股美股背馳，再加注建倉。佢估大市唔會一條直線咁上，去到咁上下會回，但可能出現反覆向上格局。

Root:華能首季盈利跌８０％，股價反升，因為早前出了盈警，壞消息已反映，也有一班大戶睇住大陸市，覺得華能這類股，本質不俗，受宏調壓價影響，中央幫得石油石化股，遲早要幫電股。

平保坐吓先，可以用購入價６８元為止蝕，若不跌穿坐一會。

買入後跌三分之二，大市又唔係股災，即使有息派，都係雞啦，至少係狂炒股啦。

小旗手：外資入股內銀股，無法阻止，人民幣不自由流通，已是對外資最重要防線。

S2000:津發和中國中鐵都OK，但不是一線股，要等吓。

阿肥：煤炭股已受壓，不能大加特加價。

Bdroom:航運股的週期是經濟好，出入口多，船公司生意好，運費上，賺大錢，人人見好做，博命起新船，過兩三年新船供過於求，運費開始跌，再遇上經濟升得耐會放緩，航運入低潮。

Ton ton:你怕高追大風險係啱，但好難話什麼水平安全，只能說想買等回吐時吸納，若怕輸定好止蝕位。

Siu siu:你的建行可能快啲見家鄉，洛鉬差啲啦（下次記住止蝕），你問可否加注建行，或趁反彈沽一半，我建議又唔好加注，要買買其他股。可以定止蝕位，例如大市跌番穿２４０００點就止蝕之類，若上升反而可以睇耐啲。

Fish:媽媽年已７０，若要月入３萬，以５００萬本金計，要年息７厘，房託基金風險較低，本地領匯基金OK，唔好望佢升，但風險較少，但只得３厘息，要合要求可能要買越秀房地產基金。

Mr.Business

注：此篇文章版权归香港頭條網所有。

金融High Tea——趁住反彈就落藥
2008年4月24日

美股前晚低收，恒指昨高開61點後持續造好，最高見25,361點，為近三個月高位，全日收報25,289點，升350點。內地股市升近4%，國企指數更升了418點，報13,838點，大市成交增至1,053億元。期指收報25,279，升281點，比現貨低水10點。到晚上內地宣佈調低印花稅，說明市場永遠有春江鴨，亦解釋鰦點解中港兩地股市點解會升。

美股對上一晚跌104點，但昨日亞洲股市早段都無跟美股跌，開盤不知點解都微升。經紀張一開市打電話來，媽媽聲咁話，早一晚買鰦隻熊仔，見美股跌成百點，鬼咁開心等食胡，心諗唔跌400點、500點，至少都跌200、300點交纒功課，點知9點9期指一開市就微升，唔知玩邊科。

陸羽仁當時已叫他好走鬼啦，每逢港股和美股背馳，都有跟尾，上個月尾近結算又係咁，美股跌港股唔跌，而家又來玩呢招，咪制啦，等個市回一回就最好將隻熊仔打靶啦，結果真係放鰦錢入佢個袋。後來內地股市愈升愈有，港股跟住上，特別係紅色股炒得幾勁，指數升唔多，但紅色股升得多。

中環茶友話，港股市底好強，跟紅頂白，美股跌佢唔跟跌，內地股市升4%佢就跟升。散戶唔信期指可以升穿25,000點，個市就升穿俾你睇，恐怕殺淡倉行動未完，又係鰟句，見到大市回吐，唔好追沽，好快到下星期二期指結算，小心被人夾淡倉也。

今個星期港股造好，但市場焦點開始轉向國企H股，上海A股周初跌穿3,000點，但香港的國企股表現硬淨，沒有跟隨下跌，中環茶友話，最近掃入香港國企股的，多數係外資，呢班大戶同內地股市逆勢而行，本身應該係好友底，兼且有少少看好內地股市，他們的買盤走在政策之先，證明又有料到。

茶友話，內地出招救市早有風聲，當上海股市回落到4,000點時，市場已經有減印花稅的揣測，但當時「管理層」無出招，估計係因為當時市場信心太虛怯、跌勢來得太猛，以當時四千點跌到去周初的3,000點，大市再跌了四分之一，挫幅不可謂不厲害，現在管理層先出招限制「大小非」要有秩序貨，跟住順勢乘住升市減印花稅，好明顯係睇準個勢鈬做№，如無意外，內地股市在3,000點水平已經初步搵到個底。

A股仍有值博空間

聽完分析，陸羽仁問茶友，唔好講咁多腬，今日個市好大機會高開，咁追唔追得過先？茶友答話，今日個市追唔追得過，要睇個市高開幾多，指數由低位到現在，反彈幅度超過四千點，累積升幅已經不少，再追風險不宜低估，所以昨日指數雖然升，但藍籌表現唔係咁突出，不過，國企升幅相對落後，至於代表內地A股的幾隻基金，都係跌完之後開始回升，值博率會比其他股價高，要追貨可以先考慮A50或翔龍呢類基金。

業績好股價升好正常，業績唔好照樣大升，就有少少不尋常，昨日內房股和電力股都大升，只能說是跌過籠的反彈作用。好似華能（902）[股價及相關新聞] ，公佈按中國會計準則，截至2008年三月底第一季業績，純利2.4億元人民幣，較07年同期跌80%，每股盈利2分；期內營業收入增長20.2%，華能的業績充份顯示內地電力公司成本加電費無得加的困局。再加上國家電力監管委員會開腔，指調升電價要視乎用戶承受能力，電力公司短期內加價無望。不過一眾電力股表現仍勇，其中大唐發電升13.9%，華能升10.5%，大有業績愈衰愈升得勁的味道，或者投資者開始追落後，相信國家既然都幫石油、石化股，遲早都要幫一幫電力股。

中環茶友話，電力股炒上有少少追落後味道，另一方面，成本上漲但電價無得加，令到成個行業進入汰弱留強，對大型電力股長遠未必無利，畢竟經過雪災後，中央知道基建投資係不可少，若然限制電廠加價，電廠長期做蝕本生意，必然導致投資萎縮，所以當電力股跌到殘，就有相反理論派的擁躉入市掃貨。

追濠賭股要定止賺

澳門行政長官何厚鏵表示，在可預見將來都不會增發新賭牌，一眾濠賭股所擁有的賭權賭䒷成為有限資源。受消息刺激，昨日一眾濠賭股急升，不過澳門賭業正面對空前競爭，即使不批新賭場新賭䒷，現在賭場全部落成，數量亦都十分驚人，論生意長铫唔係咁好景也，所以炒賭業股記住定止賺位，否則音樂一停小心走唔切。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

轉勢訊號  
       
2008/4/24 上午 09:41:53
網誌分類: 經濟

美股道指昨日升４２點，升番上１２７６３點，但今天的焦點恐怕不是美股，而是大陸股市，阿爺昨日黃昏宣布減股票交易印花稅，由０．３％減到０．１％，即係打回去年５月３０日加印花稅前的原型，從新玩過。

消息出來之後，有評論員話政策無用，因為股民買股票主要睇升唔升，唔介意俾幾多印花稅。陸羽仁竊以為評論者未了解中國國情，亦未明中國股市的運作邏輯，雖然中央出減印花的重招，不是寫包單一定救得起股市，但話佢無用就有少少輕視阿爺的有形之手在大陸股市的作用。

大陸股市在去年旺市時成交大量增加，政府又加印花稅，搞到過去一年國家印花稅收入超過２０００億人民幣（下同），而股市的派息總額亦不及此數，股民整體俾稅多過收息，形成所謂「負收益」，本身已經唔係好健康。

更重要的是大陸是一個發展中的股市，股民炒心理多過炒基本因素，股市氣氛好的時候極好，７０、８０倍市盈率的股票搶住買，壞的時候特壞，２０、３０倍市盈率的股票無人吼，所以股市升跌的關鍵是股民對股市前景睇好或睇淡的心理。

而股民的好、淡心理，很多時是源於他們理解政府的政策，而非基於經濟或上市公司盈利前景的估計，近二十年大陸的主要跌市，都和政策有關，９３年是宏觀調控，９７年是股改將令大量法人股投入市場（就是現在實現了的非流通股分階段自由買賣，即所謂「大小非」減持），股民觀察政府的政策不利股市，特別是股市已炒高時，認為政府要砌低個市，就一窩蜂沽貨，造成跌市。到２０００年之後中國經濟漸入好景，企業盈利不斷上升，但內地股市有好長一段時間還是一潭死水，上證綜指在１０００點上下浮沉，證明在中國股市，即使經濟好，公司盈利好，也和股市上升無必然關係，股民等待一些政府的刺激股市的舉措，或許０５年１月２４日政府把印花稅由０．２％下調到０．１％，已是政府明示希望股市向好的舉措，但大陸股市亦要等到０５年年底才起步急升。

大陸股市今浪下跌，亦是源於政府的宏調政策，本來預計無咁大力，但見到通脹愈升愈高，政府愈出愈大力，已令股民心驚；本來預計雪災政府會鬆一鬆手，怎知政府無鬆手，更令股民膽震。從政府政策上來說，去年阿爺回應通脹初升時反應太慢，放虎出山，所以今年要加力補救，但股民見到政府宏調愈來愈大力，開始掟貨，跌穿４０００點後愈跌愈多，股民就不問價沽，慢慢形成惡性循環，打破了股民向好的心態，最後變得只有外資、社保基金和中金公司在接貨，若非這些大戶接貨，大陸股市肯定跌得更勁。

阿爺不想股市升得太顛，但也不想股市暴跌，因為大跌市既是社會不穩定的因素，亦會進一步拖到整個內需和經濟慢下來，阿爺雖然不想經濟過熱，但也不想打過籠搞到經濟太冷，所以股市跌穿４０００點時，已跌到阿爺的心防，密謀做嘢救市。

知情高人透露，在大陸股市４０００點時，減印花稅的方案已準備就緒，但當時怕太早推出，股市未跌夠，推完無用，股市再瀉，就無重招救市，所以一直隱而不發，觀察大市的底部在何方，外資在３５００點樓下大量湧入建倉，阿爺自然看在眼裏，在周日先推出限制「大小非」減持的救市方案，但大市未止跌，到本周二跌穿３０００點時，大市單日ｖ型反彈，中央見到時機已至，就一舉推出減印花稅方案。

阿爺連番出手，要救市的姿態極度明顯，主要是讓股民重拾信心，中央雖要宏調，但唔想打死股市，期望可以挽回股民的信心，相信股市先可在３４００點至３８００點穩定下來。如今還要看的是下月中公布的４月中國CPI數字，如果顯著回落，證明通脹受控，中央的宏調措施可以稍稍放輕，相信大陸股市有機重上升軌。

港股方面，昨天又出現和美股下跌背馳的情況，加上升穿２５０００點這個長期反彈的重大阻力位，這些可視為轉勢的訊號，只要美國不爆大鑊，港股有機會回到一個反覆向好的格局，當然要觀察回吐的幅度，每次回吐以不穿大位為宜。未來的走勢雖然不是一帆風順，但有機反覆向上，可趁升到咁上下回吐時，追一點紅色股也。

陸羽仁

http://www.hkheadline.com/blog/r ... rd=&searchtype=

Mr.Business

2008/4/25 上午 10:29:35

陸羽仁覆網友

Ray:是否減持看今天網誌，若好怕風險，可以在期指結算日前先減一部份貨吧。

Apple:請參考今天網誌，但咁多股蝕３５％至４０％，若想減持都唔好減哂，減一部份博回落１０％揸番，降低成本吧。

Christine:油價未改向上的大勢，但紅色股走勢轉強，若持貨本來想投資，７５３，３８６和９３９都可以揸吓o既。

Yuki:大市走勢有轉強跡象，想買貨未必可以等到大跌，若回吐不穿大位（例如２５０００點），可酌情吸部份紅色股。

今轉美國若減息０．２５厘，大銀行肯定唔郁，但對地產股只是中性，它們不是焦點，焦點是紅色股，食粥食飯睇佢地。

S2000:你講那隻推介股炒味好濃，老細莫財，不排除會炒吓，買入要嚴守止蝕，一唔炒就會插。

大陸即使股市好番，地產都仲係調整，內房股超跌反彈，但追入的風險不低。中石化你有１０．３８元一注，都係等吓油價再升佢再插時，才買第二注好啲。

白穗禮：我本想寫第三本書，但有一部份要新寫，暫時未有時間寫。在Jet雜誌寫專欄都俾你發現到，你都好嘢。因為Jet老總係老友，佢叫到無辦法唔幫手，主要寫睇投資書的某些心得。

Bdroom:G7開完會，會後聲明話「關注美元下跌的影響」，但匯市無乜反應，後來加拿大財長向傳媒爆料，G７開會無討論過各國聯手干預匯市問題，所以會議結果對美元匯價中性。

Philip:沽熊仔買入１３３和３８００，沽熊仔無錯，止蝕永遠唔會錯，就算個市調頭回吐都唔係錯，但你買入的股份有無錯就唔知啦，１３３大路少少，睇唔啱都有得守吓啩。

木子：炒輪等如賭博，至理名言。

Mr.Business

注：此篇文章版权归香港頭條網所有。  

金融High Tea——短炒老散要執生
2008年4月25日

港股受到內地出招刺激，出現裂口性高開，內地調低股票印花稅後股市飆升，恒指高開487點後一度升上25,862點，下午徘徊收報25,681點，升 392點；國企指數升578點，報14,416點，大市成交增加至1,303億元。期指收報25,618點，升339點，比現貨低水63點，成交 94,231張。

港股升幅同內地比，已經算係小兒科，「管理層」將印花稅由0.3%降低0.1%，市場估計功效等如注入了一千億資金，刺激內地股市大幅飆升，兩市最終收盤漲幅均超過9%，創下自2001年10月以來的單日最大漲幅，滬綜指報收3,583點，漲9.3%，深成指報收12,914點，漲9.6%，兩市成交額大增，共計2,729億元人民幣。內地股民在久沉打擊下，見到中央連續出手，表現興奮莫名，大嗌共產黨領導無得頂，又話中央領導層辦事要「王岐山化」，反映可以用莫名亢奮來形容，若果不是因為好多股票升停板，相信指數升幅可能仲大。

睇實25,000點支持位

在大市全面攀升下，幾乎所有重型股都向好，連日拖累大市的中石油A股漲9.87%，報收18.15元人民幣，金融類亦全線飆升，平保，國壽A股漲停，報收32.87元；工行漲8%，中行漲9.00%，招行漲9.9%。由於A股勁升，內地證券商申銀萬國（218）[股價及相關新聞] 急升18%，第一上海（227）[股價及相關新聞] 升14%；擁證券業務的光大控股（165）[股價及相關新聞] 及浙江滬杭甬（576）[股價及相關新聞] 升12%及4%。

在內地股市勁升下，香港掛牌的國企H股亦表現強勁，紅籌中石油更連續兩日累積反彈差不多兩成，不過，香港個市升得鈬，個別發展色彩比較濃，重磅藍籌礇控（005）[股價及相關新聞] 不升反跌，中移動（941）[股價及相關新聞] 相對升幅亦不算大，中環茶友估計，大戶在低位掃入礇控頂實指數，現在市場氣氛轉好，無必要再坐住一向跑得慢的重磅大笨象，所以正好趁指數上升沽番鱓貨出街，呢類重磅股可能出現國企愈威，佢懐就愈滯的現象亦不奇。

如果茶友無錯，外資大戶應該係好友底，他們在跌市時穩住隻大笨象，發揮定海神針的作用，到形勢有利，就將個市推上去高位，昨日指數升幅雖然略為收窄，但四百點升幅，點講都唔算少，現時指數已經距離25,000點的反彈阻力位比較遠，由於下個星期期指就結算，個市由低位反彈了差不多五千點，加上美股亦去到阻力位，大戶有機會在高位先食一食胡都唔定，如果大市回吐，就要睇25,000點的支持位會否跌破，如果這些支持位守得住，反彈形態仲未破壞，如果跌破這個位，反彈形勢就受到破壞，短炒的老散就要執生。

反覆市要識揀股

正路鈬講，大市反彈到呢個水平，就算要再上，都好可能會反覆，散戶要搵食，有兩招自保，第一係盡量避免高追，畢竟個市升得多，就算反覆都可以回調幾百點，震一震老散，高追係心理質素上會蝕底，但如果手頭有平貨，就可以定下止賺位繼續坐；第二招就係買股要揀當炒類別，因為個市反彈得急，若然你話係投資的我獱長線，當然無理由現在去追貨，既然係咁，入市當然係要揀資金追捧的股隻啦。

茶友話，大市呢類升勢動力來自內地，中資類當然係值博率較高，A股概念的A50（2823）[股價及相關新聞] 、滬深指數基金外，國企股普遍都會受惠，其中水坭、建材類股份接力炒上，中材（1893）[股價及相關新聞] 升4%，中國建材（3323）[股價及相關新聞] 升8%，安徽海螺（914）[股價及相關新聞] 則升7%。炒友現時一個目標，係部份潛鰦水的半新股，呢類股價好處有兩個，首先係上市時間短，盈利仍然處於保證期大家有數得計；其次係累積的獲利貨有限，要撩上難度不高，只以浮上水面作為目標，都有若干短炒水位，但要留意者，是炒潛水半新股，對象只限國企，其他非國企公司，就不在呢個類別。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

轉勢訊號（２）         

2008/4/25 上午 09:19:21
網誌分類: 經濟

美國公布的數據參差，新屋銷售以年度計５２萬間，是９１年以來最差，按年計樓價跌１３．３％，是４０年以來最差。但耐用品訂單升１．５％，相信是受惠於美元貶值。最好的數據是上週新申領失業救濟金人數意外地跌到２個月來的低位，好過市場預期，顯示勞工市場沒有大幅放緩。

而美林表示有足夠資金維持派息，更令人憧憬最壞的情況已經過去，美股道指升８５點，升幅０．７％，升番上１２８４８點，美元亦大幅反彈。

港股大升後，不少網友問起乜位可以沽番早前的坐艇貨出街。我建議大家用兩個角度去分析，首先睇大市，其次睇自己的組合情況。

大市由上月期指結算時的２３２８５點，升到昨天的２５６８０點，升幅２３９５點，以單月來說升幅甚鉅，外資大戶炒期指，除了炒一個趨勢之外，還炒波浪上落，升得太急回吐吓唔奇，所以我在頭條專欄叫大家唔好追貨追得太急，否則一個正常調整落番１０００點，你都會好傷。至於何時調整，通常是過完下週二期指結算之後機會大一點，不過若之前再急抽而上，小心提早回吐。

不過正如我昨天所說，大市露出一點轉勢的訊號，主要是大市升番上２５０００點樓上，從走勢上，若大市能企穩於２５０００點以上，就改變了去年１１月開始調整市的下行走勢，當時是一浪比一浪低，每一個反彈浪頂，都低過上次的浪頂，形成一級級向下的完美走勢。在調整的市道，買跌容易買升難，做熊仔好過做牛仔。

今次穿２５０００點，有三個可能，一個是假穿，穿完再大跌，見番２００００點，若是如此，今次升市就是一個局，引傻仔落叠。第二是穿完再橫行，第三是開始形成反覆向上走勢，我有少少傾向相信第三種走勢，記住「反覆」兩個字，而且走勢尚需確認。

若真是反覆向上的走勢，就開始和前幾個月相反，雖然反覆，但做牛仔易過做熊仔，因為在這個市況中，向下調整不會太深，你做咗熊仔，經常不到你的理想價，你唔想食糊，但一唔食糊，過一陣又向上番，慢慢又陷入一個坐熊仔艇的局面中。我昨日叫做咗熊仔的老散把握回吐的機會打靶，就係咁o既道理，萬一俾我把衰口講中，個市開始反覆向上，假設有６０％機會如此，你揸住熊證，升得慢跌得快，回落你又唔想斬，想睇吓，但睇得一兩個星期個市又彈，跌跌吓熊證得番個零頭，你開始無眼睇，熊證好易變廢紙。我知道還有大量散戶心態好淡，或許這就是大市可能反覆向好的基礎。

最後唔好單睇大市分析，因為分析好可能會錯，要睇自己組合情況，以及買入股票的價位，高位買了貨，輸咗錢，想趁反彈沽出，係人之常情，但個個人情況不同，不能一概而論。一種極端是你其實好少貨，假設你有九成現金，其餘一成是在３５元買咗國壽（０２６２８），現價３３．８元，你想沽貨，我就話你不一定要沽，因為大市跌落低位你無買貨，貨太少，可能要趁回調吸多少少貨，起碼揸到三成貨，萬一大市唔係你你睇得咁淡，都有少少貨在手。若再大插，你的貨唔多，可以長期守吓。

另一種極端是成手貨，隻隻巨蟹，咁又唔同，若你十成資金入足貨，大部份輸錢，等大市彈高啲先減持一部份，希望再等低位入番，絕對無壞，你早前入貨價唔靚，要出入一吓來降低成本，假設你沽一半貨，可以在低一成左右買番，都可以減低持貨成本，早前買咗貴貨，自由度會降低，比較難長守。

記住無人可以準確估計大市，但你可以準確分析自己的處境，唔好期望在反彈的最高位沽清所有貨，然後等佢跌到２００００點買番所有貨，世界邊有咁理想，還要記住大戶專同散戶作對，大戶要引到大部份人好心雄咁買貨，才是今年大市見頂的時候。

陸羽仁

http://www.hkheadline.com/blog/r ... rd=&searchtype=

Mr.Business

2008/4/28 上午 11:16:54

陸羽仁覆網友

Ray:你問恒指今年內重上２７０００點至２８０００點水平的機會是否多過５０％，我估機會高好多，有８０％。我有一個觀察，去年恒指合理的高位原本只是２６０００點至２８０００點，但港股直通車消息一出，就把恒指拉到近３２０００點，這一拉不正常，所以回吐力度亦巨。但合理估計，今年恒指去番２７０００點以上的機會頗高，或許中間再有反覆，但以今年計不難到這些水平。所以若你揸股票可以睇長少少，也不一定一彈就沽，當然也要看你承受回吐的能力，關鍵是蟹貨多不多，若蟹貨太多不妨減少少，若不多又無須咁急沽。

Gigi:先多謝支持。批評容易建設難，在現實世界裏，建設的工作卻難得多。我還在學習中。

Piker、Yuki:美元在世界的霸主地位，主要因為它是最主要的儲備貨幣，以及石油以美元結算，當這兩大因素未改變前，不能過度看淡美元的位置。英國一直想保持自己在歐洲自主性，特別近年英國經濟甚佳，其他歐洲大國經濟不振，更令英國不想加入歐幣機制。歐洲經濟基調不太強，美國次按危機亦會拖低歐洲經濟，看不到歐元有條件全面取代美元的位置。美國國勢下滑，美元的影響下降，會是一個以十年計的長週期，但投資卻是一個短週期，不要過份以長週期去估短週期，美元近年急跌和雙赤及樓市、次按爆煲有關，美元要不絕大減息，唔跌至奇。但減埋月尾呢次息，美國再減息空間極有限，利息隨時已見底，美元有較大反彈唔奇。唯一是油價異常大升，似在反映以色列向敍利亞或伊朗動武的風險，這是匯市的新不確定因素。　　

所以Yuki問好唔好買金、澳元及鈕元，我覺得走短線好難講，但要小心美國減定息，美元有較大的反彈浪，要見到市場消化這消息後，才消除美元反彈的風險。

Flyinthesky:你話快速止賺止蝕和讓利潤奔跑有矛盾，我話不一定，以炒作計，止蝕要快，止賺未必要咁快，止賺位要定得深，才可以避過震倉。另外，假設你買十隻股，輸的打掉，贏錢的盡量坐，若大市勢或個股比較快向上（即回調的幅度不深），不難坐到一個幾成的升幅。

Christine:中石化首季業績差是意料中事，這種原油價向成品油倒掛的狀況不能長期維持，阿爺若不想成品油價升，對鍊油業務的補貼要增加，或是讓油價改革，讓油價升，再津貼農村用油或商業用油。

Bdroom:沽咗太古賺咗錢，想買番，恐怕大勢暫時對寫字樓收租股不利，升唔升，跌會跌，建議短線換馬其他股份好啲，等寫字樓租金穩定了再算。

小南：月供股票可以現在開始，最好搵穩陣的大股，例如指數股，　恒生Ｈ股ETF基金２８２８係可以考慮的選擇。

Lavendar:紫金一話上A時，H股已大幅炒起，跟住急回，而家A股都上埋，見唔到有炒H股的理由，除非金價大升，短線走勢不會強，要守止蝕止賺位。

Muse:廣深鐵路業績唔係咁差，但有大行不甚看好，你入貨價６．５元都幾高，無乜好建議，只能守吓。

Mr.Business

注：此篇文章版权归香港頭條網所有。

金融High Tea——大戶獱望遠鏡睇市
2008年4月28日

港股上周五收25,516點，回吐164點，不過現貨收市後期指彈番上25643點，反升25點，高水126點，有點好友托市的味道。後來美股亦升，杜指升42點，升幅0.3%，升到12,891點，逐步接近13,000點的水平，要看今次美股是蓄勢破頂，還是見頂而回了。

近期影響港股的兩大因素：美股和內地股市，都有回穩跡象。美股杜指自從1月跌穿13000點之後，一直插水，在3月中見過11,508點的低位。以美國次按風波爆咁大鑊來計，爆到貝爾斯登咁大家投資銀行差唔多要執笠，杜指呢個低位一鱓都唔算低，而且仲算有鱓太高，早前美股跌穿12,000點時，好多人話杜指應該跌到8,000、9,000點，結果無插落去，如今升番上近13,000點，美股都算表現得好啦，都拜聯儲局主席伯南克狂減息、狂印銀紙托住個市。從外國投資者的角度，若美元兌該國貨幣貶值15%，美股就好似11,000點，若累積貶值30%，美股真係好似9000點一樣（其實睇港股都有類似效果），若從貨幣大貶值的角度看，都幾吸引。

大貶值後股市吸引

而內地股市上周還在表演大插水，上周二上證綜指更曾一度插穿3,000點，最後在阿爺大減印花稅政策出台後，A股大力反彈，上證綜指上周五收3,557點，都叫做企番穩少少。

今年頭一季的跌市，基本因素是全球性的，主要是美國次按危機變成全球信貸緊縮，多家金融機構都唔掂，佢懐係全球股市的最主要炒作者，自己知自己事，自己都爆緊大鑊，知道自己今年第一季要輸數以10億、甚至過100億美元，佢地的環球炒作策略自然唔會向上炒，當然係順勢向下炒。

所以去年底有個說法話內地股市會同美股脫鹇，我話信佢都傻，若果美國股災，你估A股會唔會一枝獨秀？結果呢一浪內地跌市證明，A股不但不會和全球股市脫鹇，仲會跌得多過人，更證明了內地股市跌市第一因是全球次按危機，第二因才是內地高通脹和宏觀調控引致的企業盈利減少。

最近阿爺出招減印花稅，好多人話無用，話A股好快彈完又散。我就話A股彈完散唔散，當然要看內地的經濟基本因素，就係我早前講在5月中看4月CPI有無回落，有顯著回落就顯示宏調政策可以略為收一收，對股市有利；但正如上面所講，這只是第二因，第一因還是要看次按危機和環球股市的發展，所以講來講去，還是要講番美股及外資大戶的炒作方向。

破大位有轉勢苖頭

這一段港股和美股的走勢，睇到少少大市轉勢的訊號，雖然尚待確認，仍值得一談。港股自從1月中跌穿25,000點後，反彈受制於此位，不能升穿，其後更不斷向下，在3月18日試20,572點的低位，有向下破位的味道。不過踏入4月，港股接連反彈，近日升番上25,000點樓上，這是一個重大位置，若有支持，港股便重拾一個反覆向上的走勢。

其實美股都有少少類似走勢，1月初下破13,000點後一直未能重上這個水平，若能升穿亦呈現突破，升穿後若回落，只要不跌穿12,500點，亦出現一個回穩向上的走勢。

這裏要講一個基本問題，美國樓市咁差、信貸緊縮、首季經濟衰退，美股憑甚麼能重上番13,000點樓上呢？

陸羽仁早前講過，金融界猛人話要睇4、5月美國首季經濟和公司業績，若壞消息盡出，市場沒有太壞的反應，大市就有機會見底，現時預言似乎逐漸實現。你可能會問，美國樓市未跌完，信貸緊縮又未解決，金融危機的壞影響正向實體經濟轉移，點解話股市短期可能已見底呢？香港樓市97年都衰鰦6年才真正見底，點解話美國股市會咁快見底？

金融猛人話，美國起樓速度和香港唔同，香港起樓有幾十層，整個起樓周期3、4年，但美國樓大部份係屋仔，起1年就起好，樓市一轉差，新屋動工馬上減少，存貨的周轉期也快，所以佢地樓市的周期會比香港短，估計美國樓市到09年會見底。

CEO撇到突好交數

猛人又話，買股票的大戶，係獱住望遠鏡睇№，如果相信美國樓市明年到底，美國經濟在今年第4季、甚至第3季可以回復增長，佢懐不會等到呢件事發生才去買，佢地會超前半年、甚至一年買股票，所以近排成日有人話市場估金融股見底，就係呢個原因，銀行的生意可能要到今年底明年初才會明顯改善，但市場搶先在半年前入市。

仲有一個因素，就係捉美國各大銀行、各大投資銀行CEO的心理，他們有些是新人，有新是舊人，若果捱得過這個浪，又可以搵大水，既然市場已預計了第一季美國經濟會滑落，預鰦第一季金融機構的業績唔會好，一眾CEO們就會在會計準則容許的範內盡情撇帳，甚至撇到突，只要事先向分析員吹好風，讓他們有充足的預備知道自己公司會輸大錢，結果業績公佈出來，仍然會「符合預期」，這也是市場見到銀行第一季蝕大錢而唔沽貨的原因，CEO們做好「期望管理」，就可減少震盪。若公布蝕大錢業績的同時，同時宣佈成功集資充實資本，更可以把震盪減到最低。

在這一個提前輸錢的機制下，美國金融機構第二、三季的生意雖然未必能全面恢復元氣，但由於很可能不再用大幅撇帳，所以業績很有機會快速改善。

結果在本月美國公司第一季業績公布時，已有不少人偷步入市，特別係自導自演這一幕的投資銀行，就更加會計好數撲去買同類金融股博炒番上了。

雖然美國的金融大戶計好數要玩見底，但情況未必完全由他們控制，亦無人能排除大市還有再探底的風險，但炒股就如賽跑，8個人在起跑線上，司令員準備鳴槍，有冒險家性格的跑手計好司令員差不多要鳴槍就衝出去，最後能否成功，這除了考反應之外，還要靠一點運氣，不成功就要出局。穩陣跑手真正聽到槍聲才起跑，安全十足，不過又會蝕底半拍。如今睇大市要等安全十足才入市，要睇埋7月美國公司出的第二季業績，不過若到時公司業績OK，股價又唔係現在的價位了。

摩通睇AH股見底

美股湧現博見底的資金，同一樣的外資大戶，也在博H股和A股見底，摩根大通就係好友，他們上周在內地搞了中國投資論壇，睇法樂觀，摩根大通中國研究部主管兼首席經濟學家龔方雄話，全球流動性風險正在降低：「在我們看來，最壞的時候已經過去，全球資本市場的尋底已經成功，我們不排除二次探底的風險，但是全球的資本市場是非常有效的，美聯儲為美國金融風險的消除起到了一個有效的作用。」他認為現在正處在一個次債危機、金融危機向實體轉變的過程，這往往是市場見底的過程，資本市場永遠是向前看的，所以金融危機的影響若從金融層面向實體市場發展，全球流動性危機就基本去除了。很多要在香港洗倉的行動就不會太多了，下跌的風險就很小了。

龔方雄認為中國自身的經濟風險也正在逐漸降低中，他估計通貨膨脹在2月份應該已經見頂，中國第二季度的CPI資料應該在7%左右，第三季度、第四季度則會回落到5%左右，總的來說，通脹壓力會逐步減弱。他更預測中國當局還會採用新的組合拳來提高A股市場的信心，中央還將嘗試向市場注入更多資金，例如向 QFII（合資格境外投資者機制）配發新配額，股指期貨交易也有望今年實行。

雖然不少人怕紅色股盈利增長放緩，市盈率高，但龔方雄認為，「現在的中國公司H股、紅籌股從來沒有這麼便宜過……目前H股、紅籌股的動態市盈率今年已經是 21倍，明年是17倍，盈利增長是多少？今年30%多，明年也是20%多，所以從盈利增長來看市盈率已經是相當合理了。」

陸羽仁相信，高盛和摩通等大行先後睇好H股，外資大戶獱住望遠鏡向前看，當散戶覺得風險仍未消除時，他們已經搶先入市買貨，當然搶先就會冒少少風險。不過現時紅色股仍比藍色股便宜，特別是H股指數在急抽之後應有回吐，以投資角度看，等回吐時買少少行業龍頭股責纒倉無壞，若怕風險，買貨唔好買咁盡，保留部份現金，應該可以忍受萬一再探底的風險。換一個炒作角度，若大市轉勢，由反覆向下，變成反覆向上，你去造淡風險就很高，大市唔係唔會調整，而係調整時又唔會跌得太深，未跌到淡友食胡位，但轉眼又炒番上去，這就是我在4月開始經常叫人唔好造淡的原因，炒股要順勢也。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

沽樓等跌市？         

2008/4/28 上午 09:49:40
網誌分類: 經濟

股市回復少少生氣，令人對樓市前景都睇番好啲啲，週末聽銀行界老友講，呢幾個月豪宅無運行，但中小型單位市道唔太差，都維持到一定的二手成交，唔係一個跌市，你計埋去年第４季本地樓市急升的因素，呢一兩個月樓市微微落，只能算是急升之後的整固而矣。

網友elainejeffy問我好唔好賣樓等跌市，佢話：「陸sir，有一個問題我諗咗好耐都唔知點好，希望你可以俾d意見。我而家有一層樓放緊，帳面大概有60-70萬利潤，不過放左之後要租返一層。由於低利息期既關係，租屋會貴過現時供樓，如果每月供款還本金既錢當作儲存既話，租樓一個月就要俾多5千蚊出黎，即係一年會俾多6萬蚊。問題就係...

1)      如果股市現在係熊二期既話，熊三出現既時候我怕會拖低樓市，浪費咗今次高沽遲吓低買既機會。

2)      但係如今上証綜指3千點大陸政府高調救市，如果上証守得住3千點，那恆指破2萬既機率會唔會好細呢?

3)      如今樓市中線前景好似幾樂觀，人工加，租金加，通脹升，低息，負利率，地產商惜貨而賣，建築緊既樓宇又下降緊，即係供應少咗，需求多咗。就咁睇樓市又好似仲有得升吓啵，就算唔升都唔洗咁快賣住啵。期望你既回覆，各位師兄都可以俾d意見，謝謝。」

elainejeffy這種賣樓等跌市的心態，在股民、以至業主心中非常普遍，或者我可以分幾個層次答。

第一，散戶買樓長線賺錢容易過買股。Peter Lynch都講過呢個道理，話佢見過好多美國人買樓賺錢，較少人買股賺錢，買樓者多數隨著收入增加，細樓換大樓，最後到退休時有一間價值極高的大屋，累積大筆財富。我話呢個道理在香港一樣好啱，好多人打一世工，最後剩下來唯一的財產就係一間樓，或者做一種小生意，幾十年後生意好似無乜錢賺，但賺咗間舖，咁都已經好叻，因為出租舖都足夠養老有餘。樓是不動產，較難沽出，逼人做較長線的投資，無咁易在跌市或「疑似跌市」中沽出，揸住間樓守得過低潮，最後大市反覆向上，就有數以倍計的利潤。但若你買了股票，想沽出十分容易，一個電話就搞掂，你好易受貪婪和恐懼所左右，見到少少利潤想走，或者一有跌市即閃，但跌到底時你又未必敢去買番。散戶投資出出入入，住往掌握唔到好時機，不如唔出入好過。另外，普通人比較大駛，賺幾多駛幾多，買樓之後要供，逼你儲錢，逼你死坐，逼你長線投資，對散戶較有利。

第二，買樓有槓桿。你買一間２００萬元的樓，放低三成６０萬首期，借１４０萬，即係用６０萬去做２００萬的投資，有非常大的槓桿，你買股票除非借孖展或炒衍生工具（如窩輪），否則沒有這麼大的槓桿；但你買股票用槓桿去炒風險很大，股票一跌，證券行會要求你補倉，你補唔到就斬倉，好易把本金輸清。你買樓遇上跌市，即使變成負資產，只要你定期供樓，銀行不會咁身痕走去斬你倉，所以買樓有一個較「安全」的槓桿。反觀賺錢時，若買股不用槓桿，買樓買股相比，你攞６０萬去買樓，樓價升三成你賺６０萬，但攞６０萬去買股，股票升三成你賺１８萬，條數差好遠。

第三，要捕捉最高點出貨、最低點入市好難。你想高價沽樓，低位買番，唔係咁易，歷史上香港樓市最易捉的高位係９７年，我識部份人在那時都沽了樓，但好多係「符碌」所致，係政治上唔睇好香港，想移民調走資產之類，才去沽樓。而有些沽了樓者見９８年跌到咁上下，又去追番，最後都係輸。在一般情況下，樓市的頂部唔係咁易睇到，elainejeffy現在以為是「熊三」要到走去沽樓，衰起上來只是在中間位沽咗，樓市不跌再升，間樓兩三年再升多６０、７０萬，你仲要每月俾多５０００元租樓，一出一入，條數好惡計。買咗樓揸長線唔係唔可以沽，如果你嗰間係自住樓，最好去到你認為好離譜的高價才去沽，「離譜」兩個字，同「升咗」、「賺咗」唔同，而家中小型住宅，好多和９７年高峰價仲低三成以上，未到離譜、升到顛的地步。

第四，若非出現elainejeffy講的大熊市，我又未睇到樓價會大跌。利息又低，市民供樓承受力充足，香港政府唔肯定期賣地，地產發展商又怕蝕底唔願放低大筆按金去鈎地，土地供應不足，發展商十分惜貨，咁環境樓市不易大跌，你睇elainejeffy的例子就知，供完每月要貼５０００元去租樓，咁倒掛係吸引人買樓唔係沽樓，雖然低息唔會永遠持續，說不定明年就開始加息，但到美國加息時，經濟環境又改善，人們也未必怕加息了。

所以簡單去講，elainejeffy想而家高沽等樓市跌吓去低買，係一種出入的心態，並不是對待長線投資的應有態度，散戶睇市不如大戶，自己以為睇到市場的高低點去出入，好易就放咗好的投資。到發覺睇錯時，更可能用套現的錢去追樓追股，在高位追入風險更大，所以我建議elainejeffy都係坐吓貨啦，「坐看雲起時」吧。

陸羽仁

http://www.hkheadline.com/blog/r ... rd=&searchtype=

Mr.Business

2008/4/29 上午 10:46:48

陸羽仁覆網友

我怕大家睇唔到牆頭草貼的文，再貼如下：

「綜緩 要 終(止)緩.

新界北區某酒樓真人對話-

茶客 - 經理你間酒樓生意幾好喎

經理 - 係幾好, 不過好難做.

茶客 - 租貴 ?

經理 - 其次, 主要搵唔到人開工.

茶客 - 乜呢度唔係好多新移民失業咩 ?

經理 - 失業先唔駛做, 政府派錢有綜緩

茶客 - 哦, E, 你口音都似來了無耐喎.

經理 - 係呀, 我到港五年, 勤力D現在己是經理, 政府唔幫好過幫。」

陸羽仁話香港人自食其力博命捱，肯定有出頭天，唔使吓吓叫政府幫，政府愈幫，人的意志會愈消沉，幫佢變成害佢。

Ray:若上高位，可能到７月較啱時候。若我係國際大鱷，想推上，都可以慢慢手咁推，上三步跌番一步半，造番少少「正常」波幅，等股市打好個底，造就今年的高潮。大戶睇埋政治，８月有奧運，９月香港有選舉，７月開始出大啲力，連阿爺都會幫埋你。

Diskie:不能排除Sell in May因素美市會回，美息快見底，美元強番啲，今年５月亦不宜看得太淡。

Ming:你想買美孚樓，要三思，都成４０、５０年樓，住宅會折舊，除咗向海那一批因為政府豪起大過維園的公園，托高了樓價之外，其餘地段太舊，仲有好多市區十多年樓齡的屋村樓，貴美孚１０００元一呎，狀態好好多。

在網上搜尋美孚９７呎樓等關鍵字，應可找到當年價錢。

Kowloon TV:你買賣９００呎九龍樓換大樓，問好唔好先沽後買，在低價時最好即買即賣，在高價是可以先賣等跌後買，而家樓價中中地，可能都係同時換安全啲。或都唔買賣，真係等幾年等到有跌市時，才即賣即買，在淡市你換大樓，其實都係買平咗。

WA:富邦概念十足，但近排炒得太喪，唔知乜位，變成一隻大炒股，總之若買入要嚴守止蝕。

Fish:你問匯豐和華能出完業績都升，兩隻股都唔係衰股，但匯豐出業績優於預期，華能先發盈警已消化壞消息，所以唔係話業績差出完業績一定升，大市要配合才成。

S2000:正如我今日篇文講，靠做小炒家搵食，唔係咁易。

Alice:以後不要同老公鬥氣,也不要話任何股票要坐一世。想減持一部份,可如金曹兄意見,改持國壽或2828,但也要保留一部份,不要全部走哂。

Mr.Business

注：此篇文章版权归香港頭條網所有。

政策市有好必有壞
2008年4月29日

在剛過去的一周，有幸回到內地參加了一個討論中央救市政策的研討會，反方及正方表現十分精采。從去年十月開始，內地股市由高位調整，上證指數跌幅逾四成，內地股民紛紛要求政府救市。

那時便開始出現了兩種不同的聲音，一些人支持，一些人反對。最後中央還是敵不過股民的要求，連環出招，先限制「大小非」減持股份，再將印花稅由千分之三調低至千分之一。導致A股出現了六年半以來最大單日升幅，噴井式狂飆逾百分之九。

政府應為監管者

在研討會上，反對一派認為股市自有浮沉，政府不應救，不能救，亦不必救。他們認為政府是監管者角色，只需監管股市的違法違規行為。但是對股市指數的高低，政府不應該管，市場自有運行規律，無必要過多干預。他們相信長遠來說，股價都是建立於集團盈利上，故過於低迷的股價始終會吸引追求回報的資金的注意。

另一派則是支持中央救市的，他們認為內地股票市場建立時間不長，仍不完善，在發展過程中存在覑許多問題，因此股票市場發展的每一步，可能都需要政策引導。例如，這一次大市跌超過一半是不合理的，所以中央有必要及責任出來告訴股民們股市已經跌夠了，不反彈的原因純粹是因為大家沒有信心而已。

Victoria相信基本分析，比較偏向反對一派的想法，但為甚麼中央最後還是決定救市？我想問題是出在內地A股仍是一個封閉的市場，玩家主要由內地股民主導，他們大部份仍沒有股價跟盈利掛鹇這個想法。主導他們買賣情緒的是股價的上落，見升便追，見跌便沽是一種習性，這一窩蜂的想法使到大市大升大跌，容易脫離基本因素。

其實，政策市有好的一面，也有差的一面，完全視乎當時的情況。救市的政策當然是皆大歡喜，但上周五紫金（2899）[股價及相關新聞] A股的處理卻是另一個極端例子，當紫金被炒到二十二元的時候，上海證券交易所引用條例「叫停」半小時，在收市前約五分鐘復牌，股價卻隨即狂插約四成。

憂股民輸打贏要

其實內地炒買氣氛已大不如前，即使不停牌，相信紫金股價一樣極大機會回落。如今多此一舉，令輸錢的股民更有藉口對監管者發泄。輸錢不是大問題，最擔心的反而是令人養成了一種輸打贏要的想法。

王雅媛（Victoria）

http://www.hkheadline.com/news/h ... mp;section_name=wnb

Mr.Business

注：此篇文章版权归香港頭條網所有。

金融High Tea——月尾又玩唧牙膏
2008年4月29日

美股上周高收，恒指高開後，全日在反覆上落，收報25,666點，升150點，雖然內地股市下跌，拖累國企指數回吐25點，大市成交縮減至737億元。不過指數在高位頂住，頗有臨近月尾大戶開始操作，為期指埋單的跡象，結果期指收報25,660點，升17點，比現貨低水6點，成交80,586張。

陰陰懐炒先襟玩

內地股市上周大反彈，短線暴漲使市場積累了獲利盤，滬綜指昨報收3,474點，跌2.3%，深成指報收1,2782點，跌2.5%，兩市成交額跌回1,618億人民幣。

昨日藍籌股表現較佳，升市時乏力的礇控（005）[股價及相關新聞] 又發作用，升了1%，恒生（011）[股價及相關新聞] 、東亞（023）[股價及相關新聞] 漲0.8%、中銀香港（2388）[股價及相關新聞] 升1%，另外地產股普遍向好，長實（001）[股價及相關新聞] 、恒地（012）[股價及相關新聞] 、新地（016）[股價及相關新聞] 反有進帳。到了月尾，大戶做鰦好倉獱鯩向上的走勢開始覑跡，昨日個市只係牛牛懐咁升，好似唧牙膏咁陰陰用力，咁樣反而好過，若然大家一湧入市，老外一個唔該，就會沽貨食胡，大家玩得保守，老外甩唔到貨，個市咁樣仲會襟玩鱓。

雖然國企指數跌，但走勢不是一面倒，最明顯係金融股的六行三保分開走，國壽（2628）[股價及相關新聞] 等幾隻保險股跌，但銀行股普遍向好，陸羽仁早兩日同大銀行老總食飯，他對內地銀行睇法比較樂觀，話內地雖然加大宏調力度，但今年首季內地銀行業績仍然靚爆表，睇落第二、三季業都應該得。

內銀股生意好做

大銀行老總話，內地銀行今年貸款嚴控，每季定出額度，通常第一日已經全部批出，因為收緊銀根，但經濟熱度保持，形成貸款需求強勁，中央又不限制銀行調高利率，所以雖然限制貸款總額，生意仍然好好做。現在第一季純利增長強勁，第二季都應該一樣保持到良好勢頭。反而香港今年拆息係咁跌，對於存款多要係同業拆借的銀行，變成要面對息差收窄，加上頭一季股市回落，財富管理業務難做鰦，生意仲難保持增長過內地同業，現在市場傳內銀斟購緊永隆銀行（096）[股價及相關新聞] ，假如真係成事，大家都驚又多了一個大隻佬加入市場爭食大餅。

銀行家話內銀生意好做，睇落似乎無錯，好似中國銀行（3988）[股價及相關新聞] 昨日公布首季業績，股東應佔溢利217億元人民幣，較07年度同期增長85%，雖然集團涉及美國投資，但基本業務較市場預期為佳，這不是個別現象，建行（939）[股價及相關新聞] 首季純利321億人民幣，幾乎等如去年上半年的純利的342億人民幣，刺激股價升2.21%不過中銀現價市盈率16倍，估值比同業算係略低，其他建行21倍、工行（1398）[股價及相關新聞] 23倍，雖然係貴一鱓，但同盈利增長率比，都仲算係合理。

「三通」概念股發力上升，台泥（1136）[股價及相關新聞] 、統一（220）[股價及相關新聞] 、旺旺（151）[股價及相關新聞] 升19%至36%，「三通」概念股閩港控股（181）[股價及相關新聞] 急升38%，閩信集團（222）[股價及相關新聞] 升16.67%、富邦銀行（636）[股價及相關新聞] 升15.63%、廈門港務（3378）[股價及相關新聞] 升9.66%，連帶其他港口股，天津港發展（03382）[股價及相關新聞] 升5.5%，三通或台資股好多都係細市值股份，所以對個市氣氛影響唔係咁大，呢類股份比較適合散戶玩，好似隻富邦連日上升後，若然單計盈利能力已經超晒值，資金追捧主要係博有注資活動，因為富邦是少數在港掛牌的台資金融股，而且早前打晒開口牌，話有機會進軍內地，之後就谷到隻股一浪高於一浪腬。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

沽樓等跌市？（２）
       
2008/4/29 上午 09:54:59
網誌分類: 經濟

期指結算前夕，美股道指略回，跌２０點，收報１２８７１點，睇嚟港股結算上落幅度未必太大。

昨日講起「沽樓等跌市」的風險，睇完網友的回應，我恐怕網友誤會我講今年樓市一定升，其實我在講持有樓宇是一個長線投資，要有較長線的看法，起碼也是兩三年的事，主要不是講短炒作的起伏，短線樓市上落的分析，只是作為一個次要的參考。

網友Sun的回應很有意思，值得大家細讀，佢話：「我想回應陸Sir"沽樓等跌市"之看法，我覺得如果自問自已炒股票是敵不過"貪婪和恐懼", 則陸Sir的觀點頗正確, 可是, 如果你能不犯陸Sir所講的兩大錯誤---1」 炒股時的"貪婪和恐懼", 及 2」沒有儲錢的自制力, 要靠供樓強迫---那麼, 我認為套樓等買股是好主意。舉一例子, 我友人最近以$530萬沽了2001年以$330萬買入的一手盤, 升值60%, 似乎比買股好, 但他持貨7年, 實際是每年回報率只有7%, 還是因為去年九月急升才有這每年7%的成績, 如果以07年九月價去計, 算他持貨6年, 根據當時同類盤的成交價, 只有$310萬, 每年回報率只有5%。可是, 假如你在2002年"不幸地"以一個不靚的價, $95元買了飽受次按困擾的匯豐, 現價我算它$130元, 每年回報率也有7%, 而且, 匯豐股息有4-5厘, 是完全入袋的, 而租金回報雖然也可說有4-5厘, 但郤未扣除放租的成本("全包"費用, 維修, 買樓及放租佣金, 稅項), 而風險(租不出, 租霸, 兇案)亦高於買大藍籌股票。我只是以買了表現欠佳的匯豐作例子, 如果你買的是巨型國企如中石油, 中移動, 至今回報數以倍計, 買樓又豈能及? 當然, 如果閣下敵不過陸Sir所說的"貪婪和恐懼", 那麼你持有匯豐, 很可能早已低位憤而沽貨, 而持有樓宇, 則縱使SAR時期都可能會"焗"你持貨。」

陸羽仁在某意義上同意阿Sun的意見，雖然表面看佢無計買樓的槓桿，若計埋槓桿，買３３０萬元的樓只需三成即９９萬元的首期，７年賺２００萬，以本金計回報率是２０２％。但阿Sun講得對，如果唔係計匯豐，係計中移動或中石油，買股票回報又會高好多。

我相信大家都記得，我話自己寫文係從眾，用八二分，社會上有兩成係叻仔，有八成係凡人，叻仔唔使教，只要教凡人，所以我寫文好多時係針對嗰八成凡人，唔係寫俾兩成叻仔睇。而現實上那兩成叻仔中，可能有１０％有超高的心理素質，可以完全戰勝貪婪和恐懼，成為大富大貴之人，這也是小量白手出身靠博起家的富豪發跡歷程。不過股市亦專收叻仔，也有大量叻仔埋骨於股海中，部份人曾一度風光，但結果衰收尾，或許這種大起大落，就係好賭者的人生樂趣。

但其餘八成凡人買股，絕大多數時候敵不過貪婪和恐懼，買股多數騰騰雞雞，貴時追，平時沽，長期埋單計數，買股賺賺蝕蝕得過桔，所以我就話不如買樓啦，主要都唔係睇樓市而家的大勢（以中小型樓計，現時樓價不高不低，以經濟發展和匯價計屬合理水平），而係睇大多數人投資的能力和習慣，持有樓宇係一個笨方法，讓大多數的凡人，可以較易達到彼岸。

若果你唔知自己係叻仔定係凡人，例如日前問問題的elainejeffy，可以睇吓自己過去買股的住績，計清楚條數，睇吓咁多年買股賺多定蝕多，累積回報有多少，咪知自己係邊類人。若無買股經驗，或者輸多贏少，或都贏埋平均一年都無１０％平均回報，咁樣就當自係凡人好啦。記住要計過去咁耐「累積」數字，唔好只計贏唔計輸，同埋要將本金鈎出來，你不斷把人工投入去炒股，累積的錢只係本金，唔係贏錢。若計完往績將自己分類成叻仔，就可以多炒作，若是凡人，就多投資，買樓係一個笨笨地的長線投資方法。

這裏想再講講yy太留言，佢話：「你今天之blog道出了好多小生意人(好彩的)的心聲 "經營幾十年,生意賺不了多少, 但買了一店舖出租可以養老."我會好好計劃看時機買入工商單位. 我都好想買地舖,但而家太貴了.因為可能十來年後, 我埋單計數, 可能都是供了物業養老!做生意是三更貧, 五更富的人生呀！而您對樓及股之取捨, 正正是yy生及我放棄了2005買大陸樓, 買了港股但投資方法不好, 而打回原形的景況. 如果早2-3年識您,我地的歷史,會改寫, 但現在都未為晚.。多謝陸sir花這麼多時間寫blog. 您真的幫了好多人. 感謝。」

放一個長線角度看１０年以上，一個地方的股市和樓市，會和當地的經濟發展同步，但短期１、２年看，股市和樓市、特別是股市，就如用狗帶拖著的頑皮小狗一樣，不是跑過籠向前，就是跑太慢落後。大陸經濟未來十年還會每年以７％以上增長，只要不是在太貴時買股買樓，死揸十年會有大收穫，未來的大陸，就如過去９７前２０年的香港那樣，仍處於高增長期。香港現在的經濟已比較成熟，未來增長較慢，每年有３％、４％已不錯了，所以買樓買股要睇啱時機（買紅色股的角度不一樣），但yy太若做生意能自己供得起舖，在香港買舖也不錯，自用無放租的煩惱，而且商舖少折舊，１０、２０年過後，供滿間舖，將來靠收租也可以達到財務自由了，但要靠炒股１０年、２０年達到財務自由，難度大好多。所以對凡人來說，炒股只是小注怡情吧！

陸羽仁

http://www.hkheadline.com/blog/r ... rd=&searchtype=

Mr.Business

2008/4/30 上午 10:23:06

陸羽仁覆網友

肥安：聽說你問了問題，我找不到，能否再貼出來？

金曹：長線投資，永遠比炒作容易，因為大鱷唔喜歡食長線投資，他們太頑固，太笨，叫唔到佢地買寶藥。

阿Ki:返工時都是努力工作，不要炒股為好，做好工作是年青人第一重要的投資項目，會計工作應該不難找到。阿Wa的講法不錯，只要肯博，定有出頭天。

S2000:有點擔心你話靠炒２６２８謀生，都係努力先找份工吧，有安定收入，炒股的本金才有著落。

小潘：大陸銀行的業績比想像中好，沒有受宏調影響，主要是中央控制貸款量，無控制加息，銀行加夠息賺到突，所以內銀股顯露投資價值，但信行收存款基礎不夠大，自身資金不足，較受增加存款準備金的影響。

Roots：「股東應佔淨利潤」就是我們平常指的「純利」或「盈利」，即是公司賺幾多錢。

有關中石油，大行看不清阿爺的補貼政府前景，開始建議沽中石油，例如建議等好消息（如落實阿爺增補貼）時沽出，估計中石油一段時間會受壓。

Muse:有中海油，想獲利。油價可能還會向上，沽出要接受油價可能再上的可能。

有大堆IPO，股份素質中等，內房股若有大幅反彈，不妨出貨，換成內銀行股好點，其餘股份也可以等大反彈沽出，伺機換回大股。例如恒鼎，現價太貴，不如換了國壽或建行好過。

長揸：你有供滿的樓，想換大樓，一般地講有兩個選擇，在沽現實全部投入新樓，或先買新樓，但現樓等一段時間，在更好價位得才沽出。若自問投資能力定力不足，可能選前者，這是較保守的方法。

Kfc:我高位時叫人沽中石油換中海油，你問而家點，若做了前述動作，可沽中海油，換入中石化，要預咗中石化仍可能再跌。

Bdroom:高手朋友未沽華能，佢話今次會「長線啲」，我估佢揸３個月至半年。所謂中央遲早要幫電廠，很難講會幾時發生，但你而家才去「炒一轉」，可能等佢回落一點才入市好些。

Lee ming:你問洛鉬為什麼大跌，我話因為佢升得太厲害囉，高高上過２１元，太顛，股市都有地心吸力，升完會跌。

Andy:間單點供２８２８算數，唔使揀股。