【专题讨论】转载香港頭條網陸羽仁, 王雅媛的文章

Mr.Business

注：此篇文章版权归香港頭條網所有。

莫吃眼前虧         

2008/2/18 上午 09:51:50
網誌分類: 經濟

網友Bigcow問話匯豐（０００５）好抵，但會否再低？我估好多人係匯豐粉絲，早前講到匯豐都有好多人有反應，所以不妨再講吓。

過去一年，有個中環茶友經常提醒我，小心匯豐，佢在美國次按的業務係大炸彈，又脫唔到手，匯豐的英國董事會又唔夠大刀闊斧找管理層開刀，所以鬼佬大行對匯豐幾唔睇好，外資大戶要插大市時實搵匯豐來插，隨傳隨到，永無失拖。

所以我講匯豐時亦比較小心，對網友問起匯豐時都唔會答得太具體，由於網友的問題多數無講清楚自己係長線或短線，我最怕長線和短線的觀點混淆咗，亂答累死你。不過如今都可以講得具體啲，我認為短線買匯豐唔係幾買得過，你可能即刻有反應，話無理由匯豐無可能反彈，甚至大反彈？我並唔係話匯豐唔可能反彈，如今美國金融股如碧斯所言，有一個１０％、２０％的大反彈，匯豐一定會彈，但我的問題是如果美股彈，港股又彈，匯豐會唔會係最突出的股份呢？

香港恒指可以分成三大部份，匯豐佔其一，紅色巨股佔其一，地產股佔其一，三分天下，若美股彈，港股彈，匯豐彈，你估恒指彈唔彈，你估紅色巨股彈唔彈，你估地產股彈唔彈？你要我估，我估若匯豐反彈，恒指的反彈幅度唔會少過匯豐，即係買盈富基金（２８００）都會差唔多，甚至好啲。點解會好啲？如果紅色股或地產股反彈得仲勁，超越匯豐，咁盈富的升幅就會大過匯豐。從一個短炒的角度，匯豐是弱股，唔係唔會彈，雖然跌得多，但反彈未必會多過人。

若講短線，我其實睇好紅色巨股多啲，因為大陸A股已跌了一段時間，主要是年頭宏調和法人股解凍所致，雖然宏調措施都未出齊，但消息會慢慢消化，而解凍股唔似會在低位狂沽，所以大陸股市都係近底。唔好忘記仲有個港股直通車，呢個措施未死，要出亦可以好快出，而且多數係喺港股便宜時推出，所以紅色巨股好有條件短線跑贏匯豐，若唔識揀股，買匯豐不如買恒生H股基金（２８２８），兩隻去跑，我睇好２８２８多啲。

匯豐的問題是美國和歐洲業務，中線而言（講一兩年），頭頂有一把懸劍，就係美國次按危機的幅射未完，壞消息未充份反映，如我今天在頭條日報的專欄提到，美股可能有大反彈，但今年下半年怕佢彈完又嚟料，信用卡的壞帳潮又到，匯豐在美國的次按賣唔到，歐洲業務又怕被美國拖累，所以中線匯豐不能睇好，較好的情況是在大波幅內行走，股價在１００元至１３０元間走動，未有條件向上大突破此波幅太多，若較壞的情況出現，不能排除下半年會下穿波幅試底，買佢小心吃眼前虧。

若問好長線匯豐買唔買得過，我會覺得匯豐的基本管理資素良好，若在低位吸，揸五年以上，當係債券咁收息，或者有得諗，又舉一個例，以長線計，若唔買匯豐買恒生H股指數基金，就係買中國經濟仲有十幾年快速增長，紅色巨股的管理唔好，但高速增長可以填補管理缺陷，所以紅色巨股是高風險、高回報的股份。但如果匯豐賣掉美國次按業務，以其優良管理，則是低風險、中回報的股份，如何選擇要自己決定。

好多股民愛匯豐，是受佢過去長期高增長所影響，期望這種高增長可以再來，但我要話俾大家知，匯豐下跌前的兩三年的高增長期，主要是收購美國業務而來，但那個收購為她帶來大災難，她在那幾年中國生意（甚至是印度和俄羅斯這些新興地區）還是較便宜時，沒有大手落注，錯過了這個機會，想追都好難追，所以未來匯豐即使醫番好，也不是過去那隻又穩陣又高增長的匯豐了。

陸羽仁

[ 本帖最后由 Mr.Business 于 18-2-2008 11:05 PM 编辑 ]

Mr.Business

2008/2/19 上午 11:35:33

陸羽仁覆網友

我昨日講了匯豐，我只想大家用比較客觀的方法去看一隻股，及比一條股和其他的股份，唔想大家盲目看好匯豐，也唔想大家盲目看淡它。

例如珍西寶，你月供開匯豐想停，我覺得你唔使咁激進，月供係講十年二十年的事，匯豐的強項是管理較好，照計時間愈長對佢愈有利。我估匯豐長線應可與恒指同步，增長慢過跑得快的紅色巨股，但快過恒指中的弱股。珍西寶如月供組合內多過一條股票，不要放棄匯豐，月供要轉股，都係等佢貴時才轉，不是便宜時轉。

小潘、bigcow等，匯豐跌得多不排除會彈，但紅色巨股同時跌得時，彈都人地彈得多啲。

Zipany:做嘢想成功最緊要「博命」，人地行一步，你行三行，人地做信差送信兼蛇王，你快步去早人半個鐘送到（當跑步健埋身），老細自然會睇得起你。唔好等老豆幫你諗下一份工做乜，大個仔，要自己衝條路出來

Rayray:你問我鐘意紅色股為何揀恒生H股基金（２８２８），唔揀A５０基金（２８２３），有長短線原因，長線好多朋友講緊月供，是十年八年之事，A股貴H股三成以上，十年後可能已兩股合一，所以現時買H股揸十年等如有三幾成折讓，QDII和港股直通車如通行，都會收窄兩者的差價。短線美股都在醖釀反彈，若美股彈H股會行得先過A股，還有港股直通車是一個可能突如其來出現的好因素，所以短線也先買H股。２８２８可以現價買一半，等佢跌一成再買多一半。

我估第一季港股餘下日子會在２１０００點至３００００點走動。

你問地產分類指數今年重上去年高位機會是否少過一半，我估略高於一半，主要睇美股。

你早前買了中石油、中鋁以及和黃，想彈近２５０００點減持，我覺得唔能一概而論，因為２５０００點是好淡分界，如能上穿２５０００點，走勢會轉好，若只論走勢，應在上２５０００點，之後回落明顯守唔住時才沽貨，咁樣價位雖然無咁好，但不會錯過可能有的反彈，點做要自己衡量。我估你上面的問題亦係短線問題，若是全年計，今年住後高位唔止２５０００點。

Rayray:中石化在內地發可換股債，對H股來說中性偏好，公司資金多了可投資，換股的股份是A股，無增加H股供應。

Hau:中銀香港有次按風險，但你入貨價１６．３元，夠便宜，防守性強。

Wenthlyn:8.8元買了新鑫，無止蝕，到而家可以守吓。

Yuki:散戶無大力造淡，可以慢慢造淡，不斷開淡倉，一樣有同樣效果。大公司業績好有點助力，但主導香港大市的不是大公司的業績，除非有大戶部署了借公司業績來炒。

Ken:大市唔係主要因為accumulator 或ELI而跌，佢地只係放大器，係下跌的助力。而家清得六六七七啦。

S2000:奧思是細股，以派高息吸引人，PE１４倍以細股講幾高，我唔敢建議，只係話若買入要嚴守止蝕。

陳永仁：想投機中石化、國航、上電、百麗，如果大市得，這幾隻都OK，中石化和國航大路啲。

Flyinthesky:你計樓的租金收益率無錯，用年租金總回報除以樓價。

Eatfish:錦江現價OK,現價可以分段吸。

Mr.Business

注：此篇文章版权归香港頭條網所有。

奧思——投資者的美人
2008年2月19日

上周的頭條Victoria說過估值便宜而又派高息的股票，有機會成為○八年投資者的資金避難所。上周的大市便有一個好例子，它便是主要從事分銷~H2O+及露得清護膚品，及經營水療美顏中心的奧思集團（1161）[股價及相關新聞] 。

美容院及瘦身公司近年在香港大行其道，但不少人因不喜歡它們的宣傳手法，都會拒絕投資這種股票。但只要賺到錢的生意，它的股價最終都是會反映它應有的價值。現代美容（919）[股價及相關新聞] 於○六年初上市，一上市便跌破招股價。

○六年中它的股價為一元左右，而每股的淨現金竟達八角五仙。除去淨現金，用每股大約三角的價錢，去買一間○七年每股可賺兩角的美容公司，根本是超值。不合理的估值不會維持太久，故集團股價很快便止跌回升，最高曾見四元以上。

奧思集團（1161）[股價及相關新聞] 的估值絕對沒有像當時的現代美容低，不過它有一個頗吸引人的買點，便是有內需概念。當公司公佈○七年業績時我便留意它，當時它的市盈率低於十倍，息率卻高於十厘。我覺得很奇怪，集團○七年全年盈利為四千多萬，但派息卻派了五千多萬，集團於國內的銷售業務才剛剛步入收成期，為何可以派那麼高的息?就因為這個疑問，我並沒有買入此股份。結果是奧思集團的股價自公佈業績後到上周五為止升了七成有多。

「投機是一種獨特的選美活動，在此遊戲中評判員應選的不是個人心中的美人，而是評判團總體判定的美人。」雖然奧思集團不是Victoria心中的美人，但它卻是其他市場參與者心中的美人。

王雅媛（Victoria）

http://www.hkheadline.com/news/h ... mp;section_name=wnb

Mr.Business

注：此篇文章版权归香港頭條網所有。

金融High Tea——成交縮快到臨界點
2008年2月19日

港股昨日腳軟回吐，恒指高開196點，見24,344點後，轉升為跌，下午低見23,736，最後以近低位23,759點收市，倒跌389點；期指收市前略彈，收報23,829點，跌447點，比現貨高水70點，成交64,727張。國企指數跌213點，報13,630點，大市成交781億元。

上周五美國市微跌，但日股一開市就高開，帶動港股跟住高開，日本自從上周公佈3.2％經濟增長後，日股轉趨強勢，對美股相對偏強，不過日股昨日後段都回軟，日經指數只升12點，升幅只有0.1％，所以港股下午亦順勢回吐。

暫時睇港股雖軟，順住回吐，但走勢未明朗，特別是成交只有781億，成交較少，有點上落波動，牛皮待變的味道。港股走勢呈一個尖頂向右方的三角型，無論上升和下跌的幅度都在收窄之中，自上月22日見低位21709點之後，第一浪兩日後反彈到24966點的高位；上星期一（2月11日）再跌至22569點的低位，但此低位高於上月的低位，再反彈到昨日日中高位見24344點，高位又低過上一二浪近25000點的高位，波幅正在收窄中，走勢比較沉悶。

油元買平貨歐股升

不過中環茶友話，呢鱓咁樣的悶市，波幅收窄，成交又縮，應該唔悶得好耐，到下星期近期指結算，應會走出一個方向。到臨界點唔插就會升，唔會悶住咁完場。陸羽仁認為呢個月點收場唔知，主要跟纒美股的方向走，但下個月可能會好番少少。

不過昨日歐洲股市初段表現幾好，主要受惠於銀行和汽車股上升，今年至今歐洲股市已跌了12％，現時開始有人覺得跌幅過深，瑞士第二大銀行瑞信集股升幅可人，皆因卡塔爾投資局表示已入股瑞信，並計劃未來一年內，斥資150億美元入股歐美銀行。卡塔爾投資局行政總裁兼卡塔爾首相阿勒薩尼表示，一直與瑞信有往來，他們亦在市場上購入部份瑞信的權益，由於仍在增持，故拒絕透露入股的比例。

內地發3G入直路

近排不斷炒作內地電訊業重組及發3G牌照，瑞信發表研究報告，引述TD-SCDMA行業聯盟秘書長楊驊指，國務院正召開常務會議討論內地電訊業重組事宜，他預料中國很快會發出第三代流動電訊發牌照。瑞信報告還引述楊驊表示，中國料發出三張3G牌照，中移動（941）[股價及相關新聞] 料取得TD-SCDMA制式牌照，中電信（728）[股價及相關新聞] 得到CDMA2000制式牌照，而網通（906）[股價及相關新聞] 則透過併合中國聯通（762）[股價及相關新聞] ，取得W-CDMA制式牌照以進軍移動通訊市場。中移動率先發展內地制式3G，由目前在內地10個城市推行TD-SCDMA建設，擴展至第二階段的300個城市。

瑞信認為，電訊業重組在今年上半年或有公佈。在四大中資電訊股中，瑞信最看好網通，給予其「跑贏大市」評級，目標價26.5元。另外，中移動近期股價下跌，也為投資者在其3月中旬公佈2007年第四季良好業績前提供買入機會，該行目前對中移動評級亦為「跑贏大市」，目標價153元。

至於中電信及聯通，瑞信認為重組的大部份利好因素已反映，故評級僅為「中性」。

昨日電訊個別發展，中移動跌2.1%，網通跌2.7%，聯通升0.7%，中電信升幅收窄至1%。

另外，內地媒體刊登「商品大王」羅傑斯致中國投資者的一封信，他在信中指出，中國股市自05年見底後開始上漲，雖然目前存在波動，但預期增長將會持續一個世紀，並強調中國不會失敗，也不會衰退。羅傑斯認為，中國高速發展的經濟，令到許多產業都存在覑巨大的成長空間，包括電力、能源、旅遊、傳媒、農業、基礎設施及高科技產業等，投資者都可以通過股市來投資這些領域。我地買內地股都可以參考纒。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

隧道尾的亮光         

2008/2/19 上午 09:57:32
網誌分類: 經濟

昨晚歐洲股普遍造好，倫敦升２．７５％，法國升１．９％，德國升２％，但美股本在一個回吐氣氛中，無乜力水，結果道指跌２８點收場，收報１２３４８點。

網友mkm早兩日問過一個問題，值得大家參詳吓，佢問：「Luk Sir, 各位師兄師姐，最近在反省﹐究竟是自己EQ問題﹐IQ問題, 定係MQ(mud Q)問題﹐點解自己投資唔掂呢? 自己的組合由+20％變成-10%? 07年底我決定看多點書。首先多謝Luk Sir﹐介紹Hedgehogging。」

其他網友都有類似情況，有少少情緒低落，例如網友阿K話自己止蝕完之後組合輸３０％，要諗吓往後係月供、投資抑或投機。

買股票唔順，一定有問題，所以要搵出問題原因，我覺得原因好簡單，就係股市唔升。港股去年大部份時間十分好景，大部份時間走勢向上，自六月更開始抽升，中間雖有回吐，但回吐完好快又急升，簡直有唔買就笨的感覺。這是典型的大牛市型態。

散戶炒股，絕大多數係買股票，即係做好友，好友在一個牛市中，自然係如魚得水，如果炒得狼者，更會覺得自己係股神，全世界都唔及佢炒股咁叻，亦有好多人連工都唔想返，甚至辭埋職去炒股，覺得炒股好揾好多。我哋的網友太喪炒者較少，因為陸羽仁唔喜歡講冧巴，理論上太喪炒者唔會鐘意睇。但即使是投資者比較保守的網友，手揸股票，都會感覺良好。

換一個情況，好友遇上跌市，而且跌完無馬上彈番，你估感覺會點？就好似大家現在的感覺，感覺好差，因為投資開始變成負數，而且好似行入隊道一樣，未見到盡頭，開始有點唔自在了。手上揸重貨者會心大心細，心上無貨者也不能再投入熱絡的股市炒過，自己心情唔愉快了。

今次跌市和去年３月和８月的跌市有點不同，那兩次跌市一跌完馬上就彈，唔使一兩個月股市已去番跌之前的高位，若頂得住無沽貨，坐完過山車無事又來過。但今次跌市自１１月開始，之後雖有反彈，但反彈完一浪比一浪低，而最近上月一浪急插，插完之後大市反彈亦唔太有力，現時更如我在頭條日報所講，營造一個波幅收窄的三角，氣氛沉悶而低壓。

這種市況有幾個原因，第一，美國次按危機的確好大鑊，股市向下炒易過向上炒，第二，基於炒作因素，以外資為主導的港股，去年８月、９月受港股自由行消息及內地資金沖亂了，升到近３２０００點的高位，到外資重新做主後，股市修正回復常態，所以先要有大調整。第三，內地宏調，經濟和股市向下，更令港股欲振乏力。

但陸羽仁對未來兩個月大市的看法，和碧斯睇美股的看法接近，大市短期還在尋底，近月尾結算更波動，但正蘊釀一浪較大的反彈，這浪可能由美股反彈帶起，可能因港股直通車這類消息帶起。相反地，短期內再恐慌性下跌的機會，正在逐漸減少中。

陸羽仁
http://www.hkheadline.com/blog/r ... rd=&searchtype=

Mr.Business

2008/2/20 上午 10:50:02

陸羽仁覆網友

昨日蒙查查，美股無市都無留意，通常升跌不大亦唔去睇，搞錯咗，sorry。

Ray:我係估第一季有較大反彈。美股亦似會彈，但亦怕佢彈完再跌，所以亦恐怕港股會彈完再跌。２１０００點至３００００點上下都未必會到，只係俾大家參考吓，只係一個感覺，唔係幾科學，唔好信咁多。

港股直通車今年內應會開動，或個每個人買股有限額，幾時開車就估唔到，我估在大市低時開車機會大啲，睇吓阿爺覺得幾時夠低，而家都唔算高，唔知遲啲會唔會低啲。

為何地產股和地產背駞，因為上一浪挾高地產股，再上近２８０００點，派了一轉貨，記唔記得一月初你問我，我經常話就到頂，那時單看地產股，已炒過籠，而家無形之手消失，地產股回復「正常」。３５可以開始慢慢吸。

Yuki:你問會唔又上衝不破，久守必失，唔係無機會，但過埋呢個月可以睇好少少。

初哥：月供２８２８都可以，若儲一筆錢買，最好在國企指數在１４０００點以下才好買。記住買股票有風險，太等使的錢不要買股票。

鳯陽花鼓：細股炒浪隨時開始，隨時完，可以炒高一倍派貨，也可以只炒高三幾成就派，睇大市如何，所以炒細股要有隨時起身的準備。記住唔好睇基本因素。

公主：歡迎加入研究股市學投資的行列。

三心兩意：中資股唔知會唔會再深跌，若貨不多，可現價先吸一注，候低再吸，唔好手上乜貨都無，齋等理想價位。

Bdroom：公司批股和配股一樣，是公司發行新股俾街外人認購集資，而供股就係向現有股東伸手，要股東認購新股。

Mr.Business

注：此篇文章版权归香港頭條網所有。

金融High Tea——月黑風高 股仔亂郁
2008年2月20日

經過一輪大起大落，港股好聽叫做進入穩定期、唔好聽叫做陷入悶局，恒指高開281點，下午一度上升高見24,403點，尾市升幅收窄，收報24,123 點，升363點；國企指數漲342點，報13,972點，成交依然奀奀懐，只得788億元。期指收報24,180點，升351點，比現貨高水57點。

生意淡薄，不如賭博，但股市就是賭場，小股民日日都同大戶對賭緊，分別只係有幾博，個市淡靜，交投炒埋不足一千億，大家想搵食，自然就要博鱓，所以今個星期開始，好多股仔又開始郁番，昨日情況仲明顯，十大上升股價全部都係股仔，而且升幅都接近兩成。

股仔今次郁番，藥引係殼股宏通復牌，股價單日升十幾倍，其他莊家跟住起哄，宏通點解會狂升，主要係公司重組完成，發完票據復牌又批股，但這些資料現在要上網睇，老實講有幾多個老散會日日咁神心逐家公司的資料翻閱先？總之大家就跟紅頂白，跟住莊家玩。

大戶發呆 莊家乘機搵食

有個中環茶友話，股仔有得炒，係市靜係可以預期的現象，通常股仔一年會炒一轉，但莊家幾時會發力呢？如果你係莊家，你會諗起舊年情況，舊年第三季，股仔有段時間禾雀亂飛，炒到癲晒，當時茶友仲形容呢類係喪屍股，明白無盈利無派息都可以跳跳纒，後來呢類喪屍係點樣沉寂呢？就係個市成交愈來愈大，幾隻巨型國企炒個不亦樂乎，跟住帶起相關的窩輪，日日有即日鮮炒，由於老散個個吸鰦去大檔，股仔個細檔就靜晒。

茶友話，股仔去年尾雖然沉寂晒，但莊家趁好市都搵到錢，無話因為股仔靜晒損晒手，早排個市係咁跌，股仔跌到加零七，有錢的莊家紛紛趁價錢平兜番鱓貨，等候機會又出來炒作搵食。

咁點解股仔會揀呢個時候發難呢？茶友拆局，喪屍要活動，當然要睇天時地利，現在個市大跌完開始穩定，但大股仲係浮浮沉沉，未成氣候，相關窩輪都悶悶懐，市內的病態股民個個手痕搵№炒，一如係月黑風高之夜，仲唔係莊家出來搵食之時？莊家同餓狼一樣，若然落單無乜戰鬥力，所以要搵食就要成群一齊出動，宏通喪炒等如替餓狼發出獵食鳴聲，莊家見到有人開始出擊，就紛紛鈬料。

狼群式炒股快來快去

餓狼要搵食，當然不是找老虎做對手，而係想係羊咩咩，亦即係老散，不過，森林裏面，老虎又係想食羊咩咩，餓狼又係想食羊咩咩，但講惡餓狼梗係唔係老虎鰟皮，所以只能趁老虎未出鈬之時搵食，所以當個市旺番，大價股同基金大戶又出動獵食之時，餓狼可能又要好似舊年尾匿埋。以前港股老虎唔多，餓狼搵食期可以有幾個月，但現在不但老虎，獅子，鱷魚全部都走來搵食，這些猛獸都要爭食，餓狼覓食的日子好難學以前咁長，所以炒細價股熱潮，來得快也可以去得快，手痕老散認為自己可以趁機賺番筆，不妨落場玩玩，但最緊要記住呢個係森林唔係天堂，係弱肉強食的世界，自己出得鈬行想食人，就要預備被人咬番轉頭，落注前要諗定止蝕位。

講完股仔，茶客當然要講股場兩單消息，一單係新地（016）[股價及相關新聞] 主席郭炳湘突然暫停主席職務；一單係港交所（388）[股價及相關新聞] 行政總裁周文耀明年約滿離職的消息。第一單消息係公司昨晚自動引爆，但內情無交代，《頭條》昨日報道，係同大股東郭氏家族內部有不同意見有關，其中涉及郭炳湘身邊一名女士影響力日大，惹起家族不滿，陸羽仁聽中環猛人講起，話湘少近兩年同自己的私人銀行家交帶，好多重要決策都要同這位唐小姐匯報，所以大家早就知道這位女士存在，今次他忽然為女暫時旅遊休息，有小小出人意表，但純屬私人事務，相信亦不會對新地有明顯影響，所以昨日公司股價亦與大市表現同步。

至於另一單消息，早前周文耀係高位行使一批港交所股權，做法令人關注，所以明年約滿走人，亦都不足為奇。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

炒細股         

2008/2/20 上午 09:58:06
網誌分類: 經濟

昨晚美股起落不大，道指微跌１０點，而亞洲股市低開，主要是憂慮油價重上１００美元一桶會影響運成本及壓低公司盈利，但股市未致有太大波動。美元匯價亦回軟，兌日圓落番去１０８日圓以下，早上報１0７．８日圓。

大市好悶，細價股無聲無息炒起，吸引了大家的眼球，市場流傳細價股這次炒作由宏通集團（０９３１）復牌暴升引發，停牌逾１７個月的宏通本週一復牌，一開市股價馬上飆升，最高報０．５３元，最多急飆１３倍。後來略為回吐，昨日收０．４３元，仍然升到好勁。

細價股炒作唔講基本因素，只講供求，從宏通炒作亦可見一斑，宏通是英特爾授權的主要中港代理之一，已公布的業績就真係唔係幾見得人，０６年全年蝕１．８億，核數師德勤對公司帳目有保留，主要針對一筆為數３６００萬元的存貨作的撥備是否合理，公司和核數師傾唔掂數，所以核數師有保留意見。而０７年上半宏通仍蝕１２０萬，簡單點講宏通已公布的業績並不賺錢。

宏通公告，停牌期間向主席兼控股股東簡志堅發行3.58億元零息可換股票據，主要用作抵銷債務，換股價僅0.0386元。若悉數兌換，宏通須發行92.8億新股,令簡氏的持股增由76%至96.5%，而簡氏已向獨立承配人配售1,600萬股，每股0.388元。另外公司指出,去年下半年透過增聘銷售經理，旗下貿易業務已逐漸改善，對前景樂觀。

宏通炒起起不是因為大家估佢業績好，而係貨源集中，大股東現時持股都有７６％，街貨有限。加上配股價高達０．３８８元，一見佢咁高價配股出街都有人接，就知唔簡單，自然易炒起。

宏通現在發行了２３．８億股，若加埋大股東持有的換股債可兌換的股份，未來總股數可能有１１６．６億股，以現時已發行的股數計，宏通總市值已有２３．８億，加埋可能換股的總股數，以現價計潛在市值有５０．７億。唔知宏通業績改善到乜地步，可以支持２３億、甚至５０億市值？

你可以話，大話最怕計數，也可以話，炒股唔睇數睇供求，兩個講法都啱，如果你買一隻炒味濃的股份，我計完一輪數，話佢唔值咁o既價，你無買，第二日再升五成，你第三日就會罷睇我寫的東西。所以我會分成「投機的我」與「投資的我」去講，睇完咁o既數，投資的我自然唔會吼，你地亦唔好問我這類型股票的基本因素，因為睇基本因素就唔應該買。但投機的我唔同，明知有局，落場玩吓，最緊要明白自己係「鱷口偷金」，偷到唔好食咁深，偷唔到唔對路都要閃，嚴守嚴守嚴守止蝕，係炒細價股最重要保命之道。

有些朋友話唔識分邊啲的股票有莊，邊的股票無莊，其實好易分，若價碼細或市值在１０億以下的股票，你去銀行睇吓股票機，若果買方和賣方都掛滿牌的話，九成九都有莊家活動，因為香港有千幾隻股票，若無莊家炒作的股票，即使基本因素良好，成交都好靜，買賣雙方的掛牌都有少，４、５倍PE的股票比比皆是，但亦由於無莊，這些股票長期都唔郁，或者一年只是兩次公布業績時會炒吓。但若細價股買賣雙方都掛滿牌，好熱鬧，就多數有莊家在「搭棚」，造出熱鬧的氣氛。炒這些股，自己執生。

陸羽仁

http://www.hkheadline.com/blog/r ... eyword=&searchtype=

[ 本帖最后由 Mr.Business 于 20-2-2008 12:25 PM 编辑 ]

Mr.Business

2008/2/21 上午 10:05:14

陸羽仁覆網友

聽網友講學歷講得咁過癮，我又加把咀，我絕對同意不應以學歷為評議人能力的標準。泛民議員經常反對歧視，咁要求一定要有大學學歷才可以做廣播處長又算唔算係一種學歷歧視？另外按同樣邏輯，無大學學歷又係唔係唔可以選立法會議員？因為政府經常被班議員點去做乜做物，若按同樣邏輯，俾無大學學歷o既立法會議員指揮政府，危險咪仲大。張文今次講大咗，邏輯有少少問題。

Ray:我話第一季有較大反彈，其實我係想講未來三個月有較大反彈，即係由２月中至５月中。你問大彈前炒乜位，我都係靠估，牛皮上落，應該係２２０００點至２５０００點中間走。而大反彈就會明顯上穿２５０００點。想買貨近２３０００點可以開始買吓，或者現價跌得好深近５２週低位的優質股份都可以考慮。

你問點解我話下個月可能好少少，下個月大陸開人大，可能大陸因素轉好。美股亦有機在下月中減息前彈番上１３０００點，氣氛在改善中，但美資大行如高盛在大力唱淡，亦令人憂慮。

對大新銀行無深入研究，但大銀行股如匯豐、渣打以至中銀香港都因次按投資受壓，市場又怕細銀行突然爆嘢，所以少機會賣盤的細銀行就無人吼。幾時反彈，既等大市，而銀行股也較落後。

Ken:美國經濟危機深重，信用卡壞帳係下一波焦點。但問題是美股會股災式急跌，還是反幅慢跌，若是前者，港股必定大大鑊，若是後者，就要睇大陸因素，要大陸夠好，港股或者唔會有大事，仲可以反覆炒吓上落。

牆頭草：你話美國佬大隻講，我都好同意，黑人當選總統的機會始終有限，只會在電視劇集「２４」中出現，白人女人好過黑人好多，但共和黨好弱，應該民主黨出總統，如今唯一變數要看３月彭博會否出戰。

Bdroom:向街外配股和向股東伸手供股不同之處，供股股東要再出錢認股，否則權益會被大攤薄，因為供股價多數有較大折讓，你唔供好蝕底，所以股東多數好憎供股。配股出街感覺好少少，特別是如配股價無大折讓，對股價的影響較少。

Wooly:美國市政府債券跌價，令收益率升２０％，有風險，但唔算太大，但香港似乎無買貨渠道。

S2000:唔知渣打最後要為次按撥備多少，但買渣打最好等壞消息盡出，等吓業績安全啲。

Mr.Business

注：此篇文章版权归香港頭條網所有。

炒細股（２）         

2008/2/21 上午 09:19:46
網誌分類: 經濟

昨日港股跟住日股落，以為美國會死，但美股又無事，美股受惠於惠普業績理想及油股因油價大升而抽高，道指升９０點，升０．７％，升到１２４２７點。日股早段受美股上升及日圓回軟刺激，亦反彈了２００多點。

延續昨天講細價股的話題，昨日和經紀張傾起細價股，他身在市場，好多人話俾佢聽收到堅料呢隻有得炒，嗰隻有得炒，有些冧巴他也會跟吓，由於經紀張是穩陣之人，買得好少，而且有乜唔對路即走，我問佢賺多定蝕多，佢話成日想買到一隻細股可以升１０倍、８倍，可惜從未買中過，好多時賺１０％、２０％都會走，但有個別輸咗唔忿氣死揸，真係可以跌到得番啲渣。我再追問佢夾埋賺定蝕，佢話無計數，但估計加埋坐艇嗰啲，都係打個和。

經紀張身在市場，自己又識的「幫莊」（即莊家的外圍打手），炒細股炒上炒落，都係打個和，可見炒細股唔係眼睇咁易賺錢，所以你地「聽人講」炒細股賺幾多幾多，一定要過濾，好多散戶賺錢時大大聲認叻請埋親戚朋友食飯，輸錢暗啞底無人知，所以你聽到人炒細股搵到水，信住一半先啦。

我同經紀張講，你炒細股最大的問題，就係希望買中一隻股，賺１０倍，甚至１００倍，買１萬，賠１００萬，帶住呢個發達夢去漫遊股海，過程好開心，但結局可能好痛楚，經紀張勝在買得細，所以輸時亦輸得唔多。正如馬會宣傳今期六合彩頭獎６０００萬一樣，結果埋單搵最多錢個嗰係馬會，的確有人中６０００萬頭獎，但輸o既夾埋多過６０００萬好多。

我有一個搭順風車理論，細價股有如一架「夢想號巴士」，佢個牌寫o既總站通常都好吸引，專引細路仔上車，掛個牌去迪士尼樂園、去海洋公園、去睇金魚之類，總之呢期興玩乜嘢佢就話帶你去玩乜嘢，引到一大班小朋友開心上車，甚至見到小朋友傻得緊要，連終點站去邊都唔駛講，搵個大聲公吹水話「總之係好玩」，就滾到大班「好天真好傻」的小朋友上車（天真同傻就係細路仔的特微嘛）。

你睇潮流興礦業，就有一大堆礦業股，興木材就有好多木材股，再講早啲有賭業股，IT股，網股。當然１００件「朱義盛」假貨中，也有一兩件係珠珍，真係可以把生意由細做到大，不過多數人無咁幸運揀中真嘢，甚至真係真貨，但只值１萬元的珍珠鏈用５萬元賣俾你，你買中真貨一樣中招。當然最勁者就連概念都無，齋炒起個價來引你，但股民好天真，以眼見為真，見到成交價就信到十足，飛身撲入。

網友siusiudd話，「我知有好多師奶買細價股，貪細價股平，唔係隻股估值平，而係佢買股票的成本平，呢個真係一個好大o既認知錯誤，但你要解釋俾佢哋聽時，佢地仲要當你''發嗡瘋''。」Siuiudd講得好啱，細路仔上咗o架巴士玩得好高興之時，你要拉佢落車，你係爸爸媽媽佢都要同你死過，有理說不清。

但我話呢架夢想號巴士，最終到總站係要將全班細路拐走去賣。所以我同經紀張講，上唔上車，要考慮自己的定力，一般人定力唔夠，一玩個心就失哂控，唔識落車，就唔上車好過。但你自問定力夠，就當搭順風車，每架車搭一兩個站，幾開心都要落車，明知係賊車，就唔好想搭到尾去迪士尼樂園，我話如果１００架車有１架去到迪士尼，你博唔博呀？定係搭一兩個站玩吓就算？玩細價股只能跟一程走一轉，嚴守止蝕，走咗見到人發達，要恭喜佢，祝佢好運坐到去迪士尼呀。

陸羽仁

http://www.hkheadline.com/blog/r ... eyword=&searchtype=

[ 本帖最后由 Mr.Business 于 21-2-2008 02:54 PM 编辑 ]

Mr.Business

2008/2/22 上午 11:43:58

陸羽仁覆網友

金曹：你問大行沽空查唔查到，沽空好易查，但沽空唔犯法，炒個別股份有內幕交易，炒大市無內幕交易，大戶造哂空倉，再借現貨狂沽，無法追究，佢可以話佢睇淡。唔好唔忿氣，外資大戶富可敵國，對美股走勢又一清二楚，無得跟佢鬥。

Ray:你話我講到大市的臨界點，同話下月睇好少少有無關係，都有少少關係，表示看成交咁少，可以愈來愈靜，跟往靜三、四個月，也可以到臨界點，突然向上或向下郁，我較傾向臨界後會再現大波動一種估計。

恒隆有大行睇淡，見今日頭條日報專欄，主要係話當佢大陸發展多，但嘉里和瑞房較資產值折讓更大。

以前講高沽低揸炒大股波幅，開始講匯豐，匯豐風險轉高，改為講中銀香港和領匯，你問我中銀香港次按風增加後又點，我就話又要改，唔好用佢炒波幅，怕佢向下穿。但可炒波幅的大股好多，你以前問過我電視廣播，佢多數在４０元至４８元中間走，有近兩成上落，現價４３元，跌低啲近番４０元，可以入吓炒波幅。

你有中石油近打和價，問沽唔沽好，大市又落到近２３０００點，以上落市計，都可以等一等。

Tong:港交所主要睇大市成交，成交一縮，又維持較長時間，就要趁快沽港交所，佢會慢慢回，後市亦睇成交，如果連續三四個月係咁，港交所有排跌，不過我又唔係睇得太淡，估計大市淡靜唔會維持太耐。

Ling:你有５及１４５，問收股息時收錢好定收股票好，若是長線投資，收股票好，收現錢股息食一兩餐又食哂，無得錢生錢。

Ngkhsammy:１３．２元入中石化，３．１３元入咗中行，你問邊隻好，論股票中石化好啲，因為中行受次按和外匯投資影響，人民幣升值佢係輸家。但你貴買好股中石化，而家沽又太便宜，都係唔好郁。

小潘：租金上升，想吼希慎，都可以，但希慎太保守，派息又唔夠高，股價落後，若換了人做大股東，升一倍都得，但維持現狀股價走勢落後。

Wall:你問我對新地睇法有無變，１３０、１２７、１１７元分三注入得唔得，我對新地睇法無大變，但最近的管理層風波，要搞幾個月，不排除會略影響股價，短線要買新地，不如以同樣價錢比例買恒基，更加穩少少。

港交所想每低１０元入一注，要忍得蝕至得，港交所要彈會好快彈，也有可能回一段時間，若忍痛力夠，才好去買。

若以港交所比恒基，港交所係高險更高，回報亦更高。

Surewin:想分三注入中石化，佢最近受石油價急升拖住跌，一個月低位是７．４１元，可在現價入一注，８元和７．５元入第二、三注。

水滴石穿：降漫遊費和電訊業重組，對中移動都有不利，特別重組後中國電信和網通都取得無線電話牌，多了競爭，但中移動股價主要跟大市，大市升，佢都會跟升。

Bassking 123:中鐵炒味較濃，你講的價位可以分注低吸，但入齊貨要守止蝕。　

any:想買華能，可以現價買啲，等佢插到近６元再買啲。

Mr.Business

注：此篇文章版权归香港頭條網所有。

金融High Tea——地產股升過龍回得深
2008年2月22日

在美股早一日上升帶動下，恒指昨日跟隨外圍高開367點，最高升多過400點，但午後一度轉升為跌，收市前略反彈，仍微升33點，收報23,623點；期指收報23,496，跌134點，比現貨低水127點，成交64,457張。國企指數升9點，報13,561點，大市成交縮減至754億元。

昨日大市上落波幅都有500點，但市況仍靜，成交亦少，但巨股礇豐（005）[股價及相關新聞] 漲1.3%，中移動（941）[股價及相關新聞] 升1%，所以大市升唔起唔關佢地事，主要是本港地產股唔爭氣，跌完再跌，長實（001）[股價及相關新聞] 、恒地（012）[股價及相關新聞] 、新地（016）[股價及相關新聞] 、信置（083）[股價及相關新聞] 、新世界（017）[股價及相關新聞] 及恒隆地產（101）[股價及相關新聞] 跌1.9%至4.3%不等。

昨日陸羽仁講，近日樓價升係炒落後現象，有朋友睇完後哭股喪，問起我地產股點解同樓市背馳，樓價升緊，地產股插得咁急，例如有老友130幾元買鰦長實，而家得番114元，問我今年有無機會見家鄉。

地產股當日炒高派貨

睇番幾大地產股的走勢，又的確係跌得幾甘，新地在1月8日創出175.4元的新高後，昨日見132.7元，從高位下跌24%；恒基同樣在1月8日創新高 79.8元，咁飱又係從高位跌鰦24%；長實之前已較弱勢，新高在去年10月創下，但以1月8日的近期高位148.5元計，如今114.7元，亦跌了 22.4%。散戶若摸頂追入，忍住20%以上的跌幅，都幾肉痛。

我的朋友問我為何地產股和樓價背馳，我話現時的現象，緣起是1月初時升得好急，當時升過龍，而家大市靜，咪回復「正常」囉！昨日地產股又跌，有人話因為睇到美國再減息的空間有限，我就話美國仍有減息空間，但即使美息再減多一厘，但香港再減息的空間有限，這已不是新聞，上月底美國減0.5厘，香港只跟得 0.25厘，由於存款利率減到好低，銀行唔會做蝕本生意，減唔到咁多存款利息，自然唔想減咁多貸款利息，所以香港不能跟到足美國去減。

記得1月初恒地升到72元時，我話升多一成都夠皮啦，我以為要升多一個星期，點知佢過兩日已急升到79元多，升得咁急就唔支持得耐啦！當時已有證券行話樓價要升多五成，地產股股價才合理。

如今要望樓市運到

中環茶友對而家地產股和樓市的所謂「背馳」現象，有兩個解釋，第一，就係當日憧憬美國減息炒到突，如今市靜就打回原形。第二，這個看法陰謀一點，1月8日大市再推上27637點的短期高位，只是期指大戶推高派貨的行為，當時最易有人信就係炒地產股，所以咪狂炒地產股囉，好啦派完貨大市就插，如今係插完自由浮沉的階段，地產股咪背馳，打回原形，去番合理水平。

老友話長實會唔會去番130元樓上，我話睇兩個因素，一睇大市，大市如果上番28000點樓上，地產股都係其中一個上升的火車頭。二睇樓市，去年11月、 12月樓市偷步炒，升得好急，短期升鰦兩三成，如今要慢慢消化，而家發展商新盤勒住未推，如果4、5月新盤推出又賣得好，谷起樓市，地產股可能有得番炒。

股市一沉百踩，高盛大量降低各種股票評級，亦有證券行看淡個別地產股。摩根大通發表研究報告，將恒隆地產的評級由「增持」降至「中性」，目標價亦被調低6%至每股33元，反映經濟前景欠明朗、內地項目發展進度緩慢等因素。

摩根大通話，恒隆地產的同業如嘉里建設（683）[股價及相關新聞] 和瑞房（272）[股價及相關新聞] 現價較每股資產淨值折讓40%，惟恒隆地產的折讓僅17%，折讓唔夠多。

但另一投行瑞銀的研究報告則因應恒隆地產的較高物業銷售呎價，如君臨天下的呎價由以住的1.4萬元提升至1.65萬元，以及較快的預售速度，而調高恒隆的08和09年度盈利預測32%和33%。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

炒細股（３）         

2008/2/22 上午 09:36:51
網誌分類: 經濟
　　
美股又插，皆因油庫存高令人擔經濟會跌衰退，加上一個製造業報告的數字差過預期，令道指大跌１４２點，跌番落１２２８４點，日股早段亦跌２００幾點，看來港股亦要再受壓。

延續細價股的話題，早兩日網友鳯陽花鼓問起，炒細價股會炒到幾時炒完，其實我真係唔識答，可以炒番一頭半個月，可以炒兩日就炒完，完全係好隨意，你買細價股只能自己執生。

你可能追問點解咁隨意呢？或者我可以咁樣去分析。股市內有幾十個莊家，有大有細，佢地幾時做嘢，除咗佢地自己知之外，其他人好難預先知，但通常（記住只是通常，唔係一定）一年都會炒番一轉大大地，炒完派貨搵番的使費，唔係人地今年邊有錢開銷。

個別細股會有自己的炒作計劃，通常係一些剛賣盤的新鮮貨，新老闆要炒番一轉，就比較大動作，又改名，又轉行，搞完炒到好高，總之動作多多。但市場上更多是一大堆半生不死的舊炒股，佢地通常都炒完高位派哂貨，跌到一個地底泥價錢，有些還在一轉、兩轉地供股收貨，也有一些已收夠貨，貨源已歸番邊，等候時機當無事再炒過。

炒細價股的時機，不能太差，也不能太好。股市氣氛太差，炒高都無人夠膽跟，炒來都無用。股市氣氛太好，巨股升得太勁，佢地啲窩輪幾十巴仙咁升，亦無散戶有興趣炒細股，去年８月後就係咁o既環境，傳出港股直通車的消息後，紅色巨股炒個不亦樂乎，亦無人有興趣炒細股，所以去年下半年細股完全無得炒。以如今的市況論，略嫌氣氛太差，不過是否無得炒，就要莊家自己先至知，佢地掃高股價後，好易睇到有無人跟，如果炒極都唔係有好多街外散戶跟，就知道氣候未到，炒來也無用。如何判斷市況，如何估計散戶的熱情，莊家自有睇市的專業知識。

前兩日由宏通暴升帶動細價股炒一炒的氣氛，情況可能係咁，又用夢想號巴士的例子來解釋一下，過去幾十架夢想號巴士都泊埋一邊，因為市面淡靜，細路仔都唔多一個，所以開巴士來都無用，不過突然有架巴士開車，仲大大聲叫細路上車，又唔知點解忽然湧出一班細路來搭車，其他巴士見人地咁好生意，心諗其實市況唔係想像咁差，於是亦唔執輸，也開架車試吓。

你問呢次架車幾時停，我答唔到你，除咗架架巴士都屬唔同公司有唔同開車手法之外，也要睇大圍氣氛如何，假如巴士打幾個圈都上唔到一兩個客，大圍氣氛好弱，巴士司機會覺得開車都無用，咁好快就會停車，唔係玩得好耐。

呢件事情相當吊詭，你以為關鍵時巴士司機點諗，想問佢幾時想停車，其實主角係你自己及一眾細路，停車與開車，主要睇細路多唔多，主要睇細路夠唔夠傻。你要有心理準備，若細路唔夠，每分鐘都可能會停車。

假設架車無停，你下一個問題係架巴士會開幾耐先至拐細路去賣？我亦都話同細路多少及大圍氣氛有關。市場靜的時候，開幾個站接到三幾個細路都收工啦，送去劏咗就算，就好似０５、０６年時，細股炒高幾成，就已經派貨派唔切，唔會炒得太顛去得太盡，司機怕開得太遠，好多細路叻到玩完就落車，去到尾站得番小貓三兩隻，佢就殺埋細路都唔夠找油錢條數；但去年頭炒到顛時，細價股炒高１０倍、８倍亦比比皆是。點解去年頭炒得咁勁，因為大市開始熱度高，細價股就搶先炒，正如有架夢想號巴士愈開上客愈多，唔止吸引到本地細路，亦有好多大陸細路過關來香港搭車，而且大陸細路更大膽，有得玩遠一遠都跟你去，死都唔落車，架夢想號巴士自然有咁遠開咁遠，盡量殺多啲客仔啦。

　　你睇得呢啲夢想號巴士多，你會好化，太陽之下無新事，但天真的小朋友卻源源不絕，一批被人拐走，又有另一批湧出來，都幾妙。坐幾個站識落車的細路，其實唔係咁多，否則呢啲夢想號巴士就唔會開到成行成市，而家高通脹，成本咁高，若然無辦法拐走大量細路，你估佢又會唔會開車俾你白玩呢？

陸羽仁
http://www.hkheadline.com/blog/r ... rd=&searchtype=

Mr.Business

2008/2/25 上午 10:55:14

陸羽仁覆網友

Ray:地產股主要睇大市，若大市近期指結算再插，有機會再跌１０％左右。

Flyinthesky:期指的問題是大戶是否想平倉，若果轉倉，在結算時不用太大力做工夫，但例如有淡倉想平倉，就會大力推低，若有好倉想平倉，就會大力推高。所以你問會否「低位結算」，我就問是否有無人想推低平淡倉。

小豬貓：想買大新最好等埋業績，裕元是工業股，最近受一眾不利廠商的政策及新聞影響，弱勢，買入要捱長啲。

YY太：東寧當年輸死人，佢同明珠係難兄難弟，四流貨炒到變上菜，從股價睇就知係純炒，如果當年識得你，一定叫你止蝕。

新丁：你有筆錢投資又要進取又要穩健，唔識答你，首先要問你主要想點？

Philip:２０００萬流動大陸資本放香港，好難做人民幣對沖。

Muse:有中信銀行換馬，國航、中移動和國壽都OK，看你喜歡那個行業。

Piker:分注入，入完第一注，即升１０％，要看你點分析後市，若認為轉勢，可追，若不確定，可堅持等。

Yuki:中投買日股，問題是日本經濟是否確認轉勢，日圓咁強，以出口為主導的日本經濟係唔係咁好，唔知，但日股都幾落後，相信有少少資金會避入日本炒一炒。

周三派糖，層面廣泛，唔可以話對那個行業特有利（相信紅酒業免哂稅最受惠，可惜無紅酒股），但對整個本地經濟有利作用，對樓市中線利好。

新股中鐵建可認購，但太大孖展去認有風險。

Bdroom:你問細價價可否長揸，如果係炒股，長揸死梗。有好多正經做生意的細股都好便宜，但無人炒，會好悶。

Any:華能、國航及中海油的基本因素唔覺有大變，或如華能，煤價升電價不能升的惡劣局面，已反映了大部份，主要是市場氣氛問題。

Mr.Business

注：此篇文章版权归香港頭條網所有。

金融High Tea——大行善變 玩死老散
2008年2月25日

上周五美股都夠戲劇性，本來成日都跌，但在最後30分鐘突然抽番高，皆因市場傳聞債券保險公司Ambac Financial Group Inc.會有人拯救，搞到金融股帶頭急抽，杜指最後升96點，升至12,381點，這一種收市前抽高的市況，好可能都係人為玩№的結果，等到尾市才傳出好消息，少少成本就扯高個市，跟住今日又可以在亞洲炒番半日。

近日港股死纒死纒，成交量大減，以靠大市成交搵銀的港交所（388）[股價及相關新聞] 自然大受打擊，上周五跌到146.9元收市，再跌4%以上，開始跌低過港府去年公佈入市時的154.44元，跌到港府入市價之下，自然惹人注目。

表面看港府買的港交所開始要輸錢，不過港府是分段買入，買到超過5%才公佈，公佈時港交所造154元，不等於港府入市平均價係154元，由於港府早段入了平貨，拉勻成本會低鱓，但點講都好，港交所再跌，港府慢慢都會入肉。

上周五港交所再急挫的元兇之一，美資大行高盛把港交所目標價由300元大幅調低到147元，降幅高達51%，把評級降為「中性」，咁仲唔止，高盛還要建議要等到109元才好入市。「金人」（高盛的英文名）把港交所入市價定到咁低，嚇到散戶都唔敢依家買。

「金人」出手 目標削半

歐資大行瑞銀都降低了港交所的目標價，但係就無「金人」咁誇張，瑞銀將港交所原目標價240元，降到194元，下調幅度19%，但仍維持「買入」評級。

港交所股價由去年9月7日市場知道政府入市起步，由當日收市的158元，升到11月5日的高位268.8元，如今已從高位跌了121.9元，跌了 45.3%，如今在大行唱淡下仍然有跌唔停之勢，港股雖然未有股災，但買了港交所的股民都等如經歷了股災，如果你在高位做了隻Accumulator（累積投資票據），和港交所掛鹇，以85折接貨計，接貨價220幾元，比現價高35%以上，日日要接貨，咁接法會輸到喊，難怪有人話做了這些「I kill you later」，依家接貨接到差唔多破產，要賣樓填數。

有時睇大行的報告，又真係覺得好兒戲，唔係話港交所唔會跌到109元，而係話半年前仲睇緊300元，點解咁快就可以調低目標價一半以上，仲要在當日目標價低64％的109元才可以買入，若果今日係飱，當日係唔係睇錯市呢？

高盛調低港交所目標價的原因，主要是估計港股成交量會萎縮，認為內地高通脹帶來宏觀調控，美國次按危機和經濟衰退，皆可能打擊市場氣氛和成交量，亦減少公司融資活動，從而削弱港交所的估值。高盛估計港交所今年日平均成交1000億元，將盈利預測調低四分之一，以23倍市盈率推算，計出147元的目標價（見附表）。

高盛本來係港交所好友，去年10月證券界爭相調高港交所盈利時，高盛也不甘後人，將港交所目標價由213元調高至280元。當時高盛預估港股08年每日成交會增至1,450億元，所以調高港交所目標價。其後再將目標價進一步調高到300元。

見好睇好 見淡唱淡

唔好話港交所目標價係300元，即使係280元，到底要有幾多基本因素支持，都唔係講得幾清，因為以日均成交1450億計，以高盛今日估計成交與股價關係的推算，都推唔出280元咁高價，因為現時佢認為港股每日成交有1400億元，再加26倍市盈率，港交所都只係值206元。我未能找出金人當日的報告，未明點解當時計估計1450億的成交量就可以估出280元的目標價，目前1400億的成交量只可以估出206元的目標價。

如果今日的目標價係飱，咁去年的目標價300元又係唔係頭腦發熱呢？如今金人提出大幅調低港股交所目標價的理由，例如內地高通脹會帶來宏觀調控，美國次按危機可能帶來經濟衰退等等，並不是新鮮事物，去年估計港交所值300元時，這些風險因素已經存在，咁當時估到港交所值咁貴，又是否低估了這些因素的風險呢？又例如港股直通車仍未開行，當日又是否無計到有可能放慢直通車的風險呢？

陸羽仁並不是說證券行唔可調低股票目標價，而係若果無太戲劇性因素出現，就唔應該咁大幅變動股份目標價，假如美股發生大股災，杜指跌了3000點，證券行要大幅調低股票目標價，都合理少少，如今無發生太特別的事變，就把港交所目標價調低一半有多，似乎太善變了一點。反觀瑞銀調低港交所19%，並維持買入評級，就合理一點。

現時回想，去年政府入市買港交所股票，再加上大陸話要搞港股直通車，港交所股價急升，證券行鬥唱高港交所的目標價，其實無太堅實的理據，如果我懐唔假設證券行當時有刻意唱好的動機，就要承認他們起碼如散戶一樣，見市好就睇好，見市淡就睇淡，睇好時就鬥講得高目標價，睇淡時就鬥講得低目標價，頭腦不是過熱，就是過冷。

投機目標 不可盡信

或許你會問，港交所最高都去過268.8元，300元真是無機會達到嗎？這種問題混淆了股價的合理價值和炒作價位，證券行出報告推介一隻股票，定出目標價，應該是計好晒數，並計及其生意的風險因素，計出合理價值，才推算投資的目標價位。事後孔明去睇，港交所200元時，證券行話佢值300元，其實係估佢有機會炒到300元，你依賴這些數字去做長線投資，隨時中招。

有時大行報告的目標價，真係流流懐，唔叻得過散戶好多，因為散戶也是股市好時特別心雄，股市淡時特別膽怯，估唔到證券行報告有咁多數據，都唔係高得過散戶好多，大行對股票的評級，隨覑市道而急變，不可盡信。

若你當日信鰦大行對港交所的300元目標價深信不疑，狂買港交所窩輪和買和它掛鹇的Accumulator（累積持貨票據），如今輸到嘔泡，真係喊都無謂。經一事長一智，如今大行估港交所估得咁淡，亦都唔可信到十足十，要自己獨立思考。

金融機構在旺市出完Accumulator，在淡市又出Decumulator（累積沽貨票據），玩法是和Accumulator相反， Accumulator是有折扣累積獱貨，Decumulator是有溢價畀你累積沽貨，投資者買入後可以用一個比現有溢價的高位沽貨，例如有15％溢價畀你沽貨，但正股跌5%你就會被踢走，但若正股急升，投資者就要以定價不斷估貨，不斷輸錢。陸羽仁奉勸各位輸過Accumulator的朋友，就唔好再掂 Decumulator，因為買了這種產品，在跌市中好過癮，天天畀你高價沽貨賺錢，但若大市「不幸」急升，例如你聽了大行預測，極度睇淡港交所，做港交所的Decumulator，行使價係160元，若港交所反向抽上，升番上200元樓上，你一樣輸到喊，但若港交所再跌，你又好易被人踢走，同 Accumulator一樣，贏就贏有限，輸就輸無限。

陸羽仁唔係估港交所一定唔會再跌，咁鮋走勢短期好似仲會跌多鱓，但隨覑隻股一路向下，價位愈來愈低，做淡的風險亦慢慢增加也。你等到109元先買無所謂，買唔到唔使死，但去沽佢就高風險也。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

導遊         

2008/2/25 上午 10:06:51
網誌分類: 經濟

講開細價股炒作，網友們就講到股評人作為導遊領隊的問題，阿Sam的評論都幾值得深思。

阿Sam話，「我又舉一個例,引用陸sir的(夢想號巴士),分析員可作為導遊領隊,帶領小朋友上巴士遊玩.在眾多的導遊領隊中,總有一些好的導遊領隊能帶小朋友到總站迪士尼樂園、海洋公園遊玩.問題就是出在這裡.小朋友是天真的,咁好玩必引來另一大群好傻的小朋友上真正的夢想號巴士總站遊覽.既然總站已到達,理應勸他們下車,無謂再冒超高風險,帶他們上月球,火星.結果月球火星就去唔到. 一大群小朋友就送到維修廠房,眼光光看著巴士維修,進退不得。」

阿Sam呢個例子係講碧桂園（２００７），講導遊之前不妨講吓隻股票，碧桂園上市時只有０６年業績，純利１５．２億元人民幣（下同），若果這間公司未來維持一個溫利增長的業績，即使以２０倍市盈率計，市值也只值３００億，但碧桂園去年９月股價高峰期時市值超過２０００億，製造了一個神話。

碧桂園在去年９月公布中期業績，把公司的股價推上高峰，碧桂園０７年上半年實現銷售收入60.3億元，較去年同期增長48%﹔純利達14.2億元，同比大漲164.3%，淨利潤率為23.6%。內地傳媒將碧桂園和大陸地產股王萬科比較，去年上半年同期萬科銷售收入為110.1億元，較06年增長66.4%﹔純利為16.7億元，同比增長31.3%，淨利潤率約為15.2%。從銷售收入計，萬科仍比碧桂園大得多，但去年上半年萬科只比碧桂園賺多2.5億，顯示碧桂園的利錢深很多。

碧桂園公布的０７年上半年業績，已近０６年全年盈利，令人相信其０７年全年盈利將比上年倍增，股價一路急抽，當時有內地傳媒這樣形容，「截至9月4日收盤，碧桂園的市值約為2094億元，萬科的總市值約為2237億元。碧桂園在上市僅4個多月后，與行業標桿企業的差距進一步縮小了。」

我們看碧桂園這樣在四線縣城賣平價樓的公司，股價竟然追得上大陸龍頭地產公司萬科，覺得很不合理，但碧桂園當時既銷概念，又有炒供求的味道，它賣的營運概念是「低價快速銷售」，和萬科這種成熟地產公司的運作模式很不一樣，而碧桂園公布出巨額的中期盈利，令人相信這是大陸地產業高增長的模式。再者，碧桂園上市後，貨源比較集中，要炒起亦相當容易。

但你睇碧桂園股價，在９月２１日創了１４．１８元後，已開始回軟，到１０月底股市高峰，都上唔番高峰，最高上到１１月１日的１３．３２元，都破唔到高位。

如果講「導遊」的問題，見到隻股有得炒，叫人炒吓，本來無所謂，亦好難話到站就叫你落車，架夢想號巴士到咗海洋公園，都可能再去迪士尼，如果在很開心時叫人落車，但到架巴士司機變臉後，你就真係要提醒啲細路要執生。論股價走勢，碧桂園在１１月初後急回，弱勢已成，要斬。其次大陸對地產宏調，特別針對搶了好多土儲的地產公司，碧桂園首當其衝，導遊見到唔對路，都要話一話俾班搭車的細路聽。陸羽仁記得去年底叫人唔好掂大陸地產股，後來這批股反彈（碧桂園彈番上１０元樓上），我仲俾人鬧，覺得我唱衰佢地，但我當時諗，見到有危機，好醜都要提醒一下。

陸羽仁

http://www.hkheadline.com/blog/r ... rd=&searchtype=

Mr.Business

2008/2/26 上午 11:30:08

陸羽仁覆網友

Ray:你問點解少咗人講日圓套息交易風險，一則在日圓一浪浪上升後，做套息交易的對沖基金減了倉，二則危機是相對的，次按愈爆愈大，就覺得套息交易係碎碎地的料了。

你問港股會否三角型向下，三角型代表波幅收窄，但我覺得三、四月波幅可能大番，先看３月大陸開人大政協及美國減息有無刺激向上炒下，若炒唔起，就要小心四月尾、五月初美國金融業公布第一季業績，有再插風險。

李鴻亨：藥股本來有前景，但香港上市的無乜好猛的藥股。你問那幾隻雖然有些實業，但似炒股多啲。子公司通常由母公司分拆出來，不能一概而論那一種好啲，要看市場愛炒那一種多啲，如炒正子公司業務，子公司就炒，反之亦然。

自資之明：買咗國浩和太古A大出血，本來國浩和太古都唔係勁炒股，但大市唔就，佢地都回落不少，太古有在大波幅區波動，有少少穿底Feel，相信是受累於個仔國泰，因為太古香港出租為主，受惠於租金上升。短期兩隻股或會再跌，但不致於太危險。

Mkm:偉易達插到近低價，除了大陸政策對廠股不利之外，通脹亦令成本急升，而美國市場又有衰退之險，一升一跌，恐怕會大量侵蝕盈利，若要買，要預咗佢再跌，要守較長時間。

Bdroom:８３元入的太古可以揸長啲。

Yuki:宏華在鑽油井生產業位置不錯，但不要期望這類股份有太大驚喜（除非被人圍了貨來炒），可以抽吓，無需太博。

國泰試低位，不止油價，最大問題是如果美國衰退，會影響國泰的貨運生意，再加一樣，如果三月馬英九當選台灣的總統，兩岸通航，國泰的台灣線生意會大受影響。估計有基金暗暗減持，所以股價多重受壓。

鳯陽花鼓：中鐵建可以申請。

Benno:美國民主黨上台，都無乜新招可以短期大力救市，因為民主黨傾向減軍費，加稅，減開支，平衡預算，強美元，有利長線經濟，但對短線幫助不大。

朋友想買美國樓，估計仲要跌多一年，可以建議佢在下半年跌得深啲時，出吓低價去買，等沽家插你個低價。

白穗禮：周融反擊，觀點正確到極，但身份有少少不宜，想出來做官，就開始要學唔好講自己認為係啱o既話啦。

Lavenden:９．３３元入了中材，想轉中鐵或新上市的中鐵建，中材和中鐵類近，都有炒味，但中鐵大好多，所以轉中鐵可能好過中材，另一隻近似的是中交建。至於中鐵建，若上市升得多，就唔好轉去買，小心接貴貨，升得少買啲無壞。

Clmama:你問港交所係唔係要１０９才好買。一年之前，我覺得港交所升過１００元，炒味開始強，投資味下降，現家都差唔多。不過從投機的我的角度，就懷疑港交所會唔會去到１０９元咁低，若一話有港股直通車，隨時又炒番上１８０元、２００元。

Philip等:低風險投資無７至８厘回報咁高。換人民幣主要博升值，有機有此回報，但有中度風險，主要係美元長線有可能強番啲。８５．５元入的國浩，３６．８元入的中信泰富，入價較低，有得守。

三心兩意：大戶淡倉應該都清了不少，似慢慢收貨多啲，但佢可以再插低啲來收，都玩死你。

[ 本帖最后由 Mr.Business 于 26-2-2008 02:10 PM 编辑 ]

Mr.Business

注：此篇文章版权归香港頭條網所有。

尋找好股 在於堅持
2008年2月26日

有朋友發了電郵給Victoria，大概內容說他是股場初哥，開始對股票產生濃厚興趣，目標是學習巴菲特或林森池等價值投資者。目前為止，他已閱讀了大量投資書籍，對財務分析有一定的知識，但他覺得市面上起碼有數千隻股票，不知道第一步應如何覑手去找出一隻被人忽略高增長或估值過低的股票。

多看不同財經專欄

股神巴菲特的名言：「若市場有效率，我們都是乞兒了。」毫無疑問，市場不是有效率的，但隨覑愈來愈多聰明人參與這個遊戲，股票價格反映公司資料及訊息的速度愈來愈快。所以，要尋找一隻被人忽略而又值得投資的股票，基本上是需要每天持續的研究。

我想每一個人研究的方法都各有不同，這視乎個人的知識、身處的行業或行業裏的位置。一般人最容易得到股票資訊的渠道便是報紙，基本上每份報紙的財經新聞都是一樣的，但財經專欄或股票分析卻存在差異。有人說過，如果你跟報紙建議去買股票都可以贏錢，那麼香港便沒有窮人。我是同意的，但不可以因此而抹煞了一些值得看的財經專欄或股票分析。

其實，只要你願意放一點時間去閱讀不同報紙的財經專欄，過一段時間後你便可以分得出哪些是值得看，那些是看不看都沒有所謂。講止賺、止蝕很容易，真正要做時卻困難十倍，所以Victoria會偏向喜歡看那些以炒賣為正職，講股為副業的人所寫的文章，因為他們才是真真正正的市場參與者。

網上資訊細節多

除了報紙，現在互聯網多了很多投資博客，他們都是投資者找股票的好地方。科技發達，現在投資網頁都會提供一些基本的免費服務，如每日的十大成交、十大升幅等等。投資者不妨利用這些網頁去留意一些無故大升或創新高的股票，兩種情況都是代表了有資金流入，而為甚麼有資金流入？有機會是此股的基本因素有所改變。再配合港交所網頁裏公司的年報，要尋找一隻值得投資的股票並不是一件十分困難的事。

尋找值得投資的股票的難處，不在於高深的知識，只在於努力不懈的堅持。尋找的過程中，雖然命中率不高，但一旦成功，那份滿足感及回報會令你覺得之前付出的一切都是值得的。

王雅媛（Victoria）

http://www.hkheadline.com/news/h ... mp;section_name=wnb

Mr.Business

注：此篇文章版权归香港頭條網所有。

金融High Tea——好夢由來最易醒
2008年2月26日

港股近日無厘精神，亞洲股市昨日表現不壞，但在內地股市再跌下，下午倒跌至23,165點，收報23,269點，跌35點；國企指數倒跌134點，報13,203點，大市成交只637億元。期指收報23,384，升7點，比現貨高水115點，成交85,167張。

內地A股差，滬綜指報收4192點，跌4%，深成指報收15486點，跌4.3%，兩市成交額共計1,382億人民幣，中資電信股雖然傳重組，但價照跌，傳重組方案「五合三」有份的聯通（762）[股價及相關新聞] 挫4.7%，網通（906）[股價及相關新聞] 跌0.4%，中電信（728）[股價及相關新聞] 倒跌1.2%。

上午港股上升，但近日備受沽壓的港交所（388）[股價及相關新聞] 已經唔靚仔，下午個市回軟兼無成交，大行唱淡言論愈聽愈得人驚，於是股價再跌4%收市，收報140.9元，呢個價雖然同大行建議目標價109元比，仲有 30元水位，但不足半年前，港交所最高去過268元，現在大跌126元，若果做一半孖展，現在都輸到清袋，莫講話買「窩輪」，好多人以為炒藍籌穩陣，但好似武俠小說話齋，最安全的地方就係最危險的地方，大家以為游泳池水淺，又有救生員睇實，游水一定安全，但每年都有泳客在泳池浸死，所以投資大忌，就係忽視風險，以為咁樣投資好安全，實際上安全到存錢入銀行，都有可能遇覑銀行執笠，更何況係其他方法？

藍籌一樣可以輸死人

中環茶友話，港交所跌得咁甘，好多人相信同衍生工具有關，其中特別係累股交易（accumulator），上年港交所股價係咁衝，由八月份大奇蹟日的 100元，升纒破150元，升纒破200元，當升破250元時，大行話睇300 元，有人發揮超前想像力，話計到遲早有可能升到500元，當時投資銀行打電話鈬，話有港交所的accumulator出，問個客做唔做，莫講話個「sell屎」點樣吹噓呢個工具可以日日買平股的優點，就算她叫個客諗清楚先決定，好多人都已經自動入疊啦，到今日港交所大跌，班客由日日買平貨變日日買貴貨，意志同財力差小小者，真係會人都癲！

港交所累街坊，茶友話，藍籌成為股民殺手，另一隻係礇控，而最多人死不是礇控由153元跌落鈬個纒，而係130元個纒，因為大笨象跌到去130元，好多人就走去買股票掛鹇票據同累股交易合約，結果入貨後三、兩下手勢，礇控（005）[股價及相關新聞] 股價插到104元，好多人嚇到跳車，但亦有人反手做淡，走去做累沽交易（decumulator），結果股跌被人摑一巴、股升又被人摑一巴。

發夢最怕係遲醒

本來，投資有賺有蝕，大家心甘命抵，但這些藍籌衍生工具賣出街，好多時包裝成低風險工具，最重要係發行機構監管非常寬鬆，令人想起美國的次按問題，一旦爆煲時有沒有足夠的預警及防禦機制呢？到時幾個相關團體又會不會玩搓波，無人肯承擔責任呢？

大藍籌股民輸到怕，所以最近股仔有番小小起色，昨日輪到中國鐵路貨運（8089）[股價及相關新聞] 升近4%，第一視頻（082）[股價及相關新聞] 漲近一成。

講開細價股炒作，陸羽仁在網誌講過一個夢想號巴士的例子，仲惹來好多網友討論，其中有網友提出熱炒內房股碧桂園，該股去年掛牌，去年9月股價高峰期時市值超過2000億，製造了一個神話，市值一度逼近新地，當時陸羽仁都講過話覺得好誇張，現在網友講起，當然無限唏噓，大家若有興趣，可以上網看看。

不過，陸羽仁要講的，是股市若果無憧憬，個市肯定無作為，所以任何股票，都係販賣夢想，正如其他人生夢想，十居其九都係成空居多，而且好夢由來最易醒，最緊要係夢醒之後，不要發覺自己係最遲起身鰟個，炒好似港交所的藍籌如是，炒雞股亦如是，尤其近日個市閃閃縮縮，大家投機股仔，絕對要記住無論賺蝕，最緊要走得快。

陸羽仁

http://www.hkheadline.com/news/h ... mp;section_name=wtt

Mr.Business

注：此篇文章版权归香港頭條網所有。

債保曙光         

2008/2/26 上午 09:46:17
網誌分類: 經濟

美股昨日出現本月以來最大的反彈，道指急升１８９點，升上１２５７０點的水平，升幅１．５％，主要受評級公司標準普爾宣布維持最大債券保險公司MBIA Inc 的 AAA評級。消息令 MBIA Inc股價大升２０％，亦令一眾金融股急抽。 MBIA Inc及第二大債保公司Ambac Financial Group Inc合共擔保１．２萬億美元的債券，若兩大債保公司被大降評級，佢地擔保的債券大跌價，美國金融隨時陷入融化性的崩潰，如今MBIA Inc保住評級，金融界就有抖一啖大氣的感覺，雖然未到脫險，但都可以鬆一鬆。

MBIA Inc要保住評級，背後當然做咗大量工夫，大家應該記得，早前我寫的「巴菲特盛宴」，就係講股神巴菲特提出要出資５０億美元，吃掉債保公司最安全的市政府債券生意，而股神對和次按有關的CDO債券保險業務卻無興趣，當時股神已經話有一間債保公司拒絕他的建議，現在看來，請股神食檸檬的好可能就是MBIA Inc，因為佢自己如今提出一個類似的重組建議。

MBIA提出一籃子的方案，包括停止派息，並決定在未來六個月不再擔保那些備受質疑的資產扺押證券，又計劃在未來五年內將這些有問題的業務和穩健的市政府債券業務分離，MBIA的行政總裁Jay Brown又話，他對早前已公布的帳目有些問題，暗示資產的貼現價值估得過低。佢又話他們正在盡全力恢復公司的穩定，但估計未來一段日子仍會波動。

MBIA這一輪搞作，事先自然和評級機構標準普爾有緊密溝通，所以標普亦宣布不再檢討MBIA的AAA評級，但維持它在「負面觀察」，「不再檢討」意味著短期內標普無意降低 MBIA的評級，「維持負面觀察」意味著將來若再有檢討，郁動評級都是向下而非向上。標普又話第二大債保商Ambac Financial正在研究集資，所以會俾多點時間它避免降級。

兩大債保商仍未脫險，但獲得寶貴的抖氣機會，作出部署避免降級。有金融猛人對陸羽仁講，英國都將北石銀行國有化，但美國卻任由債保公司危機坐大，按理早早應該由國家負擔債保公司條數，就可以防止危機擴大，但執政共和黨內有核心人物極反對企業失敗由政府填數，所以政府遲遲不想行動，才拖出現在的危機，希望債保公司的集資自救及自我拆骨行動，可以重建市場信心。

美股大升，日股早段反應溫和，只升５０幾點，升幅０．４％，但大家唔好忘記，日股昨日升了４００幾點，所以今日唔升太多亦唔奇。港股昨日人升佢唔升，十分樣衰，其中一個原因是受大陸股市大跌影響，A股怕企業大集資，昨日大跌４％，但管理層出口術反對企業集資集得太狼，上海A股今日早段反彈２％。外圍氣氛改善，照計港股都會彈一彈。

陸羽仁

http://www.hkheadline.com/blog/r ... rd=&searchtype=