【专题讨论】转载香港曹仁超---投资者日记-熊二反彈進入浪B調整

bryon

原帖由 四伯爽 于 6-8-2008 12:35 发表
（此篇文章版权归作者曹仁超）

中國要有自己品牌

8月4日，周一。恒生指數跌347.68，收報22514.92，成交490.65億元；8月期指跌487點，收報22382點，低水。

滙控（005）公布業績，純利跌咗29%，唔太差；恒生（ ...

Invest because of China, but not in China

四伯爽

（此篇文章版权归作者曹仁超）

中國決心打擊通脹

8月5日，周二。恒生指數跌565.17，收21949.75；成交639.9億元；8月期指跌424點，收21968點，高水。唔排除周三港股止跌回升。

港燈（006）半年獲利31.71億元，升17.9％，每股獲利1.49元。上半年嘅售電量減少1.7％，但因固定資產投資增加而令純利繼續上升，成為抗跌股；東亞（023）半年獲利8.94億元，下跌52.3％，响金融工具上虧損10.43億元，另喺可供出售金融資產上損失1.98億元，反而淨利息收入 34.83億元，升26.1％，昨天股價回落8.3%；希慎（014）半年獲利34.37億元，升150.3％，嚟自物業重估產生嘅非現金收入利潤，唔計物業重估，獲利升18.2％，見6.05億元。昨天中海油（883）跌6.3％；神華（1088）跌8.9％；中煤能源（1898）跌6.9％，因煤價喺澳洲跌8.2％，見每噸160.4美元。內地房地產股重挫，中國海外（688）跌8％及華潤置地（1109）跌8.6％；因內地萬科7月份嘅銷售物業下跌咗15％，相信內地樓市進入回落期。

日本經濟又陷衰退

法國第二大銀行法興第二季純利跌63％，但股價反而上升咗4.5％，因相信最惡劣嘅日子已過去。

三菱UFJ第二季獲利少咗66％，至512億日圓，股價亦升1.6％，見915日圓。

日本經濟形勢迅速惡化中，過去二季出口及工業產出等關鍵資料，再次發出經濟大幅降溫嘅訊號，日本好可能宣布2003年開始嘅經濟復甦，依家又重新陷入衰退。6月日本嘅工業生產環比下降2%（整個第二季下降0.7%）。第一季都係負增長，係2001年以嚟首次連續兩季負增長，即係日本工業界已陷入衰退，主要受出口降溫嘅拖累。第二季企業嘅純利較去年同期下降15%，70.9%人話日本經濟進一步變壞，只得1.7%話會好轉（最差係1997年12月，當年有 72.1%人話會轉壞）。

北岩宣布，半年蝕咗5.92億英鎊，英國政府宣布將30億英鎊注資轉為股份，以及將4億英鎊優先股轉為股份去改善北岩嘅資本充足比率。

美國房利美及房貸美虧損估計一直維持到2009年第一季，今年房利美股價已回落70％，至11.83美元；房貸美跌78％，見7.52美元。更悲觀嘅睇法係兩房喺未來二到三年仲係蝕錢。

油價已跌穿120美元，上月睇油價200美元嘅大行分析報告唔知點自圓其說。美國股市喺2007年10月見頂回落；CRB指數喺今年7月相信已見頂（上半年仍升29％）。Oscar Gruss & Son Inc.分析員Michael Aronstein話商品七年牛市啱啱完成，有一至二年嘅熊市。2002年起嘅商品牛市到今年7月進入結局篇。

台灣7月嘅通脹率5.6％，係1994年6月以嚟最高。馬英九上台後逐步取消燃料及電力價格嘅管制，加上受颱風影響搞到農作物失收。UBS估計，9月份台灣加息1.25厘（6月26日已加息至3.625厘）。

菲律賓7月嘅CPI上升12.2％，估計8月28日加息半厘（上次加息係7月15日，加半厘至5.75厘）。

銅價已跌至六個月內嘅低位，9月嘅交貨價每磅3.44美元，好接近之前嘅低價（2月8日嘅3.426美元）。7月下跌8.7％，周一再跌3.9％。

金價亦跌至六星期嘅低位，見892.7美元，係6月26日以嚟最低。

大豆跌到停版（跌5.1％），每莆式耳12.95美元，亦係3月31日以嚟最大跌幅。由7月3日至依家回落咗21％。

玉米亦跌5％，見每莆式耳5.555美元，6月27日至依家已回落咗30％。

可可跌7.1％，見每公噸2783美元，亦係7月7日以嚟最大嘅跌幅。

甚至糖亦回落5％，見每磅13.42美仙，係7月17日以嚟最大嘅跌幅。

綿延起伏嘅衰退（Rolling Recessions）喺去年第四季已開始，初期貝南奇仲可以減息對付；如今年第三季嘅GDP又再出現負增長，便連貝南奇亦無晒符。5月份嘅910億美元退稅支票消費者已使完，6月份起美國嘅消費又再下降。利率已由去年9月嘅5.25厘，減至家吓嘅2厘，未來仲可以減幾多？（日本過去將利率降至零，亦無法阻止衰退嘅出現。）

南非最大嘅礦務公司Anglo American過去兩天跌咗11％；Gold Fields一天之內跌咗11％；南非嘅資源股踏入8月份大幅下跌。

澳元亦回落，紐元嘅跌幅更達4.3％，最近紐元減息0.25厘，估計9月11日再減息半厘，至7.5厘。由2003年7月開始嘅紐元滙價上升期，相信喺今年上半年已結束。CRB指數7月份已回落10％，周一再回落3.2％，係3月19日以嚟最大嘅跌幅（商品出口佔澳洲嘅總出口17％）。

商品價齊下跌

MSCI世界指數中一百一十七隻能源股皆回落，一百六十六隻礦務、農業及化工股亦回落，平均跌幅係20％。理論上跌幅超過20％便進入熊市，即8月份起全球資源、能源及農產品股進入反覆回落期。

成功嘅投資由高質素嘅資訊開始。去年8月次按危機所引發嘅宏偉及壯觀嘅火焰漸被環球性信貸危機所熄滅。IndyMac銀行被接管、房利美及房貸美失去咗貸款嘅能力，足夠令美國嘅GDP出現低增長（雖然未必出現連續二季負增長）。去年10月係股市嘅高潮；今年3月係金價嘅高潮；今年7月係油價嘅高潮。今年3 月起SPDR金股被兌現，令三百二十五公噸黃金重流市場（最高峰時SPDR金股共持有六百七十三點四噸金）。周一Arch Coal跌6.14％；Peabody Energy跌6.07％；Foundation Coal跌6.85％。美國煤礦股嘅P/E已回落到十倍！通縮喺今年7月開始，令金、銀、銅、鋁、鋼鐵、鉛、小麥、大豆及玉米等無一樣唔跌。無形嘅手又喺度發揮作用，雖然原材料價格未來仍有死貓式嘅反彈，但大方向已確定係向下。

美國大建築公司WCI Communities喺股價下跌50％後申請破產保護令，集團負債18億美元，8月5日有1.25億美元可換股債券到期更無力贖番，令股價下跌54.8％，收69美仙，收市後宣布申請破產保護令。

美國嘅房地產由1999年起步，2006年見頂，部分理由係因政府豁免咗50萬美元資本升值稅（即升值少過50萬美元嘅首次置業者，唔使畀增值稅）。美國樓價泡沫喺2006年7月爆破，至今達兩周年。

山東省政府透露，山東電網最大電力缺口達1022萬千瓦，接近全省電力需求嘅三分一，依家缺口仲可能進一步加大，更可能危及整個華北電網嘅安全。7月份全國有十六個省級電網用電負荷創咗歷史新高，主要係電煤緊張。以山東省為例，多數主力電廠嘅電煤庫存低過七天警戒線。國家決定為避免引發全國大停電，必要時切斷山東省嘅全省供電。上述嘅情況喺2006年亦發生過，因河南省負荷太重可能引發全國大停電，而果斷地切斷咗河南省供應，避免引發更大範圍嘅停電。暑假各位如去山東省旅行時小心面對全省大停電。

中國第一條高速鐵路──京津城際鐵路喺8月1日開通，最高時速去到350公里。將北京及天津兩大直轄市相連起嚟，全長只得120公里，即唔使半小時就到。

第二條係由哈爾濱到大連，全長950公里，最高時速係300公里，經長春、瀋陽及大連到北京，即三小時多DD就走完。

另一條係由北京到上海嘅京滬高速，全長1320公里，時速330公里以上。

第四條係由北京經武漢到廣州嘅京廣高速鐵路，全長2200多公里，依家已開通咗武漢到廣州嘅980公里，估計2012年會全部建成，到時北京到廣州只需九個鐘。

除咗上述外，長三角東南沿海一直到珠三角，建成一個沿海嘅通道已動工，完成後把長三角同珠三角大部分嘅城市聯接起來，成為城市間人流及物流嘅通道，標準時速係250公里。

換言之，四到五年後，中國將建成四通八達嘅高速鐵路網絡，把中、東及西區連接埋，大大改善咗家吓發展失衡嘅狀況。

滬深三百指數跌2.53％，收2703.08。

謝國忠話奧運泡沫穿咗，中國可能出現後奧運症候群。即係大型奧運基建完成後，大量觀光客離開後，奧運主辦國嘅經濟成長多半難逃減緩命運。較嚴重嘅係1988年漢城、1992年嘅巴塞隆拿及2004年嘅雅典。中國更提早爭住離場，令去年10月起滬深三百指數回落。

三次通脹歷史

改革開放以嚟，中國出現咗三次高通脹期。

第一次係1988年通脹率達到18.8％。價格上升主要係農產品、生活上嘅消費品及一般嘅工業商品好似洗衣機、冰箱及電視機等。主因係受管制價格與市場價格有差距，造成有辦法嘅人從受管制價格制度中取得產品，到市場上出售（俗稱倒賣）。政府為咗打擊倒賣嘅行動，宣布開放受管制價格嘅產品市場，引起領取固定工資嘅人不滿，最後出現1989年嘅六四事件才告終。六四事件後，因中國嘅產品喺出口上受外國無形嘅抵制，令國內供應一下子充足，不但消除咗內地通脹，連 GDP增長率亦急降。

第二次係政府為咗重新刺激經濟，任由人民幣喺外滙調劑中心貶值；透過貶值，出口漸恢復增長，但人民幣貶值令1993 年嘅通脹率達13％。朱鎔基上台後關掉外滙調劑中心，將人民幣訂喺8.7兌1美元及宣布今後人民幣許升不許跌，並任由1994年人民幣嘅利率狂升。1994年10月內地通脹率一度升至 24.1％，但利率亦急升；最終高利率戰勝咗高通脹率，1994年11月起通脹率一直下滑，到1995年經濟又再復甦。

第三次係事隔十年，2001年起美元利率下降，2002年起美元滙價下降，人民幣滙價同美元掛鈎亦因此下降。2003年中國加入咗WTO，產品可行銷全球，令中國出口急升。中國本土資源唔足以應付出口嘅需求，只有向全球入口，刺激咗全球資源類產品大幅上升。雖然2005年7月起人民幣開始升值，但升幅甚至唔及歐羅；出口繼續高速增長，中國對全球資源嘅需求繼續上升；加上流動性過剩刺激內地嘅房地產及股票價格上升，咁樣一嚟不但外需狂升，內需亦好大。

借鑑美國經驗

2006年下半年起人行逐步加息兼提升存款保證金率，去年10月17日起滬深A股開始回落，但由於去年8月美國次按危機嘅出現，令聯儲局再次放寬銀根兼減息，美元周圍流竄將漸受控制嘅中國通脹率再一次推高。油價由去年8月嘅70美元，推高到今年7月嘅147美元！

雖然係咁，中國緊縮嘅貨幣政策加上逐步取消（或減少）出口退稅慢慢生效；今年上半年中國嘅出口增長率漸放緩，同時美國GDP增長率亦大幅下降。如無意外，通脹高峰期亦逐漸過去，唔少虛高資源性產品價格首先開始回落；中國逐漸度過改革開放以嚟第三個高通脹期。參考上兩次通脹情況，唔排除中國另一經濟向上期喺明年上半年（最遲喺明年下半年）開始。

1979年美國通脹率達11.3%，當年10月雪茄伏上任，將存款準備金率提升到8%；貼現率上升至12%；聯邦基金利率由12厘加到17%。

1980 年3月14日宣布信貸增長率控制喺6%至9%，並將存款準備金率升到10%（消費信貸準備金率15%）。不過，1980年CPI升幅仍達 13.5%，GDP出現負增長0.2%，令卡達總統無法再連任。1981年1月列根上台後支持雪茄伏將利率提升到20厘，高出當時通脹率5厘。同年8月宣布削減個人及公司嘅利得稅及鼓勵儲蓄，下半年CPI開始滑落。到1982年年底CPI升幅只有3.8%，引發咗美國另一次長達二十五年嘅經濟繁榮期。

中國政府有冇當年列根總統嘅決心同毅力，透過加息及減稅，全力打擊通脹而孕育未來長期經濟繁榮期！

四伯爽

（此篇文章版权归作者曹仁超）

商品牛市幾時完

8月 6日，周三。是日打風，香港停市，日股則大升；滬深三百微升0.69%，收報2721.69。外圍方面，道指真正嘅頂喺2000年；納指2003至 07年嘅反彈無法高出2000年嘅水平。道指如扣埋通脹，去年10月嘅高點亦唔及2000年。2003至07年股市嘅上升及經濟嘅再繁榮建基喺金融嘅再膨脹（Reflation）政策，透過CDO製造大量嘅信貸，刺激樓價上升，帶動消費，令經濟出現再繁榮；再膨脹所製造出嚟嘅再繁榮係借番嚟嘅，遲早都要還。去年8月嘅次按危機，CDO泡沫爆破咗，各大金融機構將手上嘅CDO大幅撥備（美林每1美元CDO嘅作價22美仙，另為買家提供75％嘅財務按揭，即係實收5.5美仙，其餘數目日後收唔收到？有賴買家唔好出問題）。

以伊都唔想打仗

去年第四季美國嘅GDP已修正為負增長；今年第一及第二季透過減息及退稅製造增長。美林分析員David Rosenberg喺7月7日估計，今年第三季GDP又見到負增長嘅機會好大；估計明年第一季嘅GDP又再見到負增長。雖然冇連續兩季負增長，但出現綿延起伏嘅衰退（Rolling Recessions）。8月1日分析員估明年標普五百純利只上升2％（7月1日仲估升8％），增長率及P/E亦下降（P/E高低由G增長率決定）。加上分析員習慣咗傾向樂觀，因此明年純利可能連2％增長率都冇。

油價由147美元回落到118.02美元，唔少人睇係好消息。以色列同敍利亞已達成咗和平協議多個月，相信以色列同伊朗最終亦可達成協議，因為兩國都唔想打仗。一旦達成咗協議，油價見100美元（或以下）係可以預計嘅；不過，近期石油股跌幅好細（7月油價未跌，但石油股先跌，此乃我老曹喺7月睇淡油價嘅理由）。擔心石油喺100美元以下（例如90美元）重建基礎，而唔係真正改變方向。油價回落唔係供應上升，而係美國人（根據《巴隆氏》報道）連續十三個星期減少咗揸車（7月份暑假，路上行車里數較去年同期少咗2.2％）。7月27日美國交通部資料顯示，過去七個月美國人減少咗揸車四百萬里，最少係5月，較去年同期跌咗3.7％。

雖然地質學家估計，阿拉斯加近北極圈有九百億桶石油儲存，依家動工開採最少要十年後先有產量。

有人相信油價回落可刺激股市上升，但唔記得咗油價由2001年開始上升；美股由2002年10月開始上升。去年10月後美股回落，油價繼續上升；甚至油價見90美元時，美股大方向仍然唔會改變，因2003到07年美股上升係透過再膨脹製造出嚟。五年再繁榮期由2003年開始，去年結束，例如去年嚟自再按揭產生嘅9000億美元信貸，供消費者用咗，到咗今年上半年，呢支歌仔已冇得唱。透過減息（去年9月到今年4月）、退稅（今年5月）及各國主權基金嘅注資，今年上半年總算過咗，下半年又點？Bridgewater Associates估計，金融機構喺次按虧損嘅數字高過1.6萬億美元，已公布嘅唔夠6000億美元，即係仲有1萬億美元呆壞賬未宣布，到時連主權基金亦頂唔住。因此，全球性信貸收縮係無可避免。

上一個商品牛市由1968到80年共十二年。唔少人（尤其係羅傑斯）認為，依家商品牛市未完。歷史係不斷重演，但每次劇本唔同。我地唔可以將1968到 80年嘅歷史照抄一次。上一次商品牛市係日本及西德冒起，改變咗戰後美國雄霸天下嘅局面。今次係金磚四國（中國、印度、巴西同俄羅斯），與日本及西德唔同，金磚四國中，巴西同俄羅斯係原材料嘅出口國；中國同印度亦唔缺原材料，只係到2000年時無法再應付高速出口增長，商品超級牛市係咪今年7月完畢？等時間去證實。

重建美國消費者還錢能力

值得注意係：一、歐美進入咗信貸收縮期，需求增長率喺度下降緊；二、中國嘅宏觀政策出現咗大改變，唔再走粗獷型嘅出口經濟；三、非洲加入咗原材料供應國嘅行列；四、今年原材料價格上升，但資源股股價唔升仲跌；五、資源價格上升太快引發咗需求破壞（Demand Destruction），例如美國人減少咗揸車。

1980年至今嘅環球化，美國製造業有80％已外判；以Nike為例，佢地只做產品研究及發展、設計及市場推廣。生產則外判到世界各地（尤其係中國）。一旦產品滯銷，佢地就減少訂單，首當其衝唔係美國，反而係中國及其他新興工業國。最後搞到美國衰退，好快感染到其他嘅新興工業國。

次按危機爆發，唔係借錢成本太貴而還唔起，係美國嘅消費者還錢能力成疑！上述唔係減息可解決嘅問題，重建美國消費者嘅還錢能力，唔係一年，而係好長好長（日本用咗十三年；香港用咗六年）。

聯儲局維持利率2厘不變，相信喺今年內仍無法加息（去年9月至今年4月已減息3.25厘，今年6月CPI升幅達5％）。銀行手上仲有七千億美元嘅物業貸款，喺失業率上升5.7％（估計年底見6.5％），如上述嘅貸款有25％出事，銀行界就要撥備1750億美元。聯儲局過去接受銀行界4000億美元嘅 Mortgage Paper，初期只係作短期抵押；7月30日宣布延期到明年1月，咁樣即係話銀行界無力贖回上述嘅抵押品。點解係明年1月？因為係大選後。估計上述嘅 4000億美元Mortgage Paper中，有20％可能出事；即係明年1月聯儲局需承擔800億美元嘅呆壞賬。美國證監宣布阻止沽空三十天亦延長到大選之後！因此，有理由相信今年第三季GDP負增長之後，明年第一季美國GDP又再見到負增長！

戰後嘅美國家庭負債，喺1952年相等於GDP嘅24％，到1965年相等於GDP嘅46％，上升咗接近一倍；由1966年起，喺呢個水平上上落落，一直到1982年起，再由呢個水平上升；到去年美國家庭嘅負債相等於美國GDP嘅98％。唔少人驚青美國經濟已進入類似1966至82年嘅情況，嗰段日子係美國嘅滯脹期（GDP升幅有限，CPI大幅上升，搞到利率大升）。唔少人相信滯脹會重演，但商品價格由1968至80年出現咗十二年牛市，但今次商品價格由 2001年10月開始已上升，並已完成5浪上升浪【圖】。我老曹擔心通縮大過通脹。

波羅的海乾貨輪指數由2003年1月嘅1.14，升到去年10月嘅10.8後，回落到今年2月嘅5.5，跌幅相當大。因中國入口嘅需求大增而令波羅的海乾貨輪指數喺今年6月見11.6，出現咗假突破後回落。因受過去年10月至今年2月回落後嘅反彈教訓，家吓反而好少人睇淡乾貨輪嘅前景（雖然租金已係 2002年嘅十倍）。我老曹開始擔心乾貨輪租金由今年5月見頂後回落。

四伯爽

（此篇文章版权归作者曹仁超）

英美楼市齐受苦

8月7日，周四。本文见报日，系北京奥运开幕时，奥运效应会点？木宰羊；恒生指数打风后升154.45，收22104.2；成交758.97亿元。8月期指升78点，收22046点，低水；9月期指更低收21977点，奥运开幕日港股恐怕往下炒矣。

今年8月同去年8月有乜唔同？除咗北京举办奥运嘅热潮外，最大唔同系股票分析师嘅地位。去年8月，股票分析师个个都有金手指，大行推介边只股，边只股嘅股价便升到唔清唔楚；今天股票分析师早已唔见咗金手指嘅魔力，唔少更变咗千夫所指；尤其系Accumulator依家变咗I killyourlater。唔少分析师重新执位（由甲行跳去乙行）或患上严重失忆症，唔记得一年前自己讲过乜嘢。一年前人人喺度讲港股直通车，港股 P/E应同沪深A股睇齐（当年A股嘅P/E最高系五十倍）。今天分析师认为，沪深A股嘅P/E应同港股嘅P/E睇齐（依家国企嘅P/E十六倍），真系一个嘴巴两片唇。

分析员唔系金手指

勇于认错、永不改过，系股票分析师嘅特有性格。随住形势改变，不断修正自己嘅睇法，从来唔固执己见，先可以喺变幻莫测嘅股市中生存。如你以为股票分析师真系咁醒，而委托佢地帮你理财，系阁下士刁拔。去年10月至今，如亏损少过20%，已经跑赢咗毕非德（连毕非德亦蚀咗20%，你话D股票分析师嘅成绩会系点），今年唔少分析师已由年薪几百万变咗失业人士。

我老曹无意讥讽股票分析师，因我老曹亦系呢一行出身，只系话畀各位知，我地唔系金手指。喺牛市中个个都可以做股神，熊市一嚟我地都变咗牛鬼蛇神！四十年股市生涯，我老曹亦曾被人封做股神，亦一度被打成牛鬼蛇神。学习凡事处之泰然，只要无愧于心即可。股票分析师既唔系股神，亦唔系牛鬼蛇神，只系普通人。

沪深三百回落0.05%，报2720.44，咁牛皮，可能个个都走去睇奥运唔睇股市。

房贷美第二季蚀咗8.21亿美元或每股1.63美元（去年同期赚7.29亿美元或每股96美仙）。房利美周五公布业绩，又睇吓佢会点。

马来西亚反对党领袖安华周四无罪释放，打算参加8月26日嘅选举，以便返番国会。3月普选后，反对力量仲差三十席便可从执政党National Front政府中将权力抢番；换言之，今年第四季对马来西亚好重要。

英伦银行好麻烦

英伦银行几麻烦，明知5厘息太高但唔敢减息（因欧罗4.25厘，喺可见将来再加息），未来一年喺信贷压碎（Credit Crunch）嘅力量下，英国出现衰退嘅机会好大。欧洲银行行长面对德航员工获加薪5.1％认为极之危险，因7月份欧罗区通胀率已达4.1％（央行目标通胀率系2％）。今年2月钢铁工人亦获加薪5.2％。咁样落去，通胀率令人担心，佢扬言尽一切努力去打击通胀。

一年前全球信贷泡沫爆破，唔少人仲未感到情况好坏（去年9月同10月股市仍升）。依家睇番，情况较去年想象中仲差；不过，今天仍冇人相信美股出现perma bear，一如1990年时冇人信日股熊市会长达十三年一样，因为人类系天生乐观。

贝南奇好心做坏事
格蛇利用自己过去做咗联储局主席十八年嘅经验，喺度单单打打；贝南奇因熟读1929至32年嘅华尔街危机，而过分热心bailouts。佢不但挽救贝尔斯登，连房利美及房贷美亦救埋；并向各银行提供4000亿美元嘅抵押贷款，7月30日仲宣布，延期到2009年1月先至赎番；去年9月到今年4月高速减息，将利率由5.25厘降到2厘，搞到全人类对美元冇晒信心，引发咗全球性通胀。其它央行嘅热心程度唔少得过贝南奇，例如英伦银行、欧洲央行及瑞士国民银行都参加集体bailouts行动。各个国家更透过主权基金纷纷注资有问题嘅金融机构，反正系蚀人民嘅钱，对自己无关痛痒，蚀完又再注资；真系what a wonderful world!各国央行bailouts，以及主权基金注资，可唔可以阻止美国、英国、西班牙及爱尔兰嘅楼价下跌？答案系唔得嘅。

至于中国同唔少新兴国家过去利用汇价偏低去大量出口，搞到自己国家因赚埋太多外汇而出现流动性过剩，跟住引发咗通胀乃至股市爆煲等等。

今年商品、农产品价格甚至油价亦爆煲；因为中国经济正由粗犷型经济走向节约资源及能源经济，情况好似八十年代嘅日本。资源及能源有更好嘅使用，搞到中国对资源及能源嘅入口依赖下降。之不过同八十年代唔同，当年美国成功控制通胀而进入咗减息周期，刺激房地产、股票及债券嘅价格上升，带领住全球重新走向经济繁荣。今次却面对美国信贷泡沫爆破，令soft loans一下子冇晒，令一个过分杠杆化嘅资本市场面对melt down。美国人过去依赖借贷度日嘅日子，随住楼价下跌而结束，新兴工业国依赖向美国大量出口，维持本土繁荣嘅日子亦冇埋。呢个调整期恐怕较2000年科网股泡沫爆发嘅日子更长同更深。

1968至80年嘅滞胀，CPI升幅一度达14.5％，最终被雪茄伏嘅20厘高息收服。雪茄伏系伏虎降龙嘅英雄，1987年将通胀率收服后，便让位畀格蛇；过去格蛇一直奉行雪茄伏嘅政策，直到2001年「九．一一惨剧」后，通胀呢头猛兽由2002年起被放虎归山，令商品出现咗七年牛市。贝南奇更系蛋头一名，佢好似唐吉诃德对住风车以为系火龙，满脑子都系1929年华尔街危机，任何金融机构面对破产佢都 bailout，令渐渐再被驯服嘅通胀率，喺利率由5.25厘降到2厘以及美元贬值下又再起动。中医话，大热症唔可以一下子压落去，以免外感传里；应该先清咗热毒，然后再调理身体。去年8月如任由两到三间金融机构先破产，今年经济进入冷却期先减息（一如2000年任由科网股回落，2001年1月先减息），便唔会搞到依家咁嘅局面——通胀及通缩一齐嚟。

未来美国楼价仍有17％嘅下跌空间，英国更有38％【图】；欧美金融机构点样承受咁大压力？泡沫形成嘅过程带嚟欢乐，爆破必带嚟苦楚，同时有悔不当初嘅感觉。英国1973年嗰次回落期只得两年；1989年嗰次回落期五年；今年呢次又唔知要几耐嘞。

1997 至去年美国人话只要买楼便可发达？楼价按年上升，每年只需将D物业加按便可借钱消费。去年起突然发现呢条路唔得，今年更发现自住嘅物业已跌价20％，令自己嘅首期（20％孖展）化为乌有，银行面对4760亿美元坏账。十年楼梦令美国GDP不断咁升，消费者不断咁增加消费。依家楼价下跌，但食物同汽油价格却上升；家吓不但唔可以再借钱消费，同时生活费上升，更担心可能失业。前克林顿白宫经济顾问Nouriel Roubini认为，美国金融业蚀咗约20000亿美元，依家只系为次按拨备，仲有好多呆坏账未宣布。Decision economics环球策略员Allen Sinai认为，美国正步入衰退期，而且又阔又深。

澳洲不利消息涌现

情况开始对澳洲不利，7月CPI升幅达4.5％，而非中央银行嘅目标通胀率2%至3％；利率高达7.25厘；6月份消费信心跌咗5.6％；物业贷款减少 4.2％；失业率4.3％（2月系3.9％）；原材料价格开始回落，影响咗澳洲收入。6月份申请楼按嘅人较5月份再减3.7％，同1月份比较已减少 25％；政府宣布今年第二季起，澳洲楼价开始回落。2006年嘅美国、去年嘅英国及今年嘅澳洲亦加入回落行列，澳洲长达十七年嘅增长期亦开始结束。

英国嘅情况更令人担心，根据Financial Services Authority嘅资料，今年首季被接管嘅住宅共九千一百五十二间，较去年同期嘅六千四百七十一间，上升超过40％；今年首季超过三十万间楼按延期供款（较去年同期多四万间），新增延期供款嘅人约五万四千个，估计第二季情况进一步恶化。

过去新兴市场因企业纯利高增长，而令P/E较美股高嘅时代，会否反过嚟因企业纯利大跌，而令P/E较美股低（过去新兴市场股市P/E系较美国低）？商品价格经过七年牛市后会否出现一至三年嘅熊市？喺金融市场唔系表演勇气嘅地方，保存实力先系唯一嘅真理。喺1997年冇保存实力嘅投资者，依家喺边？2000年唔肯喺科网股撤退嘅人，依家又喺边？If there's danger, run away, live to fight another day!（有危险，便走佬，留番条命为明天作战。）上述系老兵唔死嘅理由。美国人需要一段好长好长嘅时间先可以将负债水平降低。科网股泡沫用咗两年零八个月，何况呢个次按风暴引发嘅理由系楼价回落。

选择职业要注意五点

投资有成功有失败；上述同勤力系无关。成功嘅投资者都了解商业及股市周期而加以利用，不会喺去年10月全身投入，明白潮起潮落嘅威力。冇人喺商业周期低潮 ringthebell，例如喺2001年叫你买金及资源股；亦冇人喺高潮时发出all clear嘅讯号。一切都要自己心领神会；升市三五七年便要小心，任何升市短嘅三年，长嘅七年。投资成功第一守则系人地头脑发热时，自己最好行开D。

宾州大学调查发现，67%大学毕业生，冇法适应今天嘅job market，可以话系学非所用。

搵到一份人工15000元嘅工作，年年加人工5％，每年把15％收入储起嚟，每年又喺投资市场赚10％回报，到五十五岁开始踏入退休年龄时拥有几多？答案系大约800万元。上述仲未扣除买楼供款及结婚生仔嘅供书教学开支；亦未计未来三十年通胀率蚕食嘅购买力（香港三十年前嘅100万元购买力，相等于依家嘅 3000万元）。Not bad, but it is still bad!

青春本身系无敌，喺选择职业之时要注意：一、唔好投身前途有限嘅行业；例如我老曹喺1968年放弃咗纺织业，投身证券业，虽然当年喺纺织厂收入较证券行高30％；二、唔好投身嗰D唔肯扩充嘅企业，公司唔怕细，最重要系老板要有野心；1973年我老曹放弃咗《明报》，投身《信报》，1973年《明报》老板已冇野心，反而当年行止兄却野心勃勃；三、唔好畀工作搵你，而系你去搵工作，向自己心仪嘅企业发自荐信，努力进入自己认为有前途嘅公司，而非到job market搵工做；四、入咗公司后，了解公司嘅目标及方向。协助公司早D达标及追随公司嘅方向（如自己方向同公司唔同，请早D走人）；五、专注及增加职业上所需嘅知识，建立自己嘅人际关系，年轻人应该肯捱肯博，勇于表现自己，建立自己嘅团队（一群想法相同嘅年轻人互相鼓励，齐齐上位）。多D交际，少D打机（或睇电视）。

如冇法喺三十岁前赚100万元，你嘅前途已令人担心。三十岁前投资不妨博D（但唔好借钱），甚至输到乜都无晒亦可从新嚟过，但唔好忘记三件事：Be good（对朋友要好，同时有良好嘅态度）；Be honest（唔好呃人，人地会记你一世）；Be happy（几时都要快乐，今天输钱，明天忘记，因为快乐嘅人才会幸运）。

只有咁样，你先至可以脱颖而出，五十五岁（或六十五岁）退休前可以讲句我对今生无悔！如果唔系，你就同宾州大学调查中发现嗰67％大学生嘅情况一模一样—人到中年万事忧。

内地主力放落长三角

8月6日国务院总理温家宝主持召开国务院常务会议，原则上通过进一步推动长江三角洲地区改革开放及经济社会发展指导意见。

长三角继珠三角之后，由以前嘅全球制造业中心转为以服务业发展体系为主。上述嘅指导意见喺学术界已讨论咗十几年，呢次由国务院拍板起航。家吓珠三角占全国 GDP嘅10％；长三角占全国GDP嘅22％。珠三角以香港及澳门为龙头，由习近平负责；长三角以上海及天津为龙头，国务院拍板向四个中心迈进（即国际金融中心、贸易中心、航运中心及经济中心）。由中央部委到地方嘅政府动用近四百人，动员中科院、社科院、江浙沪三地重点高校、地区规划研究院学家及知名研究规划机构。

睇嚟中国政府对长三角嘅经济转型信心较珠三角大。过去十年香港人太唔争气，回归至今吵吵闹闹，如果唔系中央协助，连金融中心亦保唔住。呢次国务院把主力放喺长三角而唔系珠三角，系要长三角做番D成绩出嚟，证明统一地方政府嘅思想，由中央领导地区规划方式，较香港嘅吵吵闹闹经济强。

四伯爽

"如冇法喺三十岁前赚100万元，你嘅前途已令人担心"

他说的是港币吗 ？？哈哈
脸青咯...

四伯爽

（此篇文章版权归作者曹仁超）
大小非押后解禁延长熊市

8 月8日，周五。恒生指数跌218.99；成交639.46亿元。8月期指跌309点，收21737点，低水；9月期指跌294点，收21683点，出现期指倒挂现象，担心周一港股亦好唔得几多。东方航空（670）跌7％，收2.14元；联想（992）升3.2％，见5.41元，因第一季获利升65％。

花旗推介联想，估计今年度每股获利4.9美仙，升164.4％，P/E十三点八倍，目标价8元。中国神华（1088）估计今年每股获利1.295元人民币，升25.4％，P/E十七点二倍，目标价为30元。

沪深三百指数跌4.74％，收2591.46，创六星期来最大跌幅，因为中央政府响奥运开幕前并冇宣布救市措施，令市场大感失望。国航大跌至8.69元、南方航空跌至6.76元，为1月28日以来最大跌幅。中信证券挫4.6％，收21.39元；海通证券跌8.2％，收21.52％。

由失望走向绝望

B 股跌幅更达8.36％，创近五个月来最大当日跌幅；沪深两市本周分别下跌14.17％及11.7％。B股周五跌幅仅次于今年3月18日当天下跌9.08％鲉单日最大跌幅。本周B股指数已下跌14.17％，大量B股跌停板，跌幅超过9％鲉亦有十九只，跌幅超过8％鲉有十六只。沪市成交2.698亿元，较上日升141％，深市2.085亿元，较周四多156％。响奥运开幕前B股出现大抛售，反映投资者渐由失望情绪走向绝望。

百仕通第二季亏损1.5亿元，中投公司去年参股至今，账面亏损近11亿美元。中国成立鲉主权基金一开始便有2000亿美元，依家仍处于摸着石头过河期。请给中投多点时间。

中化国际公布七亿四千万股限售股8月12日起全流通，上述公布令其周四接近跌停板。由今年6月三一重工宣布限售股全面解禁，亦令该股价下跌，所有宣布皆令流通股逃唔出一跌。另一批上市公司大股东承诺自愿继续锁定两年解禁股，上述公布虽然减少近期大小非流出市场，但同时将压力延长多两年。以浙富及西仪为例，依家流通股分别只有二千八百六十四万股及五千八百四十万股；明年8月浙富有四千六百零四万股上市，到2011年有六千一百三十五万股；至于西仪今年11月6 日增加一千四百六十万股，明年8月再增一千一百七十九万股，2011年则有二亿多股限售股上市。

去年11月5日上市鲉中石油家吓流通股四十亿股，2010年11月5日可增至一千五百七十九亿股；今年3月上市鲉中国铁建依家流通股为二十四亿五千万股，2011年将系七十八亿三千万股。上市公司大股东本月愿锁定大小非全面解禁期延长两年，反而不利牛市诞生！

2006年6月限制大小非解禁，系造成2007年10月前大牛市鲉部分理由，踏入今年面对大小非大量解禁而引发大熊市。部分上市公司大股东自愿限售两年，令人担心所造成鲉结果只系延长熊市，而非令牛市提早降临。

日本第二季GDP下降2.3％，由第一季GDP已下跌0.6％，即日本经济又一次陷入衰退。1990年至今日本一再努力由出口导向型经济转为内需，利率更由 1990年6月鲉6.25厘降至最低鲉零利率（依家系半厘），可惜日本各大银行1990年响房地产贷款及股票互控上亏损很大，失去贷款能力。喺信贷收缩下，虽然1990年至今日本政府已多次刺激经济，表现最好算系2003年4月至07年2月，透过出口中国而令经济复苏（中国采购大量半制成品，加工后再出口）。随着日圆升值，出口增长放缓，去年第二季起GDP增长率又再减慢，今年出现连续两季GDP负增长，而成为OECD国家中最先陷入衰退国。值得思考鲉问题系，日本到2015年将有四分一人口达六十五岁或以上，日本严重缺乏十八岁到六十五岁鲉工作人口；一亿二千八百万日本人中，只有2％喺海外出生（日本人甚至歧视喺外国出生鲉日本人）。如日本仍唔肯开放市场接受外地劳工入口，日本有可能劳动人口不足而再次陷入长期经济衰退。

全球航空公司进入收缩期

今年第四季估计全球航空公司将减少五千九百七十万个座位，较去年同期减少7％，结束五年来航空公司鲉扩充期，理由系高企鲉燃料费。上一次航空界收缩期由 2001年开始，为期三年，共减少5％载客能力及7％飞行航线。Official Airline Guide估计，未来十年全球航空业将减少五千架飞机，估计新飞机订单只有七百四十四架（2001年嗰次美国所受鲉影响最大，共减少13％载客能力，相信呢次亦唔例外）。

今年3月当金价升穿1000美元时，忽然产生大量黄金长线好友，令过去几个月唔少人响金价回落期中吸纳。投资需求急升取代消费需求急降（印度今年黄金需求急降），依家大量黄金落入投资者手中，将阻碍金价日后上升。

澳洲小麦7月份因雨水充足，估计收成较原先估计鲉二千三百二十万吨为多，可能达二千三百七十万吨，而令到全球小麦跌价。

雅典奥运之后，雅典股市2004年8月20日起将由2225.16上升到去年11月9日5346点，三年内上升140％【图】！沪深A股会否一如雅典股市，响未来三年上升140％，而非内地分析界估计咁熊市一直伸延到2011年？

商品价格近期急跌，后市点睇？JP摩根天然资源基金由2003年鲉5000英镑升到近期19450英镑；但上月至今CRB商品指数急跌10％，为1980年以来最急，甚至油价亦由147美元跌至118美元。德银分析员认为，商品周期已见顶，建议客户获利回吐，认为长期而言油价只值60到80美元、金价只值 650美元一盎斯；铜价、铅价甚至粮食价亦回落。欧洲最大退休基金BGI喺2006年大量投资石油、金及铜，唔少大机构亦加入，去年只小量投资，踏入今年更减持。Capital Economic分析员Paul Ashworth认为，依家商品鲉情况同九十年代后期纳指鲉表现接近，已唔能够用传统评估法去分析。

家吓睇好鲉最佳借口系新兴亚洲市场需求、低利率及美元贬值，完全忽视美国经济正步入衰退，欧洲情况亦好唔到几多！楼市泡沫爆破引发次按危机，下一个泡沫爆破应该系商品。M&G Global Basics基金经纪Graham French认为，天然资源股升幅已跟唔上商品价格，系时候减持商品喇，即使唔系牛市结束，亦逃唔出一次大调整。商品市场同其它市场并冇分别，只系投机味更浓而已。粛easy money及大量信贷推动下，商品出现大牛市并非由实际需求推动，情况有如九十年代纳指泡沫，一旦熊市来临，甚至最好鲉科网股亦难逃一跌，我地生活喺达摩克利斯之剑下（Damoclean sword），好容易产生不稳定需求。矿务公司面对有限度竞争，自然疯狂抬价，一旦发现需求非想象中咁大，又可以突然令需求消失！唔少人以1967至79 年上次商品大牛市作蓝本，而认为依家商品牛市未死；世界事物系咪咁简单？上一个牛市寿命十二年唔代表2001年开始鲉商品牛市同样有十二年寿命，如果只有七年（即2008年7月）结束又点？

知之为知之不知为不知

你知道2a-7 puts系乜嘢？我老曹就木宰羊喇。Citadel Investments鲉Dan Johnson曾喺一次投资会议上问AIG管理层，公司响应话不便讨论。周三收市后，AIG公布响2a-7 puts市场提供保险而亏损53.6亿美元！

恒生银行（011）柯清辉认为，次按债券咁复杂，睇唔明，所以恒生冇玩！「识就话识、唔识就唔识」，既然自己唔识便玩少瓣。唔知道2a-7puts系乜，可以唔玩。可怜AIG已亏损好大，周四股价一天之内下跌16％，收24.23美元。

花旗与美国证监会达成协议，以73亿美元向四万个个人投资者及慈善基金买回auction-rate证券，依家只有1000万美元资产；亦答应协助机构投资者处理手上120亿美元同类证券。美林亦宣布以票面值购回100亿美元auction-rate证券，但明年1月才实行；听讲瑞银及美国银行好快亦同监管者达成类似协议。

英国第三大银行柏克莱上半年净收入28亿英镑，较去年同期减少35％，但较分析员估计鲉17.1亿英镑为多。

未来投资必须谦卑

全球银行股系咪已出现最恶劣日子？GMOLLC公司主席Grantham系最先提出Perma-bear理论者。佢过去不但准确估计2000年科网股泡沫爆破（响两个月前已提出），亦准确估计美国楼市泡沫引发次按危机。依家该公司管理资产达1260亿美元，认为信贷危机最少维持两年半，因为未来楼价仍会回落。佢认为，中国GDP增长率明年仍会放缓而令全球原材料价格下跌，未来投资方面仍要谦卑（humble），不可过分自信。

过分自信鲉投资者往往买卖次数太多、赚钱太少。未来投资策略：一、唔借钱投资。二、分散（例如将资金分成十注，每次动用一注）；三、消费不能超过个人收入；四、唔好希望自己跑赢大市。

四伯爽

（此篇文章版权归作者曹仁超）

美国人难再举债度日

8月10日，周日。美元强势令油价重见115美元。商品价格回落，南非兰特亦大跌，因加息至12.3厘。道指上周升3.6％、标普五百升2.8％；原油价格则跌8％、铜价跌7％、金价跌6％。商品价格系咪7月见顶回落？

旧年8月出现次按危机后，悲观者曾认为今年世界经济会出现大衰退、乐观者则认为除美国外，其它国家可以decouple（唔受美国楼市影响）。一年过去了，除日本今年出现连续两季GDP负增长，美国去年第四季GDP亦修正为负增长，意大利第二季GDP负增长0.3％，德国有机会喺今年第二季GDP出现负增长。

不过，全球经济既冇出现大衰退，其它国家亦无法出现decouple，唔似1973至74年及1981至82年因油价高企而引发全球经济大衰退。有人认为引发1973至74年及1981至82年全球大衰退系由于美国过紧鲉货币政策，而非高企鲉油价。去年9月起美国将利率减到今年4月鲉 2厘，成功阻止咗全球经济大衰退出现。

如上述分析正确，就有另一问题出现：1974年通胀回落令利率下降，引发1975年经济复苏；1982年通胀率回落、利率下降，亦令经济响1983年复苏。今年商品价格由7月起大幅回落，可令第四季美国CPI升幅收窄，但第四季美国能否再减息？冇大幅减息刺激，又点样jump start美股、刺激经济复苏？道指120个月平均线系1566点，估计呢次只系由7月15日起鲉浪B反弹，阻力喺12845点。

战后婴儿想退休唔想供楼

1973 至74年美国出现衰退后，日本同西德成为世界经济增长新鲉引擎（三头马车理论），令全球经济再繁荣。1981至82年衰退后，中国成为美国廉价货鲉最大来源，美国CPI升幅大减、利率下降，引发资产升值潮，令美国再次成为世界经济增长鲉大引擎。未来世界经济增长大引擎由谁担当？美国、欧洲受制于楼价回落期，已无力再做引擎；日本进入人口老化期，自顾不暇；中国GDP太细，无法拖动全球经济。根据以往经验，油价见顶唔代表从此天下太平，何况现水平油价下跌空间已有限。

房利美第二季亏损23亿美元或每股2.54美元，亦减少派息，令上周五股价跌9％，收9.05美元。房利美大部分亏损来自 Alt-A贷款，主要嚟自四个州（加州、佛州、内华达州及阿里桑那州）。Alt-A贷款较次按好，但唔及prime贷款。Alt-A贷款只占房利美总贷款 10％，却占其第二季亏损50％。从呢点睇美国楼按贷款仍在恶化，明年房利美及房贷美系咪仲捱得住？仍存疑问。

战后美国利率由低水平逐步上升到1981年。经过三十五年利率上升期，1980年三十年期债券有15厘息一年亦冇人够吉士买，因为人人相信利率将不断向上。1981年到2003年人们经过二十二年利率回落期，新一代又相信利率只跌不升，因此搏命借钱买楼，2004年7月开始利率向上升，仍无法阻止美国人买楼，直到2006年7月利率升至5.25厘，美国人抢贵楼行为才停止。

2007年8月次按危机爆发令短期利率下降，但战后婴儿步入退休期，唔似1980年代至 2006年佢地步入三十五至五十岁，不但买第一层楼，同时有兴趣买第二间屋用嚟度假。2007年起战后婴儿发现房屋并唔系「储蓄」，佢地只想退休唔想供楼，却面对生活费上升而楼价却下跌，情况一如九十年代鲉日本人，甚至较日本更差，因为美国家庭负债率相等于2007年美国GDP 140％，今年才回落到100％（但却系因为断供）【图】。美国人再无法过举债度日鲉生活矣，因为：一、借得太多，已无力还债；二、美国人步入退休期，失去赚钱能力。不但美国系咁，英国情况更差，而且仲有欧洲。

商品牛市七年寿命机会大

近期油轮租金回落。石油生产商大量抛售石油期货合约去死锁利润（虽然油价已下跌15％），金价、铜价、铝价亦偏软，但仍较一年前高5％、14％及23％。如美国人开始减少消费，将令失业率上升及GDP失去增长动力（甚至负增长）。

根据TIPS（Treasury Inflation Protected Securities）显示，未来五年美国通胀率系向下而非向上。十年TIPS利率只有2.18厘，甚至较一般债券利率仲低（正常十年期债券息率3.94 厘）。证明呢次商品牛市只有七年寿命机会极大。

美国汽车业进入挣扎求存期，唔少甚至可能破产。美国商场开始人流减少，餐厅生意亦开始差，因为美国人已经开始节衣缩食。

过去美国人无论买乜嘢，只要透过银行发行CDO（Collateralised-Debt Obligations）便可支付。信贷咁容易获得，理由系银行将CDO卖畀投资者便可收番资金，唔少CDO更获三A评级。2005年5月起连三A评级鲉 CDO价格亦开始回落，当时大部分人仍唔为意。到去年夏季，CDO价格狂泻20％，引发更大抛售，结果才发现呢个市场好少人肯承接，令CDO价格一落千丈。就喺此时，核数师要求CDO必须按市价入账，银行因CDO跌幅太大，连资本充足比率亦出现问题，除拨备外更须集资；到今年CDO市场已接近死亡。过去十年透过发行CDO集资购买资产鲉游戏无法再玩落去，未来美国资产价格又点样再升值?!

赞助奥运推广品牌非人人有效

呢次通胀系咪同1968到80年一样（1980年3月美国CPI升幅达14.8％）？当年推动CPI上升鲉主要系劳工成本上升，但1980年至今美国劳工成本（扣除通胀率）却回落30％，理由系新兴工业国冒起，令美国鲉工序大量外判，从而令美国企业1982至2007年纯利一直上升，亦令美国温巴仙人口鲉收入占GDP比重不断上升（造成贫富两极化）。依家同1981至82年唔同，当时商品价格回落，令美国进入减息周期；今次商品价格回落，美国利率却减无可减。就算油价回落到100美元一桶，仍然系高油价，只要油价响100至120美元牛皮，美国经济便无法复苏。

今年起中国经济进入软着陆期，估计明年GDP增长率降至9％（今年为9.8％）；CPI升幅5％，出口增长率大减，但内需未能完全取代，引发A股进一步回落（虽然A股长远而言睇好，但太早入市系死罪）。

今年奥运营销报告指出，六十二个北京奥运赞助商中，90％企业奥运营销至8月1日止未获成功，只有10％企业取得较好营销效果，佢地分别系琼森、可口可乐、伊利牛奶、Visa、联想、百威及金龙鱼七家。其中又以琼森、可口可乐和伊利牛奶成为最大赢家，品牌美誉上升60％；其它品牌美誉上升者有长城葡萄酒、 UPS、阿迪达斯、松下、通用电气、麦当劳、中移动、三星、皇朝家俬、海尔、中国网通、亚都、中国银行、青岛啤酒等，较经常性营销效果略好，其它品牌鲉成绩一如常规营销。

换言之，利用奥运去增加品牌美誉唔系人人都得（大部分唔得）。而2004年雅典奥运鲉一百四十四家奥运合作伙伴中，只有唔到30％企业响奥运项目上赚钱。赞助奥运大部分系蚀钱生意！

美消费料进入负增长期

截至今年3月止日本人外汇孖展户口开户数目较对上年度升92％，家吓已达一百二十三万户。佢地共抛空6960亿日圆（63亿美元），较一年前升13％。估计 9月份，日圆兑1美元可见110，年底见112。估计明年3月底孖展户口可过一百七十九万个，抛空日圆将达9060亿日圆。

英镑已跌至二十一个月内低位，见1.9146美元，因为被接管鲉住宅单位较六个月前增加41％。BNP百利达伦敦分行分析员估计英镑可见1.85美元。今年英镑兑美元跌3.3％、兑欧罗跌6.1％。

12 月期金见864.8美元，较7月31日跌6.3％。UBS AG估计，金价短期内可见850美元，因金价已连升七年，恐怕今年3月见顶。12月玉米价格跌4.4％，见5.182美元，上周跌咗11％。11月大豆价格跌4.7％，见11.805美元，上周回落14％。连橙汁价格上周亦回落4.7％。

美元过去六年跌34％，系刺激商品价格上升鲉部分理由。小心近期美元止跌回升。

毕非德认为，自己鲉投资策略系85％葛拉咸同15％费雪。葛拉咸鲉价值投资法透过毕非德而声名远播，费雪则较少人知。1958年费雪写咗Common Stocks and Uncommon Profits，佢自1950年代便持有摩托罗拉，到2004年过身前仍未卖出。摩托罗拉曾带畀佢唔少欢乐时光，但近年股价则不敢恭维矣。

Oppenheimer分析员Meredith Whitney指出，未来十二个月到十八个月美国消费将进入负增长期。Cheap Credit is a Thing ofthePast！过去大量借钱畀冇还钱能力鲉家庭去买楼的日子已成过去。

四伯爽

（此篇文章版权归作者曹仁超）

中国慎防地产泡沫

8月11日，周一。恒生指数跌25.87，收21859.34；成交575.89亿元。8月期指升64点，收21804点；9月期指升37点，收21720点，期指倒挂现象未见消除。

美国经济嘅回落期估计伸延到明年（今年下半年GDP估计只得0.7％升幅），未来十二个月出现衰退嘅机会高达51％（4月份曾估计高达70％）。估计今年嘅CPI上升4.3％，利率估计喺明年3月前唔会上升，仲系2厘。

工业股否极泰来？

7 月份中国嘅外贸盈余上升4％，至253亿美元，系四个月嚟首次回升，主因系内地工厂产品报价上升10％，开始将上升嘅成本转嫁畀买家，搞到出口上升 26.9％，至1367亿美元；入口上升33.7％，至1114亿元。高附加值产品好似电子产品嘅需求仍上升，政府再次增加纺织品嘅出口退税，加上原材料价格下跌，工业股系咪到咗否极泰来时刻？

上海期铜跌至八个月内最低，10月合约报56940元人民币；新加坡3月期铜报每吨7375.5美元。铜价下跌，代表全球经济进入咗放缓期。

沪深三百继续下跌5.2％，收2456.81。中国铝业、江西铜业、云南铝业、紫金矿业、山东黄金及中金黄金亦跌停板。A股已跌至二十个月内嘅低点；中信证券下跌8.6％，因上半年利润只升咗13％；北辰实业、东方航空及北京城建下跌10％。

沪深A股约六百只股份跌停板，占上市股份40％；跌幅超过5%嘅约一千四百只。虽然国资委主任李荣融表示，国有股喺相当长嘅时间内唔会大量减持，但投资者信心已冇晒，令A股P/E首次跌穿二十倍，渐同香港国企指数嘅P/E睇齐。

Thomson Reuters公布，今年1月1日分析界对标普五百今年第二季业绩估计系升4.7％，4月1日改为负2％，7月1日改为负11.5％，8月11日再改为负 22.1％；理由系AIG每股蚀咗51美仙，以及房利美每股蚀咗2.54美元。至8月8日止已公布业绩嘅公司共四百四十九间。66％较估计中好、10％和估计接近及24％较估计中差；能源纯利升18％、科技升16％及必需品消费升15％；最差系金融负94％，其次系非必需消费负57％。

皇家苏格兰银行上半年蚀咗8.02亿英镑，系1960年代至今首次出现亏损，亦系英资大银行少见嘅亏损。上半年供股集资120亿英镑后，仲要为信贷拨备 59.3亿英镑。不过，市场反应唔差，股价升3.2％，见240.5便士，相信最恶劣嘅日子已成为过去。去年佢与富通银行及西班牙Banco Santander连手收购荷兰ABN Amro银行，却撞啱美国次按危机，令三大银行都冇蚀钱。天有不测之风云，人生真系无常。

唔会有奥运后效应

7 月16日开始嘅股市上升，只系另一反弹而唔系熊市结束；7月中开始油价大幅回落，只代表经济衰退步伐渐近，而唔系另一繁荣期开始。喺熊市中，散户可以采取持盈保泰嘅策略，静待熊市三期嘅来临；亦可喺熊市中Keepyourfeet wet（保持30％资金喺股票市场炒上炒落，以便春江水暖鸭先知）；我老曹策略系后者，唔系点知熊市结束？世上无先知，只有事后孔明；奥运效应已证明咗唔存在，依家又有人推销嘅奥运后效应亦系唔存在。奥运只系体坛盛事，既冇前效应亦冇后效应。虽然北京为咗奥运而投资一、二千亿元人民币喺配套设施上。由于北京过去嘅配套设施不足，依家只因利乘便；相对于全国基建项目嘅开支仍唔算多，股市既冇奥运前效应，应该亦冇奥运后效应。运动归运动，经济归经济。

美国纽约大学斯特恩商学院经济学教授努里尔．鲁比尼指出，今次次按危机美国付出嘅代价可能达到3万亿美元，相当于美国GDP嘅20%以上。虽然已发出咗重大危机爆发嘅讯号，但至今大家仍未能真正认识危机嘅严重性，依家破产仍局限喺金融业，距离第二阶段仲有距离，未出现大规模嘅企业破产及失业率上升。过去二十五年，美国经济喺信贷泡沫滋养下，增长日子已一去冇回头。个个希望炒股炒地产发达，家吓美国五千一百万间住宅中有八百万间已资不抵债，已失去自己嘅房子，如楼价跌幅扩大到30%，将有二千一百万个家庭冇咗间屋，到时就真系大灾难。

强项系捕捉大浪

入咗行四十年，我老曹发现赚大钱机会大部分唔系嚟自拣股（stock picking）而系嚟自大浪（Big Wave）。1969到73年我老曹蒙查查咁赚咗50万元，理由唔系我老曹晓拣股，而系咁啱遇上恒生指数由不足100点升到1774点嘅大浪。1974年 7月至12月我老曹输畀森池兄嘅理由先系拣股经验唔足；我老曹当年买和记企业，由7元跌至1元令我老曹嗰50万元变咗10万元；森池兄却买和记地产，因为有15厘股息跌幅只得10％，令1974年12月佢嘅身家幸保不失。依家森池兄更系拣股专家，接近凤凰无宝不落，而我老曹仲醉心喺捕捉大浪（强调有智慧不如趁势；宁买当头起、莫买当头跌；止蚀唔止赚等）。

捕捉大浪系我老曹嘅强项；至于拣股则系我老曹嘅弱项（相信同自己嘅性格有关，我老曹欠缺森池兄嘅精挑细选性格）。但过去嘅成绩亦唔错，例如逃过咗1981 -82年嘅大跌市；1984年7月《联合声明》草签限制港府每年卖地五十公顷，我老曹认为三个政府（中、英及港）逼港人买楼发达；又好似1987年10月股灾我老曹亦能逃过。1989年六四事件后才重新入市；1997年投资英国，最近卖埋最后一间物业；2001年睇好黄金、资源股及货币（如澳、纽及加元），以及去年10月喺港股直通车谣传下再度减持港股。

1984年买楼，甚至唔识拣，到咗1997年亦可赚十五倍；反而喺1997年下半年买楼，任你点叻，2003年4月最少蚀咗50％；1990年曾劝王增祥先生放弃日股，因为「势」不在「我」；去年10月我老曹放弃喺英美嘅投资，因为上升趋势完成。

1801 至1831年英国钢铁及煤产量每年上升5％，到1900年英国系全球最大嘅工业国；依家仲有乜嘢系英国生产嘅？1890年美国由农业走向工业，1929年美国货渐营销全球，依家除咗高科技产品外仲有几多工业制品喺美国生产？1978年中国走改革开放路线，去年中国成为世界工厂；然后……每一个国家都有佢嘅工业黄金三十年，但希望永远高速增长系冇可能。英国、美国、日本及中国都冇可能。工业完成黄金三十年后，经济便逐步走向大量消费期，英国及美国都系咁；日本人因为1990年前喺物业及股票市场蚀咗太多，搞到消费市场无法壮大，形成咗依家唔生唔死嘅局面。

由1801到2000年整整二百年，英国及美国喺发明、科学、制造业及金融业等一直领先而获得全球惊人嘅财富；不过，随之而嚟系财富减少期，最先系英国（第一次世界大战后已开始），依家系美国（科网股泡沫爆破后开始）。中国工业黄金三十年已结束，正过度到内需型经济后，进入另一繁荣期。英国由1800年开始到第一次世界大战爆发，繁荣期约一百三十年先退位让贤由美国取代；美国繁荣期由1890年开始到2000年见顶，约一百一十年；中国1978年开始至依家只行咗三十年，即最少仲有七十年繁荣期？未来唔系无风无浪而系波涛汹涌；如各位像我老曹一样，相信大浪理论，便应「任凭风浪起，稳坐钓鱼船」。未来投资宜集中喺东方而唔系西方。

中国嘅困难系点样化解制造业头上嘅「达摩克利斯之剑」？人民币升值、取消或减少出口退税、中外企业税制统一为25％、新劳动合同法保障产业工人嘅最低工资、严格执行环保条例及中央三农政策等都系合理措施。只系咁样一嚟中国制造业必须告别廉价优势，进入产业升级期。九十年代嘅台湾及东南亚就系避唔开「达摩克利斯之剑」，而令经济从此冇进步。1978年开始嘅中国改革开放政策，提供咗三低一高嘅有利环境（即低劳动成本、低地价及低税率，从而产生咗高利润）畀制造业。1989年六四事件后，中国政府为咗迅速恢复经济繁荣，更任由人民币贬值；令台湾、南韩、东南亚及日本厂商亦入嚟。2003年加入WTO后，全世界嘅厂商都嚟咗，令中国嘅制造业出现咗过分挤逼，大鱼吃小鱼嘅生态出现；内地资源不胜负荷，只好向外入口，带动咗全球原材料价格上升。到今年中国已渐接近恶性通胀嘅边缘，CPI唔受控制咁上升。今年起人行及早实施银根紧缩政策及人民币升值兼加息，喺通胀洪峰下，依家都仲未有造成广泛泛滥（A股由去年10月起大跌；内地房地产价格亦步入回落期）。

品牌不是用广告建立

我地要搞清楚，唔少成本系企业本来就要承担嘅，只系中国政府为咗刺激GDP增长而冇严格执行。例如工人嘅人工、福利及环保；出口退税原先系应付1997年亚洲金融风暴嘅临时措施，结果此一措施却维持咗十年先修正。外资企业15％（内地企业35％）亦系唔公平竞争，已实施咗三十年。最初嘅目的只系为咗吸引外资，依家外资太多要逐步取消，亦系正常。

八十年代香港弃制造业而万马奔腾咁走向房地产，作为一个城市嘅后遗症已咁多（例如1997年7月房地产泡沫爆破后嘅六年衰退），再睇睇英、美依家嘅苦况，以及1990年日本房地产泡沫爆破嘅后遗症。中国如果任由上述嘅事件喺境内重演一次，真系非常士刁拔（1990年嘅日本系无知；1997年7月嘅香港系士刁拔、去年嘅美国系故意。如中国政府继续任由内地房地产赚取较其它行业更高嘅利润真系好士刁拔，冇得救）。任何国家或民族唔可能只靠房地产升值去发达，日本、香港、英、美及中国都唔得；楼价太高对国家或地区长期经济发展必造成重大隐忧，此乃我老曹一直反对香港实施联汇制度嘅理由。可惜香港政府至今仲执迷不悟。

买楼可以发达？如果你用黄金响公元前429年喺罗马置业（当年罗马帝国进入全盛期），揸住一千年后仍未归本；跟住系欧洲社会进入黑暗时期。而我老曹阿爷嗰辈喺战后返番中国发展，只留低我老曹父亲喺香港守业，家族所付出嘅代价亦唔想提（因睇错大方向系投资上嘅死罪）。

依家中国制造业缺点系冇自己嘅品牌（甚至未能成为世界品牌；因缺乏原创技术，一切核心技术都系入口）。冇R&D支持下，中国品牌点样打入世界市场？唔少人仲话品牌系用广告建立嘅。广告固然重要，但建立品牌背后嘅力量系R&D，广告只系辅助性质。有咗自己嘅品牌，产品边际利润才可提升，才可化解「达摩克利斯之剑」。台湾及东南亚国家九十年代起经济唔可以再创新高，就系台湾及东南亚国家嘅品牌无法打入国际市场，理由系佢地相信广告创造品牌；反而南韩却能建立国际品牌，理由系喺强大嘅R&D下出现咗创新技术。最终中国经济可唔可以逃出台湾及东南亚嘅框框，好似蚕蛹化蝶，更加精彩？就睇呢几年矣。

四伯爽

无意中发现这个讲广东话潮州音很重的UNCLE系列 (这个系列很长，这边只放一个连接）
看了超感动，又超惭愧的
或许现在你的事业，人生很不如意。希望这个Uncle讲的东西能带给大家一些激励
共勉之

http://www.youtube.com/watch?v=h8hRjZViZvU&feature=related

[ 本帖最后由 四伯爽 于 14-8-2008 11:13 PM 编辑 ]

linkinwei

怎么楼主没再连载了？？

Mr.Business

是咯。。。可能楼主出门了。。。

linkinwei

等楼主转载好久了，终于忍不住自己搜寻了一下，找到了有关文章，暂代楼主转载。请楼主包涵包涵小的越职。


商品牛市玩完

8月12日，周二。恒生指数跌218.45，收21640.89；成交700.52亿元。8月期指跌315点，收21489点；9月期指跌300点，收21420点。期指倒挂现象继续存在而且在扩大中。

紫金矿业（2899）挫5.8%，收4.52元；招金矿业（1818）跌9.5%，收5.75元；江铜（358）挫5.1%，收10.5元。因金价跌2.6%至802.27美元，呢个价系去年12月21日以来最低；铜价再跌1.4%，收每吨56420元人民币。

李宁品牌将扬威海外

国家统计局主管嘅《中国信息报》近日发表题为〈2008年第二季度经济述评：市场不支持高房价〉嘅文章，受呢篇文章影响，香港中资地产股好似远洋地产（3377）、北辰（588）、富力地产（2777）、中国海外（688）、华润置地（1109）及上海复地（2337）皆有唔同程度嘅跌幅。

沪深三百跌0.52%，收2444.16。

中国人民银行前年至今共发行三组奥运纪念金银币，发行价8000元（人民币．下同），2006年第一组（两枚金币及四枚银币）一度炒至22000元，依家已跌至16000元；2007年发行一组，市价只得10000元。其它好似奥运火炬接力纪念章、历届奥运火炬金银条、纯金奥运十二生肖、奥运金银玉及奥运五福娃如意等都喺度跌价。甚至最近发行嘅奥运钞票，唔少投资者亦响过度炒作时被套住。奥运仲举行紧，有关嘅产品因过去炒得太高而回落。政府嘅宏观调控首要任务已由「防过热、防通胀」，转为「一保、一控」。8月1日起调整部分纺织品及服装等商品嘅出口退税，系2006年下调出口退税以嚟首次回调。过去内地普遍受三率两价（汇率、利率及出口退税率；劳动力价格及原材料价格）因素影响，令工业股跌完可以再跌。踏入今年8月客观形势改变紧！商务部部长陈德铭表示，国家对劳动密集监管业所遇到嘅困难已表示关注，并同企业界及国际社会发出咗一个讯号！不过，仍系有保有压，除「一保、一控」外，另取消两高一监产品嘅出口退税，即高耗能及高污染嘅产品仍系政府力压。近期央行亦向商业银行发出指令，喺信贷方面可加大对中小企业嘅支持，全国性商业央行喺信贷规模基础上调5%；地方性商业银行可上调10%。人民币已连续十个交易天走低，创出人民币汇率改革以嚟最大一次贬值。

换言之，国家对制造业嘅态度已出现变调。由从前嘅打压改为稳定政策，适时微调。随住通胀率渐受控制，中央再次出手防止经济出现大幅下滑，包括进一步提高个人所得税嘅起点，同时又降低咗储蓄存款利息税去鼓励消费，以便中国经济喺降温过程中，GDP增长率唔好大起大落。

1972年嘅奥运会成就咗Adidas品牌；1984年嘅奥运会成就咗Nike品牌；今年北京奥运会否成就咗李宁品牌？李宁（2331）2004年6月28日喺香港上市，计划2018年成为世界第五大体育用品品牌。今次嘅奥运会，李宁企业系中国、西班牙及瑞典运动员嘅独家供货商。产品喺中国市场占有率10.5%（Adidas 15.6%及Nike 16.7%），估计李宁起飞燃点奥运主火炬后，中华民族嘅自豪感大增，令李宁品牌最低限度喺内地可同外国品牌有得争！李宁唔止喺1984年洛杉矶奥运会上一人攞咗三枚体操金牌（至今内地无人能破）；佢更系商业奇才，将名气换成财气，创立咗自己嘅品牌令中国人人向往，成为少数以品牌取胜嘅公司；李宁品牌下一步能否扬威海外？有人话呢次点火行动最少值四十亿美元。

油价确认熊市

美元由弱转强，国际油价由7月11日嘅147.27美元回落到114.45美元，跌幅达22%；中国A股市场大跌至近期新低，可能系反映中国经济减速；只有印度Sensex及香港国指7月份上升6.64%及5.01%；菲律宾上升4.76%算系表现唔错，其余都冇乜表现。前景展望系美国房利美及房贷美喺新会计法规下需集资750亿美元，而美国政府唔愿注资，令股价喺8月份再暴跌。

俄罗斯股市跌幅已超过20%同时只得八倍P/E，卢布亦大幅回落，外资正由俄罗斯股市大撤退。今天因宣布撤军而令股市及卢布汇价反弹，但已发出熊市讯号。

7月中美国证监会禁止抛空到8月13日到期，会唔会引发新嘅抛售潮？美国金融危机根深蒂固，令股市唔可能忽然间变成牛市。主因系金融业本身受房地产影响而产生极紧嘅信贷，呢一个因素令其它行业亦好极有限（金融业有经济脊骨嘅称号）。所谓分散投资（包括地区及唔同行业）最终亦避唔开金融业下陷所产生嘅信贷收缩影响。William Fries（管理178亿美元嘅Thornburgh International Value Fund基金经理）认为，今年下半年通胀率慢慢咁上升，经济慢慢咁放缓，情况好似水刑（water torture）咁，投资者D资金慢慢咁流失。减少承担风险夜晚可安心瞓觉！

尼日利亚事件、伊朗核武可能引发以色列与伊朗冲突、飓风警告、委内瑞拉动乱、土耳其油管事件，以及俄罗斯挥军入侵格鲁吉亚（两大产油国），但油价由147.25美元回落到114.45美元，跌幅超过20％，可以确认系熊市。喺上述嘅新闻刺激下，油价仍无法大升；美国汽油价格回落到每加仑3.81美元！美国系全球最大嘅石油消费国，根据国际能源机构（IEA）嘅数字，今年起美国对石油嘅需求喺度下降紧；好多人认为石油需求缺乏弹性，其实唔系，例如美国人改揸悭油汽车或唔揸车坐集体运输工具，以及冬季唔好将室内温度保持响二十五度，已可令石油再次出现供过于求。1980至2000年石油供过于求15％，可令油价由45美元跌至10美元。需求上升下又升到147美元；家吓石油已供过于求2％，系咪再次进入油价回落期？

中国生产商利润有暗涌

7月份英国通胀率升4.4％，较英伦银行嘅目标通胀率2％，高出超过一倍；英国7月份楼价指数回落到83.9（4月系94.7），系1978年以嚟跌幅最大嘅一季，理由系面对信贷收缩；零售业销量下降，加上估计10月份CPI可升上4.9％，令英国无法减息。

中国7月份CPI升6.3％，系第三个月回落（6月系7.1％），中国GDP增长率连续四季下降，证明中国经济进入冷却期。中国通胀率相信已见顶；估计到今年第四季可跌至4.5％；中国生产价格指数估计今年第三季见顶，但生产商同时面对世界经济增长放缓，利润亦无法回升。

日本7月份批发物价指数升幅系二十七年新高，上升7.1％（6月上升5.7％）。面对燃料及原材料上半年大幅上升，更多企业执笠。不过，日本银行无条件加息，因第二季GDP下降2.3％。日本造纸宣布9月起纸价上升10％。

摩根士丹利同意回购Auction-Rate债券约45亿美元，最迟喺9月30日开始。

黄金、白金及白银跌至七个月内低点，令商品价格进入咗熊市。金价由3月17日嘅1032.7美元至今已回落咗22％；白金及白银较高价回落咗36％及33％。标普GSCI指数由7月3日至今回落咗21％【图】，确认商品价格进入熊市。因此，早应减持资源股同能源股，今年上半年GSCI升41％，踏入7月3日至今回落咗21％，引发熊市讯号；愈嚟愈多讯号证明商品牛市已死！澳洲最大嘅黄金生产商Newcrest Mining Ltd、日本最大嘅镍矿公司Sumitomo Metal Mining、南韩最大嘅钢铁厂Posco及全球最大嘅矿公司BHP Billiton股价都系咁跌。

1971年我老曹第一次跟位大马主朋友入马场，佢话畀我老曹知佢只马赢梗，我老曹用咗500元（当年月薪只得1500元）买Win，结果佢只马跑第二，跑第二买Win系冇钱赔嘅，从此我老曹就唔再赌马，因为我老曹感觉唔到娱乐性，加上要花太多精神喺拣马上，甚至跑第二而买Win都冇钱分。过去一直同呢位大马主保持联络，直到1997年佢问我老曹借钱，礼拜六要我老曹到银行等佢；银行经理同我老曹倾计时问我等边个，当佢知道系等某某，佢话呢个大马主近日财政有问题，小心借出去嘅钱冇得还，于是我老曹离开银行，从此冇咗呢位朋友。不过，佢嘅拣马方法我老曹应用喺股市上又几有用。

六招拣股／马策略

一、唔好场场赌；有心水先赌，冇心水就唔好赌。

二、跑第一叫Win、跑第二叫Place及跑第三叫Show，其它唔使理。跑马嘅目的系一场马中点样拣出第一、二及三；股票亦一样，要买就买龙头股，其它唔使理。

三、拣赢出嘅马难，拣会输嘅马容易；一场马如能剔除50%跑唔出嘅马，你便赢梗。其实买股票何尝唔系咁呢？森池兄亦经常喺恒指成分股中拣其中一半投资；策略就系嚟自呢位大马主。

四、大热唔买、大冷唔买。赔率少于一点二倍唔买，赔率大过一点五倍唔买；因为大冷经常跑唔出，大热亦经常倒灶，最好买半冷门（即中价股）。

五、孖T唔买、三T唔买及过五关者唔买，因为赢面极低。上述只系博彩唔系分析；换言之，期指、期权及衍生工具赢面不及股票。

六、Do your Homework。例如睇晨操、研究马匹嘅状态、品种及脾性等，唔同嘅场地及天气往往有唔同嘅结果。

上述六招赌马法系咪有用，唔清楚，因为1971年第一次输钱后我老曹便冇咗兴趣，反而将赌马嘅策略用喺买股票上，却发现几有用。

今天传媒纷纷患上政治狂躁症，保持独立思考及头脑冷静愈来愈重要。

电视机上观众往往问分析员某股短期点睇？我老曹常发笑。正确嘅答案系：「如果我知，都唔使上电视啦！」又或者系：「甚至我知，点解要免费话畀你知？」唔炒短线者系几十年经验累积嘅结果，其中95％同分析市场心理技术有关，系唔会免费教人嘅。正系会考状元年年有，股市炒手最难求。

我老曹从来唔信散户喺短线中有出色嘅表现，一如未经训练者又点样喺奥运中攞金牌嘅道理一样。

linkinwei

中国要学星巴克

8月13日，周三。恒生指数跌347.57，收21293.32；成交693.16亿元；8月期指跌282点，收21203点；9月期指跌284点，收21136点。

今天工商银行（1398）跌5.4％，收5.25元，因瑞信降低评级；建行（939）跌6.1％，收6.2元；港交所（388）跌3.1％，收103.5元；联通（762）跌4.3％，收14.8元；国美（493）跌5.2％，收3.27元；利福国际（1212）跌8.6％，收10.42元。投资组合进入熊市，蚀钱系无可避免嘅事。我老曹去年10月已经采用三七分，即30％投资至今损失唔少，70％资金摆喺银行亦只能收2.5厘息（美元存款为主）。喺熊市唔系表现勇气嘅时候。

为发债签对赌协定

环球资金正由金砖四国（BRIC）回流番美国，今年标普五百指数只回落12％，同期沪深A股回落54％、印度回落25％、俄罗斯回落21％及巴西回落15％。美国减息七次，至2厘；巴西加息1.75厘，至13厘；印度加息1.25厘，至9厘；俄罗斯加息1厘，至11厘；人民币多次收紧存款保证金率。

沪深三百开始企稳，昨天升0.02％，收2444.67。

联储局调查报告显示，今年第二季80％美国境内嘅银行收紧贷款标准（4月份调查时只得60％），相信系5月开始股市又再回落嘅理由。本周一摩根士丹利所发行嘅债券，穆廸将佢降级，由Aa3降至A1令大摩股价下跌6.1％；房利美跌3.7％、房贷美跌4.1％、JP摩根跌9.3％及UBS跌6.2％，令股市又再出现抛售。根据MeredithWhitney喺《新财富》杂志估计，未来两个月超过二十五个金融机构仲要集资！

《上海证券报》追查碧桂园（2007）今年2月与美林签署一纸对赌协议，因而累到碧桂园冇咗4.428亿元。嗰时碧桂园以19.5亿港元融资作为抵押品，合约2013年才到期；如股价上升美林就赔钱，股价下跌碧桂园就有损失。呢份对赌协议作用系为碧桂园发行可换股债券，可惜2月15日至8月12日公布业绩时碧桂园股价跌咗36.67％，形成碧桂园账面蚀咗4亿多元。唔少上市公司为咗发行可换股债券而签咗上述文件者（例如某纸品厂及某造纸厂），随住熊市来临，呢D协议纷纷变成上市公司业绩亏损。

《上海证券报》亦报道咗国家税务总局及海关总署打算重新开征黄金增值税，呢个建议畀黄金行业大力反对，仲喺度争拗紧。1994年税制改革后，黄金增值税采取优惠政策好似金矿、冶炼生产及销售等免税，对配售黄金采取即收即退（即表面上收但即刻退番）；进口黄金原料就实行零关税。令十四年嚟黄金增值税系名存实亡。如果奥运之后重新开征番黄金增值税，业界认为对佢地呢行打击好大。

1989年六四事件后中国GDP增长率一度回落到4％；1997年亚洲金融风暴后中国GDP亦回落到6.5％。去年10月起A股回落，相信今年中国经济开始进入软着陆期。当年化解六四事件压力系利用人民币贬值；化解1997年亚洲金融风暴系推出出口退税。相信2010年中国嘅内部消费可取代出口，成为中国经济向上嘅另一增长动力，问题系今明两年呢段青黄不接期又点？

唔好重量唔重质

今年上半年上游企业（原材料生产者）利润上升64％、中游企业（原材料加工者）蚀咗8％及下游企业利润上升32％；其中饮食业获利上升41.4％，但公用事业却负增长68％。下半年又点？估计石油及天然气获利仍升47％及煤矿升13.7％；内地房地产面对压力因上半年销售额减少7％，下半年进入减价促销期；CPI今年2月升幅8.7％见顶后回落；食物价格4月见顶回落。由于今年工资升幅较大，中国CPI今年仍保持住高增长（例如5％）。因此，整体货币政策仍系从紧，个别行业从宽。今年全年出口增长率估计19％及入口增长率27％；下半年人民币升幅减慢，估计年底见6.6兑1美元。今年上半年出口升幅最大系机械上升35.9％，其次系电子升16.9％，第三系纺织品升15％，其它产品升幅收窄。估计下半年机械出口升幅收窄，反而电子及纺织品仍可保持上半年嘅升幅。

估计A股熊市三期极有可能喺明年出现，至于系边一季仍要观望，因影响因素好多，例如油价由147.25美元回落到100美元，定系反复向上重见200美元？

星巴克1999年只有二千间咖啡店，到去年已超过一万间；并以每天开五点五间嘅速度增长。结果令管理层牺牲咗质量而搏命追求量嘅增长，喺好多唔应该开店嘅地方亦开店，唔应签嘅贵租约亦签咗，甚至连麦当劳亦唔请嘅小伙子一样照请，因扩充太快唔够人用。过去错误嘅决定系造成今天（或将来）唔愉快局面嘅原因。终于星巴克痛定思痛重新收紧番标准，将唔合规格嘅咖啡店执笠。管理层重新将注意力放番落质量上而唔系数量上，最终结束咗长达三十七年嘅扩张期，努力将经营重点由提升服务达到从前开业时嘅标准。

中国由1998年至去年连续十年GDP保持10％以上嘅速度增长，大量低收入农民变咗制造业生产员工，终于中国亦面对劳工唔够、原材料涨价及美国需求增长率放缓嘅问题；一如星巴克，中国唔应该再强调GDP增长率而系服务质素，唔好再建造全球最大嘅商场而人流不足，以及唔好再生产蚀本货。今天全球十大商场有七个喺中国（其中四个较美国商场仲大）。佢地唔系起喺地价便宜嘅美国，好似Alberta嘅WestEdmontonMall（美国人要揸车去买嘢），而系起喺地价昂贵嘅北京。去年中国GDP中49％与制造及出口业有关（美国系20.5％、英国18.2％及日本26.2％），中国点样由制造业转型到内部消费而唔引发经济放缓？银行收紧信贷，令地下钱庄收取15到20厘息嘅贷款，今年呢次软着陆都好惊险万分。

气候有春、夏、秋及冬；月有圆缺；人往往希望百尺竿头更进一步（到百尺竿头仍唔收敛，往往跌进深渊）。以工厂为例，永远扩充嘅结果系必然有一天面对客源不足而要低价抢客，跟住系蚀本咁争客去保持市场占有率，最后就执埋笠。

中国未来五年点样适应每年GDP只上升8％？更加唔好谂如果有一年GDP增长率只有6.5％（例如1998年）。中国制造业面对生产力过剩，甚至减价抢客，营业额升幅仍然有限。

农产品今年丰收

OECD国家今年起每天石油需求减少六十万桶（减幅最大系美国达2％），今年石油新需求来自新兴工业国，令今年全球石油需求每天仍升八十万桶（原先估计系一百万桶），今年新增产量每天一百万桶；明年每天一百二十万桶；去年8月到今年7月油价上升唔系因需求增加而系资金由股市流向金市及油市造成，理论上油价今年7月已见顶嘅机会好大。去年12月美国通过限制私家车石油效率法案（系1975年以嚟另一次），由家吓每加仑行17哩标准到2020年每加仑最少行27.5哩，以及汽油内含乙醇量到2020年上升五倍（欧洲标准由家吓每加仑行35哩上升到45哩）。中国部分城市如上海及北京对四驱车抽重税率去提升汽车用油效率；印度、印度尼西亚、马来西亚及台湾正逐步减少对汽油嘅补贴10％到30％，估计奥运之后中国亦加入。IEA估计，如果各国减少汽油补贴可令全球每天减用四十万桶油；如中国取消汽油补贴，中国耗油量可减少10％令全球减少3.5％嘅需求，石油立即进入供过于求期。

农产品方面又点睇？过去两年恶劣天气令澳洲、俄罗斯及乌克兰等小麦减产。美国水浸及乙醇计划亦刺激食品价格上升，超过两年农作物全球失收喺过去四十年只发生过三次，有理由相信今年起丰收，令供应紧张嘅农产品纾缓下来（天气难测，今年系咪大丰收，年底先至肯定）。

金属极受全球经济景气嘅影响，其次系能源价格（例如南非电力不足引致金属减产），中国过去大搞基建令全球金属价格上升，假设明年全球GDP增长率唔及今年，有理由相信明年金属价格冇能力创新高。

债券又点？1981年9月30日美国十年期债券见15厘系从来未见过嘅高息；其后债券价格平均每年上升9％（未计利息收入）亦系二百年内少见。2003年6月十年期美国政府债券见战后最低利率3.1厘后又点？长达二十二年嘅债券牛市系咪喺2003年6月结束？

美元升反为衰退先兆

美汇指数已升穿下降轨，但未超越前浪嘅78点，所以未能确认美元转势，短期喺74点到78点牛皮，如升穿78点，美元可睇好，反之只系牛皮市【图】。过去三年美元兑日圆回落27％及兑欧罗回落33％，今年7月起系咪美元转强？美元回升显示美国步入衰退嘅机会极大，令美国人由全球抽番资金回国减债。呢次油价暴跌唔系因供应上升而系需求下降，亦反映经济走向衰退。

战后国际货币体系以每盎斯黄金兑35美元为基础，各国自订与美元嘅汇价，叫做布列顿森林体系。呢个体系系1971年8月15日由尼克逊总统宣布废除，各国货币汇价可自由浮动亦可继续同美元挂钩；1976年再签订浮动汇率制合法化，各国货币必需逐步走向自由浮动唔可以长期同美元汇价挂钩，1976年后各国货币汇价出现更大嘅波动；1987年10月G7连手逼日圆升值及2005年要求人民币升值就系嚟自1976年嘅协议。

自1971年美元同基金脱钩后，全球通胀率唔受控制，今年美元购买力只得1971年嘅4％（即1971年100万美元身家，今时今日相等于2500万美元），可见货币贬值嘅速度真系几惊人。

另外，多谢各位支持，研讨会广告刊出两天内所有入场券已被订购一空；迟嚟嘅电话已无法满足。多谢大家仁慈嘅心，协助苗圃为内地筹建学校而慷慨捐款，我老曹代表受惠者向大家鞠躬。

linkinwei

次按烧到中国身上

8月14日，周四。恒生指数升99.39，收21392.71；成交611.54亿元。8月期指升134点，收21337点；中国海洋石油（883）升7.5%，收11.2元；中国铝业（2600）升6.8%，收6.8元；中国龙工（3339）升14%，收6.89元，因德银推介。

花旗推介港交所（388），估计今年每股获利4.68元，减少19.1%，P/E二十二点八倍，目标价137.8元；恒隆地产（101）今年每股获利1.75元，升241.9%，P/E十三点五倍，目标价34.34元；安徽海螺（914）估计今年每股获利2元，升29.6%，P/E十七倍，目标价42元。

沪深三百微跌0.05%，收2443.51。

美国7月份银行接管物业大升三倍，即系话美国房地产喺度恶化紧，其中内华达州最差、加州第二差及佛州第三差。

日本又面对衰退威胁

波罗的海干货指数连跌二十三个交易天，系2005年第三季以嚟最差。高盛估计，明年再回落40%，2010年再跌47%，因为干货轮周期见顶。虽然一连跌咗二十三个交易天，依家租金仍较二十年平均价高出两倍。

美元一个月内上升6％，挑战美汇指数去年12月嘅78点高位；呢个系2002年2月美元开始回落时所形成嘅下降轨阻力，由嗰年起计，兑欧罗跌幅超过50％，估计美汇指数喺78点争持。7月份美国零售业减少，系五个月内首次。唔包括汽油嘅7月份零售减少0.2％，减幅最大系汽车，减少2.4％。

日本第二季GDP收缩0.6％，再次面对衰退威胁。日本建屋商Urban Corp因无力清还23.5亿美元负债而申请破产，令日本银行股回落。日本楼市泡沫爆破后十八年仍有余震，影响之下Tokyu Land跌5.3％；NTT Urban Development Co.跌6.1％、Urban跌48％，至32日圆，以及Kansai Urban Bank因担心贷出嘅60亿日圆无法收番而跌10％，至52日圆。

欧洲第二季GDP跌0.2%，欧罗汇价高企令欧罗区经济陷入不景气。

英国面对滞胀，估计CPI短期仍企喺5％，然后明年跌到2％。英镑有减息压力而令英镑急跌。英伦银行警告，明年英国嘅GDP可能冇升幅，甚至出现一季或两季嘅负增长。柏克莱跌7.1％、莱斯银行跌6.2％、皇家苏格兰银行跌6.4％、Enterprise Inn.跌11.2％、马莎跌10.1％、DSG跌15％、ITV跌10.1％及Punch Taverns跌11.2％。伦敦West End租金喺度回落紧。酒吧、写字楼及商店系英国最昂贵嘅物业，今年下半年亦面对租金回落（价格早就跌咗）。

8月14日中国海关总署发布分析报告指出，今年首六个月中国货对美国出口增速首次降至单位数，上半年出口1167.9亿美元，增长8.9%，低于总体外贸出口21.8%，较去年同期低9个百分点，系七年内首次得单位数增幅。其中广东省跌8个百分点、江苏省跌22.9百分点，上海及浙江回落7.6及8.7个百分点。四大地区对美国出口占中国出口美国总值75.7%，其中服装系负4.8%增长、手机负28%增长、塑料负28%及玩具负5%增长。美国已成为中国第二大出口市场，可见次按危机对中国出口美国嘅影响好大。

联储局要谂计

中国上半年石油存量六百万公吨，产品存量最少四百万公吨，因政府要求较高嘅存量；下半年需求估计较上半年升6.7％略少。估计全年嘅需求上升4.8%，因油价高企及中国GDP增长率放缓；IEA估计，中国下半年石油需求将增加6.2％，需修订；相信下半年需求只有4.5％增长，较IEA估计每天少十二万五千桶。令全球下半年新增需求由每天九十六万桶，降至每天八十四万桶。上半年中国石油入口升13.6％，如非增加存量，估计入口只上升6.9％。理由系中国石油储存设施新起好，为咗应付奥运而将存量上升到足够应付十五天嘅消耗。如上述嘅估计正确，年底油价应喺每桶100到110美元。今天油价止跌回升、金价反弹及道指回落，因8月8日止原油库存减少四十万桶，汽油库存减少六百四十万桶。

至今为止，全球金融机构已为次按拨备5000亿美元，估计仍需拨备10000亿美元。上述亏损可令消费（C）及投资（I）减少；美国政府今年5月退税后，7月份嘅财赤已超过1000亿美元，全年财赤接近10000亿美元，未来进一步退税嘅条件唔存在；即政府财政政策（G）亦无法刺激经济。无论从C、I及G角度睇，再次引发通胀力量真系好有限。因美元购买力下降而引发成本推动通胀（例如2003年至今年上半年透过美元贬值而产生嘅通胀），未来亦必须由贝南奇发明新方法，才可抵销15000亿美元呆坏账所引发嘅通缩压力，联储局已透过TAF（Term Auction Facility）向银行提供二十八天到三十五天嘅短期贷款，数目已达8100亿美元去保持银行嘅偿付能力（solvent）。另外，联储局又创造了TSLF（Term Securities Lending Facility），令银行可以用难流通嘅证券作抵押，向联储局换取资金。TAF加TSLF令联储局已提供15000亿美元信用贷款畀美国各大金融机构，但仍然无法阻止金融业下沉，未来联储局仲有乜嘢新方法？

经济「单料铜煲」好麻烦

7月8日美国财长保尔森中东之行，相信系受到以科威特为首嘅中东国家放弃本国货币与美元挂钩嘅影响，至于佢答应咗乜？从最近美元走势系咪有一D启示？

美国楼价已跌咗20％，过去五年入市嘅三分一物业买家已变咗负资产；如楼价再跌10％，后果真系唔敢谂；熊至今未去冬眠，仲喺度搞破坏。格蛇话美国楼价明年上半年见底，理由系新供应减少及到咗可负担嘅水平；真系咩？

全球经济由楼价到消费信心及商业景气到零售数字；美国、欧洲、日本、中国及印度嘅麻烦喺度逐渐浮现。工业活动通常较信贷情况慢九个月左右，即今年下半年起先浮现，因来自美国、加拿大及欧洲嘅订单喺度减少紧。下半年对原材料嘅需求减弱，无论能源及原材料价格，宜利用每次嘅反弹作出售之用。日本极有可能已进入衰退期，佢嘅造船厂订单已面对取消；越南及南韩正以加息对付通胀，甚至响土耳其君士坦丁堡嘅建筑机械需求亦喺度下降。

近月股市方面因油价及原材料价格回落或有一定嘅支持作用，但今年下半年上市公司业绩肯定唔及去年下半年，明年上半年上市公司嘅业绩亦肯定唔及今年上半年，即系股市反弹后仍有回落嘅压力。

事实证明喺经济环球化嘅环境下只有延迟（Delay）而冇分道扬镳（Decoupling），美国次按危机慢慢喺欧洲及日本感觉到，至于中国嘅反应更激烈，出口放慢远超过美国，因中国经济49％活动由出口相关业务推动，仍系「单料铜煲」式经济（即热得快、冷得快）。唔似美国及欧洲等成熟经济已系多元化，任何行业对整个经济影响力都唔会好大。

以香港为例，1973／74年出口不景，股市一落千丈；1981／82年出口不景，对股市影响力已减弱咗好多，今天出口只系香港经济其中一环。香港经济已由七十年代嘅过分依赖出口有关行业，渐渐走向多元经济，唔再系「单料铜煲」式经济。

熊二游戏唔易玩

展望下半年，石油及原材料价格因需求减少而回落，低潮喺明年上半年。股市底部可能同过去唔同，例如唔同行业喺唔同时间内见底，形成咗参差底机会好大。工业股唔少已由2003年起回落，经过五年回落期唔排除喺今年下半年寻底；内地零售股仍喺上升周期；原材料股可能喺明年上半年先见底；内地银行股同地产股要睇人民银行嘅决定。

大户出货未必系坏消息，亿万富豪Carl Icahn今年7月增持自己系大股东嘅房屋建筑公司WCI Communities 14.5％，该股7月29日每股市值1.31美元，四天后下跌至59美仙，跌幅达54.9％；呢间公司喺上周一宣布破产，亿万富豪喺一个月内冇咗1.13亿美元身家。因大户入货而唔用脑袋分析，肯定系连恤衫都输埋（Lose your shirt）。

熊市二期游戏规则叫做Hit and Run。喺唔稳定时间做唔稳定嘅投资，并唔系叫你投资自己唔识嘅项目，而系唔可以长期揸住（buy and hold）。只有牛市一期才可采用买入后揸住嘅策略。一般散户系咪识得捉熊脚？如果唔识都系持盈保泰好。因为Hit and Run游戏中，85％投资者都系输家，你可唔可以成为嗰15％！

linkinwei

美次按后遺症有排搞

8月17日，周日。Nymex原油價格下試200天移動平均線（110.18美元），如果跌穿唔系乜嘢好消息，只系代表經濟進一步放緩；三十年期債券利率已跌穿200天移動平均線（4.513厘），代表后市利率易跌難升；金價早喺8月5日跌穿200天平均線（890.9美元），上周再失守阻力區796.5美元，有能力下試另一支持區729.5美元。

本周注意力喺油價110.18美元攻防戰，支持區喺108.23美元，如果守穩可反彈上試120.73美元；反之會下試78.4美元。

歐羅兌美元200天線（1.523美元）喺8月8日失守，下一支持位喺1.4174美元；美元兌日圓支持位喺108.85日圓，阻力喺113.88日圓。

道指200天移動平均線（12470點）已成上升阻力，下一支持位200周移動平均線（11722點）喺上周亦失守，后市真系几麻煩。

A股點會死

北京奧運基礎建設費用400億美元，分四年搞掂，中國政府喺過去四年每年用喺北京奧運鲉費用只及全國GDP 0.3％；因此，既冇奧運前效應亦冇奧運后效應。北京人口占全國人口1.1％及占全國GDP 3％，所以亦冇溢出效應（Spillover effect）。何況去年至今人行已十次調升存款准備金率及六度調升利率，家嚇銀行存款准備金率上調到17.5％鲉歷史新高，引發企業獲利減少、A股暴跌及房地產泡沫爆破；加上去年10月美國次按危機，令中國工業利潤成長率今年上半年得21％（去年同期系43％）。政府管制價格令煉油部門、發電廠及唔少公共建設部門都出現蝕錢，盈利率下滑必然沖擊A股，政府選擇唔救市，畀A股O由偏高跌番去合理水平。由于中國股市杠杆投資操作唔多，私人投資者亦好少借錢，甚至大企業亦未必需要喺股市籌集資金，除咗投機性買入者損失慘重外，對整個社會沖擊唔大（2006／07年暴升，帶嚟去年10月后暴跌啫）。何況中央政府有足夠工具阻止股市同房地產進一步下跌，例如減息及放寬銀根，政府至今仍冇咁做鲉目的系約束上市公司肆無忌憚鲉圈錢行為、向唔負責任鲉上市公司Say No去增加証監會鲉稽查力量、防止內幕交易成為主流及解決大小非減持壓力；情況好似1973／74年鲉港股，冇呢次熊市鲉洗禮，香港投資者亦唔會咁快成熟。呢D大小非流通股利用十股送三股對價便取得流通權，甚至唔使對價亦能流通，徹底破壞咗市場鲉估值體系。上述鲉問題可以拖得一時，但唔可以拖一世，只好承認現實畀佢地流通，以及畀滬深A股痛痛快快咁跌一次，先系走向市場化鲉正確方法。限售股與流通股同股唔同權及同股唔同價鲉問題遲早要解決；市場不應要求限制大小非流通，點解唔痛痛快快一次過解決晒D問題?!香港1973／74年股市曾下跌93％亦死唔去，何況系滬深A股至今跌幅只系60％？

8月13日出台鲉最新貨幣信貸及外匯儲備數字，証明咗熱錢由中國境內流出，股市繼續面對沖擊系無可避免、人民幣匯價受壓及房地產亦避唔到，滬深股市開始由深秋走向寒冬。銀河証券首席分析員左小雷今年2月估美元下半年走強及熱錢流出中國，加上本周一開始大小非加快減持，沖擊波好大。不過，只要捱過寒冬，春天仲會遠咩？

1980年起全球化一直為世界經濟提供巨大紅利，令各國克服國內資源及市場錯配問題，實現資源喺全球范圍內最優配置。隨著全球化深入及瓶頸漸露，過去唔少國家擁有大量低成本勞動力供應及大量廉價資源鲉時代已結束；反而全球流動性過剩變成國際游資到處投機炒作，令貿易保護主義又重新抬頭。全球化黃金時代結束及惡果逐漸浮現，摩根士丹利6月出台鲉報告擔心潮流開始逆轉；長達二十五年鲉歡樂時光進入告別篇。美元由全球股市及房地產市場回流番美國，估計至10月都系美元強勢期；黃金喺1032.7美元見頂，金價下跌21.89％；白銀喺21.36美元見頂，價格已回落33.62％，熊市訊號已十分清晰。各位可嘗試捉住下跌中鲉刀，上述唔系我老曹鲉嘗好，個人意見仲系利用每次反彈作減持（如各位仍持有大量貴重金屬、資源股同能源股鲉話）。事關美匯指數仲未升穿78點，仍有爭拗。

點填萬億美元呆壞賬？

Jeremy Grantham（基金管理人）去年首先用慢動作火車相撞去形容呢次鲉次按危機。一年過咗去呢個慢動作火車相撞影響慢慢浮現；一卡接一卡開始出軌，危機由一個國家傳到另一個國家；第一卡出軌當然系美國，去年第四季出現GDP負增長；依家系歐洲同日本，今年第二季GDP負增長；今年第三季最大可能性系英國GDP出現負增長。各金融機構已公布撥備達5000億美元，估計仲有10000億美元呆壞賬等候公布。全球有冇足夠資金去填補呢方面鲉損失？

過去GDP高增長鲉金磚四國，GDP增速亦出現放緩（軟著陸只系衰退另一代名詞）！上述情況不但喺中國及印度出現，喺巴西同俄羅斯亦出現，因原材料價格開始回落。美林証券北美洲分析員David Rosenberg估計，由美國次按所引發鲉衰退喺明年年中前唔可能完成。歷史話畀我地知，標普五百喺經濟見底前四個月回升，即美股最少回升四個月，美國經濟先有可能見底。喺美國金融股未見底前，全球經濟唔可能回升。

再睇睇十年期債券與三十年按揭利率關系。去年5月兩者相差系1.37厘，家嚇系2.53厘，過去平均數系1.68厘。即依家為樓按搵買家較一年前要畀多D息，代表買家唔愿購買樓按債券，喺咁鲉情況下，樓價點樣見底？雷曼兄弟打算賣出400億美元商業樓去改善資產負債表，如無法喺市場出售，就打算分拆上市。5月15日至今雷曼鲉股價回落63％，同期標普五百金融分類指數只回落20％。雷曼總共蝕咗80億美元，已集資130億美元；手上物業去年11月市價520億美元，今年5月份只值400億美元；樓按証券5月31日約值294億美元。上述出售可令雷曼兄弟第三季進一步撥備。

寧買當頭起

今天花旗股息有7.2厘；美國銀行股息有8.9厘（如不減息鲉話）。美國各銀行股系咪見底？美國金融股鲉情況加上油價高企，令今年港股忽上忽落，極之難玩，當然仍有人喺今年內賺到錢，但我老曹就冇呢個本事。格蛇猜測明年上半年美國樓價見底，我老曹鲉回答系your opinion is as good as mine !唔少人指責樓市泡沫由格蛇一手造成，搞到佢面對好大群眾壓力；因此，作出上述鲉預測系情有可原，但可信性唔高。喺佢做聯儲局主席鲉十九年，証明咗佢鲉預測能力極低；例如1996年鲉非理性亢奮，道指卻由6000點升上10000點；1999年鲉千年虫事件，成為二十一世紀第一個國際笑話。2006年第四季格蛇曾說：「Most of the negatives in housing are probably behind us. The fourth quarter should be reasonably good, certainly better than the third quarter.」但美國樓價2006年11月至今不但冇止跌回升，反而一直跌到今年8月。既然2006年11月佢鲉預測錯誤，點解我地要信呢次佢會預測正確？

有智慧不如趁勢，勢起時加入，勢盡時退出（寧買當頭起，上升15％時不妨加入；莫買當頭跌，回落15％時不妨退出）。

1980年至今美國住宅貸款上升一百多倍，由10億美元升到今天超過10000億美元，其中有几多住宅貸款將變成呆壞賬？National Association of Realtors公布，第二季全美樓價回落7.6％，被銀行接管鲉住宅樓較一年前上升三倍。加州Sacramento區樓價已回落36％、佛州鲉Cape Coral及Ft. Myers回落33％。瑞信估計，全美8.4％樓按者無力供款而變成呆壞賬。

黃金都唔保值

美國7月份CPI上升5.6％，系1991年1月以嚟最大升幅，但金價卻失守800美元。邊個話黃金可保值？歐羅見1.4721美元，由7月15日1.6038美元至今已回落8.21％，唔系因為美國經濟好轉而系歐洲經濟喺度轉壞。美元一如其它鲉嘢一樣由供求決定；當分析界睇淡歐羅時，佢地被迫睇好美元。德國銀行估計明年歐羅區陷入衰退，以及GDP增長率由先前估計鲉0.8％降至0.1％。明年第一季前歐羅將減息1厘；反而美元唔會減息，上述系睇好美元鲉理由。白金較黃金22％跌幅更大，已達39％；鈀金跌幅更達到50％，上述唔會系技朮性調整而系貴金屬已見頂訊號。商品價格見頂主因系全球經濟前景由穩步向前變成增長減速，甚至出現衰退，令商品供求關系逆轉，由供不應求變成供過于求。因經濟前景較為悲觀，各類商品需求消費趨向疲軟，形成生產商唔急于補充存貨，商品便一下子由供應緊張變成寬松。投機資金因此大量流出期貨市場，令大量投機基金被迫主動斬倉或蝕錢出局。

貴金屬同基本金屬由地下開采需時，今天回收技朮不斷提升，已淡化金屬稀缺特性，例如白金接近100％回收。

上周滬深A股跌5.95％，成交創二十一個月新低，其中地產板塊普遍下滑。媒體報道，7月份社保基金新開二十四個交易賬戶，市場人士期望社保基金入市。雖然第二季GDP仍升10.1％，主要嚟自政府投資基建項目，但人行警告經濟仍會進一步放緩，令人民幣跌至6.87兌1美元。

linkinwei

教大家咩叫對沖

8月18日，周一。恆生指數跌229.91，收20930.67；成交452.2億元；8月期指跌122點，收20899點；9月期指跌114點，收20837點。港股下跌鲉主因系受A股下跌拖累；其次系香港GDP升幅由第一季7.3％急跌至第二季4.2％，見五年內新低，反之第二季CPI升幅卻達5.7％。一如中國經濟一樣，進入下行周期。今天富士康（2038）急跌24％，收5.84元，系2005年2月以嚟最大跌幅，今年恆指回落25％，富士康下跌67％。信和置業（083）亦下跌4.9％；新世界（017）跌6.2％。
滬深三百下跌5.48％，收2313.4；上海A股下跌5.33％、深圳A股下跌5.92％。中信証券跌8.7％、海通証券跌10％、潞安環能跌9.2％、山東黃金跌8.6％及中國神華跌5.2％。上周六中國証監會鲉六條救市措施，周一開始實施，不但未能令股市止跌，反而擴大跌幅，創二十個月新低，近五百只股份跌停板，98％股份下跌，上升鲉股份只得三十五只。

內地基建隨時減速

外需大幅度下滑引發中國經濟增速放緩，估計今年第一產業升幅只有3.5％,第二產業今年第一季較去年第一季下跌，主因受雪災影響；第二季逐步改善又受到煤電油運供應緊張鲉瓶頸約束；第三季面對歐美訂單減少。甚至第三產業增幅亦只有10.6％，較去年低2個百分點。外需下滑及內需面對通脹壓力，無法大幅上升；未來如外需繼續下滑，依家政府大量投資鲉基建項目亦需減速，以免搞到尾大不掉。因為投資基建項目鲉目的，系為咗加強出口競爭能力。如果出口增幅持續下滑，明年鲉基建投資亦需減慢先得。

另一個令人擔心系由深圳開始鲉樓按斷供潮暗涌，正向其它大城市擴散。家嚇全國只有深圳及東莞樓價較去年8月高峰回落三分一，其它城市鲉情況唔算嚴重。

國務院宣布，今年8月20日起焦炭出口暫定稅率由25％上升到40％；煉焦煤出口稅由5％上升到10％、煙煤出口稅10％、鋁合金出口暫定稅15％，擔心煤炭股及鋁股受壓。

浙江省政府8月17日宣布重大建設行動計划，2010年起滬杭磁懸浮列車開始興建，滬杭客運專線明年開始興建，滬杭磁懸浮全長199.434公里；其中城際線（長三角區聯絡線）長164.577公里、上海機場聯絡線34.857公里，浙江段長103.553公里，設嘉興及杭州兩車站，總投資220億元人民幣，2014年建成，今年至2012年計划完成投資65億元，今年開始沿線各市政府負責做好土地預留、規划選址及環境評估前期工作。

內地食用油價一路下滑，本周每噸9400元，下調咗40元（較月初已下跌2000元，跌幅達17.54％）。內地食用油市場已由去年供不應求到依家鲉供過于求。

英國8月份樓價較一年前下跌4.8％，平均每個單位售229816英鎊，因缺乏借貸渠道，倫敦跌幅更達5.3％，將大大影響英國第三及第四季GDP增長率。

花旗推介和黃（013），估計今年每股盈利4.1元，較去年減少43％，P/E十七倍。目標價94元。

次按做教材

我地成日聽到對沖（Hedging）呢個字，但唔少人仲唔知對沖系乜，只知系同時買入及拋空某D股份；為增加大家對對沖鲉認識，我老曹就以去年次按危機為例，解釋對沖鲉運作。

去年8月次按危機出現，聯儲局為金融體系注入資金以免情況惡化；9月開始到今年4月聯儲局把美元利率由5.25厘降到2厘，面對上述鲉情況身為對沖基金經理應該點做？

一、假設次按危機惡化，歐美銀行股同金融股股價必然大幅下跌。第一個做法自然系拋空歐美銀行股同金融股。假如次按危機冇估計中差，銀行股同金融股反因聯儲局減息而上升咁點辦？基于以上假設，去年9月對沖基金不但大量拋控歐美金融股同銀行股，同時買入咗大量中國內地銀行股同金融股。理由系：甲、如果次按危機惡化，歐美金融股必首當其沖，內地金融股必系受影響最少者，跌幅自然唔及歐美金融股。如拋空歐美金融股，買入中國內地金融股，只要歐美金融股跌幅大過內地金融股已可賺大錢；乙、如果美國減息令全球金融股上升，唔受次按影響鲉內地，金融股升幅一定較歐美金融股大。因此，對沖基金去年9月起便喺歐美建立空倉，喺香港建立好倉。此乃9及10月港股內地金融股突然大升鲉理由。今年7月14日美國証監處立例禁止「裸空」至8月13日止，對沖基金被迫喺呢段日子補回去年9月拋空鲉美國金融股，同時拋售響香港上市內地金融股，面對巨大外資拋售內地金融股壓力加上「外資」大量流出（因平倉），造成7月15日港股下跌。上述對沖行動叫做跨境對沖，即同時拋空歐美金融股及吸納香港上市內地金融股，亦系最常見鲉對沖行為。

二、次按危機出現，聯儲局減息必然引起美元匯價回落，商品價格上升。進取型基金經理去年9月大手拋空歐美金融股并將資金用作購買商品期貨（尤其系原油）。呢類對沖行為叫做跨行業對沖，但風險極大，因一旦睇錯市可以兩頭輸。如果睇啱就左右逢源賺到笑，形成資金喺去年9月由股市流向商品期貨。上述鲉對沖行為亦因美國証監立法阻止無貨拋空而被迫平倉，形成歐美金融股股價急升，相反原材料價格尤其系期油就急跌。

去年9月對沖基金拋空歐美金融股，買入本港上市鲉內地金融股；進取對沖基金拋空歐美金融股，呢D買入商品期貨行為，叫做建立長短倉。今年7月14日至8月13日受法例所限而平倉叫做Unwind。Unwind引發香港鲉內地金融股、油價及商品價格受壓，而美元急升，相信Unwind到8月13日已完成，但唔代表對沖基金從此睇好歐美金融股（記住只系平倉）或睇淡內地金融股（都系平倉啫），更加唔代表睇淡商品期貨及睇好美元（兩者都系平倉）。進入本周，大部分對沖基金position應該系square（中文好難譯，意思系獱空倉及好倉皆唔多）。下一步點，則謀定而后動，估計全世界金融市場開始靜番落嚟；明白對沖行為后，可較了解近期一連串發生鲉事，而唔系咩睇好美元、睇淡期貨等。

只喺香港進行較小規模鲉對沖行為，例如去年9月起拋空內房股，買入本港地產股。因為內地人行一再抽緊銀根及加息，內地房地產遲早下跌；去年9月起香港因追隨美元減息，香港房地產必上升。上周五內地官員講話及人民幣匯價連跌十一個交易天，睇嚟內地利率再上升鲉機會唔高，內地銀行存款准備金率再上調鲉機會唔大；反之香港卻有加息壓力。本周開始自然買番內房股，沽售本港地產股平倉。呢段日子內房股跌幅較本港地產股大好多，亦系賺到笑。上述系十分粗簡鲉對沖行為，但一般散戶做唔到，因無法借貨拋空，但最低限度亦應該知道人地喺度做緊乜，唔好一見買盤便以為睇好、一見沽盤便以為睇淡咁無知。

美元反彈好似玫瑰

上月美國新建房屋下跌9.9％，至九十九萬間，系十七年內最少；上月美國生產商價格指數估計升0.5％；今天期油回升1％，見114.95美元；芝加哥期貨市場估9月份美國加息機會只有14％，令金價升1.4％，見798.95美元；美元回升一如玫瑰（玫瑰雖美，卻長滿刺）。唔好太早肯定D乜嘢。

近期熱錢令越南經濟滑向危機邊緣。今年6月6日越南國家銀行發出通告指出，外匯自由市場只能買進外匯而不能將外匯賣畀個人，要賣只能賣畀國家，違規者嚴懲。令過去兩個月越南大部分外匯代理店生意蕭條，因只能同游客買入外匯然后賣畀國家。越南股市曾一瀉千里、越南盾大幅貶值、通脹持續攀升及外貿逆差迅速擴大（越南股市由去年10月10日1110.78，回落到今年6月20日364.32，喺國家加強管制后，局面總算穩定落嚟）。過去十年越南經濟保持年率7.5％增長，特別系去年更達到8.48％歷史性新高；加上政府喺吸引外貿方面采取極為寬松及優惠鲉政策，引致國際熱錢不斷咁增加，去年信貸升幅更高達53.8％。國內唔少大企業更將資金投入股市及房地產造成股市及樓價急升，今年熱錢飽食遠飛，引發咗去年10月到今年6月鲉下跌狂潮。6月6日政府推出一連串政策后，7月份通脹率較6月上升1.13％，系今年內最低升幅，總理阮晉勇要求加大宏調令明年CPI升幅回落番7％到8％之間，到時經濟下滑危機先算受控制。

中韓均有熱錢流走

南韓經濟亦面臨股市低迷、韓圜匯率下跌及通脹壓力加大；南韓又一次面對海外熱錢大規模加速撤離。7月共賣出6.2萬億韓圜（61.1億美元）股票及2.7萬億韓圜（26.6億美元）短期債券，韓圜兌美元下跌7.7％。8月4日政府大量拋售美元支持本國貨幣（7月外匯儲備已連續四個月下滑至2475億美元，學者指出其中2000億美元短期必須償還外債，即系真正可用鲉外匯只有500億美元）。面對國際資本市場1萬億美元鲉對沖基金，擔心政府拋售美元行動支持唔到几多日；雖然8月7日同時宣布加息到5.25厘。

7月16日1美元兌6.8128元人民幣，至今已回落到6.8649元人民幣，代表國際熱錢7月16日起亦從中國撤出，賺取升值利潤。中國政府擁有全球最多外匯，自然唔使擔心，加上中國政府喺呢方面作出准備，尤其系汶川大地震后，已准備國際熱錢流出。只系樓市及股市因熱錢流出而雙雙低迷。國際熱錢好可能有咗新鲉投資戰場而結束喺中國鲉暴利之旅；從呢點睇，內地股市及樓市繼續有下調壓力。

北京奧運會正如火如荼咁進行；投資市場喺度講奧運低谷效應。雖然我老曹已一再指出，北京奧運只系運動會同經濟無關，唔應該有奧運前效應亦唔應該有奧運后效應。1984年洛杉磯奧運、1988年漢城奧運、1992年西班牙巴塞隆拿奧運、1996年亞特蘭大奧運、2000年悉尼奧運及2004年雅典奧運都冇后奧運效應。

6月份中國電力消耗只上升8％，咁樣計中國GDP增長率放緩速度好快（中國電力消耗乘1.2系中國GDP增長率），隨著城市人收入升幅放緩及股市產生負財富效應，擔心今年第四季開始內地消費升幅亦減弱，令內地銀行股、電訊股及零售股前景蒙上陰影，但呢D皆同奧運后無關。

日本第二季GDP出現負2.4％增長。NikkoCitigroup分析員KiichiMurachima估計，第三季GDP又回升令今年全年GDP上升0.8％；明年GDP上升0.6％。最快明年下半年日本GDP先有較穩定鲉增長。呢種時好時壞鲉GDP增長率系1990年后日本經濟特性，令日本經濟衰退淺而長。理由系日本原材料接近全部入口，加上境內消費力弱令日本產品無法加價，一旦原材料價格上升，企業純利便走下坡；原材料價格回落，企業純利又回升，形成日本經濟1990年起時好時壞。

linkinwei

原帖由 linkinwei 于 20-8-2008 05:50 PM 发表
环球资金正由金砖四国（BRIC）回流番美国，今年标普五百指数只回落12％，同期沪深A股回落54％、印度回落25％、俄罗斯回落21％及巴西回落15％。美国减息七次，至2厘；巴西加息1.75厘，至13厘；印度加息1.25厘，至9厘；俄罗斯加息1厘，至11厘；人民币多次收紧存款保证金率。
（93 ...

请问一厘等于多少？１％？那，是不是在巴西如果放FD，IR 为１３％？

四伯爽

对不起 各位
小弟由于出外公干 公司的手提电脑没有中文软件 所以不能登录佳丽
不过 今天终于装置了谷歌中文 可以来吹水了

linkinwei君，谢谢你帮我把文章放上来

1 厘就是1%咯 巴西的13%利息是很高 不过通货膨胀更高

linkinwei

还望大大见谅。。。

btw,真的好想把钱丢进巴西噢 ＞＜是不是有办法效仿一些新加坡人，看到了利率差，拿着钱过来大马放进FD？？

四伯爽

（此篇文章版权归作者曹仁超）

中國經濟半冷半熱

8月19日，周二。恆生指數下跌446.3，收20484.37，成交484.65億元。8月期指跌544點，收20355點；9月期指跌556點，收20281點。東亞銀行（023）跌3.9%、信置（083）跌5.3%及中國鋁業（2600）跌3.1%。

花旗推介長江基建（1038），估計今年每股獲利2.4元，升13%，P/E十四點七倍，目標價40.5元；亦推介平安保險（2318），估計今年每股獲利1.98元，減少24%，P/E二十一點七倍。

美國飲食業出事

今年7月15日嘅道指系咪熊市「中途島」？美國經濟衰退喺去年第四季已開始，明年年中前都好難結束；衰退結束前，上市公司純利只占美國GDP7%而唔系依家嘅14%。美國過去每年起屋量系一百四十五萬間，只有2003年至去年上升到每年二百萬間，較平均數高出30%，樓價每年上升20%，更連升六年，理由系 2001年1月起開始減息。上一次樓價見頂系1988年，1989年出現信貸壓碎（creditcrunch），令大量S&L（儲蓄及貸款機構）出問題，令1990及91年出現消費減少。呢次2006年7月樓價見頂，去年8月出現次按危機，今年下半年先開始出現消費減少，相信明年情況無法扭轉。美國儲蓄率已由今年第一季0.3%，上升到第二季2.6%，估計仲會上升。

美國方面調查顯示，38%消費者未來九十天會減少出外用膳，10%會增加。增加外出用膳費用者只占5%，43%話會減少出外用膳消費，睇嚟美國飲食業正進入不景氣。

滬深三百升1.52%，收2348.47。招商銀行升3.2%、上海電力升10%漲停板，因高盛估計中國政府下月上調電價、粵電力亦升5%及華電國際升5.8%。

央行8月15日首次表態，建議畀民間借貸機構合法定位，推出放貸人條例，畀小額貸款公司及民間錢庄陽光化規范化，唔再系地下錢庄而系民間借貸組織。作為紓解中小企業及三農資金困難，打破商業銀行正規金融機構壟斷市場嘅格局，相信放貸人條例出台后，民間借貸利率將降低。個人小額擔保貸款由最高嘅二萬元提升到五萬元；小企業擔保貸款由最高嘅一百萬元提高到二百萬元，利率系人民銀行公布嘅貸款利率上浮三個百分點。小額擔保貸款政策由2002年開始，到今年5月全國發放小額擔保貸款175億元，中央及地方政府貼息19.37億元。相信放貸人條例出台后小額貸款需求可大幅增長。

美國爆發次按危機后雖然聯儲局大幅減息，美元大幅貶值但衰退仲陰魂不散。歐美日經濟紛紛出現GDP負增長，令世界經濟下行。對高度依賴外貿嘅中國，出現加入咗WTO七年內出口增幅首次下滑，下半年到明年上半年將系中國最困難嘅時期。過去中國由出口、投資基建及消費三頭馬車而行，但真正拉動經濟仲系出口。依家危機系出口增長率放緩。中央政策已由「兩防」轉為「一保一控」：一、確保全年經濟仍能平穩增長（例如增加紡織品、服裝出口退稅及商業銀行信貸額）；二、繼續控制物價過快上漲。估計第三季GDP升幅10.2%。中國經濟既要防止經濟滑坡出現，亦要防止通脹惡化。中國私人消費占GDP36%（唔似美國咁占70.2%），可唔可以抵擋得住占GDP49%嘅出口及投資增長率下滑影響？

點刺激消費？

中國希望刺激內需，但每二十個成年人中只有一個有信用卡（唔系預付卡），點樣刺激消費？中國工業發展已面臨能源與供需缺口，石油2010年供需缺口一億二千萬至一億七千萬噸；天然氣及煤炭缺口三百億立方米及五億噸；另一方面，環境制約亦日益顯現，中國經濟增加值分別較美國、日本及德國低22.99％、 22.12％及11.69％；加上產品缺乏知識產權及專利少，只憑工資夠平此一中國特有王牌。隨住沿海地區工資水平上升及熟練工人缺乏，此一優勢自 2004年起已慢慢減少，但中國出口產品2004年后價格仍迅速下跌，制造業能給嘅利益已按年減少。因為科技創新能力弱、品牌建設不足、物流支持唔夠、基礎設施依然薄弱及缺乏熟練技工與營銷管理人才，到今年已危機四伏，中國制造業仲可以向前行几遠？

以勞力士表為例，一只已可賣2萬几元；反之，中國自己嘅品牌機械表一只只能賣200元。分別喺邊？有時甚至唔系生產技朮、產品款式甚至材料而系營銷能力；中國產品就系無法賣出好嘅價格！不但手表系咁，其它產品一樣系咁，永遠停留喺薄利多銷嘅水平，中國產品几時先能夠跳出呢個框框？

中國鐵路網絡計划喺2020年前增加一倍；超級公路增加75%；城市內道路增加66%；機場增加70%；港口增加280%。咁多基建項目上馬但出口增長率放緩，最后結果會點？

俄羅斯反對美國喺東歐布防御導彈，尤其喺波蘭及捷克引入愛國者導彈系統，擺明系針對俄羅斯。呢次入侵格魯吉亞因佢嘅總統薩卡什維利首先派兵入侵欲脫離佢嘅南奧塞梯及申請加入北約。俄羅斯擺明唔畀面美國，目的系向波蘭及其它國家施壓。如果美國以保護歐洲為名到波蘭境內建立導彈防御系統，歐洲局勢將好復雜。各位唔好忘記俄羅斯今天擁有2250億美元美國政府債券，如果喺市場拋售……。

金價由今年3月17日1032.7美元，回落到8月15日 772.98美元已完成前升幅50％調整，理論上進入支持區。至于可唔可以完成前升幅61.8％，即下試730美元？冇人知。技朮上睇，金價喺730至 773美元之間重建基礎有機會進入黃金第二上升階段（第一階段系長達二十一年熊市結束，各國政府增加貨幣供應，孕育咗黃金牛市）。值得注意系白金走喺黃金之前，例如去年9月已創新高、今年2月見頂回落及7月已大幅下降，都走喺金價之前，如白金價止跌回升，可重新睇好黃金。如果美匯指數升穿78點就另計。

油價又點睇？今年5至7月出現油價上升，而石油股下跌嘅現象，呢個系今年7月我老曹認為油價見頂嘅理由；踏入8月情況又啱啱相反，即油價下跌，而石油股牛皮。擔心108美元將系呢次油價嘅底，油價喺度重建緊基礎！

1969 年黑龍江珍寶島事件，中俄發生軍事沖突。基于敵人嘅敵人就系朋友理論，尼克遜總統1972年訪華，開始聯華抗蘇政策！1989年六四事件及蘇聯解體后上述政策先停止。1998年俄羅斯發生債務危機，美國提供援助令兩國關系又再轉為友好。呢次俄羅斯入侵格魯吉亞，未來美俄關會點發展？亦將影響美國同中國嘅關系。

夏日戀情太短暫

滬深A股由2005年11月16日847.49升上去年10月17日5891.72，調整61.8％系2774點，無論你點分析，內地已進入熊市。喺熊市中有反彈，但喺熊市完結前不宜入市。去年10月嘅Boom正改變成Bust，歐美日GDP有機會出現衰退（連續兩季GDP負增長），中國GDP絕對唔會出現負增長。不過，佢嘅GDP增長率如果由11％放緩到8％，對股市影響超過OECD國家GDP連續兩季負增長！道理好簡單，有錢人冇咗1億元只會唔開心；中產階級冇咗1000萬元便節衣縮食減少消費；中下階層家庭冇咗100萬元已有人想自殺。

中國嘅問題系上萬間工廠面對破產威脅，可令接近一千萬工人失業；政府則拚命增加基建投資去令GDP保持增長。形成GDP保持高增長，股市卻狂瀉。中國同出口有關嘅行業占全國GDP49％已陷入不景氣，另外51％如基建及服務業等卻過熱。中國嘅問題系「半邊經濟過冷、半邊經濟過熱」，你話點搞？

7月15日至8月13日美國証監限制「裸空」，令道指由7月15日10827點升上8月11日11867點，升幅達9.6％。恆生指數受外國對沖基金平倉影響，只由7月16日20988點升上7 月24日23369點，升幅達11.34％，呢個夏日戀情實在太短暫（只維持一星期）。

五窮六絕七翻身嘅7月只有一星期升市便玩完，由此可見博反彈几難玩。香港由7月24日起及美國由8月11日起又再受制于熊市，至于香港有几多人可以喺7月16日至24日反彈中贏錢？聽講只得無線電視藝員葉翠翠。

全球股市資金變不足

去年10月股市進入Secularbearmarket，喺熊市初期做bargainhunters代價往往系蝕多D。至于采用buyandhold策略嘅人就唔知家嚇心情系點？喺次按危機壓力下，全球六十五萬億美元嘅CDS（CreditDefaultSwapes）有几多會出問題？專家估計數字高達 15000億美元（至今已公布4865億美元），最終應引發通縮而唔系通脹。根據TrimTabsAdviser嘅數字，去年8月次按危機至今年7月止共有1470億美元資金由股票基金流失，令全球股市由流動性過剩逐步走向資金不足。

道指完成7月15日至8月11日嘅反彈后，新一輪金融股拋售潮又再開始。房貸美及房利美繼續令人擔心。摩根士丹利8月5日已通知客戶暫停home-equitycreditlines（即用住宅做抵押嘅客戶，唔可以再獲新嘅借貸），加上唔少大金融機構必須向客戶回購AuctionRateSecurities。過去各大金融機構共出售3300億美元 AuctionRateSecurities，如果全部回購，大金融機構未來借貸能力又點？

7月16日《華爾街日報》「Heardonthestreet」專欄分析雷曼兄弟公司市值只得90億美元，去年12月賬面值232億美元（已加入6月份增資數字），市價只及賬面值 39％，點解咁平？如果為公司1610億美元Level2資產減值5％，再為413億美元Level3資產減值25％，雷曼極有可能要撥備190億美元；咁樣一嚟雷曼資產淨值只得40億美元，依家市值90億元變成唔系平反而系賬面值一倍！今年7月15日起美國金融股反彈只系投資者仍以去年12月賬面值評估今天市值而以為平咗，其實系貴。

投資就系喺困難日子買入財政健康嘅公司，唔系喺繁榮日子買入管理不善嘅公司。

各位認為今天美國房地產財政健康咩？各位認為美國金融業管理良好咩？7月15日起道指由10827.71開始嘅上升系平倉定系睇好呢